א. א אל-נקמות יהוה אל נקמות הופיע
ב. ב הנשא שפט הארץ השב גמול על-גאים
ג. ג עד-מתי רשעים יהוה עד-מתי רשעים יעלזו
ד. ד יביעו ידברו עתק יתאמרו כל-פעלי און
ה. ה עמך יהוה ידכאו ונחלתך יענו
ו. ו אלמנה וגר יהרגו ויתומים ירצחו
ז. ז ויאמרו לא יראה-יה ולא-יבין אלהי יעקב
ח. ח בינו בערים בעם וכסילים מתי תשכילו
ט. ט הנטע אזן הלא ישמע אם-יצר עין הלא יביט
י. י היסר גוים הלא יוכיח המלמד אדם דעת
יא. יא יהוה--ידע מחשבות אדם כי-המה הבל
יב. יב אשרי הגבר אשר-תיסרנו יה ומתורתך תלמדנו
יג. יג להשקיט לו מימי רע-- עד יכרה לרשע שחת
יד. יד כי לא-יטש יהוה עמו ונחלתו לא יעזב
טו. טו כי-עד-צדק ישוב משפט ואחריו כל-ישרי-לב
טז. טז מי-יקום לי עם-מרעים מי-יתיצב לי עם-פעלי און
יז. יז לולי יהוה עזרתה לי-- כמעט שכנה דומה נפשי
יח. יח אם-אמרתי מטה רגלי חסדך יהוה יסעדני
יט. יט ברב שרעפי בקרבי-- תנחומיך ישעשעו נפשי
כ. כ היחברך כסא הוות יצר עמל עלי-חק
כא. כא יגודו על-נפש צדיק ודם נקי ירשיעו
כב. כב ויהי יהוה לי למשגב ואלהי לצור מחסי
כג. כג וישב עליהם את אונם-- וברעתם יצמיתם יצמיתם יהוה אלהינו