1. Pedro ñ'eⁿ Juan xcwe na cwila'neiⁿna nda̱a̱ nn'aⁿ, ndo' tquie ntyee na m'aⁿna ñequio ts'aⁿ na matsa̱'ntjom nn'aⁿ na cwil'a cwenta wats'om t'maⁿ. Mati nt'om nn'aⁿ judíos na laxmaⁿna tmaaⁿ' saduceos tquiena.
2. Jnda̱ teilioo naⁿ'ñeeⁿ ee Pedro ñ'eⁿ Juan cwit'mo̱o̱ⁿna nda̱a̱ nn'aⁿ na jnda̱ mawando'xco Jesús, jo' chii mati nn'aⁿ na jnda̱ tja̱ maxjeⁿ ntando'xcona.
3. Quia jo' t'ue naⁿ'ñeeⁿ joona. Ndo' cwe' nc'e na jnda̱ tmaaⁿ, jo' chii tioomya naⁿ'ñeeⁿ joona w'aancjo hasta quia nneiⁿncoo cwiicheⁿ xuee.
4. Sa̱a̱ nn'aⁿ na tyondye ñ'oom' Ty'o̱o̱ts'om na tyoñe'quiana, jndyendye naⁿ'ñeeⁿ jla'yu'na. Ndo' cha'tsoñ'eⁿ nn'aⁿ na cwila'yu' tue'ntyjo̱ cha'na ‘om meiⁿndyena na cwe' naⁿnom.
5. Teincoo cwiicheⁿ xuee naquii' Jerusalén tjomndye nn'aⁿ na m'aⁿ n'iaaⁿ cwentaa nn'aⁿ judíos ñequio nn'aⁿ na cwiluiitquiendye, ñequio nn'aⁿ na cwit'mo̱o̱ⁿ ljeii na tqueⁿ Moisés.
6. Ñ'eⁿ Anás, tyee na cwiluiitquieñe, ñequio Caifás, ñ'eⁿ Juan ñequio Alejandro, ndo' ñ'eeⁿ cha'tsondye nt'omcheⁿ nn'aⁿ na nn'aaⁿna ntyee na cwiluiitquiendye.
7. Tqueeⁿ'ndyena Pedro ñ'eⁿ Juan ndo' tsa̱'na naⁿ'ñeeⁿ quii'ntaaⁿna. Jluena:—¿'Ñeeⁿ tquiaa na jnda̱'yo', ndo' ‘ñeeⁿ ts'aⁿ xuee' cwilei'ñ'om'yo' na luaa' cwil'a'yo'?
8. Ndo' Pedro too' quii' ts'oom m'aaⁿ Espíritu Santo, matsoom nda̱a̱na:—'O re nn'aⁿ na m'aⁿ'yo' n'iaaⁿ ñequio ‘o nn'aⁿ na cwiluiitquiendyo' joo nda̱a̱ jaa nn'aⁿ Israel,
9. na cwita'x'ee'yo' nda̱a̱yâ cantyja naya na tuii ñ'eⁿ ts'aⁿ na ñet'oom na ntjeiⁿ nc'ee, ¿aa ñe'candye'yo' chiuu tuiiyuu na jnda̱ tco'yana' jom?
10. Xeⁿ na ljo', quia jo' cha'tsondyo' ‘o ñequio cha'tsondye nn'aⁿ Israel cala'no̱ⁿ'yo' chiuu waa. Nquii Jesucristo, ts'aⁿ na jnaⁿ Nazaret na ty'iom'yo' ts'oom'naaⁿ, tquiaa Ty'o̱o̱ts'om na tando'xcoom jnda̱ na tueeⁿ'eⁿ. Ñequio xuee' jom jo' na jnda̱ n'maⁿ tsaⁿs'am'aaⁿ' na cwinty'ia'yo' na meintyjeeⁿ'eⁿ jo nda̱a̱'yo'.
11. Juu Jesús cwiluiine tsjo̱' na ‘o na cwiluiitquiendyo' jo nda̱a̱ya jnda̱ tquie'yo'. Sa̱a̱ jnda̱ tacatyeeⁿtyeⁿ tsjo̱'ñeeⁿ nquii tsiaⁿtsjo̱' yuu na t'maⁿti matseixmaⁿna' na cha'tso ljo̱'.
12. Tjaa'naⁿ ‘ñeeⁿ cwiicheⁿ na nnda̱a̱ nncwji'n'maaⁿñe nn'aⁿ macanda̱ nquii Jesús. Ee cha'waa nnom tsjoomnancue tjaa'naⁿ xuee' cwiicheⁿ na tqueⁿ Ty'o̱o̱ts'om na juu nnda̱a̱ nncwji'n'maaⁿñe jaa.
