1. Cha'tsondye nn'aⁿ na cwindye'ntjomtyeⁿ nda̱a̱ patrom, matsona' na cala't'maaⁿ'ndyena patrom ‘naaⁿna ñequio na xcwee' n'omna cha tincju'naaⁿñena' na ñoomñoom ñ'oom nlaneiⁿ nn'aⁿ nacjoo' Ty'o̱o̱ts'om ndo' mati nacjoo' ñ'oom na cwit'mo̱o̱ⁿya.
2. Ndo' quia la'xmaⁿ patrom ‘naaⁿna nn'aⁿ na cwila'yu', jeeⁿ matsona' na cala't'maaⁿ'ndyena naⁿ'ñeeⁿ ee na nn'aaⁿndyena nc'e na cwila'yu'na. Maty'iomna' na yati candye'ntjomna nda̱a̱ naⁿ'ñeeⁿ. Ee ts'iaaⁿ ‘naaⁿ naⁿ'ñeeⁿ cwil'ana ndo' cwiluiindyena na nn'aaⁿndyena na wi' n'om ntyjeendyena nc'e tjom na cwila'yu'na. Ca'mo̱ⁿ' ndo' quiaa' ñ'oommeiⁿ' nda̱a̱ nn'aⁿ. Caljoya n'o̱o̱ⁿya cantyjati na mañequiaa Ty'o̱o̱ts'om
3. Xeⁿ m'aaⁿ cwii ts'aⁿ na ñomquiati ñ'oom na ma'mo̱o̱ⁿ na juu ñ'oom'ñeeⁿ titseijomna' ñequio ñ'oom na xcweti cantyja ‘naaⁿ' Ta Jesucristo na ticateijndeiina' na wjaaquieñe ts'aⁿ cantyja ‘naaⁿ'aⁿ,
4. jom matseis'aañê sa̱a̱ meiⁿchjoo ticatsei'no̱o̱ⁿ'o̱ⁿ, cwe' jndyeto matseineiiⁿ cantyja ‘naaⁿ' ñ'oom na nquiu nn'aⁿ judíos ndo' matseintja'ñê ñ'eⁿ nn'aⁿ cantyja ‘naaⁿ n'oom'ñeeⁿ. Jo' na cwinaⁿna' na cwila'ta̱a̱' n'om nn'aⁿ nc'iaana, ndo' m'aⁿna na jndoondye ntyjeena, cwila'jnaaⁿ'ndyena, ndo' tiya m'aaⁿ' n'omna cantyja ‘naaⁿ nc'iaana,
5. jo' chii tileicantycwii na cwila'ntja'ndye nn'aⁿ na tajo'ndyo cwicwila'tiuuna, na tatîcata'jnaaⁿ'na ñ'oom na mayuu'. Cwila'tiuuyoona na ñ'oom ‘naaⁿ' Ty'o̱o̱ts'om na matseiyu' ts'aⁿ cwiluiiñena' cwii nnom na nleityañe ts'aⁿ.
6. Ñ'oom na mayuu' na ts'aⁿ na matseiyu' ñequio Ty'o̱o̱ts'om, cantyja ‘naaⁿ' jo' matseixmaⁿ cwii na jndati nchiiti na nleityañe ts'aⁿ tsjoomnancue. Sa̱a̱ macaⁿna' na caljoya ts'oom ñequio cha'tso na jnda̱ jnaaⁿ'aⁿ nnom Ty'o̱o̱ts'om.
7. Ee tjaa'naⁿ ljo' tquio̱cho̱o̱ya tuiindyo̱ tsjoomnancue ndo' tjaa'naⁿ ljo' ya nntsaacho̱o̱,
8. xeⁿ niom na cwicwaa'a ndo' niom liaaya, maty'iomna' ñequio nmeiⁿ' caljoya n'o̱o̱ⁿya.
9. Ee nn'aⁿ na ñe'cwityandye, mat'uiina' joona cha'cwijom cwii teinco', na jndye nnom na ntjeiⁿ na matsei'ndaa'na' joona na matiomna' joona na nnt'uiiwi'na' na nntsuundyena.
10. Ee juu na matseicandya' ts'om ts'aⁿ s'om, tseixmaⁿna' x'ee cha'tso nnom natia. Ndo' m'aⁿ nn'aⁿ nc'e na queeⁿ n'omna s'om jnda̱ maju'taaⁿñena' joona cantyja na cwila'yu'ya cwii n'omna ñ'eⁿ Ty'o̱o̱ts'om ndo' jndye nnom nawi' jnda̱ mamanchjena' joona. Ts'aⁿ na matseiyu' luaa macaⁿna' na queⁿya ts'om
11. Sa̱a̱ ‘u je' na cwiluiindyu' cwentaa' Ty'o̱o̱ts'om, cwji'ndyu' cantyja ‘naaⁿ' nmeiiⁿ'. Cja'ntyjo̱' cantyja ‘naaⁿ cha'tso na maty'iomyana'. Quiaandyu'ñ'eⁿ' cantyja ‘naaⁿ' Ty'o̱o̱ts'om, na nntseiyu'ya' ts'om' ñ'eⁿñê, na c'oom' na wi' ts'om' nn'aⁿ, meiiⁿ wi' matjom' sa̱a̱ ti'ndiinc'uaa'ndyu', c'oom nioom'cheⁿ ts'om' ñequio nn'aⁿ.
