1. Jnda̱ na tjacaa cwii canchoo'ñequiee chu, tjo̱nnda'a Jerusalén ñequio Bernabé. Mati tja Tito ñ'eⁿndyo̱.
2. Tjo̱ jo' ee jnda̱ t'mo̱ⁿ Ty'o̱o̱ts'om no̱o̱ⁿ na l'ue ts'oom na cjo̱. Jo' jlana̱a̱ⁿyâ na ñencjo̱o̱cha̱a̱ⁿyâ ñequio nn'aⁿ na cwiluiitquiendye cantyja ‘naaⁿ' ts'iaaⁿ ‘naaⁿ'aⁿ. Tcuu tcuu t'mo̱o̱ⁿya nda̱a̱na ñ'oom na mañequiaya nda̱a̱ nn'aⁿ na chii judíos cha nda̱a̱ nlui'n'maaⁿndyena. S'aa na ljo' ee tical'ue ts'o̱o̱ⁿ na juu ts'iaaⁿ na jnda̱ ñes'aa ñequio ts'iaaⁿ na quia nnts'aa, nleitquioo' na cwe' tsiaaⁿ'ndyo joona'.
3. Sa̱a̱ juu Tito na tyom'aaⁿ ñ'eⁿndyo̱, meiiⁿ na nchii ts'aⁿ judío jom, tjaa'naⁿ ñ'oom jlue naⁿ'ñeeⁿ na jndei'na' na caluii ñ'eⁿñê cha'na cwil'aa jâ nn'aⁿ judíos ñequio ndaayâ na naⁿnom.
4. T'uiina' ñ'oom'ñeeⁿ nc'e yuu na m'aaⁿyâ ty'equie' nn'aⁿ na cwil'a cheⁿnquieena na cwiluiindyena nn'aⁿ na cwila'yu'. Sa̱a̱ joona cwe' ty'equeⁿna cwenta naya na la'xmaaⁿya na m'aⁿ candyaandyo̱ jo nnom ljeii na matsa̱'ntjomna' nc'e cwila'jomndyo̱ ñequio Cristo Jesús. Ee l'ue n'omna na cwiicheⁿ ndii' candya̱'ntjo̱o̱ⁿtya̱a̱ⁿya nnom ljeii'ñeeⁿ.
5. Sa̱a̱ meiⁿ chjoowi' tîcatue'ndyo̱cja̱a̱yâ̱ nda̱a̱ naⁿ'ñeeⁿ ee til'ue n'o̱o̱ⁿyâ na nnchuii' juu ñ'oom na xcweti ma'mo̱ⁿna' cantyja ‘naaⁿ' na nlui'n'maaⁿñe ts'aⁿ.
6. Sa̱a̱ joo naⁿ'ñeeⁿ na cwijndoo'na ts'iaaⁿ ‘naaⁿ' Ty'o̱o̱ts'om Jerusalén, tjaa'naⁿ ñ'oom na jla'cwaljoo'tina na quiaaya nda̱a̱ nn'aⁿ. Meiⁿ tjaa na coch'eena' ja ljo' cwiluiindyena, ee nchii cantyja na cwiwitquioo' macwji' Ty'o̱o̱ts'om cwenta chiuu tseixmaⁿ ts'aⁿ.
7. Ee jla'no̱ⁿ'na na nquii Ty'o̱o̱ts'om jnda̱ ty'ioom ts'iaaⁿ ja na mañequiaya ñ'oom naya ‘naaⁿ'aⁿ nda̱a̱ nn'aⁿ na nchii judíos, cha'xjeⁿ jnda̱ ty'ioom ts'iaaⁿñeeⁿ Pedro na mañequiaaⁿ juuna' nda̱a̱ nn'aⁿ judíos.
8. Ee manquiiti Ty'o̱o̱ts'om na jñoom Pedro na quiaa ñ'oom naya nda̱a̱ nn'aⁿ judíos, mati jñoom ja na quiaya ñ'oom'ñeeⁿ nda̱a̱ nn'aⁿ na nchii judíos.
9. Nc'e na ljo' nquii Jacobo, Pedro ndo' Juan, na cwiluiitquiendye, jla'no̱ⁿ'na na jnda̱ ty'iom Ty'o̱o̱ts'om ts'iaaⁿ'ñeeⁿ ja, ndo' ñequio na neiiⁿna cwii cwiindyo̱ tyot'ua̱a̱ ntyja̱a̱ya lua̱a̱ya, joona ndo' jâ ñequio Bernabé. Na l'ana na ljo' t'mo̱o̱ⁿna na cwila'jomndyena na nl'aayâ ts'iaaⁿ quii'ntaaⁿ nn'aⁿ na nchii judíos yocheⁿ na cwil'a joona ts'iaaⁿ quii'ntaaⁿ judíos.