13. Jnda̱ na nty'iaa naⁿmaⁿn'iaaⁿ na tinquiaa' Pedro ñ'eⁿ Juan, ndo' jla'no̱ⁿ'na na tyoola'naaⁿ naⁿ'ñeeⁿ cha'xjeⁿ na nquiuna, ee cwe' nn'aⁿ meiⁿquiandye joona, quia jo' jeeⁿ tyotseitsaⁿ'na' joona, ndo' tjañjoom' n'omna na tyocañ'eeⁿ naⁿ'ñeeⁿ ñ'eⁿ Jesús.
14. Ndo' majndeiiti quia na nty'iaana nacañoom naⁿ'ñeeⁿ meintyjee' ts'aⁿ na jnda̱ tco'yana', jo' chii seicu'ñ'eⁿna' na nluena ñ'oom nacjoo naⁿ'ñeeⁿ.
15. Quia jo' tjeii'yana naⁿ'ñeeⁿ quii'ntaaⁿna. Jnda̱ chii tyola'neiⁿ cheⁿnquieena.
16. Tyoluena:—¿Chiuu nl'aayo̱o̱ ñequio ti'm'aⁿ'? Ee cha'tsondye nn'aⁿ tsjoom ñjaaⁿ Jerusalén manquiuyana na jnda̱ l'a naⁿm'aⁿ' cwii ts'iaaⁿ t'maⁿ na xocanda̱a̱ nnts'aa na cwe' na jndeii nquii ts'aⁿ ndo' jaa xonda̱a̱ nl'uuya na tiyuu' na ljo'.
17. Jo' chii yati cal'uuya nda̱a̱ naⁿm'aⁿ' ñequio na jndei'na' meiⁿcwii nnom ts'aⁿ tala'neiⁿtina ñ'oom cantyja ‘naaⁿ' Jesús, cha tant'omti ñ'oommeiⁿ' quii'ntaaⁿ nn'aⁿ.
18. Quia jo' t'maⁿna naⁿ'ñeeⁿ. Sa̱'ntjomna na meiⁿcwii ñ'oom tala'neiⁿti naⁿ'ñeeⁿ, tant'mo̱o̱ⁿna ñequio xuee' Jesús.
19. Sa̱a̱ Pedro ñequio Juan, jluena:—Ncjo'yo' calatiuu'ya'yo' aa maty'iomna' jo nnom Ty'o̱o̱ts'om na calacanda̱a̱yâ ñ'oom na cwindu' ‘o, nchii ñ'oom na matso jom.
20. Ee jâ tijoom jndaa ca'ndya̱a̱yâ na nlana̱a̱ⁿyâ ljo' na ñenty'iaayâ na tyoch'ee Jesús ndo' na tyondya̱a̱yâ na tyotseineiiⁿ.
21. Sa̱a̱ joo naⁿmaⁿn'iaaⁿ jndeii'ti ñ'oom tyoluena nda̱a̱ naⁿ'ñeeⁿ. Jnda̱ chii jñoomna naⁿ'ñeeⁿ, ee tileicaliuna chiuu ya nnta'wi'na naⁿ'ñeeⁿ ee nquiaana nn'aⁿ quii' tsjoom, ee cha'tsondye nn'aⁿ tyolat'maaⁿ'ndyena Ty'o̱o̱ts'om cantyja na nty'iaana na tco'yana' ts'aⁿ na ñet'oom na ntjeiⁿ nc'ee.
22. Ee tsaⁿs'a'ñeeⁿ, na jeeⁿ t'maⁿ ts'iaaⁿ s'aa Ty'o̱o̱ts'om na tco'yana' jom, jnda̱ teinom wen'aaⁿ choom'm. Nn'aⁿ na cwila'yu' ñe'cwii t'maⁿ jla'neiⁿna nnom Ty'o̱o̱ts'om
23. Pedro ñ'eⁿ Juan, jnda̱ na jndyaandyena, ty'ena na m'aⁿ nc'iaana. Jla'candiina naⁿ'ñeeⁿ cha'tso ñ'oom na tyolue ntyee na cwiluiitquiendye ñequio nn'aⁿ na cwiluiitquiendye quii' tsjoom.
24. Ndo' joo naⁿ'ñeeⁿ, quia na jndyena ñ'oom'ñeeⁿ, ñe'cwii t'maⁿ jla'neiⁿna nnom Ty'o̱o̱ts'om, jluena:—'U Ta Ty'o̱o̱ts'om, macanda̱ ‘U na mayuu'cheⁿ na matsa̱'ntjom'. ‘U tqueⁿ' cañoom'luee ñequio tsjoomnancue, ñequio ndaaluee, ndo' ñequio cha'tso na niom.
