1. Pablo ñ'eⁿ Silas ty'ena tei'nomna tsjoom Anfípolis ñ'eⁿ tsjoom Apolonia. Jnda̱ chii tquiena tsjoom Tesalónica yuu waa cwii wats'om ‘naaⁿ nn'aⁿ judíos.
2. Ndyee smaⁿna tyom'aⁿna tsjoom'ñeeⁿ. Ñequii' quia xuee na cwita'jndyee nn'aⁿ judíos, Pablo s'aaⁿ cha'xjeⁿ quich'eeⁿ. Tjatseijomñê ñ'eⁿ naⁿ'ñeeⁿ na cwitjomndyena wats'om ‘naaⁿna. Tyotseineiiⁿ nda̱a̱na.
3. T'mo̱o̱ⁿ na juu ñ'oom' Ty'o̱o̱ts'om na teiyo teiljeii matsona' na maxjeⁿ jndei'na' na cwajndii nntjom Cristo. Nnty'ioom nn'aⁿ jom ts'oom'naaⁿ, maxjeⁿ nncueeⁿ'eⁿ jnda̱ chii nncwando'xcoom. Tsoti Pablo:—Jndyocwji'yuu'ndyo̱ cantyja ‘naaⁿ' Jesús nda̱a̱'yo', jom cwiluiiñê Cristo.
4. Quia jo' nt'om nn'aⁿ judíos'ñeeⁿ jla'yu'na, jla'jomndyena ñequio Pablo ñ'eⁿ Silas. Mati nn'aⁿ na nchii judíos na cwila't'maaⁿ'ndye Ty'o̱o̱ts'om jndyendyena jla'yu'na. Mati jndye yolcu na cwiluiitquiendye jla'yu'na.
5. Sa̱a̱ joo nn'aⁿ judíos na tyoola'yu' jeeⁿ ndya' ta̱a̱' n'omna nn'aⁿ na cwila'yu' ñ'oom na mañequiaa Pablo. Jo' chii jla'tjomna cwii tmaaⁿ' nn'aⁿ na wi'ndye. Jnda̱ chii jla'jmeiⁿ'na nn'aⁿ tsjoomna. Ndo' ty'ena waa' ts'aⁿ na jndyu Jasón. Ty'equie'na w'aa'ñeeⁿ ñequio na jndei'na' na cwil'ueena Pablo ñequio Silas ee ñe'catsa̱'na naⁿ'ñeeⁿ jo nda̱a̱ nn'aⁿ tsjoomna.
6. Sa̱a̱ tîcaliuna naⁿ'ñeeⁿ, jo' chii ty'eñ'omna Jasón ñequio nt'omcheⁿ nn'aⁿ na cwila'yu'. Ñequio na jndei'na' ty'echona naⁿ'ñeeⁿ jo nda̱a̱ naⁿmaⁿn'iaaⁿ tsjoomna. Jndeii tyolaxuaana, jluena:—Joo naⁿnom na cwila'ñ'eeⁿ'ndyena nn'aⁿ na cha'waa tsjoomnancue, mati ñjaaⁿ jnda̱ tquiena.
7. Ndo' Jasónm'aaⁿ jnda̱ seiljoom joona waⁿ'aⁿ. Ndo' cha'tso naⁿm'aⁿ' cwil'ana na tjaa yuu l'ue ñ'oom na maqueⁿ tsaⁿmaⁿts'iaaⁿ t'maⁿ tsjoom Roma, ee cwiluena cwiicheⁿ ts'aⁿ m'aaⁿ na matsa̱'ntjom na jndyu Jesús.
8. Ndo' naⁿmaⁿn'iaaⁿ ñequio nn'aⁿ tsjoom'ñeeⁿ, quia jndyena ñ'oommeiⁿ' jla'jmeiⁿ'ndyena.
9. Sa̱a̱ Jasón ñequio nt'omcheⁿ nn'aⁿ na cwila'yu', jnda̱ na tioomna s'om, quia jo' jla'candyaandye naⁿ'ñeeⁿ joona. Pablo ñ'eⁿ Silas cwiñequiana ñ'oom' Ty'o̱o̱ts'om tsjoom Berea
10. Jnda̱ na teijaaⁿ xuee'ñeeⁿ nn'aⁿ na cwila'yu' mañoom' jñoomna Pablo ñ'eⁿ Silas na c'oo naⁿ'ñeeⁿ tsjoom Berea. Quia na jnda̱ tquiena tsjoom'ñeeⁿ ty'ena wats'om ‘naaⁿ nn'aⁿ judíos.
11. Nn'aⁿ judíos tsjoom Berea'ñeeⁿ ya nn'aⁿndyetina nchiiti nc'iaana na m'aⁿ tsjoom Tesalónica. Ñequio na xcwee' n'omna tyoqueⁿna cwenta ñ'oom na tyolue naⁿ'ñeeⁿ. Ndo' ‘io ndi ‘io tyola'naaⁿna ñ'oom' Ty'o̱o̱ts'om na teiyo teiljeii na tyol'ueena aa mayuu' ñ'oom na cwilue naⁿ'ñeeⁿ nda̱a̱na.
