1. Yocheⁿ na m'aaⁿ Apolos tsjoom Corinto ndyuaa Acaya, Pablo tyomanoom njoom nch'u quii' ntsjo̱. Jnda̱ chii tueⁿ'eⁿ tsjoom Éfeso yuu na ljeiiⁿ cwanti nn'aⁿ na jla'jomndye ñ'oom na tyoñequiaa Juan.
2. Matsoom nda̱a̱ naⁿ'ñeeⁿ:—¿Aa tjaquiee' Espíritu Santo naquii' n'om'yo' quia na jlayu'yo'?Jluena nnoom:—Tjaa'naⁿ. Meiⁿchjoo tyoondya̱a̱yâ aa m'aaⁿ Espíritu Santo.
3. Quia jo' matsoom nda̱a̱na:—¿Cwaaⁿ ñ'oom t'mo̱o̱ⁿ nn'aⁿ nda̱a̱'yo' na teits'oomndyo'?Jluena nnoom:—Aa jâ cantyja ‘naaⁿ' ñ'oom na tyo'mo̱ⁿ Juan, jo' na teits'oomndyô̱.
4. Quia jo' tsoom nda̱a̱na:—Juan tyotseits'oomñê nn'aⁿ quia na tyolcwe' n'omna. Ndo' tyotsoom nda̱a̱ naⁿ'ñeeⁿ na cala'yu'na ñequio Jesús tsaⁿ na nndyontyjo̱ naxeeⁿ'eⁿ. Juu tseixmaⁿ Cristo.
5. Ndo' jnda̱ na jndyena ñ'oommeiⁿ' quia jo' teits'oomndyena ñequio xuee' Ta Jesús.
6. Ndo' quia na jnda̱ tio Pablo l'o̱o̱ⁿ nacjoona quia jo' tjaquiee' Espíritu Santo naquii' n'omna. Mana to̱'na tyola'neiⁿna nt'omcheⁿ nnom ñ'oom na nchii ñ'oom na maxjeⁿ cwila'neiⁿna. Tyoñe'quiana ñ'oom na t'mo̱ⁿ Ty'o̱o̱ts'om nda̱a̱na.
7. Naⁿnom'ñeeⁿ cha'na canchoo'wendyena.
8. Cha'na ndyee chi' tyom'aaⁿñe Pablo tsjoom Éfeso ndo' ñequii'cheⁿ tyocaⁿ wats'om ‘naaⁿ nn'aⁿ judíos. Tyotseineiiⁿ nda̱a̱ naⁿ'ñeeⁿ ñequio na t'maⁿ ts'oom. Tyoqueⁿñê tyo'mo̱o̱ⁿ nda̱a̱na cantyja na matsa̱'ntjom Ty'o̱o̱ts'om na mal'uee'ñê na nla'yu'na.
9. Sa̱a̱ cwantindye naⁿ'ñeeⁿ tyola'quie' n'omna, tiñe'cala'yu'na. Ndo' quii'ntaaⁿ nn'aⁿ na jnda̱ tjomndye tyoluena ñ'oom ntjeiⁿ cantyja ‘naaⁿ' natoo' Ty'o̱o̱ts'om. Quia jo' Pablo ‘ñeeⁿ joona, tjachom nn'aⁿ na cwila'yu' w'aa scwela cwentaa' ts'aⁿ na jndyu Tirano. Jo' jo' ticwii xuee tyo'mo̱o̱ⁿ nda̱a̱na.
10. We chu tyo'mo̱o̱ⁿ nda̱a̱ nn'aⁿ hasta cha'tsondye nn'aⁿ judíos ñequio nn'aⁿ na nchii judíos na tyom'aⁿ ndyuaa Asia jndyena ñ'oom naya cantyja ‘naaⁿ' Ta Jesús.
11. S'aa Ty'o̱o̱ts'om na tyoch'ee Pablo ‘naaⁿ t'maⁿ na xocanda̱a̱ nnts'aa na cwe' najndeii nquii ts'aⁿ.
12. Ee liaa ñequio payom ‘naaⁿ nn'aⁿwii, jnda̱ na ty'ioom nn'aⁿ joona' Pablo, n'maaⁿ naⁿwii'ñeeⁿ. Mati nn'aⁿ na m'aⁿ jndyetia naquii' n'om tjei'na' jndyetia'ñeeⁿ.
13. Nt'om nn'aⁿ judíos na calua'ndye tyoma'nomna, tyotjeii'na jndyetia naquii' n'om nn'aⁿ. Jnda̱ chii jla'tiuuna na nntjeii'na jndyetia ñequio xuee' Ta Jesús. Jo' chii cwii cwiindyena tyoluena nda̱a̱ jndyetia:—Matsa̱'ntjo̱ⁿya na calui'yo' ñequio xuee' Jesús, tsaⁿ na matseineiⁿ Pablo cantyja ‘naaⁿ'.