12. Catseijndu' cha nla'yu' nn'aⁿ. Tyeⁿcaljoo'ndyu' cantyja na mañequiaa Ty'o̱o̱ts'om na matseixmaⁿ' na ticantycwii na wando' añmaⁿ ‘naⁿ' ee macwe' jo' tqueeⁿ'ñê ‘u, ndo' na tjei'yuu'ndyu' cantyja ‘naaⁿ' na matseiyu'ya' ts'om' nda̱a̱ jndyendye nn'aⁿ.
13. Jesucristo ya ñ'oom tjei'yuu'ñê jo nnom Poncio Pilato. Jo' chii jo nnoom ñequio jo nnom Ty'o̱o̱ts'om na mañequiaa na cwita'ndo' cha'tso, luaa ñ'oom na matsa̱'ntjo̱ⁿya ‘u Timoteo,
14. na catseicanda̱' ñ'oom na maqua̱ⁿya njom', tintseichui' joona' cha ticaⁿna' na ndi'tia'. Catseicanda̱' joona' hasta xjeⁿ na nncwjee'nnda' Jesucristo.
15. Quia na ntyjii Ty'o̱o̱ts'om na jnda̱ tue'ntyjo̱ xjeⁿ, nnts'aaⁿ na nntseicanda̱a̱'ñena' na luaa' ee macanda̱ nqueⁿ cwiluiiñê na tjacantyja na matsa̱'ntjoom. Jom tseixmaaⁿ Rey nda̱a̱ cha'tsondye nn'aⁿ na tjacantyja na cwitsa̱'ntjom, jom cwiluiiñê na matsa̱'ntjoom cha'tsondye nn'aⁿ na cwitsa̱'ntjom.
16. Manda̱ nqueⁿ m'aaⁿ ndo' m'aaⁿ na tijoom cueeⁿ'eⁿ. M'aaⁿ yuu caxuee yuu na leicanda̱a̱ nntseindyoo'ñe ts'aⁿ. Tjaa ‘ñeeⁿ juu na jnda̱ nty'iaa' jom meiⁿ xonda̱a̱ nty'iaa' ts'aⁿ jom. Tseixmaaⁿ na ñequii'cheⁿ catseit'maaⁿ'ñena' jom ndo' najndeii na matsa̱'ntjoom. Amén.
17. Nn'aⁿ na tyandye, catsa̱'ntjom' na ticatjeii's'andyena meiⁿ tilacantyjaa' n'omna juu na tyandyena, ee tijndaa' aa nljotyeⁿna' lueena. Cantyjaa' n'omna nquii Ty'o̱o̱ts'om na jeeⁿ canda̱a̱' mañequiaaⁿ cha'tso ‘naⁿ na nnteijndeiina' jaa.
18. Catsa̱'ntjom' joona na cal'ana naya nn'aⁿ, jo' na nncuaa na tyandyena na majndye nnom na ya cwil'ana, na tic'omna na ntycwiina, ‘naⁿ na niom lueena, catei'jndeiina nn'aⁿ.
19. Ee na nl'ana na ljo', nla'wena cwii nnom na tyandyena, na juuna' matseijomna' x'ee ñ'oom na nnc'o̱na' ñ'eⁿndyena ‘io cha, ndo' na nla'xmaⁿna na ticantycwii na cwita'ndo'na. Ñ'oom na macanda̱ na maco'ñom Timoteo
20. ‘U Timoteo, cateixe' ñ'oom naya ‘naaⁿ' Ty'o̱o̱ts'om na jnda̱ to'ñom'. Tintseiñ'oom'ndyu' ñ'oom na cwilue nn'aⁿ na cwe' cwila'ñ'eeⁿ'to ndyuee, na tileicwijndaa'. Meiⁿ tintseiñ'oom'ndyu' ñ'oom na wjaana' nacjoo' ñ'oom na mayuu' na cwilue nn'aⁿ na tjacantyja na yana' meiiⁿ na tiyuu' juuna'
21. ee ñ'eeⁿ nn'aⁿ na nmeiiⁿ' laxmaⁿ ndo' na ljo', jnda̱ tju'taaⁿñena' joona na cwilayu'ya n'omna.Quiaa Ty'o̱o̱ts'om na nncoñom' naya na matseixmaaⁿ.
| 