12. Jo' chii jndyendye nn'aⁿ judíos jla'yu'na. Mati nn'aⁿ na cwilaneiⁿ ñ'oom griego, jndye yolcu na t'maⁿti cwiluiitquiendye ndo' mati naⁿnom na cwilaneiⁿ griego jndyendyena jla'yu'na.
13. Sa̱a̱ nn'aⁿ judíos na m'aⁿ Tesalónica jndyena na mañequiaa Pablo ñ'oom' Ty'o̱o̱ts'om nda̱a̱ nn'aⁿ Berea. Jo' chii ty'ena tsjoom'ñeeⁿ, ty'ela'jmeiⁿ'na naⁿ'ñeeⁿ.
14. Jo' chii nn'aⁿ na cwila'yu' jla'tyuaa'na jñoomna Pablo na cjaⁿ ‘ndyoo ndaaluee. Sa̱a̱ Silas ñequio Timoteo ljoo'ndyena Berea'ñeeⁿ.
15. Nn'aⁿ na ty'ela'jomndye ñ'eⁿ Pablo ty'eca'ndyena jom tsjoom Atenas. Jnda̱ chii ty'elcwee'na tsjoomna Berea. Ty'eñ'omna ñ'oom na seintyjaañe Pablo nda̱a̱na na catseityuaa' Silas ñ'eⁿ Timoteo na nnc'oontyjo̱na naxeeⁿ'eⁿ. Tila'yoo'ndyena. Pablo matseineiiⁿ nda̱a̱ nn'aⁿ tsjoom Atenas
16. Yocheⁿ na meindoo' Pablo joona tsjoom Atenas seilioo'ñê na nty'iaaⁿ'aⁿ na cha'waa quii' tsjoom'ñeeⁿ too' ‘naⁿ na cwe' nn'aⁿ l'a.
17. Jo' chii tyotseineiiⁿ nda̱a̱ nn'aⁿ judíos naquii' wats'om ‘naaⁿna ñequio nda̱a̱ nt'omcheⁿ nn'aⁿ na cwitjomndye jo' jo' na cwila't'maaⁿ'ndye Ty'o̱o̱ts'om. Mati ‘io ndi ‘io tyotseineiiⁿ nda̱a̱ nn'aⁿ na m'aⁿ ts'ua t'maⁿ.
18. Tyom'aⁿ nt'om nn'aⁿ naquii' tsjoom'ñeeⁿ na cwila'jomndye ñ'oom na cwit'mo̱o̱ⁿ nn'aⁿ epicúreos ndo' tyom'aⁿ nt'omcheⁿ nn'aⁿ na cwilajomndye ñ'oom na cwit'mo̱o̱ⁿ nn'aⁿ estoicos. To̱' naⁿ'ñeeⁿ na cwila'neiⁿna ñ'eⁿ Pablo. Nt'omndye joona jluena:—¿Ljo' ñ'oom matseineiⁿ tsaⁿm'aaⁿ' na jeeⁿ jndye ñ'oom ntyjeeⁿ?Ndo' nt'omndyena jluena:—Ndoo' ntyjii matseineiiⁿ cantyja ‘naaⁿ nty'o̱o̱ts'om xcondye.Luaa' jluena ee tyotseineiⁿ Pablo nda̱a̱na cantyja ‘naaⁿ' Jesús ndo' cantyja na nncwando'xco ts'aⁿ xeⁿ jnda̱ tue'.
19. Quia jo' ty'eñ'omna jom cwii joo na jndyu Areópago yuu cwitjomndye nn'aⁿ na cwi'oocandye ñ'oom. Jluena nnoom:—Cwa catsu' nda̱a̱yâ chiuu waa ñ'oom xco na ma'mo̱o̱ⁿ' nda̱a̱ nn'aⁿ.
20. Ee tijoom ñejndya̱a̱yâ ñ'oom na mañequiaa', jeeⁿ xuii' juuna'. Jo' chii ñe'caliuuyâ chiuu cwit'mo̱o̱ⁿ ñ'oommeiⁿ'.
21. Ee nn'aⁿ tsjoom Atenas ñequio nn'aⁿ na jnaⁿ nt'omcheⁿ njoom na cwic'eeⁿya tsjoom'ñeeⁿ jeeⁿ ntyjaa' n'omna na ñe'candyena ndo' ñe'cala'neiⁿna meiⁿnquia nnom ñ'oom na xcoti.
22. Quia jo' tjameintyjee' Pablo quii'ntaaⁿ nn'aⁿ yuu cwiwijndaa' ñ'oom. Tsoom:—'O re nn'aⁿ tsjoom Atenas, ndiocheⁿ na manty'iaya, jnda̱ ljeiya na ‘o jeeⁿ cwila't'maaⁿ'ndyo'.
