1. Yom xuee cwii tjo̱o̱ na nla'tyeⁿ nn'aⁿ judíos xuee pascua quia cwila'cwjeena canmaⁿ, ndo' squia̱a̱yâ tsjoom Betania ñ'eⁿ Jesús. Squia̱a̱yâ na m'aaⁿ Lázaro, tsaⁿ na tquiaaⁿ na wando' xco jnda̱ na tue'.
2. Tyola't'maaⁿ'ndyena Jesús jo' jo'. Jla'jndaa'ndyena cwii nantquie na tcwaa'â. Marta tyondi'ntjoom nda̱a̱yâ ndo' juu Lázaro'ñeeⁿ tacatyeeⁿ ñ'eⁿndyô̱ na meindyuaandyô̱ nacañoom' meiⁿsa ñ'eⁿ Jesús.
3. Ndo' juu María maleiñ'oom cwii tsua' xjo ncheⁿ' na ñequii'cheⁿ nardo. Juuna' jeeⁿ jndana'. Tu'nquioom ncheⁿ'ñeeⁿ nc'ee Jesús, jnda̱ jo' tyowee'ñê nc'ee ñequio sooxqueeⁿ. Na s'aaⁿ na ljo' tju'na' jndye cachi cha'waa quii' w'aa.
4. Mañ'eⁿ Judas Iscariote, jnda Simón, juu mawaa xjeⁿ na nñequiaa cwenta Jesús. Tsaⁿ'ñeeⁿ cwii jâ na t'maⁿ Jesús na calajomndyô̱ ñ'eⁿñê.
5. Matso:—Cwa nchii na teil'ua ncheⁿ'waa' na cwii ndyee siaⁿnto s'om denario. Ñequio s'om'ñeeⁿ nnda̱a̱ nnteijndeii ts'aⁿ ndyeñeeⁿ'.
6. Sa̱a̱ nchii tsoom na luaa' nc'e na jeeⁿ wi' ts'oom ndyeñeeⁿ' sa̱a̱ ee na jeeⁿ canch'ueñe ndo' nc'e na jom maleiñ'oom tjaⁿche na ñjom s'om na cwileil'uee'ndyô̱ na cha'tsondyô̱, ndo' xjeⁿto jom macwjeeⁿ'eⁿ s'om jo' jo'.
7. Sa̱a̱ matso Jesús:—Ca'ndii' yuscum'aaⁿ' na luaa' mach'eeⁿ. Matseijndaa'ñê cantyja ‘naaⁿ' xuee na nncjaanty'iuu'ndyo̱.
8. Ee ndyeñeeⁿ' ñequii'cheⁿ na m'aⁿna ñ'eⁿndyo', sa̱a̱ ja nchii ñequii'cheⁿ na nnc'o̱o̱ⁿya ñ'eⁿndyo'. Jla'jndaa'ndye ntyee na nla'cuee'na Lázaro
9. Jo' chii quia na jndye nn'aⁿ na jndyendye na jo' jo' m'aaⁿ Jesús, tquie'cañomna na m'aaⁿyâ. Ee nchii macanda̱ nc'e na ñe'canty'iaana Jesús, sa̱a̱ mati ñe'canty'iaana Lázaro, ts'aⁿ na tue' na tquiaa Jesús na tando'xco.
10. Cwe' nc'e jo', ntyee na cwiluiitquiendye nda̱a̱ nn'aⁿ judíos, mati jla'jndaa'ndyena na nla'cuee'na Lázaro.
11. Ee cwe' cantyja ‘naaⁿ' jom majndye nn'aⁿ judíos'ñeeⁿ to̱ⁿ'ndye cantyja ‘naaⁿ ntyee, jla'yu'na ñ'eⁿ Jesús. Jla't'maaⁿ'ndye nn'aⁿ Jesús quia squia̱a̱yâ Jerusalén
12. Teincoo cwiicheⁿ xuee nn'aⁿ na jndyendye na tquio ncuee, jndyena na manndyoo' na nntsquia̱a̱yâ Jerusalén ñ'eⁿ Jesús.
13. Jo' chii ty'echona njom, ty'ecatjomndyena jâ ñ'eⁿñê. Tyola'xuaana tyoluena:—Caluiit'maⁿñe Ty'o̱o̱ts'om. Catio'naaⁿñê nquii ts'aⁿ na mandyo ñequio xuee' nquii na cwiluiiñe Rey cwentaa jaa nn'aⁿ Israel.
14. Ndo' ljeii Jesús cwii snom chjoo. Tjaljoom juuyo'. Ndo' na ljo' s'aaⁿ seicanda̱a̱'ñena' ñ'oom' Ty'o̱o̱ts'om na teiyo teiljeii.
15. Matsona': ‘O nn'aⁿ tsjoom Jerusalén, tila'catyuendyo'. Canty'ia'yo' macwjee'cañoom nqueⁿ na cwiluiiñê Rey cwenta' ‘o, na waljoom snom.
16. Jâ nn'aⁿ na t'maⁿ Jesús na cala'jomndyô̱ ñ'eⁿñê tîcala'no̱o̱ⁿ'â ñ'oommeiⁿ' najndyee. Sa̱a̱ nda̱nquia quia na jnda̱ seit'maaⁿ'ñe Ty'o̱o̱ts'om jom, tjañjoom' n'o̱o̱ⁿyâ na teiljeii ñ'oommeiⁿ' cantyja ‘naaⁿ'aⁿ, ndo' maxjeⁿ tuii na ljo'.
17. M'aⁿ cwii tmaaⁿ' nn'aⁿ judíos quia t'maⁿ Jesús Lázaro na ñejndii' quii' tsei'tsuaa. Jnda̱ na tquiaaⁿ na wando'xco Lázaro'ñeeⁿ, quia jo' tyotjeii'yuu'ndye naⁿ'ñeeⁿ chiuu nty'iaana na tuii.
