1. Queⁿ'yo' cwenta na jeeⁿ ndya' t'maⁿ waa na candya' ts'om Tsotya̱a̱ya Ty'o̱o̱ts'om jaa. Manc'e jo' maqueeⁿ jaa na cwiluiindyo̱ ntseinaaⁿ, ndo' je' majo' jaa. Ndo' nc'e na luaa' waa joo nn'aⁿ na tic'om cantyja ‘naaⁿ'aⁿ tileicala'no̱ⁿ'na cantyja ‘naaⁿya, jnaaⁿ' na ticata'jnaaⁿ'na nqueⁿ.
2. ‘O nn'aⁿya na cwila'yu'yo' na jeeⁿ wi' ts'o̱o̱ⁿya, je' cwiluiindyo̱ ntseinda Ty'o̱o̱ts'om. Ndo' meiiⁿ na ticala'no̱o̱ⁿ'a je' chiuu mmaaⁿ'a nnda̱nquia sa̱a̱ cwila'no̱o̱ⁿ'a quia na nleitquioo'ñennda' Jesucristo, nlaxmaaⁿya cha'xjeⁿ nqueⁿ, ee nnty'iaa nda̱a̱ya jom cha'xjeⁿ waaⁿ.
3. Ndo' ticwii cwii ts'aⁿ na luaa' macantyjaa' ts'om jom, maqueⁿlju'ñe cheⁿnquii jo nnoom cha'xjeⁿ nqueⁿ cwiluiiñê na lju'ñê.
4. Ticwii cwii ts'aⁿ na mach'ee jnaⁿ, matseijndaa'ñena' na chujnaⁿ tsaⁿ'ñeeⁿ nnom ljeii na matsa̱'ntjom Ty'o̱o̱ts'om, ee cha'tso jnaⁿ ma'mo̱ⁿna' na matseitjo̱o̱ñe ts'aⁿ nacjoo' ljeii na matsa̱'ntjoom.
5. Sa̱a̱ manquiu'ya'yo' na tyjee'cañoom Cristo na nntseicanoom'm jnaⁿ na laxmaaⁿya. Ndo' jom meiⁿcwii nnom jnaⁿ tîcatseixmaaⁿ.
6. Jo' chii cwii cwii ts'aⁿ na matseijomñe ñ'eⁿñê, tiquich'eeya jnaⁿ, sa̱a̱ ts'aⁿ na mach'eeya jnaⁿ, meiⁿ tyoonty'iaa' jom, meiⁿ ticwajnaaⁿ' jom.
7. ‘O na cwiluiindyo' ntseindaaya, meiⁿcwii ts'aⁿ tiñenquiandyo' na nñequiu'nn'aⁿ ‘o, ts'aⁿ na mach'ee yuu na maty'iomyana', ya ts'aⁿñe cha'xjeⁿ nquii Cristo cwiluiiñê na ya ts'aⁿñê.
8. Sa̱a̱ juu ts'aⁿ na ñequii'cheⁿ matseitjo̱o̱ñe, matseixmaⁿ cantyja ‘naaⁿ' tsaⁿjndii. Ee cantyjati xjeⁿ na jnaⁿjndyeecheⁿna' cha'tso, tsaⁿjndii jnaⁿ matseixmaaⁿ. Ndo' jnda̱ jndyo Jnda Ty'o̱o̱ts'om na nntseityueeⁿ'eⁿ ts'iaaⁿ ‘naaⁿ' tsaⁿjndii.
9. Tjaa ‘ñeeⁿ c'oom na cwiluiiñe jnda Ty'o̱o̱ts'om na mach'eeya jnaⁿ ee jnda̱ tquiaaⁿ na catseixmaⁿ na wando' ndo' nc'e jo' tiñecats'aa jnaⁿ nc'e cwiluiiñe jnaaⁿ.
10. Luaa waa na cwila'no̱o̱ⁿ'a ‘ñeeⁿ cwiluiindye ntseinda Ty'o̱o̱ts'om ndo' ‘ñeeⁿ cwiluiindye ntseinda tsaⁿjndii, meiⁿ quia ts'aⁿ na tiquich'ee na maty'iomyana' ticaluiiñe jnda Ty'o̱o̱ts'om ndo' mati ts'aⁿ na tiwi' ts'om x'iaa' na matseiyu'. C'o̱o̱ⁿya na wi' n'o̱o̱ⁿya nc'iaaya na cwila'yu'
11. Ñ'oom na macwindye'yo' xjeⁿ na jnaⁿjndyeecheⁿna' na cwila'yu'yo' matsona' na c'o̱o̱ⁿya na wi' n'o̱o̱ⁿya nn'aaⁿya na cwila'yu'.
