א. א למנצח על-הגתית לבני-קרח מזמור
ב. ב מה-ידידות משכנותיך-- יהוה צבאות
ג. ג נכספה וגם-כלתה נפשי-- לחצרות יהוה לבי ובשרי-- ירננו אל אל-חי
ד. ד גם-צפור מצאה בית ודרור קן לה-- אשר-שתה אפרחיה את-מזבחותיך יהוה צבאות-- מלכי ואלהי
ה. ה אשרי יושבי ביתך-- עוד יהללוך סלה
ו. ו אשרי אדם עוז-לו בך מסלות בלבבם
ז. ז עברי בעמק הבכא-- מעין ישיתוהו גם-ברכות יעטה מורה
ח. ח ילכו מחיל אל-חיל יראה אל-אלהים בציון
ט. ט יהוה אלהים צבאות שמעה תפלתי האזינה אלהי יעקב סלה
י. י מגננו ראה אלהים והבט פני משיחך
יא. יא כי טוב-יום בחצריך מאלף בחרתי--הסתופף בבית אלהי מדור באהלי-רשע
יב. יב כי שמש ומגן-- יהוה אלהים חן וכבוד יתן יהוה לא ימנע-טוב להלכים בתמים [ (Psalms 84:13) יג יהוה צבאות-- אשרי אדם בטח בך ]