25. Ñequio Espíritu Santo seijndo̱' ts'om moso' David. Jo' na seiljeiⁿ ñ'oom na tsu'. Tsoom: ¿Chiuu na cwila'wjee nn'aⁿ na nchii judíos? Ndo' ¿chiuu na cwila'tiuu nn'aⁿ judíos cwii na cwe' ts'iaaⁿ'ndyo?
26. Nn'aⁿ tsjoomnancue na cwitsa̱'ntjom jla'wendyena. Ndo' nn'aⁿ na m'aⁿ n'iaaⁿ jla'jomndyena. Ñe'cwii ty'ena nacjoo' nquii Ty'o̱o̱ts'om, ñequio Cristo tsaⁿ na jñoom.
27. Jlueti naⁿ'ñeeⁿ nnom Ty'o̱o̱ts'om:—Mayuu' ñ'oom'ñeeⁿ na tso David ee Herodes ñequio Poncio Pilato jla'jomndyena naquii' tsjoomwaa ñequio nn'aⁿ judíos ñequio nn'aⁿ na nchii judíos. Ty'ena nacjoo' Jnda' na lju' tseixmaaⁿ ndo' na majndaa' ts'iaⁿ'aⁿ na tqueⁿ' jom.
28. Tandyo xuee seijndaa'ndyu' ljo' nl'ana. Ndo' majo' jnda̱ l'ana je'.
29. Ndo' je' je' ‘u Ta, queⁿ' cwenta ñ'oom wi' na jndei'na' na cwiluena nda̱a̱yâ, ndo' cateijndei' jâ na cwindya̱'ntjo̱o̱ⁿyâ njom' na calana̱a̱ⁿyâ ñ'oom naya ‘naⁿ' ñequio na t'maⁿ n'o̱o̱ⁿyâ.
30. Ndo' catseintyjo̱' ts'o̱' nacjoo nn'aⁿwii. Catsein'maⁿ' joona. Catsa' ‘naaⁿ t'maⁿ ñequio ‘naaⁿ na xocjaantyjo̱o̱' n'om nn'aⁿ chiuu tuiiyuu. Nmeiⁿ' catsa' ee cwilcwii'â xuee' Jnda' Jesús na lju' tseixmaⁿ.
31. Jnda̱ na jla'neiⁿna nnom Ty'o̱o̱ts'om tei'ncwii' w'aa yuu na cwitjomndyena. Ndo' joona too' m'aaⁿ Espíritu Santo naquii' n'omna. Ndo' tyola'neiⁿna ñ'oom' Ty'o̱o̱ts'om ñequio na t'maⁿ n'omna. Cha'tso ‘naⁿ tjom na ‘naaⁿna joona'
32. Cha'tsondye nn'aⁿ na cwila'yu' tyom'aⁿna na ñe'cwii n'omna, ndo' ñe'cwii tyola'tiuuna. Meiⁿcwiindye joona ticatso na joo ‘naⁿ na maleiñ'oom macanda̱ juu ‘naaⁿ' jo', ee cha'tso ‘naⁿ na tyoleichona tyol'ana na tjom na ‘naaⁿna joona'.
33. Ndo' nquiee apóstoles tyotjeii'yuu'ndyena ñequio najndeii na matseixmaaⁿ na jnda̱ mawando'xco Ta Jesús. Ndo' t'maⁿ tio'naaⁿñe Ty'o̱o̱ts'om joona.
34. Ndo' quii'ntaaⁿ cha'tso nn'aⁿ na cwila'yu' tjaa'naⁿ ‘ñeeⁿ c'oom na matseitjo̱o̱na' juu ee nn'aⁿ na niom ndyuaa ndo' niom l'aa tyonda̱a̱na joona' ndo' cantyjati s'om na to'ñoomna na nda̱a̱na joona' tquioñ'omna.
35. Tquiana s'om'ñeeⁿ nda̱a̱ apóstoles. Ndo' naⁿ'ñeeⁿ tyoñequiana joona' nnom ticwii cwii ts'aⁿ na matseitjo̱o̱na' ‘naⁿ na macaⁿna' juu.
36. Quii'ntaaⁿna tyom'aaⁿ ts'aⁿ na jndyu José. Jom ts'aⁿ tsjaaⁿ Leví na jndyowicantyjoo', tuiiñê tyuaaxeⁿncwe Chipre. Apóstoles tqueⁿna xueeⁿ'eⁿ Bernabé. Ñ'oomwaa' matsona' ts'aⁿ na mañequiaa na t'maⁿ ts'om x'iaa'.
37. Jom waa tyuaaⁿ'aⁿ. Jna̱a̱ⁿ juuna', jnda̱ chii jndyoñ'oom s'om na to'ñoom, tquiaaⁿ s'om'ñeeⁿ nda̱a̱ apóstoles.
| 
