1. Cantyja ‘naⁿya, ‘o nn'aⁿya na cwila'yu'yo', tîcanda̱a̱ nntseina̱ⁿya ñ'oom cantyja ‘naaⁿ' Cristo nda̱a̱'yo' cha'xjeⁿ na ma'mo̱ⁿ ts'aⁿ juuna' nda̱a̱ nn'aⁿ na la'xmaⁿ Espíritu. Tcaⁿna' na nntseina̱ⁿya juuna' nda̱a̱'yo' na cha'cwijom cwiluiindyo' cantyja ‘naaⁿ' tsjoomnancue, cha'cwijom nda̱a̱ yonch'uu.
2. Ee yo'ndaa tileicanda̱a̱ nntquiina sei'. Joona macanda̱ ndaatsuu' tsondyeena cwiwena. Maluaa' matseijomna' cantyja ‘naⁿ' ‘o. ‘O tileicala'no̱ⁿ'yo' ñ'oom' Ty'o̱o̱ts'om na jndei'tina', ee tyooquiee n'om'yo' cantyja ‘naaⁿ'aⁿ. Ndo' meiⁿ je' tileicala'no̱ⁿ'yo' ñ'oom'm na jndei'tina'.
3. ‘O ndicwaⁿ la'xmaⁿ'yo' cantyja ‘naaⁿ' tsjoomnancue. Ee na cwila'ta̱a̱' n'om'yo' nc'iaa'yo' ndo' cwila'ntja'ndyo' ñ'eⁿndyena, ma'mo̱ⁿna' na tjaa na matseichuii'na' ‘o ñequio nn'aⁿ na la'xmaⁿ cantyja ‘naaⁿ'na'.
4. Ee quia cwiindyo' ‘o nntso: “Ja matseijomndyo̱ cantyja ‘naaⁿ' Pablo”, ndo' cwiicheⁿ nntso: “Ja matseijomndyo̱ cantyja ‘naaⁿ' Apolos”, ma'mo̱ⁿna' na la'xmaⁿ'yo' cha'xjeⁿ nn'aⁿ tsjoomnancue.
5. Ja Pablo ¿'ñeeⁿ cwiluiindyo̱? Ndo' ¿'ñeeⁿ cwiluiiñe Apolos? Ñequii'cheⁿ cwiluiindyô̱ nn'aⁿ na cwindya̱'ntjo̱o̱ⁿyâ nnom Jesucristo na cantyja ‘naaⁿyâ jla'yu'yo' ñ'eⁿñê. Cwii cwiindyô̱ ñel'aayâ ts'iaaⁿ na tquiaaⁿ nda̱a̱yâ.
6. Ts'iaaⁿ na s'aa matseijomna' cha'cwijom ts'aⁿ na manom'. Ndo' ts'iaaⁿ na s'aa Apolos matseijomna' cha'cwijom ts'aⁿ na matseicandaa' ntjom. Sa̱a̱ nquii Ty'o̱o̱ts'om mach'eeⁿ na tjaanajndeii ts'iaaⁿ'ñeeⁿ.
7. Ndo' na luaa', meiⁿ juu ts'aⁿ na manom' tit'maⁿ cwiluiiñe, meiⁿ ts'aⁿ na matseicandaa'. Nquii Ty'o̱o̱ts'om t'maⁿ cwiluiiñê ee jom mach'eeⁿ na wjaanajndeii ts'iaaⁿ'ñeeⁿ.
8. Juu ts'aⁿ na manom' ñequio ts'aⁿ na matseicandaa', ñe'cwii xjeⁿ cwiluiindyena. Ndo' nquii Ty'o̱o̱ts'om nntioml'uaaⁿ ts'aⁿ cantyjati na jnda̱ ñejndi'ntjom nnoom.
9. Ee jâ cwe' cwila'xmaaⁿyâ nn'aⁿ na cwilajomndyô̱ ts'iaaⁿ ‘naaⁿ' Ty'o̱o̱ts'om, ndo' ‘o la'xmaⁿ'yo' tyuaaⁿ'aⁿ, la'xmaⁿ'yo' cha'cwijom w'aa na mach'eeⁿ.
10. Cantyja ‘naaⁿ'na', ja cwiluiindyo̱ cha'cwijom luañetquiee na seijndaa'ñe Ty'o̱o̱ts'om na maqua̱ⁿ tsiaⁿtsjo̱' ndo' cwiicheⁿ ts'aⁿ matseicanda̱a̱'ñe w'aa nacjoo' juuna'. Sa̱a̱ cwii cwii ts'aⁿ queⁿñe cwenta cantyja ‘naaⁿ' ts'iaaⁿ na mach'ee.
11. Ee tjaa ‘ñeeⁿ ts'aⁿ na nnda̱a̱ nlqueⁿndyo̱ cwiicheⁿ ts'iaaⁿtsjo̱' ñequio tsiaⁿtsjo̱' na waa, na juu jo' tseixmaⁿna' Jesucristo.
