1. Jo' chii cw'aa'ndyo' ja cantyja na mats'aaya ee ja jo̱m'aaⁿya cha'xjeⁿ na tyoch'ee Cristo. Luaa c'om yolcu quia cwitjomndye nn'aⁿ
2. Matseit'maaⁿ'ndyo̱ ‘o na ñequii'cheⁿ cwijaañjoom' n'om'yo' ja ndo' cwilawe'yo' ñ'oom na jnda̱ tqua̱a̱ⁿya nda̱a̱'yo'
3. Sa̱a̱ l'ue ts'o̱o̱ⁿ na nla'no̱ⁿ'yo' na tseixmaⁿ Cristo xqueⁿ cwii cwii tsaⁿs'a ndo' juu tsaⁿs'a tseixmaaⁿ xqueⁿ scoom'm cha'xjeⁿ nquii Ty'o̱o̱ts'om tseixmaaⁿ xqueⁿ Cristo.
4. Jo' chii xeⁿ matiom tsaⁿs'a ‘naⁿ xqueⁿ quia matseineiⁿ nnoom oo quia mañequiaa ñ'oom'm, matseijnaaⁿ' tsaⁿ'ñeeⁿ Cristo na cwiluiiñe xqueeⁿ.
5. Sa̱a̱ xuii' cantyja ‘naaⁿ' cwii yuscu, xeⁿ ticata̱' xqueⁿ quia na matseineiⁿ nnom Ty'o̱o̱ts'om oo quia na mañequiaa ñ'oom'm matseijnaaⁿ'aⁿ saaⁿ'aⁿ. Xeⁿ na ljo' mach'eeⁿ matseijomna' cantyja ‘naaⁿ'aⁿ cha'cwijom na jnda̱ teinqui' caseii xqueeⁿ.
6. Ndo' xeⁿ tical'ue ts'om yuscu na ñjom ‘naⁿ xqueeⁿ, quia jo' cateinqui' xqueeⁿ. Sa̱a̱ nc'e na jeeⁿ t'maⁿ matseijnaaⁿ'na' jom na nno̱ⁿ soxqueeⁿ oo na nnteinqui' caseii, quia jo' cañjom ‘naⁿ xqueeⁿ.
7. Sa̱a̱ tsaⁿs'a je', ticaty'iomna' na ñjom ‘naⁿ xqueeⁿ ee jluii'ñe Ty'o̱o̱ts'om ndo' tqueeⁿ na cantyja ‘naaⁿ' juu na caluiit'maaⁿ'ñê sa̱a̱ wandyo̱o̱' cantyja ‘naaⁿ' tsaⁿscu ee tsaⁿs'a matseit'maaⁿ'ñena' cantyja ‘naaⁿ'aⁿ.
8. Ee quia na s'aa Ty'o̱o̱ts'om tsaⁿs'a, nchii teil'uee'ñê tsaⁿscu na tuii na ljo', teil'uee'ñê tsaⁿs'a na s'aaⁿ tsaⁿscu.
9. Meiⁿ nchii na s'aaⁿ tsaⁿs'a cha cateijndeiina' tsaⁿscu, s'aaⁿ tsaⁿscu cha cateijndeiina' tsaⁿs'a.
10. Manc'e na luaa' waa ndo' nc'e na cwiqueⁿ ángeles cwenta, jo' chii matsona' na cañjom ‘naⁿ xqueⁿ yuscu cha m'mo̱ⁿna' na maju'ñecjeeⁿ nnom saaⁿ'aⁿ.
11. Sa̱a̱ cantyja ‘naaⁿ jaa nn'aⁿ na cwila'yu', waa naya ‘naaⁿ' tsaⁿs'a nc'e tsaⁿscu, ndo' mati waa naya ‘naaⁿ' tsaⁿscu nc'e tsaⁿs'a.
12. Ee meiiⁿ na mayuu' najndyee s'aa Ty'o̱o̱ts'om tsaⁿscu ee tsaⁿs'a, sa̱a̱ mati na mayuu' na m'aaⁿ tsaⁿs'a ee tsaⁿscu, ndo' cha'tsoñ'eⁿ cwinaⁿ na m'aaⁿ Ty'o̱o̱ts'om.
