1. Xeⁿ nnda̱a̱ nntseina̱ⁿya nt'omcheⁿ nnom ñ'oom na cwila'neiⁿ nn'aⁿ, meiiⁿ ñ'oom na cwila'neiⁿ ángeles, sa̱a̱ tic'o̱o̱ⁿ na wi' ts'o̱o̱ⁿya nn'aⁿ, matseijomna' cantyja ‘naⁿya cha'cwijom na c'uaa tsom' na cwitjo̱' oo cha'cwijom ncjo cañjeeⁿ na cantseiiⁿ jndyeena'.
2. Ndo' xeⁿ nnda̱a̱ nntseina̱ⁿ ñ'oom na ma'mo̱ⁿ Ty'o̱o̱ts'om no̱o̱ⁿ ndo' matsei'no̱ⁿ'a cha'tso na wanty'iuu' na matseijndaa'ñê na mandiñ'eeⁿ cha'tso na matsei'no̱ⁿ'a, hasta nnda̱a̱ nquindyo̱o̱ ntsjo̱ nc'e na matseiyu'ya ts'o̱o̱ⁿ, sa̱a̱ xeⁿ tic'o̱o̱ⁿya nawi' ts'o̱o̱ⁿya nn'aⁿ, meiⁿchjoo tjayuu l'uendyo̱.
3. Ndo' xeⁿ cha'tso na maleiñ'o̱ⁿ mañequia nda̱a̱ ndyeñeeⁿ' ndo' meiiⁿ mañequiandyo̱ na nla'cuee' nn'aⁿ ja ñequio chom, sa̱a̱ xeⁿ tic'o̱o̱ⁿ na wi' ts'o̱o̱ⁿ nn'aⁿ, tjaa yuu l'uendyo̱.
4. Juu ts'aⁿ na jnda ntyjii nn'aⁿ, ticatiom ts'om ñ'eⁿ naⁿ'ñeeⁿ, mal'ueeⁿ chiuu nnteijneiⁿ nn'aⁿ, tita̱a̱' ts'oom, titseis'añê titseiscuñê cantyja ‘naaⁿ'aⁿ,
5. tintjeiⁿñe ñ'eⁿ nc'iaa', nchii ñequii'cheⁿ na m'aaⁿ' ts'om cantyja ‘naaⁿ' nquii, nchii ntyja ntyja matseiw'ii.
6. Juu na cwil'a nn'aⁿ na cwila'tjo̱o̱ndyena, tineiiⁿ'eⁿ, sa̱a̱ quia na majo'ndyo cwil'a nn'aⁿ, m'aaⁿ na neiiⁿ'eⁿ.
7. Ts'aⁿ na jnda ntyjii x'iaa' matseiquii ts'oom cha'tso na matjoom, ñequio na macantyjaa' ts'oom ndo' ñequio na ticatiom ts'oom cantyja ‘naaⁿ joona'.
8. Juu na m'aaⁿ ts'aⁿ na wi' ts'om x'iaa' tijoom cantycwiina'. Nncue'ntyjo̱ xjeⁿ na tixocala'neiⁿ nn'aⁿ ñ'oom cantyja ‘naaⁿ ‘naⁿ na quia nluii, meiⁿ xocala'neiⁿna ñ'oom na tjachuii', meiⁿ xocaⁿna' ñ'oom na jndo̱' n'om nn'aⁿ.
9. Ee ticanda̱a̱'ñ'eⁿ cwila'no̱o̱ⁿ'â ndo' mati quia nla'no̱o̱ⁿñ'a̱a̱yâ ñ'oom'm na cwiñequiaayâ,
10. sa̱a̱ quia nncwjee' juu na canda̱a̱'ñ'eⁿ quia jo' n'ndiina' nmeiⁿ' na ticanda̱a̱' la'xmaⁿ.
11. Quia ñet'o̱o̱ⁿ na tyochjoo ja, tyotseina̱ⁿya, tyotseitiuuya ndo' ñet'oom' ts'o̱o̱ⁿ cha'xjeⁿ cwii yucachjoo, sa̱a̱ quia na tue'ntyjo̱ chuu'a ‘ndi na ñet'o̱o̱ⁿya cha'na joona.
12. Ndo' maluaa' waa na matseijomna' cantyja ‘naaⁿyâ, je' juu na cwila'no̱o̱ⁿ'â cantyja ‘naaⁿ' Ty'o̱o̱ts'om, matseijomna' juuna' cha'cwijom na manty'iaa' ts'aⁿ nnon tsjo̱'jñom na jnda̱ teitsa̱ nnomna'. Sa̱a̱ juu na canda̱a̱'ñ'eⁿ quia na jnda̱ tyjee'cañoom juuna' quia jo' canda̱a̱'ñ'eⁿ nntsei'no̱ⁿ'a. Je' cwe' xeⁿntaⁿ' xeⁿntaⁿ' matsei'no̱ⁿ'a sa̱a̱ quia ljo'cheⁿ nntsei'no̱ⁿ'tcuundyo̱ cha'xjeⁿ nquii Ty'o̱o̱ts'om canda̱a̱'ñ'eⁿ mawajnaⁿ'aⁿ ja.
13. Niom ndyee nnom na waa ndo' waana': na matseiyu'ya ts'om ts'aⁿ ñ'eⁿ Ty'o̱o̱ts'om, na macantyjaa' ts'om ts'aⁿ ñ'eⁿ jom ndo' na m'aaⁿ na jeeⁿ candya' ts'oom jaa, sa̱a̱ t'maⁿti naquii' ntaaⁿ ndyee nmeiiⁿ', juu na m'aaⁿ na candya' ts'oom nn'aⁿ.
| 
