1. Jo' chii ndicwaⁿ waa ñ'oom na tso Ty'o̱o̱ts'om na wanaaⁿ na nntsaaquia̱a̱'a na nnta'jndya̱a̱ya na m'aaⁿ. Jo' chii cal'aaya cwenta na tintseicu'na' na nt'omndyo' ‘o taxocanda̱a̱ nlajomndyo' cantyja ‘naaⁿ' jo'.
2. Ee je' macwindya̱a̱ya ñ'oom naya ‘naaⁿ' Ty'o̱o̱ts'om cha'na joo nn'aⁿ Israel. Sa̱a̱ tjaa'naⁿ na teijndeii ñ'oom'ñeeⁿ joona, ee tîcala'yu'ya n'omna quia tyondyena juuna'.
3. Sa̱a̱ jaa na cwila'yuu'a nntsaquia̱a̱'a yuu na nnta'jndya̱a̱ya cha'xjeⁿ jnda̱ tso Ty'o̱o̱ts'om: Xjeⁿ na w'iiya joona tsjo̱o̱ na tijoom ñequia na nnc'ooquiee'ndyena yuu na tsjo̱o̱ na nnta'jndyeena.Waa cwii taⁿ' ñ'oom' Ty'o̱o̱ts'om na teiljeii na matseineiⁿna' cantyja ‘naaⁿ' xuee na jnda̱ ntquiee': Xjeⁿ na tqueeⁿ tsjoomnancue tjacanda̱a̱' ts'iaaⁿ na s'aaⁿ.
4. Sa̱a̱ waa cwiicheⁿ taⁿ' ñ'oom' Ty'o̱o̱ts'om na teiljeii cantyja ‘naaⁿ' xuee na jnda̱ ntquiee'. Matsona': Xuee jnda̱ yom tjacanda̱a̱' cha'tso ts'iaaⁿ na s'aa Ty'o̱o̱ts'om. Xuee jnda̱ ntquiee' tacaⁿna' na nnts'aatyeeⁿ ts'iaaⁿ, tajñeeⁿ.
5. Ndo' mati waa cwiicheⁿ ñ'oom'm na teiljeii na ma'mo̱ⁿna' cantyja ‘naaⁿ' juu ñ'oom'ñeeⁿ. Matsona': Tijoom xuee nñequia na nnc'ooquie'na ndyuaa yuu na mats'aa naya na nnta'jndyeena cantyja ‘naⁿya.
6. Ndicwaⁿ wanaaⁿ na nt'om nn'aⁿ nnc'ooquiee'ndyena yuu na nnta'jndyeena ee nn'aⁿ na tyondye jndyee ñ'oom na macwji'n'maaⁿñe Ty'o̱o̱ts'om nn'aⁿ tîc'ooquiee'ndyena jo' jo' nc'e na tyola'tjo̱o̱ndyena.
7. Nc'e naljo' ma'mo̱ⁿxco Ty'o̱o̱ts'om cwiicheⁿ xuee na matseicajndyuna' xuee je'. Tjacaa jndye ndyu quia jo' ñequio ‘ndyoo David seineiiⁿ ñ'oom'm na jnda̱ teiljeii: Xuee je' xeⁿ nndye'yo' jñeeⁿ'eⁿ, tilaquie' n'om'yo'.
8. Ee xeⁿ jnda̱a̱ tquiaa Josué yuu na nnta'jndyee nn'aⁿ Israel, tixocatseineiⁿ Ty'o̱o̱ts'om cantyja ‘naaⁿ' cwiicheⁿ xuee.
9. Jo' chii nn'aⁿ cwentaa' Ty'o̱o̱ts'om ndicwaⁿ waa na nnta'jndyeena cantyja ‘naaⁿ'aⁿ,
10. ee ts'aⁿ na nncjaquiee' yuu na mawajndye Ty'o̱o̱ts'om, nncwajndye cantyja na mach'ee cha'xjeⁿ nqueⁿ tajñeeⁿ ts'iaaⁿ na s'aaⁿ.
11. Jo' chii matsona' na calajnda̱a̱ya na nntsaquia̱a̱'a yuu na nnta'jndya̱a̱ya cha tjameiⁿcwii ts'aⁿ na nntseijomna' na tintseiyoom'm cha'na nn'aⁿ Israel.
12. Ee juu ñ'oom' Ty'o̱o̱ts'om wando'na' ndo' waa najndeii na matseixmaⁿna'. Ta̱a̱ticheⁿ juuna' nchiiti cwii xjo na we ntyja ta̱a̱. Mawindi' juuna' na mato̱o̱ⁿ'ñena' añmaaⁿ' ts'aⁿ ñequio espíritu ‘naaⁿ' ts'aⁿ. Matseicano̱o̱ⁿna' ñ'oom na ñjoomticheⁿ na m'aaⁿ' ts'om ts'aⁿ ndo' macu'xeⁿna' ñomtiuu na m'aaⁿ' ts'om ts'aⁿ.
13. Na cha'tso na jnda̱ tqueⁿ Ty'o̱o̱ts'om, tjaa meiⁿcwii na nnda̱a̱ nncwanty'iu jo nnoom, ee cha'tsoñ'eⁿ m'aⁿ xueena' jo nnom nqueⁿ na nñequiandyo̱ cwenta. Jesús cwiluiiñê tyee na tjacantyja na cwiluiit'maⁿñe
14. Nquii Jesús Jnda Ty'o̱o̱ts'om cwiluiiñê tyee na tjacantyja cwentaaya. Jnda̱ tjaqueⁿ'eⁿ cañoom'luee, jo' chii macaⁿna' na caljoo'ndyo̱tya̱a̱ⁿya cantyja ‘naaⁿ' na cwila'yu'ya n'o̱o̱ⁿya ñ'eⁿñê.
15. Ee m'aaⁿ na wi' ts'oom jaa cha'tso na tijo'ndyo na la'xmaaⁿya. Ee teinoom cha'tso na mach'eena' xjeⁿ jaa na cwila'tjo̱o̱ndyo̱ nnom Ty'o̱o̱ts'om, sa̱a̱ meiⁿcwii tîcatseitjo̱o̱ñê.
16. Jo' chii ñequio na t'maⁿya n'o̱o̱ⁿya calacandyoo'ndyo̱ tio ‘naaⁿ' Tsotya̱a̱ya Ty'o̱o̱ts'om cha nnto'ño̱o̱ⁿya na wi' ts'oom jaa ñequio naya na matseixmaaⁿ na nnteijndeiina' jaa quia na macaⁿna'.
| 