13. C'oom'ya n'om'yo', ¿aa ndya' maty'iomyana' na ticañjom ‘naⁿ xqueⁿ yuscu na nntseineiⁿ nnom Ty'o̱o̱ts'om?
14. Mati ma'mo̱ⁿyana' nda̱a̱ya na matseijnaaⁿ'na' tsaⁿs'a quia na teincoo sooxqueeⁿ,
15. sa̱a̱ matseit'maaⁿ'ñena' yuscu quia na cwiwiteincoo soxqueeⁿ, ee joona' tseixmaⁿna' cwii na matseicu'na' xqueeⁿ.
16. Sa̱a̱ xeⁿ m'aaⁿ ts'aⁿ na ticjaawee' ts'om ñ'oomwaa', macaⁿna' na catsei'no̱o̱ⁿ'o̱ⁿ na meiⁿ jâ meiⁿ nn'aⁿ cwii cwii tmaaⁿ' na macwji' Ty'o̱o̱ts'om cwentaaⁿ'aⁿ, tjaa'naⁿ cwicheⁿ nnom na cwil'aaya. Tixcwe cwil'ana quia cwicwa'na Cena na tqueⁿ Jesucristo
17. Ñ'oom na matseiljeitya̱ nda̱a̱'yo' leicanda̱a̱ nntsjo̱o̱ na ya cwil'a'yo' ee mach'eena' quia cwitjomndyo' juu na cwil'a'yo' matseilcwe'na' ‘o nchii na mateijndeiina' ‘o.
18. Ee najndyee jnda̱ mandiiya quia cwitjomndyo' na nla't'maaⁿ'ndyo' Ty'o̱o̱ts'om, titjoom' m'aⁿ'yo', ndo' m'aaⁿ' ts'o̱o̱ⁿ na ljo'.
19. Ee maxjeⁿ nleitquioo'yuu na titjoom' m'aⁿ'yo' cha m'mo̱ⁿna' ‘ñeeⁿ joo quii'ntaaⁿ'yo' m'aⁿna na xcwee' n'omna jo nnom Ty'o̱o̱ts'om.
20. Ndo' nc'e na titjoom' m'aⁿ'yo', jo' chii juu na cwicwa'yo', tiyuu' na tseixmaⁿna' nquii Cena na seijndaa'ñe Ta Jesús.
21. Ee quia cwicwa'yo' cwii cwiindyo' matseityuaa'ti na nlcwa' na jndyoñ'oom, meiⁿ tinquiaaⁿ na nntseijomñe cwiicheⁿ x'iaaⁿ'aⁿ na matseiyu', ndo' na ljo' nt'om joona ma'ndiina' na ñe'jndo' ndo' nt'om jnda̱ jndyee.
22. ¿Chiuu ‘o? ¿Aa maxjeⁿ tjaa'naⁿ l'a'yo' yuu na nleiñ'oom' na nlcwa'yo' ndo' na nncwe'yo'? ¿Aa maxjeⁿ ticuee' n'om'yo' nc'iaa'yo' na mati cwiluiindye tmaaⁿ' cwentaa' Ty'o̱o̱ts'om? Ee na laa'ti' na cwil'a'yo' cwila'jnaⁿ'yo' joo nc'iaa'yo' na wanty'iaa m'aⁿ. ¿Aa cwila'tiuu'yo' na jeeⁿ xcwe na cwil'a'yo'? Leicanda̱a̱ nntsjo̱o̱ na ljo'. Cantyja na seijndaa'ñe Jesucristo na cuaa Cena
23. Ee nnom Ta Jesús to'ño̱ⁿya ñ'oom na t'mo̱o̱ⁿya nda̱a̱'yo', na mañejuu teijaaⁿ na seiquioo Judas jom luee nn'aⁿ, to'ñoom tyoo'
24. ndo' jnda̱ na tquiaaⁿ na quianl'uaa' Ty'o̱o̱ts'om cantyja ‘naaⁿ'na', tyjeeⁿ juuna'. Tsoom: “Cato'ñoom'yo' tyoo'waa, cwa'yo' juuna'. Seii'a cwiluiiñena'. Mañequiaandyo̱ na nnc'io̱ cha nncwañoom'na' ‘o. Ñequii'cheⁿ na luaa' nntsal'a'yo' cha cat'mo̱ⁿ'yo' na cwicañjom n'om'yo' ja.”
