1. Majoo ncuee'ñeeⁿ tjawijndyendye nn'aⁿ na cwila'yu'. Sa̱a̱ we ndi'ndyena. Nt'omndyena nn'aⁿ judíos na cwila'neiⁿ griego ndo' nt'om nc'iaana cwila'neiⁿ hebreo. Ndo' naⁿ'ñeeⁿ na cwila'neiⁿna griego to̱'na na jla'ncjoo'ndyena nacjoo' nn'aⁿ na cwilayu' na cwila'neiⁿ hebreo. Ee cha'tso yolcu na cwila'yu' na jnda̱ tja̱ noom ticwii xuee cwito'ñoomna nantquie. Sa̱a̱ joo yolcu na cwila'neiⁿ griego tijndyeti cwito'ñoomna cha'xjeⁿ cwito'ñoom nc'iaana na cwila'neiⁿ hebreo. Jo' na to̱'na na jla'ncjoo'ndyena.
2. Jo' chii canchoo'we apóstoles jla'tjomna cha'tso nn'aⁿ na cwila'yu'. Jluena nda̱a̱ naⁿ'ñeeⁿ:—Ticatsa̱'ntjomna' na n'ndya̱a̱yâ na cwiñe'quiaayâ ñ'oom' Ty'o̱o̱ts'om na njndo̱o̱'â cantyja ‘naaⁿ' nantquie.
3. Jo' chii ‘o nn'aaⁿya, catjeii'ndyo' ntquiee' tsaⁿs'a quii'ntaaⁿ'yo' na waa ñ'oom ya cantyja ‘naaⁿna, na too' m'aaⁿ Espíritu Santo naquii' n'omna, ndo' na jndo̱' n'omna. Joona nnt'io̱o̱ⁿya ts'iaaⁿ na njndoo'na cantyja ‘naaⁿ' nantquie na nnto'ñoom yolcu na jnda̱ tja̱ noom.
4. Sa̱a̱ jâ ñecwitco nlana̱a̱ⁿyâ nnom Ty'o̱o̱ts'om ndo' na nñequiaayâ ñ'oom'm nda̱a̱ nn'aⁿ.
5. Ndo' cha'tso nn'aⁿ na cwila'yu' jla'jomndyena na ljo'. Jo' tjeii'ndyena Esteban, ts'aⁿ na matseiyu'ya ts'om ndo' too' naquii' ts'oom m'aaⁿ Espíritu Santo. Ndo' mati Felipe, Prócoro, Nicanor, Timón ñequio Parmenas. Mati tjeii'ndyena Nicolás, ts'aⁿ tsjoom Antioquía. Jom nchii ts'aⁿ judío sa̱a̱ jaach'ee xuee matseijomñê ñ'oom na cwila't'maaⁿ'ndye nn'aⁿ judíos.
6. Jnda̱ na tjeii'ndyena naⁿ'ñeeⁿ chii tquiochona joo na m'aⁿ apóstoles. Ndo' joona jla'neiⁿna nnom Ty'o̱o̱ts'om cantyja ‘naaⁿ naⁿ'ñeeⁿ. Jnda̱ chii tioona lueena nacjoo naⁿ'ñeeⁿ na cwito'ñoom ts'iaaⁿ.
7. Ndo' ñ'oom' Ty'o̱o̱ts'om jndyeti tjanty'eena'. Ndo' ty'ewijndyendyeti nn'aⁿ na cwila'yu' naquii' Jerusalén hasta mati jndye ntyee cantyja ‘naaⁿ nn'aⁿ judíos tyola'yu'ya cwii n'om. Cwita'wi'na Esteban
8. Esteban t'maⁿ najndeii Ty'o̱o̱ts'om tyotseixmaaⁿ. Jndye ‘naaⁿ s'aaⁿ quii'ntaaⁿ nn'aⁿ ñequio ts'iaaⁿ t'maⁿ na xocanda̱a̱ nluii na cwe' najndeii nquii ts'aⁿ.
9. Tyowaa cwii wats'om cwentaa nn'aⁿ judíos na jndyu tmaaⁿ' nn'aⁿ m'aⁿcandyaa'ndye. Naⁿ'ñeeⁿ jnaⁿna tsjoom Cirene ñequio tsjoom Alejandría ndo' ndyuaa Cilicia ñequio ndyuaa Asia. Nt'omndye naⁿ'ñeeⁿ to̱'na tjawa ñ'oom na tyola'neiⁿna ñ'eⁿ Esteban.
10. Sa̱a̱ tileicanaⁿndyena na nncwinom'na jom ñ'oom na matseineiiⁿ ee jom matseineiiⁿ ñequio na jndo̱'ya ts'oom nc'e matseixmaaⁿ Espíritu Santo.
11. Quia jo' cwe' nt'iu tyotsa̱'ntjomna nn'aⁿ na calue cantu nacjoo' Esteban, na jnda̱ jndyena na tyotseineiiⁿ ñ'oom tia nacjoo' Moisés ndo' nacjoo' Ty'o̱o̱ts'om.
12. Jnda̱ na jlue naⁿ'ñeeⁿ cantu jeeⁿ seijmeiⁿ'na' nn'aⁿ quii' tsjoom ñequio nn'aⁿ na cwiluiitquiendye ñequio nn'aⁿ na cwit'mo̱o̱ⁿ ljeii na tqueⁿ Moisés. Ndo' ty'ena nacjoo' Esteban. T'uena jom. Ty'eñ'omna jom jo nda̱a̱ naⁿmaⁿn'iaaⁿ.
13. Ndo' tqueeⁿ'ndyena nt'omcheⁿ nn'aⁿ na calue cantu nacjoom'm. Tyolue naⁿ'ñeeⁿ:—Tsaⁿs'am'aaⁿ' ñequii'cheⁿ matseineiiⁿ ñ'oom tia nacjoo' wats'om t'maⁿ na matseixmaⁿna' cwentaa' Ty'o̱o̱ts'om ndo' nacjoo' ljeii na tqueⁿ Moisés.
14. Ee jnda̱ jndya̱a̱yâ na tyotsoom na Jesús na jnaⁿ Nazaret nntseityuii' wats'omwaañe ndo' nntseichuii' costumbre na tquiaa Moisés nda̱a̱ya.
15. Ndo' cha'tso naⁿmaⁿn'iaaⁿ na meindyuaandye nty'iaana Esteban. Jliuna seichuii'na' nnoom, s'aana' cha'cwijom nnom ángel.
| 