12. Sa̱a̱ tiñe'cwii nnom ‘naⁿ na cwileil'uee'ndye nn'aⁿ na cwil'a ts'iaaⁿ nacjoo' tsiaⁿtsjo̱'ñeeⁿ. Ee ts'aⁿ na xcwee'ya ts'om na mandi'ntjom nnom Ty'o̱o̱ts'om, matseijomna' ts'iaaⁿ na mach'eeⁿ cha'cwijom cwii w'aa na cwiluiina' ñ'eⁿ s'om cajaⁿ, oo ñ'eⁿ s'om xuee, oo ñ'eⁿ ljo̱' na jeeⁿ jnda. Sa̱a̱ ts'aⁿ na tixcwee' ts'om na mandi'ntjom nnom Ty'o̱o̱ts'om, matseijomna' ts'iaaⁿ na mach'eeⁿ cha'cwijom cwii w'aa na cwiluiina' ñ'eⁿ n'oom, oo ñ'eⁿ neiiⁿ'jnda̱, oo ñ'eⁿ n'oomljooto'.
13. Juu xuee quia na nncu'xeⁿ Ty'o̱o̱ts'om nn'aⁿ, nleitquioo'ya chiuu tseixmaⁿ ts'iaaⁿ na tyoch'ee cwii cwii ts'aⁿ. Juu xuee'ñeeⁿ t'maⁿ chom nncuaa, jo' jo' m'mo̱o̱ⁿna' chiuu tseixmaⁿ ts'iaaⁿ na tyoch'ee cwii cwii ts'aⁿ.
14. Jo' chii xeⁿ tilco ts'iaaⁿ na tyoch'ee ts'aⁿ, waa naya na nlo'ñoom cantyja ‘naaⁿ' ts'iaaⁿ na jnda̱ ñes'aaⁿ.
15. Sa̱a̱ xeⁿ nlco ts'iaaⁿ'ñeeⁿ, nntsuuñê cantyja ‘naaⁿ' juuna'. Nqueⁿ nlui'n'maaⁿñê, sa̱a̱ cwe' ñetomti jo'. Ndo' na luaa' nntjoom nntseijomna' cantyja ‘naaⁿ'aⁿ cha'cwijom na nc'uaa' chii jluii'ñê naquii' chom.
16. ¿Aa ticaliu'yo' na ‘o cwiluiindyo' waa' Ty'o̱o̱ts'om ndo' na m'aaⁿ Espíritu Santo naquii' n'om'yo'?
17. Xeⁿ na m'aaⁿ ‘ñeeⁿ juu na nntseityuii' waa' Ty'o̱o̱ts'om, nntseityueeⁿ'eⁿ tsaⁿ'ñeeⁿ ee lju' cwiluiiñe juuna', ndo' mancjo'yo' cwiluiindyo' w'aa'ñeeⁿ.
18. Meiⁿcwiindyo' ‘o tinquiu'nn'aⁿñe cheⁿnquii cantyja ‘naaⁿ' ñ'oomwaa'. Xeⁿ m'aaⁿ ‘ñeeⁿ ts'aⁿ quii'ntaaⁿ'yo' na matseitiuu na jndo̱' ts'om cha'xjeⁿ nquiee nn'aⁿ tsjoomanancue cwitjeii'na cwenta, c'oom juu cha'na ts'aⁿ na meiⁿchjoo tijndo̱' ts'om, cha mayuu'cheⁿ nntseixmaaⁿ ts'aⁿ na jndo̱' ts'om.
19. Ee juu na cwitjeii' nn'aⁿ tsjoomnancue cwenta na jndo̱' n'omna, Ty'o̱o̱ts'om macwjeeⁿ'eⁿ cwenta na ntjeiⁿ jo'. Ee waa ñ'oom'm na teiljeiina' na matsona': “Nnt'uii Ty'o̱o̱ts'om nn'aⁿ ñequio mañejuu na jndo̱' n'omna”.
20. Ndo' waa cwiicheⁿ ñ'oom'm na teiljeii na matsona': “Nqueⁿ na cwiluiiñê na catsa̱'ntjoom jaa mantyjeeⁿ joo ñomtiuu ‘naaⁿ nn'aⁿ na jeeⁿ jndo̱' n'om, cwe' ts'iaaⁿ'ndyo joona'.”
21. Nc'e na ljo', tintjei's'andyo' na majndaa' ts'aⁿ na cwilajomndyo' ñ'eⁿñe. Ee cha'tso na matseijndaa'ñe Ty'o̱o̱ts'om la'xmaⁿna' cwenta'yo'.
22. Meiiⁿ nnco̱ Pablo, oo nquii Apolos, oo nquii Pedro, cha'tsondyô̱ cwiluiindyô̱ na cwindya̱'ntjo̱o̱ⁿyâ nda̱a̱'yo'. Ee cha'tso na s'aa Ty'o̱o̱ts'om m'aaⁿna' cwentaaya. Cantyja na cwitando̱o̱'a tsjoomnancuewaañe matseixmaⁿna' naya ‘naaⁿya ee na cwito'ño̱o̱ⁿya na cwitando̱o̱'a ñ'eⁿñê. Mati cantyja na cwiwja̱a̱ya matseixmaⁿna' naya ‘naaⁿya, nc'e cantyja ‘naaⁿ' jo' cwitsaaquia̱a̱'a cañoom'luee. Cha'tso na cwiwino̱o̱ⁿya je' ñequio na quia wjaawe'cañoomna' cwila'xmaⁿna' na nnteijndeiina' jaa.
23. Ndo' ‘o m'aⁿ'yo' cwentaa' Cristo ndo' jom cwiluiiñê cwentaa' Ty'o̱o̱ts'om.
| 