12. Caín tyotseixmaaⁿ cantyja ‘naaⁿ' tsaⁿjndii. Ticaty'iomna' na nl'aaya cha'na s'aaⁿ na seicueⁿ'eⁿ tyjeeⁿ. Ndo' ¿chiuu na s'aaⁿ na luaa'? S'aaⁿ na ljo' ee tyotseijomñê cantyja na ticaty'iomyana', sa̱a̱ juu tyjeeⁿ tyoch'ee na maty'iomyana'.
13. Jo' chii ‘o nn'aⁿya na cwila'yu'yo', nc'e na luaa' waa tintseiñ'eeⁿ'ñena' ‘o na joo nn'aⁿ na tyoola'yu' m'aⁿna na jndoona ‘o.
14. Jaa na cwilayuu'a ñet'o̱o̱ⁿya nacje ‘naaⁿ' na cwitsuundye nn'aⁿ sa̱a̱ je' laxmaaⁿya na ticantycwii na cwitando̱o̱'a. Cwila'no̱o̱ⁿ'a na ljo' nc'e na jnda nquiuuya nn'aaⁿya na cwilayu'. Ts'aⁿ na ticajnda ntyjii x'iaa' na matseiyu', ndicwaⁿ m'aaⁿ nacje ‘naaⁿ' na cwitsuundye añmaaⁿ nn'aⁿ.
15. Meiⁿquia ts'aⁿ na jndoo' x'iaa' na matseiyu' cwiluiiñe ts'aⁿ na matseicwjee nn'aⁿ ndo' manquiu'yo' ts'aⁿ na matseicwjee nn'aⁿ ticatseixmaⁿ na tintycwii na wando'.
16. Luaa waa na ma'mo̱ⁿna' nda̱a̱ya chiuu tseixmaⁿna' na m'aaⁿ ts'aⁿ na wi' ts'om x'iaa'. Nquii Jesús tquiaañe cheⁿnqueⁿ na tueeⁿ'eⁿ cwentaaya. Ndo' na ljo', juu na cwitando̱o̱'a laxmaaⁿya na nndya̱'ntjo̱o̱ⁿya nda̱a̱ nn'aaⁿya na cwilayu'.
17. Ndo' mati quia m'aaⁿ cwii ts'aⁿ na matseiyu' ndo' maya ‘naⁿ na maljeii, ndo' meiiⁿ na maqueⁿ tsaⁿ'ñeeⁿ cwenta na matseitjo̱o̱na' cwii x'iaaⁿ'aⁿ na matseiyu', sa̱a̱ tiquioo na wi' ts'oom juu, ¿yuu waa na ma'mo̱o̱ⁿ na jnda ntyjeeⁿ Ty'o̱o̱ts'om?
18. ‘O ntseindaaya, juu na m'aaⁿya na jnda nquiuuya nn'aⁿ, xocwitquioo' na ljo' cwe' ñ'oom na cwilana̱a̱ⁿya, ma'mo̱ⁿna' na ljo' nc'e chiuu na cwil'aaya. C'o̱o̱ⁿt'maaⁿ'ndyo̱ n'o̱o̱ⁿya jo nnom Ty'o̱o̱ts'om
19. Quia jo' luaa waa na nnda̱a̱ nla'no̱o̱ⁿ'a na laxmaaⁿya cantyja ‘naaⁿ' na mayuu' ndo' na tjaa'naⁿ na cañ'eeⁿ' jo nnom Ty'o̱o̱ts'om,
20. ee xeⁿ maco'tiana' nquiuuya naquii' n'o̱o̱ⁿya, jom cwiluiit'maⁿñetyeeⁿ, nchiiti juu na luaa' mach'eena' naquii' n'o̱o̱ⁿya ndo' tcuu mantyjeeⁿ cantyja ‘naaⁿya.
21. Jo' chii ‘o nn'aⁿya na cwila'yu'yo' na jeeⁿ jnda ntyjiiya, xeⁿ tjaa'naⁿ na maco'tiana' nquiuuya jo nnoom, quia jo' cwiñ'o̱ⁿt'maaⁿ'ndyo̱ n'o̱o̱ⁿya,
22. ndo' cha'tso na cwitaaⁿya nnoom, nñequiaaⁿ na nnto'ño̱o̱ⁿya jo' nc'e na cwila'canda̱a̱'ndyo̱ ñ'oom na matsa̱'ntjoom jaa ndo' na cwil'aaya yuu na cjaawee' ntyjeeⁿ.
23. Ndo' ñ'oom na matsa̱'ntjoom jaa matsona' na calayuu'a ñequio Jnaaⁿ Jesucristo ndo' na c'o̱o̱ⁿya na wi' n'o̱o̱ⁿya nc'iaaya na cwilayu' cha'xjeⁿ na matsa̱'ntjoom.
24. Nn'aⁿ na cwila'canda̱a̱'ndye ñ'oom na matsa̱'ntjoom, m'aⁿna quii' ts'oom ndo' jom m'aaⁿ naquii' n'omna.
| 