14. Maljo' tyol'a cha'tso ntquiee' ntseinda cwii ts'aⁿ judío na jndyu Esceva. Tsaⁿ'ñeeⁿ tyee na cwiluiitquieñe.
15. Sa̱a̱ t'o̱ jndyetia, matsoom nda̱a̱na:—Jesús mawajnaⁿ'a, ndo' mati Pablo, sa̱a̱ ‘o je' ¿'ñeeⁿ cwiluiindyo'?
16. Ndo' juu tsaⁿs'a'ñeeⁿ na maleiñ'oom jndyetia, tju'ñê nacjoona. Jnaaⁿ joona. Cwajndii s'aaⁿ hasta ‘ñeeⁿ joona na ñecantsei'ndyena ndo' tquiee'ndyena. Jndeii jlui'na naquii' w'aa na jlei'nomna jom.
17. Ndo' cha'tso nn'aⁿ judíos ñequio nn'aⁿ na nchii judíos na tyom'aⁿ tsjoom Éfeso'ñeeⁿ jliuna na ljo' tuii. Jo' chii cha'tsondyena tyuena, ndo' tyola't'maaⁿ'ndyena xuee' Ta Jesús.
18. Mati nn'aⁿ na jnda̱ jla'yu' jndyendyena tquionquiana jnaaⁿna, tjei'yuu'ndyena ljo' ñel'ana na ticatsa̱'ntjomna'.
19. Jndye nn'aⁿ na ñet'om na calua'ndye, tquiochona nom ‘naaⁿna na quio cwil'ana ts'iaaⁿ'ñeeⁿ. Jla'cona joona' jo nda̱a̱ cha'tso nn'aⁿ. Ndo' quia na tjeii'na cwenta cwanti na jnda nom'ñeeⁿ jliuna na jndana' wen'aaⁿ nchoo' qui meiⁿ s'om xuee.
20. Maxjeⁿ tjawit'maaⁿ' ñ'oom ‘naaⁿ' Ta Ty'o̱o̱ts'om. Tjawijndyendyeti nn'aⁿ tyola'yu'.
21. Jnda̱nquia seitiuu Pablo na nncjaawinoom ndyuaa Macedonia ñequio ndyuaa Acaya. Jnda̱ chii nncjaⁿ tsjoom Jerusalén. Xeⁿ jnda̱ tjaaⁿ Jerusalén maxjeⁿ jndei'na' na cjaⁿ tsjoom Roma.
22. Quia jo' we nn'aⁿ na cwitei'jndeii jom, juu Timoteo ñequio Erasto, jñoom joona, ty'eñetina ndyuaa Macedonia, sa̱a̱ nqueⁿ ljoo'ñetyeeⁿ ndyuaa Asia. Jla'jmeiⁿ'ndye nn'aⁿ tsjoom Éfeso
23. Ncuee'ñeeⁿ jeeⁿ t'maⁿ ñ'oom s'aana' tsjoom Éfeso na tyotseineiⁿ Pablo cantyja ‘naaⁿ' natoo' Ty'o̱o̱ts'om.
24. Ee jo' jo' tyom'aaⁿ cwii tsaⁿs'a na jndyu Demetrio na tyotseindo̱ s'om. Ñequio s'om xuee tyoch'eeⁿ na jlui'tsjaaⁿ wats'om cwentaa' ndyo̱o̱ Diana. T'maaⁿ' tantjoom ñequio nc'iaaⁿ'aⁿ na tyol'ana ts'iaaⁿ'ñeeⁿ.
25. Seitjoom naⁿ'ñeeⁿ ñequio nt'omcheⁿ nn'aⁿ na majo' ts'iaaⁿ cwil'a. Matsoom nda̱a̱na:—'O re nn'aⁿya manquiu'yo' cantyja ‘naaⁿ' ts'iaaⁿwaa jeeⁿ ya cwitantjo̱o̱ⁿya.
26. Sa̱a̱ cwindye'yo' ndo' cwinty'ia'yo' na manom Pablo. Matsoom ts'iaaⁿ na cwil'a nn'aⁿ ñequio lueena, tiyuu' na Ty'o̱o̱ts'om joona'. Ndo' nchii macanda̱ nn'aⁿ tsjoom ñjaaⁿ Éfeso sa̱a̱ manntycwii ndyuaa Asia jnda̱ s'aaⁿ na cwiñequiandye nn'aⁿ ñequio ñ'oomwaa' na matseineiiⁿ.
27. Jo' na jeeⁿ teincuu' ee ts'iaaⁿ na cwil'aaya jaach'eetona' na cwe' ts'iaaⁿ'ndyo. Ndo' mati wats'om t'maⁿ na ndii' Diana, ndyo̱o̱ na nquiu cha'tso nn'aⁿ na t'maⁿti ñ'oom tseixmaⁿ, jaach'eetona' tjaa ‘ñeeⁿ cwitjo̱o̱ñe wats'om'ñeeⁿ. Je' nn'aⁿ na m'aⁿ cha'waa ndyuaa Asia ñequio cha'waa tsjoomnancue cwila't'maaⁿ'ndyena juu sa̱a̱ cwe' ts'iaaⁿ na mach'ee Pablo nntycwii na jeeⁿ t'maⁿ ñ'oom juu nquiuna.
