א. א שירו ליהוה שיר חדש שירו ליהוה כל-הארץ
ב. ב שירו ליהוה ברכו שמו בשרו מיום-ליום ישועתו
ג. ג ספרו בגוים כבודו בכל-העמים נפלאותיו
ד. ד כי גדול יהוה ומהלל מאד נורא הוא על-כל-אלהים
ה. ה כי כל-אלהי העמים אלילים ויהוה שמים עשה
ו. ו הוד-והדר לפניו עז ותפארת במקדשו
ז. ז הבו ליהוה משפחות עמים הבו ליהוה כבוד ועז
ח. ח הבו ליהוה כבוד שמו שאו-מנחה ובאו לחצרותיו
ט. ט השתחוו ליהוה בהדרת-קדש חילו מפניו כל-הארץ
י. י אמרו בגוים יהוה מלך-- אף-תכון תבל בל-תמוט ידין עמים במישרים
יא. יא ישמחו השמים ותגל הארץ ירעם הים ומלאו
יב. יב יעלז שדי וכל-אשר-בו אז ירננו כל-עצי-יער
יג. יג לפני יהוה כי בא-- כי בא לשפט הארץ ישפט-תבל בצדק ועמים באמונתו