10. Ñe'cwii waa na taⁿna na cal'aayâ, na cjañjoom' n'o̱o̱ⁿyâ nn'aⁿ na cwila'yu' tsjoom Jerusalén na nty'iaandye, ndo' jo' maqueⁿ ts'o̱o̱ⁿ na mats'aa na ljo'. Tsjoom Antioquía tixcwe s'aa Pedro
11. Sa̱a̱ quia tja Pedro tsjoom Antioquía, nnoom tsjo̱o̱ na tixcwe mach'eeⁿ, ee ‘naⁿ na s'aaⁿ tcaⁿna' na candi'tiaaⁿ'aⁿ.
12. Ee xjeⁿ na tyooquie nt'om nn'aⁿ judíos na jñom Jacobo, tyocwa' Pedro ñequio nn'aⁿ na cwila'yu' na nchii judíos. Sa̱a̱ jnda̱ na tquie naⁿ'ñeeⁿ, to̱o̱ⁿ'o̱ⁿ na macwji'ñê ee nquiaⁿ'aⁿ nn'aⁿ na cwilue jndei'na' na caluii nacjoo' tjaaⁿ' ts'aⁿ cha'xjeⁿ cwil'ana ndana na naⁿnom.
13. Ndo' na luaa' s'aaⁿ, mati nt'omcheⁿ nn'aⁿ judíos na cwila'yu', jla'jomndyena ñ'eⁿ Pedro na tis'a na we waa na s'aaⁿ, hasta mati Bernabé seijomñe na tuii na luaa'.
14. Ndo' quia na tquia̱a̱ⁿ cwenta na juu na cwil'ana tixcwe m'aaⁿna' cha'xjeⁿ ma'mo̱ⁿ ñ'oom na mayuu' cantyja ‘naaⁿ' na nlui'n'maaⁿñe ts'aⁿ, jo nda̱a̱ cha'tsondye nn'aⁿ na cwila'yu' tsjo̱o̱ nnom Pedro: “‘U je' na ts'aⁿ judío ‘u, sa̱a̱ ljooñe mache' cha'cwijom nchii jo' ‘u. Nn'aⁿ na nchii judíos cwiluiindyena, ¿chiuu na ñe'catsa' na c'omna cha'xjeⁿ cwil'a nn'aⁿ judíos?” Ñequii'cheⁿ cantyja na cwila'yu'ya n'om nn'aⁿ nlui'n'maaⁿndyena
15. ‘U ndo' ja tuiindyo̱ nn'aⁿ judíos, nchii nn'aⁿ na cwila'tjo̱o̱ndye quii'ntaaⁿ nn'aⁿ na nchii judíos cwiluiindye.
16. Sa̱a̱ meiiⁿ na luaa', manquiuu jndaa'ndyo̱ na tjaa'naⁿ ts'aⁿ na nlqueⁿna' jom na tjaa jnaⁿ cotseixmaaⁿ nc'e na matseicaña̱a̱ⁿ ñ'oom na matsa̱'ntjomna' na tqueⁿ Moisés, ñequii'cheⁿ nc'e na matseiyu' ñ'eⁿ Cristo, jo' na nlui'n'maaⁿñe. Ee cha na nlqueⁿna' ts'aⁿ na m'aaⁿ cwentaa' Ty'o̱o̱ts'om, macaⁿna' na catseiyu'ya ts'om, ee tjaa meiiⁿcwii ts'aⁿ na nlqueⁿna' jom na tjaa jnaⁿ cotseixmaaⁿ nc'e na matseicaña̱a̱ⁿ chiuu t'maⁿ ljeii na matsa̱'ntjomna' na tqueⁿ Moisés.
17. Jo' chii, xeⁿ yocheⁿ na cwijoo' n'o̱o̱ⁿ na nlqueⁿna' jaa na cwiluiindyo̱ nn'aⁿ na tjaa jnaⁿ la'xmaⁿ nc'e na cwilayuu'a ñ'eⁿ Cristo, cwiwitquioo' na manncjo̱o̱tya̱a̱ cwiluiindyo̱ nn'aⁿ na waa jnaaⁿ, ¿aa ñe'ca'mo̱ⁿna' na la'xmaaⁿya nn'aⁿ jnaⁿ nc'e jom? Tijoom jnda.
18. Ee xeⁿ waa cwii na matsetyuii'a ndo' nda̱nquia mats'aa xco̱ juuna', mati matseijndaa'ñena' na mayuu' waa jnaⁿya.
19. Ja cantyja ‘naaⁿ' ljeii na matsa̱'ntjomna', matseijomna' cantyja ‘naⁿya cha'cwijom ts'oo, mañejuu ljeii'ñeeⁿ na tqueⁿna' ts'oo ja cha nnda̱a̱ nncwando̱'a jo nnom Ty'o̱o̱ts'om.
20. Ñe'naaⁿ' jnda̱ ty'ioomna' ja ts'oom'naaⁿ ñequio Cristo. Manc'e jo' maty'iomna' cantyja ‘naⁿya nchii ja cwiluiindyo̱ na wando̱'a, nquii Cristo wanoom'm naquii' ts'o̱o̱ⁿ. Ndo' na wando̱'a na ts'aⁿ ja, wando̱'a ee na matseiyu'ya ts'o̱o̱ⁿ ñequio Jnda Ty'o̱o̱ts'om na m'aaⁿ na candya' ts'oom ja ndo' na tquiaañe ncheⁿnqueⁿ na tueeⁿ'eⁿ cwentaaya.
21. Tiquits'aa na til'ue naya na matseixmaⁿ Ty'o̱o̱ts'om ee xeⁿ nnda̱a̱ nlqueⁿna' ts'aⁿ na tjaa jnaⁿ tseixmaⁿ ee matseicaña̱a̱ⁿ chiuu t'maⁿ ljeii'ñeeⁿ quia jo' cwe' ts'iaaⁿ'ndyo na tue' Cristo.
| 