28. Quia jndyena ñ'oommeiⁿ' jeeⁿcheⁿ ndya' jla'wjeena. Jndeii tyola'xuaana, tyoluena:—Nquii Diana cwentaa jaa nn'aⁿ Éfeso, jeeⁿ t'maⁿ ñ'oom.
29. Quia jo' cwe' seiñ'eeⁿ'tona' nn'aⁿ cha'waa naquii' tsjoom'ñeeⁿ. Mantyja t'uena Gayo ñequio Aristarco, nn'aⁿ na ñ'eeⁿ ñ'eⁿ Pablo na jnaⁿ ndyuaa Macedonia. Ty'echona naⁿ'ñeeⁿ, ty'equie'na naquii' w'aa yuu cwitjomndye nn'aⁿ quia na waa jomta.
30. Pablo ñe'cjaaqueⁿ'eⁿ w'aa'ñeeⁿ sa̱a̱ tinquia nn'aⁿ na cwila'yu' na nncjaⁿ.
31. Mati cwanti nn'aⁿ na m'aⁿ n'iaaⁿ nda̱a̱ nn'aⁿ ndyuaa Asia na ya ñ'oom ñ'eⁿ Pablo, jla'cwanomna ñ'oom na m'aaⁿ na tincjaaqueⁿ'eⁿ w'aa'ñeeⁿ.
32. Nn'aⁿ na jnda̱ tjomndye naquii' w'aa'ñeeⁿ nchii na nndi' ljo' cwiluena, cwe' c'uaato m'aⁿna. Nt'omndye naⁿ'ñeeⁿ cwii ñ'oom cwila'xuaana, ndo' nt'omndyena cwiicheⁿ ñ'oom cwila'xuaana. Ee majndyendyetina ticaliuna ljo ts'iaaⁿ' na tjomndyena.
33. Sa̱a̱ nn'aⁿ judíos l'ana na cjaatseineiⁿ cwii ts'aⁿ na jndyu Alejandro nda̱a̱ nn'aⁿ. Ee nt'om nn'aⁿ majnda̱ jluena nnoom ljo' ts'iaaⁿ' na tjomndyena. Jo' chii seiweeⁿ ts'o̱o̱ⁿ na cala'cheⁿ nn'aⁿ ee na ñe'catseineiiⁿ ñ'oom nda̱a̱na ñ'oom na ncwañoom'na' nn'aⁿ judíos.
34. Sa̱a̱ quia na tqueⁿna cwenta na jom ts'aⁿ judío, cha'tsondyena jla'tjoom'na jndyeena. Cha'na cwii we hora ñe'cwii tyola'xuaana, tyoluena:—Jeeⁿ t'maⁿ ñ'oom tseixmaⁿ Diana cwentaa jaa nn'aⁿ Éfeso.
35. Quia jo' tsaⁿtseiljeii tsjoom'ñeeⁿ, quia na jnda̱ jnda̱a̱ s'aaⁿ na seicheeⁿ joona, tsoom:—'O nn'aⁿ Éfeso, nn'aⁿ cha'waa tsjoomnancue manquiuna na jaa nn'aⁿ tsjoomwaa teijnoomya na nntei'x'a̱a̱ya wats'oom' ndyo̱o̱ Diana na nquiuuya na t'maⁿti ñ'oom tseixmaⁿ. Mati cwitei'x'a̱a̱ya tsjo̱' na tuiina' cha'xjeⁿ nqueⁿ na jnaⁿna' cañoom'luee jndyocuena' na m'aaⁿya.
36. Meiⁿ tjaa ‘ñeeⁿ nntso na tiyuu' na ljo'. Jo' chii cala'cheⁿndyo'. Tacal'a'yo' na ñoomñoom ljo' nl'a'yo'.
37. Ee ti'm'aⁿ' na tquio'cho'yo' ñjaaⁿ chaa' l'uu jnda̱ nty'ueena ‘naⁿ na tseixmaⁿ ndyo̱o̱ Diana na cwila't'maaⁿ'ndyo̱, meiⁿ tyooluena ñ'oom ntjeiⁿ nacjoom'm.
38. Jo' chii Demetrio ñequio nn'aⁿ na ñe'cwii ts'iaaⁿ cwil'ana ñ'eⁿñê, xeⁿ waa ñ'oom na ñe'queⁿna nacjoo' ts'aⁿ quia jo' c'oona na m'aaⁿ jwe. Ee na m'aaⁿ jom cwiwijndaa' ñ'oom na cwiqueⁿ nn'aⁿ nacjoo nc'iaana.
39. Ndo' xeⁿ waa cwiicheⁿ ñ'oom na l'ue n'om'yo' na nleijndaa', nleijndaa'na' quia na nncuaa jomta.
40. Ee teincuu' na luaa' cwil'a'yo' xuee je' ee nnda̱a̱ nntso gobiernom na cwilawendyo̱ nacjoom'm ee xeⁿ nncwax'eeⁿ nda̱a̱ya tjaa'naⁿ ljo' ñ'oom ya nnt'o̱o̱ya nnoom.
41. Quia na jnda̱ seineiiⁿ ñ'oomwaa', tsoom na cat'oom'ndyena.
| 
