1. Jnda̱ti ndyee xuee na mam'aaⁿ Festo ts'iaaⁿ quia jo' jlueeⁿ'eⁿ Cesarea tjaaⁿ Jerusalén.
2. Ndo' ntyee na cwiluiitquiendye ñequio nn'aⁿ na cwiluiitquiendye nda̱a̱ nn'aⁿ judíos ty'enquiana jnaaⁿ' Pablo nnom tsaⁿ'ñeeⁿ.
3. Tyotaⁿna na cats'aaⁿ cwii naya'ñeeⁿ na cjaacandyoo'ñe Pablo. Taⁿna na ljo' ee jnda̱ jla'tiuuna na nndo̱o̱na tsaⁿ'ñeeⁿ nato na nla'cuee'na juu.
4. Sa̱a̱ Festo tinquiaaⁿ ñ'oom'm. Tsoom nda̱a̱na:—Pablo maxjeⁿ m'aaⁿ pra̱so Cesarea ndo' ja tajndye cwii tjo̱o̱ na nncjo̱lcwa̱'a jo' jo'.
5. Jo' chii ‘o nn'aⁿ na cwiluiitquiendyo' tsa'yo' Cesarea ñ'eⁿndyo̱. Jo' jo' nñe'quia'yo' jnaaⁿ' tsaⁿ'ñeeⁿ xeⁿ waa ljo' s'aaⁿ.
6. Ñe'ñeeⁿ ñe'qui xuee ljoo'ñe Festo Jerusalén. Jnda̱ chii tjalcweeⁿ'eⁿ Cesarea. Teincoo cwiicheⁿ xuee tjawacatyeeⁿ yuu na maxjeⁿ quiwacatyeeⁿ na m'aaⁿ gobiernom. Sa̱'ntjoom na quioñ'omna Pablo.
7. Quia na jnda̱ tyjee' Pablo, mam'aⁿ nn'aⁿ judíos na tquiona Cesarea na jnaⁿna Jerusalén. Ty'ela'candyoo'ndyena nacañom'm. Ndo' t'maⁿ jnaaⁿ'aⁿ tyol'ana sa̱a̱ ticalui'yuu' ñ'oom na cwiluena nacjoom'm.
8. Quia jo' tso Pablo na tiyuu' ñ'oom na cwiluena. Tsoom:—Ja meiⁿchjoo tjaa na cotseitjo̱o̱ndyo̱ meiⁿ na cjoo' ljeii na tqueⁿ Moisés na cwileiñ'o̱o̱ⁿ jâ nn'aⁿ judíos, meiⁿ na cjoo' wats'om t'maⁿ, meiⁿ nnom tsaⁿmaⁿts'iaaⁿ t'maⁿ tsjoom Roma.
9. Sa̱a̱ Festo l'ue ts'oom na c'om nn'aⁿ judíos na ya ñ'oom ñ'eⁿñê. Jo' chii tsoom nnom Pablo:—¿Aa ñe'cja' Jerusalén na jo' jo' nleijndaa'ya ñ'oom ‘naⁿ' na nncu'xa̱ⁿya ‘u?
10. Matso Pablo nnoom:—Je' mameintyja̱a̱'a jo njom' ‘u ta yuu na maty'iomna' na nntu'xeⁿndyo̱ ee ‘u waa na matsei'xmaⁿ' cantyja ‘naaⁿ' tsaⁿmaⁿts'iaaⁿ t'maⁿ tsjoom Roma. Ee nn'aⁿ judíos tjaa na cotseitjo̱o̱ndyo̱ nda̱a̱na ndo' mantyji'ya' na ljo'.
11. Ja nñequiaandyo̱ na nnc'io̱ xeⁿ waa ljo' s'aa na maty'iomna' na c'io̱ na nntio̱o̱ⁿya jnaⁿya. Sa̱a̱ tiyuu' ñ'oom na cwiqueⁿ naⁿm'aⁿ nacjoya. Jo' chii ticwanaaⁿ na nñequiaa ts'aⁿ ja lueena. Ja macaⁿ'a na nquii tsaⁿmaⁿts'iaaⁿ t'maⁿ tsjoom Roma nncu'xeⁿ ja.
12. Quia jo' seineiⁿ Festo ñequio naⁿtquie. Jnda̱ chii tsoom nnom Pablo:—Jnda̱ tcaⁿ' ñ'oom na tsaⁿmaⁿts'iaaⁿ t'maⁿ tsjoom Roma nncu'xeⁿ ‘u. Jo' chii maxjeⁿ wja' na m'aaⁿ jom. Matseineiⁿ Festo cantyja ‘naaⁿ' Pablo nnom Agripa
13. Jnda̱ teinom cwantindyo xuee ndo' tuee' Agripa tsjoom Cesarea ñequio tyjeeⁿ Berenice. Ty'enquiana na xmaⁿñe Festo. Agripa'ñeeⁿ cwiluiiñê tsaⁿ na matsa̱'ntjom nn'aⁿ judíos.
14. Jndye xuee ljoo'ndyena jo' jo'. Jo' chii seineiⁿ Festo cantyja ‘naaⁿ' Pablo nnom Agripa'ñeeⁿ. Matsoom:—Ljoo m'aaⁿ cwii tsaⁿs'a na ‘ndii Félix na pra̱so juu.