23. Ee quia na tjo̱tseicaandyo̱ quii' tsjom'yo', jndye joo nty'iaya yuu cwila't'maaⁿ'ndyo'. Jo' ljeiya cwii tio na chuna' ljeii: “Tiowaa' cwentaa' Ty'o̱o̱ts'om na ticata'jnaaⁿ'a.” Majuu Ty'o̱o̱ts'om na cwe' cwila't'maaⁿ'ndyo'to'yo' meiⁿ ticata'jnaaⁿ'yo' jom, majom na matseina̱ⁿya nda̱a̱'yo' cantyja ‘naaⁿ'aⁿ.
24. 'Jom s'aaⁿ tsjoomnancue ñequio cha'tso ‘naⁿ na niom nnomna'. Cwiluiiñê na matsa̱'ntjoom cha'waa cañoom'luee ñequio tsjoomnancue. Jo' chii ticaⁿna' w'aa na nl'a nn'aⁿ yuu na nnc'oomñê.
25. Meiⁿ ticaⁿna' nn'aⁿ na nntei'x'ee jom ee tjaa'naⁿ ljo' na matsei'tjo̱o̱na' jom. Ee nqueⁿ mañequiaaⁿ na cha'tsondyo̱ cwitando̱o̱'a, cwitjaaya jndye ñequio cha'tsoti ‘naⁿ na macaⁿna' jaa.
26. 'Ñequio ñe'cwii ts'aⁿ s'aaⁿ tsjaaⁿ jaa nn'aⁿ tsjoomnancue meiⁿ na meinch'o̱ ndyuaa na m'aaⁿya ee nqueⁿ s'aaⁿ na jnda̱ t'oom'ndyo̱ cha'waa nnom tsjoomnancue. Ndo' seijndaa'ñê cwaaⁿ xjeⁿ nncue'ntyjo̱ na nnc'oom ts'aⁿ ndo' yuu na cwii cwii joo.
27. Luaa' s'aaⁿ cha cha'tsondyo̱ jaa cal'ua̱a̱ya jom, cal'aanc'uaa'ndyo̱ na calacandyoo'ndyo̱ na nnta'jnaaⁿ'a jom, meiiⁿ na mayuu' titquia m'aaⁿ ñequio cwii cwiindyo̱.
28. Ee cantyja ‘naaⁿ' jom cwitando̱o̱'a, cwima'no̱o̱ⁿya ndo' cwic'a̱a̱ⁿya cha'xjeⁿ tyolue nt'om nn'aⁿ'yo' na jndo̱' n'om. Tyoluena: “Jaa laxmaaⁿya ntseinda Ty'o̱o̱ts'om.”
29. Jo' chii nc'e na cwilaxmaaⁿya ntseinda Ty'o̱o̱ts'om ticaty'iomna' na nlajoom'ndyo̱ jom cwe' cwii ‘naⁿ na tuiina' ñequio s'om cajaⁿ, oo s'om xuee, oo ljo̱' na cwil'a nn'aⁿ cwe' cantyja na cwila'tiuu cheⁿnquieena.
30. Ncuee na jnda̱ teinom, Ty'o̱o̱ts'om seiquii ts'oom ñequio nn'aⁿ cantyja na tijndo̱' n'omna, sa̱a̱ je' je' cha'tso nn'aⁿ meiⁿyuucheⁿ joo na m'aⁿna matsa̱'ntjoom na calcwe' n'omna.
31. Ee jnda̱ seijndaa'ñê xuee na nncu'xeeⁿ jaa nn'aⁿ tsjoomnancue cantyja na maty'iomyana'. Jnda̱ tqueeⁿ na nquii Jesús nncu'xeⁿ jaa. Ndo' jnda̱ t'mo̱o̱ⁿ na mayuu' na nluii na ljo' nda̱a̱ cha'tso nn'aⁿ ee s'aaⁿ na tando'xco juu jnda̱ na tue'.
32. Ndo' nn'aⁿ tsjoom Atenas quia jndyena na matseineiⁿ Pablo cantyja na nntando'xco nn'aⁿ na jnda̱ tja̱, cwantindye joona cwe' tyoncona. Sa̱a̱ nt'omndye joona tyoluena:—'Io cha luaa' nndya̱a̱yaayâ ñ'oomwaa'.
33. Quia jo' jlui' Pablo quii'ntaaⁿna.
34. Sa̱a̱ cwantindye nn'aⁿ jla'jomndyena ñequio Pablo ndo' jla'yu'na, mandiñ'eⁿ Dionisio. Jom ts'aⁿ na cwiluiitquieñe Areópago yuu cwiwijndaa' ñ'oom. Mati yuscu na jndyu Dámaris ñequio nt'omcheⁿ nn'aⁿ jla'yu'na.
| 
