1. Jo' chii catjei'yo' cwenta cantyja ‘naaⁿyâ na cwiluiindyô̱ nn'aⁿ na cwindye'ntjom nnom Cristo, ndo' na cwit'mo̱o̱ⁿyâ nda̱a̱ nn'aⁿ ñ'oom' Ty'o̱o̱ts'om na wanty'iuu' tyom'aⁿna'.
2. Juu ts'aⁿ na waa cwii ts'iaaⁿ na matseixmaⁿ, macaⁿna' na cwitquioo' cantyja ‘naaⁿ'aⁿ na cwiluiiñê ts'aⁿ na matseicanda̱.
3. Sa̱a̱ cantyja ‘naⁿya, ticwjaa'ndyo̱ cwenta chiuu waa na ‘o cwitjei'yo' cwenta cantyja ‘naaⁿ' ts'iaaⁿ na matseixmaⁿya oo chiuu nquiu nt'omcheⁿ. Meiⁿ ticu'xa̱ⁿ cheⁿnnco̱ cantyja ‘naⁿya.
4. Juu na m'aaⁿ' ts'o̱o̱ⁿ tica'mo̱ⁿna' aa waa na matseitjo̱o̱ndyo̱, sa̱a̱ meiiⁿ na ljo' tica'mo̱ⁿna' na tjaa jnaⁿya. Nquii Ty'o̱o̱ts'om nncu'xeeⁿ ja.
5. Nc'e na luaa', cwitjo̱o̱cheⁿ na nncwjee'nnda' Ta Jesús, tintjei'yo' cwenta cantyja ‘naaⁿ nn'aⁿ na cwindye'ntjom nda̱a̱'yo'. Ee xjeⁿ'ñeeⁿ nnts'aaⁿ na nleitquioo'ya ‘naⁿ na cwe' wanty'iuu' cwil'a nn'aⁿ ñequio joo ‘naⁿ na cwila'jndaa'ndyena naquii' n'omna. Quia jo' nñequiaa Ty'o̱o̱ts'om nnom cwii cwii ts'aⁿ cha'xjeⁿ na matsona'.
6. ‘O nn'aⁿya na cwila'yu'yo', matseina̱ⁿya ñ'oommeiⁿ' nda̱a̱'yo' cantyja ‘naⁿya ñ'eⁿ Apolos cha nnteijndeiina' ‘o, ndo' cha cantyja ‘naaⁿyâ nntsaala'no̱ⁿ'yo' na tincwinom'yo' ñ'oom na teiljeii, ndo' cha meiⁿcwii ts'aⁿ tincwji's'aaⁿ cwii ts'aⁿ na mañequiaa ñ'oom' Ty'o̱o̱ts'om cha nnts'aana' na ticwentyjo̱ ‘naaⁿ' cwiicheⁿ.
7. Ee ¿chiuu waa cantyja ‘naⁿ' na mach'eena' ntyji' na jndandyu'ti' nchiiti cwiicheⁿ? Ndo' ¿cwaaⁿ cwii nnom na matsei'xmaⁿ' na nchii nquii Ty'o̱o̱ts'om mañequiaaⁿ na matsei'xmaⁿ' jo'? Ndo' xeⁿ cwe' jnda' naya'ñeeⁿ, ¿chiuu na matseis'andyu' na cha'cwijom tiyuu' na jnda' juuna'?
8. Mach'eena' na nquiu'yo' na la'xmaⁿ'yo' nn'aⁿ na tyandye. Cha'cwijom tjaa meiⁿcwii na macaⁿtina' ‘o. Cha'cwijom na cwiluiindyo' nn'aⁿ na cwitsa̱'ntjom, meiiⁿ na ticañ'a̱a̱ⁿyâ̱. Toom cwe' na mayuu' cwiluiindyo' nn'aⁿ na cwitsa̱'ntjom cha mati jâ nla'jomndyô̱ jo' ñ'eⁿndyo'.
9. Mach'eena' ntyjii na maqueⁿ Ty'o̱o̱ts'om jâ apóstoles na wanty'iaa'ndyo̱tya̱a̱yâ na cha'tsondye nn'aⁿ. Matseijomna' cantyja ‘naaⁿyâ cha'cwijom nn'aⁿ na jnda̱ teijndaa' na nncwje na jndoo'cheⁿ nn'aⁿ ndo' nnty'iaa ángeles.