15. Quia na tjo̱ya Jerusalén, ntyee na cwiluiitquiendye ñequio nn'aⁿ na cwiluiitquiendye nda̱a̱ nn'aⁿ judíos tyoñe'quiana jnaaⁿ'aⁿ no̱o̱ⁿya. Tyotaⁿna na catsa̱'ntjo̱ⁿya na cueeⁿ'eⁿ.
16. Sa̱a̱ tsjo̱o̱ nda̱a̱na na tiquil'a nn'aⁿ romanos na cwe' nncue'to ts'aⁿ. Najndyee nntjomndye nn'aⁿ wats'iaaⁿ nluena ljo' s'aa ts'aⁿ. Ndo' mati nquii ts'aⁿ nntsoom ljo' s'aaⁿ.
17. Jo' chii quia na jnda̱ tquie naⁿ'ñeeⁿ ñjaaⁿ tîcatseiyoo'ndyo̱. Teincoo cwiicheⁿ xuee mana tjo̱wa'catya̱ⁿya yuu na maxjeⁿ quiwa'catya̱ⁿya na m'aaⁿya ts'iaaⁿ. Sa̱'ntjo̱ⁿ na cjaacandyoo'ñe Pablo.
18. Seitiuuya aa nchii t'maⁿ jnaaⁿ'aⁿ. Sa̱a̱ quia na jlue naⁿ'ñeeⁿ jnaaⁿ'aⁿ sei'no̱ⁿ'a tiyuu' na waa ljo' s'aaⁿ.
19. Macanda̱ cwila'ncjoo'ndyena ñ'eⁿñê cantyja ñ'oom na cwila't'maaⁿ'ndyena ndo' cantyja ‘naaⁿ' Jesús. Ee jnda̱ tue' tsaⁿ'ñeeⁿ sa̱a̱ Pablo matsoom na mawando'xco tsaⁿ'ñeeⁿ.
20. Sa̱a̱ ja ticaljeii chiuu nnts'aayo̱ na nntseijndaa'ndyo̱ ñ'oom'ñeeⁿ. Jo' chii tax'a̱ya ‘ndyoo Pablo aa ya na wjaⁿ Jerusalén na jo' jo' nncu'xa̱ⁿya jom cantyja ‘naaⁿ' ñ'oom'ñeeⁿ.
21. Sa̱a̱ jom tcaaⁿ na nquii Augusto, tsaⁿmaⁿts'iaaⁿ t'maⁿ tsjoom Roma, nncu'xeⁿ jom. Jo' chii sa̱'ntjo̱ⁿya na caljoo'ñê na pra̱so jom hasta xjeⁿ na nnda̱a̱ njño̱o̱ⁿya jom na m'aaⁿ tsaⁿmaⁿts'iaaⁿ t'maⁿ'ñeeⁿ.
22. Quia jo' matso Agripa nnom Festo:—Mati ja ñe'candiiya na nntseineiiⁿ.Matso Festo nnoom:—'Iocheⁿ nndi' nntseineiiⁿ.
23. Teincoo, quia ljo' Agripa ñequio Berenice tcwee'na liaa na jeeⁿ ndya' ya. Ty'ena na m'aaⁿ Festo. Ty'equie'na naquii' w'aa ñequio nn'aⁿ na cwiluiitquiendye nda̱a̱ sondaro ndo' ñequio nn'aⁿ na cwiluiitquiendye quii' tsjoom. Quia jo' sa̱'ntjom Festo na c'ooc'omna Pablo.
24. Ndo' matso Festo:—'U ta Agripa ñequio ‘o na m'aⁿ'yo' ñjaaⁿ, macwinty'ia'yo' tsaⁿs'am'aaⁿ'. Cha'tso nn'aⁿ judíos na m'aⁿ Jerusalén ndo' mati nn'aⁿ na m'aⁿ ñjaaⁿ Cesarea cwiqueⁿna ñ'oom nacjoom'm. Jndeii' ndyueena cwiluena na tseixmaaⁿ na cueeⁿ'eⁿ.
25. Sa̱a̱ ja jnda̱ ljeiya na tjaa ljo' mach'eeⁿ na tseixmaaⁿ na cueeⁿ'eⁿ. Ndo' jnda̱ tcaaⁿ na nquii Augusto, tsaⁿmaⁿts'iaaⁿ t'maⁿ tsjoom Roma, nncu'xeⁿ tsaⁿ'ñeeⁿ jom. Jo' chii jnda̱ seitiuuya na nntseicwano̱ⁿya jom na m'aaⁿ tsaⁿ'ñeeⁿ.
26. Sa̱a̱ tjaa'naⁿ jnaaⁿ'aⁿ na majndaa' na nntseiljeiya na m'aaⁿ ta tsaⁿmaⁿts'iaaⁿ t'maⁿ'ñeeⁿ. Jo' na jnda̱ jndyo̱ñ'o̱ⁿya jom jo nda̱a̱'yo', ndo' majndeiiticheⁿ jo njom' ‘u ta Agripa. L'ue ts'o̱o̱ⁿya na nncwaxe' nnoom. Aa nchii nleijndaa' jnaaⁿ'aⁿ na nntseiljeiya.
27. Ee ja matsjo̱o̱ cwe' ts'iaaⁿ'ndyo na nntseicwano̱ⁿya cwii pra̱so ndo' ticatsjo̱o̱ya chiuu waa jnaaⁿ'aⁿ.
| 
