א. א לכו נרננה ליהוה נריעה לצור ישענו
ב. ב נקדמה פניו בתודה בזמרות נריע לו
ג. ג כי אל גדול יהוה ומלך גדול על-כל-אלהים
ד. ד אשר בידו מחקרי-ארץ ותועפת הרים לו
ה. ה אשר-לו הים והוא עשהו ויבשת ידיו יצרו
ו. ו באו נשתחוה ונכרעה נברכה לפני-יהוה עשנו
ז. ז כי הוא אלהינו-- ואנחנו עם מרעיתו וצאן ידו היום אם-בקלו תשמעו
ח. ח אל-תקשו לבבכם כמריבה כיום מסה במדבר
ט. ט אשר נסוני אבותיכם בחנוני גם-ראו פעלי
י. י ארבעים שנה אקוט בדור-- ואמר עם תעי לבב הם והם לא-ידעו דרכי
יא. יא אשר-נשבעתי באפי אם-יבאון אל-מנוחתי