א. א למנצח על-מות לבן מזמור לדוד
ב. ב אודה יהוה בכל-לבי אספרה כל-נפלאותיך
ג. ג אשמחה ואעלצה בך אזמרה שמך עליון
ד. ד בשוב-אויבי אחור יכשלו ויאבדו מפניך
ה. ה כי-עשית משפטי ודיני ישבת לכסא שופט צדק
ו. ו גערת גוים אבדת רשע שמם מחית לעולם ועד
ז. ז האויב תמו חרבות--לנצח וערים נתשת--אבד זכרם המה
ח. ח ויהוה לעולם ישב כונן למשפט כסאו
ט. ט והוא ישפט-תבל בצדק ידין לאמים במישרים
י. י ויהי יהוה משגב לדך משגב לעתות בצרה
יא. יא ויבטחו בך יודעי שמך כי לא-עזבת דרשיך יהוה
יב. יב זמרו--ליהוה ישב ציון הגידו בעמים עלילותיו
יג. יג כי-דרש דמים אותם זכר לא-שכח צעקת עניים (ענוים)
יד. יד חננני יהוה--ראה עניי משנאי מרוממי משערי מות
טו. טו למען אספרה כל-תהלתיך בשערי בת-ציון--אגילה בישועתך
טז. טז טבעו גוים בשחת עשו ברשת-זו טמנו נלכדה רגלם
יז. יז נודע יהוה--משפט עשה בפעל כפיו נוקש רשע הגיון סלה
יח. יח ישובו רשעים לשאולה כל-גוים שכחי אלהים
יט. יט כי לא לנצח ישכח אביון תקות ענוים (עניים) תאבד לעד
כ. כ קומה יהוה אל-יעז אנוש ישפטו גוים על-פניך [ (Psalms 9:21) כא שיתה יהוה מורה--להם ידעו גוים--אנוש המה סלה ]