10. Cwitjeii' nn'aⁿ cwenta na jâ na cwiñequiaayâ ñ'oom cantyja ‘naaⁿ' Cristo la'xmaaⁿyâ nn'aⁿ na ntjeiⁿndye sa̱a̱ ‘o cwitjei' cheⁿncjo'yo' cwenta na la'xmaⁿ'yo' na jeeⁿ jndo̱' n'om'yo' cantyja ‘naaⁿ'aⁿ. Cwitjei'yo' cwenta na tileicjaanjoom' cwil'aayâ sa̱a̱ ‘o jeeⁿ cwijaanjoom' cwil'a'yo'. Cwila't'maaⁿ'ndye nn'aⁿ ‘o sa̱a̱ jâ ticuee' n'omna.
11. Hasta xjeⁿ je', waa xjeⁿ na matseitjo̱o̱na' na nntquia̱a̱yâ ndo' na nncwa̱a̱yâ ñequio liaa na nlcwa̱a̱'â. Jndye ndii' cwicacho̱o̱'â, ndo' meiⁿ tjaa'naⁿ w'aaya.
12. Cwiwijndyaayâ na cwil'aayâ ts'iaaⁿ. Quia cwitioo nn'aⁿ ñ'oomwi' cjooyâ, cwitaaⁿyâ na catio'naaⁿñe Ty'o̱o̱ts'om joona. Quia cwileintyjo̱na jâ, cwila'quii n'o̱o̱ⁿyâ.
13. Quia cwila'neiⁿ nn'aⁿ ñ'om ta̱a̱' ts'om nacjooyâ, cwila'joom'na jâ cha'cwijom to' na niom nnom tsjoomnancue sa̱a̱ cwit'o̱o̱yâ ñequio ñ'oom ya. Hasta xjeⁿ je' cwil'a nn'aⁿ na cwila'xmaaⁿyâ cwii na jeeⁿ ts'iaaⁿ.
14. Nchii cwe' matseiljeiya ñ'oommeiⁿ' cha catseijnaaⁿ'na ‘o sa̱a̱ cha na nntseijndo̱'na' n'om'yo' nc'e na cwiluiindyo' ntseindaaya na jeeⁿ wi' ts'o̱o̱ⁿya ‘o.
15. Ee meiiⁿ na aa m'aⁿ qui meiⁿ nn'aⁿ na cwit'mo̱o̱ⁿna cantyja ‘naaⁿ' Cristo nda̱a̱'yo', sa̱a̱ tijndye lotye'yo' m'aⁿ. Cantyja ‘naaⁿ' na cwila'yu'ya n'om'yo' ñ'eⁿ Ty'o̱o̱ts'om, ja cwiluiindyo̱ tsotye'yo' nc'e ñ'oom naya na macwji'n'maaⁿñê nn'aⁿ.
16. Jo' chii matseijndo̱'a n'om'yo', cal'a'yo' cha'xjeⁿ na quits'aaya.
17. Jo' chii majño̱o̱ⁿya Timoteo na m'aⁿ'yo', cwiluiiñê jndaaya na jeeⁿ matseicaña̱a̱ⁿ ndo' na jnda ntyjiiya jom, jom nnts'aaⁿ na nncjaañjoom' n'om'yo' chiuu waa na jo̱m'aaⁿ na matseixmaⁿya cwentaa' Cristo Jesús cha'xjeⁿ na ma'mo̱o̱ⁿ nda̱a̱ nn'aⁿ cwii cwii tmaaⁿ' nn'aⁿ na macwjeeⁿ'eⁿ cwentaaⁿ'aⁿ.
18. Ñ'eeⁿndyo' ‘o na cwilas'andyo' cheⁿncjo'yo' na cwindu'yo' na tixocjo̱nty'iannda'a ‘o.
19. Sa̱a̱ tyuaa' nncjo̱cando̱o̱'a ‘o xeⁿ l'ue ts'om Ta Jesús, ndo' quia ljo'cheⁿ nljeiya chiuu n'om naⁿ'ñeeⁿ na luaa' cwil'ana, nljeiya chiuu tseixmaⁿ ñ'oom na cwila's'andyena.
20. Ee juu na ma'mo̱ⁿna' na matseixmaⁿ ts'aⁿ na matsa̱'ntjom Ty'o̱o̱ts'om jom, xocwitquioo' jo' cwe' nc'e ñ'oom na matseineiⁿ ts'aⁿ, nleitquioo' jo' cantyja ‘naaⁿ' na aa matseixmaaⁿ najndeii na cwiluiiñe Ty'o̱o̱ts'om.
21. ¿Chiuu nl'ue n'om'yo' na cats'aa? ¿Aa nncjo̱cando̱o̱'a ‘o na nntseitia'a ‘o, oo aa nnc'o̱o̱ⁿya na wi' ts'o̱o̱ⁿya ‘o, ñequio na jeeⁿ jnda ntyjiiya ‘o?
| 