25. Ndo' mati jnda̱ na tcwa'na, to'ñoom waso, tsoom: “Juu wasowaañe tseixmaⁿna' ñ'oomxco na maqua̱ⁿya ñequio nioom'a. Cwii cwii ndii' na cwiwe'yo' juuna', cjaañjoom'tyeⁿ n'om'yo' ja.”
26. Jo' chii ticwii cwii ndii' na cwicwa'yo' tyoo'waa ndo' na cwiwe'yo' na ñjom wasowaa, cwitsatjei'yuu'ndyo' nda̱a̱ nn'aⁿ cantyja na tue' Ta Jesús, hasta quia na nndyonnaaⁿ'aⁿ. Nchii cwe' nntseijomñeto ts'aⁿ quia cwicwa' nn'aⁿ Cena
27. Jo' chii meiⁿquia ts'aⁿ na macwaaⁿ'aⁿ tyoo'waa oo ma'om na ñjom wasowaa na tic'oom'ya ts'oom na jnda tseixmaⁿna', waa jnaaⁿ'aⁿ nacjoo' seii' ndo' nioom' Ta Jesús.
28. Nc'e na ljo', matsona' na cwii cwii ts'aⁿ cwitjo̱o̱cheⁿ na nlcwaaⁿ'aⁿ tyoo'ñeeⁿ ndo' na nnc'om na ñjom waso'ñeeⁿ, c'oom'ya ts'oom na aa tjaa'naⁿ cwii nnom cantyja ‘naaⁿ'aⁿ na matseicu'na' na nntseijomñê juu jo'.
29. Ee ts'aⁿ na cwe' macwa'to ndo' cwe' ma'uuto meiⁿ ticwjaa'ñê cwenta na la'xmaⁿna' seii' Ta Jesús, juu na macwaaⁿ'aⁿ ndo' ma'om, matseijndaa'ñena' na waa jnaaⁿ'aⁿ cantyja ‘naaⁿ'na'.
30. Macwe' jnaaⁿ' na nmeiiⁿ' cwil'a'yo', jo' chii majndyendyo' ‘o wii'yo' ndo' tijnda̱'yo', hasta nt'om nc'iaa'yo' jnda̱ tja̱.
31. Sa̱a̱ xeⁿ ñequii'cheⁿ na cwiqua̱a̱ⁿyaaya cwenta aa cwil'aaya yuu na maty'iomyana', quia jo' tixocaⁿna' na nnts'aa Ta Jesús xjeⁿ jaa,
32. ee quia mañequiaa Ta Jesús jaa, luaa' mach'eeⁿ cha ntsaala'no̱o̱ⁿ'a ndo' cha ticaⁿna' na nnt'ueeⁿ jaa cha'xjeⁿ nnt'ueeⁿ nn'aⁿ na la'xmaⁿ cantyja ‘naaⁿ' tsjoomnancue.
33. Jo' chii ‘o nn'aⁿya na cwila'yu'yo', quia cwitjomndyo' na nlajomndyo' na nlcwa'yo' ndo' nncwe'yo' na cwicañjom n'om'yo' na tue' Ta Jesús, cwindo'yo' cwii ndo' cwii x'iaa'yo'.
34. Ndo' xeⁿ m'aaⁿ cwiindyo' ‘o na ñe'jndo' cwa'jñeeⁿ na waa waⁿ'aⁿ cha' ticaⁿna' na nnt'uii Ty'o̱o̱ts'om jom na matseijomñê quia cwilajomndyo' Cena. Nt'omcheⁿ ñ'oom na cwita'x'ee'yo' no̱o̱ⁿ, cua̱jndya̱a̱ na m'aⁿ'yo' quia jo' nntseijndaa'ndyo̱ joona'.
| 
