1. Jnda̱ na teicheⁿ tia' t'maⁿ'ñeeⁿ, Pablo tqueeⁿ'eⁿ nn'aⁿ na cwila'yu'. Tyotseineiiⁿ nda̱a̱na ñ'oom na nñequiaana' na t'maⁿ n'omna. Ndo' t'maⁿndye ntyjeena. Jnda̱ chii jlueeⁿ'eⁿ tjaaⁿ ndyuaa Macedonia.
2. Tyomanoom cha'waa ndyuaa'ñeeⁿ. Tyotseineiiⁿ nda̱a̱ nn'aⁿ na cwila'yu' ñ'oom na tquiaatina' na t'maⁿ n'omna. Jnda̱ chii tjaaⁿ, tueⁿ'eⁿ ndyuaa Grecia.
3. Ndyee chi' t'oomñê jo' jo'. Jnda̱ chii manncuo̱o̱ⁿ w'aandaa na wjaⁿ ndyuaa Siria, ndo' ljeiiⁿ ñ'oom na cwindo̱o̱ nn'aⁿ judíos jom. Jo' chii seitioom na nomtyuaa nncjaalcweeⁿ'eⁿ, nncwinomnnaaⁿ'aⁿ ndyuaa Macedonia.
4. Tyom'aⁿ nt'om nn'aⁿ na tyocañ'eeⁿ ñ'eⁿñê. Tyocañ'eⁿ Sópater ts'aⁿ tsjoom Berea. Mati ñ'eⁿ Aristarco ñequio Segundo, joona nn'aⁿ tsjoom Tesalónica. Ndo' tyoñ'eⁿ Gayo ts'aⁿ tsjoom Derbe. Tyoñ'eⁿ Timoteo. Mati Tíquico ñequio Trófimo nn'aⁿ ndyuaa Asia tyocañ'eeⁿna ñ'eⁿ Pablo.
5. Joo naⁿ'ñeeⁿ ty'eñetina. Tquiena tsjoom Troas. Jo' jo' tyomei'ndoo'na Pablo ñ'eⁿ ja Lucas.
6. Jâ tyom'aaⁿyâ tsjoom Filipos ncuee na cwicwa' nn'aⁿ judíos tyoo' na tjaa'naⁿ ndaaljo' tjaquiee'. Quia na jnda̱ teinom ncuee'ñeeⁿ tuo̱o̱yâ w'aandaa. Saayâ squia̱a̱caño̱o̱ⁿyâ naⁿ'ñeeⁿ tsjoom Troas xuee jnda̱ ‘om. Jo' jo' ljoo'ndyô̱ cwii ntquiee' xuee. Tyotseineiⁿ Pablo nda̱a̱ nn'aⁿ na cwila'yu' tsjoom Troas
7. Xuee najndyee smaⁿna, nn'aⁿ na cwila'yu' tjomndyena na nl'ana xeⁿntaⁿ' tyoo' na nlcwa'na na cwicañjom n'omna Jesús. Ndo' tyotseineiⁿ Pablo nda̱a̱na. Na nneiⁿncoo cwiicheⁿ xuee mawjaⁿ, jo' chii tyotseineiiⁿ tyotseineiiⁿ nda̱a̱na hasta tuee' xcwe tsjom.
8. Jeeⁿ jndye ncjocandi na niom chom cuarto nandye yuu tyom'aⁿna.
9. Ndo' cwii tsaⁿs'a na titquieñe na jndyu Eutico wacatyeeⁿ mantana cuarto'ñeeⁿ na jnda̱ ndyee na teicantyjoo'na'. Tyjee' na ñe'catsom ee teincoo ñ'oom tyoñequiaa Pablo. Jo' chii jnaⁿjndeii tsaⁿtsjom ñ'eⁿñê. Mana tiooñê xjeⁿ nomtyuaacheⁿ. Ty'ela'we nn'aⁿ jom, jnda̱ tueeⁿ'eⁿ.
10. Quia jo' Pablo tjacueeⁿ. Tcoom'm xtyeeⁿ nacañoom' tsaⁿ'ñeeⁿ, taxcweeñê juu. Matsoom nda̱a̱ nn'aⁿ na cwila'yu':—C'om't'maaⁿ'ndyo' n'om'yo'. Mawando'nnda' tsaⁿm'aaⁿ.
11. Jnda̱ tsoom na ljo' tjawannaaⁿ'aⁿ naquii' w'aa. Tyoch'eeⁿ xeⁿntaⁿ' tyoo' tcwa'na na tyocañjom n'omna Jesús. Jnda̱ chii tyotseineiⁿtyeeⁿ hasta na tjawixueecheⁿ. Jnda̱ jo' mana tjaaⁿ.
