1. Je' jnda̱ ndyee ndii' na majo̱cando̱o̱'a ‘o. Ñ'oom' Ty'o̱o̱ts'om na teiljeii matsona' quia na m'aⁿ we ndyee nn'aⁿ na manquiujndaa'ndye cwii nnom na matsei'tjo̱o̱ñe ts'aⁿ, maxjeⁿ nnt'uiityeⁿna' tsaⁿ'ñeeⁿ.
2. Quia na ñet'o̱o̱ⁿya ñ'eⁿndyo' na jnda̱ we tsjo̱o̱ya na xoc'o̱o̱ⁿya na t'maⁿ ts'o̱o̱ⁿya ñequio nn'aⁿ na ndicwaⁿ cwila'tjo̱o̱ndye. Je' cwitjo̱o̱cheⁿ na nncua̱nnda'a na m'aⁿ'yo', mañejuu ñ'oom'ñeeⁿ matsjo̱o̱ tixoc'o̱o̱ⁿ na t'maⁿ ts'o̱o̱ⁿ ñequio naⁿ'ñeeⁿ,
3. ee ‘o cwil'ue'yo' cwii na ma'mo̱ⁿna' quia matseina̱ⁿya nda̱a̱'yo', matseineiⁿ nquii Cristo. Ee quii'ntaaⁿ'yo' nchii cwiluiiñê na tijneiⁿ na nnt'ueiiⁿ ‘o. Nqueⁿ waa najneiⁿ quii'ntaaⁿ'yo'.
4. Ñ'oom na mayuu' na ty'ioom nn'aⁿ jom ts'oom'naaⁿ cha'cwijom ts'aⁿ na tijndeii matseixmaⁿ, sa̱a̱ wanoom'm nc'e najndeii na cwiluiiñe Ty'o̱o̱ts'om, ndo' mati jâ na cwilajomndyô̱ cantyja na tijndeii ñeseixmaaⁿ, cha nc'e jo', mati nntando̱o̱'â ñ'eⁿñê nc'e najndeii na matseixmaⁿ Ty'o̱o̱ts'om cha nnteijndeiina' ‘o.
5. Catjei' cheⁿncjo'yo' cwenta aa xcwee' n'om'yo' jo nnom Ty'o̱o̱ts'om, cha nleitquioo' ¿aa cwila'yu'ya n'om'yo' ñ'eⁿñê? Queⁿ'ya'yo' cwenta cantyja ‘naaⁿ'yo'. Xeⁿ leiqueⁿ'yo' cwenta na m'aaⁿ Jesucristo quii' n'om'yo' quia jo' ¿aa chii ma'mo̱ⁿna' na cwiluiindyo' nn'aⁿ na cwe' cwila'yu'to?
6. Sa̱a̱ ntyjaa'ya cwii ts'o̱o̱ⁿya na nla'no̱ⁿ'yo' na jâ nchii cwila'xmaaⁿyâ nn'aⁿ na cwe' cwila'yu'to.
7. Cwitaaⁿyâ nnom Ty'o̱o̱ts'om na til'a'yo' ‘naⁿ natia, nchii cwil'uuyâ naljo' cha nleitquioo' na jâ jlui'yaayâ jo', cwil'uuyâ cha nl'a'yo' ‘naⁿ na maty'iomyana'. Tints'aa meiiⁿ ‘o cwitjei'yo' cwenta na tixcwe cwil'aayâ.
8. Ee xocanda̱a̱ nntsaayâ nacjoo' ñ'oom na cwiluiiñena' na mayuu'. Ñequii'cheⁿ cwilajomndyô̱ cantyja ‘naaⁿ' juuna'.
9. M'aaⁿyâ na neiiⁿyâ quia na laxmaaⁿyâ na tijnda̱a̱yâ cha na m'mo̱ⁿna' na ‘o laxmaⁿ'yo' na jnda̱'yo' cantyja ‘naaⁿ' Cristo. Ñecwitco cwitaaⁿyâ na nlaxmaⁿ'yo' na canda̱a̱'ndyo' jo nnom Ty'o̱o̱ts'om.
10. Waa najndeii na matseixmaⁿ Cristo na juu jo' mañequiaaⁿ na matseixmaⁿya cha cateijndeiina' ‘o na nntsanajnda̱'yo' cantyja ‘naaⁿ'aⁿ, nchii cha na catseityuii'na' na cwiluiindyo' cwentaaⁿ'aⁿ. Matseiljeiya cartawaañe na nnto'ñoom'yo' cha quia na jnda̱ tua̱ya quii'ntaaⁿ'yo', meiⁿ ticaⁿna' na nleil'uee'ndyo̱ najndeii na matseixmaⁿya na cat'uiina' ‘o. Matseit'maaⁿ'ñe Pablo Ty'o̱o̱ts'om
11. Ñ'oom na macanda̱, ‘o nn'aⁿya, c'om'yo' na neiⁿ'yo'. Calajnda̱'yo' na nla'xmaⁿ'yo' na canda̱a̱'ndyo' jo nnom Ty'o̱o̱ts'om. Quia'yo' na t'maⁿ n'om nc'iaa'yo'. C'om'yo' na ya nn'aⁿndyo' ñequio joona na tjaa'naⁿ tia' cacho'yo' ñ'eⁿndyena. Quia jo' nquii Ty'o̱o̱ts'om na m'aaⁿ na candya' ts'oom jaa ndo' na mañequiaaⁿ na tjaa ñomtiuu c'o̱o̱ⁿya jo nnoom, nnc'oomñê ñ'eⁿndyo'.
12. Cwii cwii x'iaa'yo' na matseiyu' cataⁿ'yo' ts'o̱o̱ⁿ na cwiñequia'yo' na xmaⁿñê nc'e na jnda nquiu'yo' jom.
13. Cha'tsondye nn'aⁿ na m'aⁿ ñjaaⁿ na la'xmaⁿ cwentaa' Ty'o̱o̱ts'om cwila'cwanomna na xmaⁿndyo' ‘o.
14. Juu naya na matseixmaⁿ Ta Jesucristo, ñequio juu na m'aaⁿ Ty'o̱o̱ts'om na candya' ts'oom jaa, ñequio nquii Espíritu Santo na m'aaⁿ naquii' n'o̱o̱ⁿya, ñequii'cheⁿ cala'xmaⁿ'yo' cha'tso nmeiⁿ'. Amén.
| 
