1. Jnaaⁿ' ñ'oommeiⁿ', jo' na ja Pablo m'aaⁿya pra̱so cantyja ‘naaⁿ' Cristo Jesús cha cateijndeiina' ‘o nn'aⁿ gentiles,
2. Nc'e na jeeⁿ yañe Ty'o̱o̱ts'om, matsona' na manquiu'yo' na tquiaaⁿ ts'iaaⁿwaa na cats'aaya juuna' naquii'ntaaⁿ'yo' cha na cateijndeiina' ‘o.
3. Ee t'mo̱o̱ⁿ no̱o̱ⁿya ñ'oom na jeeⁿ wanty'iuu' ñetuaa chiuu jnda̱ seijndaa'ñê, ndo' tquiaaⁿ na catsei'no̱ⁿ'a juuna'. Chjoowi' ñ'oom'ñeeⁿ jnda̱ seiljeiya na matseicwano̱ⁿya na m'aⁿ'yo'.
4. Quia nla'naⁿ'yo' juuna' quia jo' nla'no̱ⁿ'yo' na matsei'no̱ⁿ'a ñ'oom na wanty'iuu' ñetuaa cantyja ‘naaⁿ' Cristo.
5. Juu na jeeⁿ wanty'iuu' ñetuaa tînquiaa Ty'o̱o̱ts'om na nliu nn'aⁿ na ñet'om teiyo juuna', cha'xjeⁿ je' ñequio Espíritu Santo jnda̱ t'mo̱o̱ⁿ nda̱a̱ apóstoles na lju' n'om ñequio profetas.
6. Luaa waa ñ'oom na wanty'iuu' ñetuaana': Nn'aⁿ na nchii judíos joona, juu na nnts'aa Ty'o̱o̱ts'om na nndaa nn'aⁿ judíos, mati nnto'ñoomna. Matseitjoom'na' joona ñequio seii' Cristo, mati mañ'oomna' joona naquii' ñ'oom na tso Ty'o̱o̱ts'om na nnts'aaⁿ cantyja ‘naaⁿ' Cristo Jesús.
7. Macantyja ‘naaⁿ' ñ'oomwaa' jo' na s'aa Ty'o̱o̱ts'om na jndaya na mañequiaya juuna' nda̱a̱ nn'aⁿ, ndo' tquiaaⁿ najndeii na matseixmaaⁿ na ñ'eⁿ mats'aaya tsiaaⁿwaa'.
8. Quii'ntaaⁿ cha'tsondye nn'aⁿ cwentaa' Ty'o̱o̱ts'om na tit'maⁿ cwiluiindye, cantyja ‘naⁿya, ja tit'maⁿndyo̱tya̱, nchiiti joona. Sa̱a̱ meiiⁿ na ljo', no̱o̱ⁿ ja tquiaaⁿ ts'iaaⁿ na catseicandiiya nn'aⁿ na nchii judíos na cha'tso na matseixmaⁿ Cristo jeeⁿ cajndana' meiⁿ xocanda̱a̱ nntsei'no̱ⁿ' ts'aⁿ.
9. Ndo' ty'ioom ts'iaaⁿ ja na cats'aaya na c'ooliu nn'aⁿ chiuu nncwji'n'maaⁿñê ‘o nn'aⁿ na nchii tuiindyo' judíos. Quia na jnaⁿjndyeecheⁿna' na s'aa Ty'o̱o̱ts'om cha'tsoti na maniom seijndaa'ñê na luaa' nncuaa, sa̱a̱ hasta quia je'cheⁿ matseicano̱o̱ⁿ na ljo',
10. cha cantyja ‘naaⁿ' juu tmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ cha'tsondye na cwiluiitquiendye na m'aⁿ cañoom'luee ñequio cha'tso na cwitsa̱'ntjom jo' jo', caliuna na jndye nnom na jndo̱' ts'om Ty'o̱o̱ts'om.
11. Ty'o̱o̱ts'om s'aaⁿ cha'tso nmeiⁿ' cha'xjeⁿ nqueⁿ jnda̱ seijndaa'ñê na ticantycwii na l'ue ts'oom na nncuaa, ndo' seicanda̱a̱'ñena' naljo' ee Taya Jesucristo.
12. Ndo' nc'e na cwila'yu'ya n'o̱o̱ⁿ ñ'eⁿ Jesucristo ndo' cwicantyjaa' n'o̱o̱ⁿya jom, jo' na matseicanaaⁿñena' na cwila'candyoo'ndyo̱ na m'aaⁿ Ty'o̱o̱ts'om.
13. Jo' chii macaⁿ'a nda̱a̱'yo' na tintsei'ndaa'na' nquiu'yo' nawi' na matjo̱ⁿya cantyja ‘naⁿ'yo' ee na ljo', matseit'maaⁿ'ñena' ‘o. Cristo candya' ts'oom jaa
14. Macwe' jo' na maco̱'a xtya̱ya jo nnom Tsotye Taya Jesucristo,
15. na cantyja ‘naaⁿ' jom cha'tso yo na m'aⁿ cañoom'luee ñequio yo na m'aⁿ tsjoomnancue, cwilcwii'na xueⁿ'eⁿ na cwiluiiñê Tsotyena.
16. Nquii Tsotya̱a̱ya waa na jeeⁿ cajnda na tjaa ljo' cwii macaⁿna' na matseixmaaⁿ. Macaⁿ'a na cantyja ‘naaⁿ joona', naquii' n'om'yo' nñequiaaⁿ na nnaⁿndyo' ndo' nla'xmaⁿ'yo' najndeii na cwiluiiñê nc'e Espíritu,
17. cha nnda̱a̱ nnc'oomñe Cristo naquii' n'om'yo' nc'e na cwila'yu'ya n'om'yo' ñ'eⁿñê cha caljotyeⁿ na m'aⁿ'yo' naquii' na m'aaⁿ Ty'o̱o̱ts'om na wi' ts'om ‘o, cha'xjeⁿ njoom ty'e nch'ioo' ts'oom.
18. Mati macaⁿ'a nnom Ty'o̱o̱ts'om na cala'no̱ⁿ'ya'yo' ñequio cha'tsondye nn'aⁿ na cwila'yu' cwanti na t'maⁿ na m'aaⁿ Cristo na wi' ts'oom nn'aⁿ, ndo' na tco, ndo' na njoom, ndo' na ndye.
19. Juu na m'aaⁿ Cristo na wi' ts'oom ‘o luaa, macaⁿ'a na cala'no̱ⁿ'yo' na waljoo'cheⁿ na t'maⁿna', ndo' na luaa' nla'no̱ⁿ'yo' jo' na nnc'om'yo' na chawaañ'eⁿ naquii' n'om'yo' m'aaⁿñe Ty'o̱o̱ts'om.
20. Catseit'maaⁿ'ñena' Ty'o̱o̱ts'om na jom jndyeti nnda̱a̱ nnts'aaⁿ nchii cwe' cha'xjeⁿ cwitaaⁿ jaa meiⁿ nchii cwe' cha na cwila'tiuutya̱a̱ya ndo' na mateijneiⁿ jaa nc'e najndeii na matseixmaaⁿ m'aaⁿna' naquii' n'o̱o̱ⁿya.
21. Jom catseit'maaⁿ'ñena' naquii' tmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ nc'e Cristo Jesús cha'tso ndyu ndo' cha'waati xuee na cwii wjaatina'. Amén.
| 