12. Ndo' tsaⁿs'a'ñeeⁿ na titquieñe nchii cwe' cwantindyo tquiaana' na neiiⁿ nn'aⁿ na wando'nnaaⁿ'aⁿ. Tjanty'iaa' Pablo nn'aⁿ tsjoom Troas ñ'eⁿ Mileto
13. Jâ saañetya̱a̱yâ ñ'eⁿ w'aandaa hasta tsjoom Asón. Jnda̱ t'maaⁿyâ na jo' jo' nleincwindyô̱ ñ'eⁿ Pablo ee jom nomtyuaa wjaⁿ.
14. Jnda̱ na teincwindyô̱ tsjoom Asón ñe'cwi saayâ ñ'eⁿ w'aandaa. Squia̱a̱yâ tsjoom Mitilene.
15. Jluii'â jo' jo' ndo' cwiicheⁿ xuee tei'no̱o̱ⁿyâ ndyuaaxeⁿncwe na jndyu Quío. Cwiicheⁿ xuee squia̱a̱yâ ndyuaaxeⁿncwe Samos. Jnda̱ chii saayâ ta'jndya̱a̱yâ ndyuaa Trogilio. Cwiicheⁿ xuee saatya̱a̱yâ squia̱a̱yâ tsjoom Mileto.
16. Ee jnda̱ seitiuu Pablo na ticjaameintyjeeⁿ'eⁿ tsjoom Éfeso ndyuaa Asia ee ntyjeeⁿ xeⁿ nncwinoom jo' jo' nntseiyoo'na' jom ndo' matseityuaaⁿ'aⁿ cha xeⁿ na aa nnda̱a̱ mam'aaⁿ Jerusalén ndo' nncuee' xuee Pentecostés. Seineiⁿ Pablo nda̱a̱ nn'aⁿ na cwiluiitquiendye wats'om tsjoom Éfeso
17. M'aaⁿyâ tsjoom Mileto'ñeeⁿ ndo' jñoom nn'aⁿ na nnc'ooqueeⁿ'ndyena nn'aⁿ Éfeso na cwiluiitquiendye naquii' tmaaⁿ' nn'aⁿ na cwila'yu' tsjoom'ñeeⁿ.
18. Ndo' jnda̱ na tquie'cañom naⁿ'ñeeⁿ, matsoom nda̱a̱na:—'O manquiu'yo' chiuu tyom'aaⁿya quii'ntaaⁿ'yo' cantyjati xuee na tyja̱jndya̱a̱ya ndyuaa Asiawaa.
19. Tyondi'ntjo̱ⁿya nnom Ta Ty'o̱o̱ts'om ñequio na tyoju'ndyo̱cja̱ya. Ndo' tyot'io̱o̱ya na jnda ntyjiiya ndo' wi' tyotjo̱ⁿya na tyondo̱o̱ nn'aⁿ judíos ja.
20. Sa̱a̱ tîcjo̱meintyja̱a̱'a na tyotseina̱ⁿya nda̱a̱'yo' na tyotsjo̱o̱ cha'tso ñ'oom na mateijndeiina' ‘o. Tyo'mo̱o̱ⁿ nda̱a̱'yo' quia na tyotjomndyo' ndo' mati naquii' l'a'yo'.
21. Cha'tsondyo' tyocwji'yuu'ndyo̱ nda̱a̱'yo', meiiⁿ nn'aⁿ judíos meiiⁿ nchii nn'aⁿ judíos. Tsjo̱o̱ na calcwe' n'om'yo' nnom Ty'o̱o̱ts'om ndo' cala'yu'yo' ñequio Taya Jesucristo.
22. Ndo' je', majo̱ Jerusalén ee luaa' matsa̱'ntjom Espíritu Santo ja, meiⁿ ticaljeiiya ljo' nntjo̱ⁿya la'ñeⁿ.
23. Macanda̱ ntyjii ticwii cwii tsjoom na mawino̱o̱ⁿya ma'mo̱ⁿ Espíritu Santo no̱o̱ⁿ na maxjeⁿ nnta'wi' nn'aⁿ ja la'ñeⁿ ndo' nntuee'na ja w'aancjo.
24. Sa̱a̱ tjaa na coch'eena' ja na ljo' catjo̱ⁿ meiⁿ ticajnda ntyjii meiiⁿ xeⁿ na nlacuee' nn'aⁿ ja. Ñe'cwii ntyjaa' ts'o̱o̱ⁿya na ñequio na neiⁿya nntseicanda̱a̱'ndyo̱ ts'iaaⁿ na tquiaa Ta Jesús no̱o̱ⁿ na nncwji'yuu'ndyo̱ ñ'oom naya cantyja na wi' ts'om Ty'o̱o̱ts'om nn'aⁿ. Ee jo' na macwji'n'maaⁿñê nn'aⁿ na cwila'yu'.
