א. א יהוה מלך תגל הארץ ישמחו איים רבים
ב. ב ענן וערפל סביביו צדק ומשפט מכון כסאו
ג. ג אש לפניו תלך ותלהט סביב צריו
ד. ד האירו ברקיו תבל ראתה ותחל הארץ
ה. ה הרים--כדונג נמסו מלפני יהוה מלפני אדון כל-הארץ
ו. ו הגידו השמים צדקו וראו כל-העמים כבודו
ז. ז יבשו כל-עבדי פסל-- המתהללים באלילים השתחוו-לו כל-אלהים
ח. ח שמעה ותשמח ציון ותגלנה בנות יהודה-- למען משפטיך יהוה
ט. ט כי-אתה יהוה עליון על-כל-הארץ מאד נעלית על-כל-אלהים
י. י אהבי יהוה שנאו-רע שמר נפשות חסידיו מיד רשעים יצילם
יא. יא אור זרע לצדיק ולישרי-לב שמחה
יב. יב שמחו צדיקים ביהוה והודו לזכר קדשו