25. 'Ndo' je' je' canty'ia'yo', cha'tsondyo' na tyoñequiaya ñ'oom nda̱a̱'yo' cantyja ‘naaⁿ' na matsa̱'ntjom Ty'o̱o̱ts'om, ntyjii na taxocanty'ia'nnda'yo' ja.
26. Jo' chii xuee je' macwji'yuu'ndyo̱ nda̱a̱'yo' na meiiⁿ na nntsuuñe cwii ts'aⁿ sa̱a̱ ja tatjaa'naⁿ jnaⁿ cwii cacho̱o̱ya nda̱a̱'yo'.
27. Ee cha'tso ñ'oom na l'ue ts'om Ty'o̱o̱ts'om na catsjo̱o̱ nda̱a̱'yo' jnda̱ tsjo̱o̱. Meiⁿcwii ñ'oom tîcat'iuu'ndyo̱ nda̱a̱'yo'.
28. Quia jo' cal'a'ndyo'cheⁿncjo'yo' cwenta ndo' mati cha'tso nn'aⁿ na cwila'yu', ee jnda̱ ty'iom Espíritu Santo ts'iaaⁿ ‘o na catei'x'e'yo' tmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ na tue' Jesús cwentaana.
29. Ee ntyjii quia na tac'o̱o̱ⁿndyo̱ ñ'eⁿndyo', nlquie nn'aⁿ naquii' ntaaⁿ'yo' na nla'ndaa'na n'om'yo' na cwilayu'yo' cha'na cwitjoom canmaⁿ. Ee quia na cwiquie lowo quii'ntaaⁿyo' cwila'cwjee lowo'ñeeⁿ jooyo'.
30. Hasta quii'ntaaⁿ' ncjo'yo' nnto̱' nt'om nc'iaa'yo' nnt'mo̱o̱ⁿna nda̱a̱'yo' sa̱a̱ taxcwe cha'xjeⁿ ñ'oom na mayuu'. Laa'ti' nnt'mo̱o̱ⁿna cha nt'omndyo' ‘o ñequio nc'iaa'yo' na mati cwila'yu' nlajomndyo' ñ'eⁿndyena.
31. Jo' chii c'omc'eendyo', ndo' cjaañjoom' n'om'yo' cwii ndyee chu naxuee ndo' natsjom tîcjo̱meintyja̱a̱'a na tyoteijndeitya̱ya ‘o cha nntsaala'no̱ⁿ'ti'yo' ñ'oom' Ty'o̱o̱ts'om. Ñes'aa na ljo' ñequio na tyot'io̱o̱ya na jnda ntyjiiya.
32. 'Ndo' je' je' ‘o nn'aⁿya ma'ndiya ‘o ñequio l'o̱ Ty'o̱o̱ts'om ñequio juu ñ'oom naya na matseixmaaⁿ. Cantyja ‘naaⁿ' juuna' nntsaanajnda̱'yo' ndo' tjom nnto'ñoom'yo' naya na mañequiaaⁿ nda̱a̱ cha'tsondye nn'aⁿ na cwiluiindye cwentaaⁿ'aⁿ.
33. Ja tyootseiqueeⁿ ts'o̱o̱ⁿ meiⁿ s'om xuee, meiⁿ s'om cajaⁿ, meiⁿ liaa' ts'aⁿ.
34. ‘O nquiu'yo' nnco̱ tyots'aa ts'iaaⁿ ñequio l'o̱o̱ na tyowantyjo̱ⁿ ‘naⁿ na tyocaⁿna' ja ñequio nn'aⁿ na ñeñ'eeⁿ ñ'eⁿndyo̱.
35. Cantyja na tyots'aa ñequii'cheⁿ tyo'mo̱o̱ⁿya nda̱a̱'yo' na ts'iaaⁿ cal'a'yo' cha nnda̱a̱ nntei'jndei'yo' nn'aⁿ na matsei'tjo̱o̱na'. Cjaañjoom' n'om'yo' ñ'oom na tyotseineiⁿ Ta Jesús. Tyotsoom: “Mat'maⁿti matio'naaⁿñena' ts'aⁿ na mañequiaa nchiiti ts'aⁿ na maco'ñom.”
36. Quia na jnda̱ seineiⁿ Pablo ñ'oommeiⁿ', quia jo' tcoom'm xtyeeⁿ. Ndo' ñequio cha'tsondye naⁿ'ñeeⁿ tyola'neiⁿna nnom Ty'o̱o̱ts'om.
37. Cha'tsondyena tyotyueena, tyota'xcweendyena Pablo, ndo' tyot'uena ts'o̱o̱ⁿ.
38. Ee jeeⁿ jnda nquiuna na tsoom nda̱a̱na na taxocanty'iaannda'na jom. Jnda̱ chii ty'eca'ndyena jom yuu waa w'aandaa.
| 