18. Macwe' juu ts'iaaⁿ'ñeeⁿ na s'aa Jesús na tixocanda̱a̱ nluii na cwe' ts'aⁿ nnts'aa, jo' na ty'ecatjomndye nn'aⁿ na jndyendye jom quia jnda̱ jndyena na ljo' s'aaⁿ.
19. Sa̱a̱ joo fariseos'ñeeⁿ tyoluena nda̱a̱ nc'iaana:—¿Aa jndo'yo' je'? Maxjeⁿ tjaa na nnda̱a̱ nl'aaya. Cha'tsondye nn'aⁿ cwilajomndye ñ'eⁿñê. Nn'aⁿ na cwila'neiⁿ ñ'oom griego cwil'ueena Jesús
20. Ndo' tyom'aⁿ cwantindye nn'aⁿ na cwila'neiⁿ ñ'oom griego quii'ntaaⁿ nn'aⁿ na ty'e ncuee quia cwila'cwjee nn'aⁿ judíos canmaⁿ.
21. Tquie'cañom naⁿ'ñeeⁿ Felipe. Jom ts'aⁿ tsjoom Betsaida, ts'o̱ndaa Galilea. Nn'aⁿ griegos'ñeeⁿ ty'ecataⁿna cwii naya'ñeeⁿ nnoom, jluena:—Aa re sa, l'ue n'o̱o̱ⁿyâ na nlana̱a̱ⁿyâ ñ'eⁿ Jesús.
22. Quia jo' tja Felipe, matsoom na ljo' nnom Andrés, ndo' wendye joona ty'ecaluena na ljo' nnom Jesús.
23. Tso Jesús nda̱a̱na:—Ja cwiluiindyo̱ ts'aⁿ na jnaⁿ cañoom'luee. Jnda̱ tue'ntyjo̱ xjeⁿ na t'maⁿ nlco'wi'na' ja, ndo' cantyja ‘naaⁿ' jo' Ty'o̱o̱ts'om nntseit'maaⁿ'ñê ja.
24. Ñ'oom na mayuu'cheⁿ matsjo̱o̱ya nda̱a̱'yo', cwii lqueeⁿ na cwiquioo, xeⁿ ticjaaquiee'na' quii' ts'o yuu na nntseijomna' cha'cwijom na nncue'na', cwiljona' na ñenquiina'. Sa̱a̱ xeⁿ nnom' ts'aⁿ juuna' quii' ts'o yuu na matseijomna' na nncue'na', quia jo' majndye nncue' nnts'aana'.
25. ‘Ñeeⁿ juu na matseicandya' ts'om cantyja na matseijndaa'ñe nquii na nncwando', jnaaⁿ' jo' nntsuuñe. Sa̱a̱ juu ts'aⁿ na mach'ee na jndoo' cantyja na wjaam'aaⁿ, nndaa' tsaⁿ'ñeeⁿ na ticantycwii na nncwanoom'm.
26. ‘Ñeeⁿ juu ts'aⁿ na ñe'candi'ntjom no̱o̱ⁿ, candyontyjo̱o̱ⁿ naxa̱ⁿ'a. Ndo' yuu na nnc'o̱o̱ⁿya majo' jo' nnc'oom ts'aⁿ na mandi'ntjom no̱o̱ⁿ. Ndo' ‘ñeeⁿ juu ts'aⁿ na nndi'ntjom no̱o̱ⁿ nntseit'maaⁿ'ñe Tsotya̱ya tsaⁿ'ñeeⁿ. Matseineiⁿ Jesús na nla'cuee' nn'aⁿ jom
27. 'Je' mamatsei'ndaa'na' ts'o̱o̱ⁿ, ndo' ¿chiuu nntsjo̱o̱ cantyja ‘naaⁿ' jo'? ¿Aa nntsjo̱o̱: “Tsotya̱ya, cwji'n'maaⁿndyu' ja juu xjeⁿ na nntjo̱ⁿya nawi'waañe”? Sa̱a̱ xocatsjo̱o̱ na ljo' ee jnda̱ jndyo̱o̱ cha na nnc'io̱ cwentaa nn'aⁿ.
28. ‘U Tsotya̱ya, quiaa' na catseit'maaⁿ'ñena' ‘u.Xjeⁿ'ñeeⁿ teic'uaa jndyee' Tsotyeeⁿ cañoom'luee. T'o̱:—Jnda̱ tquia na matseit'maaⁿ'ñena' ja ndo' wjaatseit'maaⁿ'ñetina' ja.
29. Nn'aⁿ na jndyendye na meintyjee' nacañoomyâ jo' jo', jndyena na ljo'. Jluena nda̱a̱ ntyjeena na seixuaa tsuee. Sa̱a̱ nt'om nn'aⁿ jlue:—Cwii ángel seineiⁿ nnoom.
30. Tso Jesús nda̱a̱na:—Jndye'yo' na teic'uaa na seineiiⁿ cha cateijndeiina' ‘o, nchii cha cateijndeiina' ja.
31. Ee jnda̱ tue'ntyjo̱ xjeⁿ na nncu'xeⁿna' nn'aⁿ tsjoomnancue. Ndo' mati nntyuii' na matseixmaⁿ tsaⁿjndii na matsa̱'ntjom quii' n'om nn'aⁿ.
32. Ndo' quia na jnda̱ jla'we nn'aⁿ ja na nla'cuee'na ja, quia jo' nnts'aa na nntseitjomna' nn'aⁿ cantyja ‘naⁿya.
33. Ñ'oomwaa' matsoom cha ca'mo̱ⁿna' cwaaⁿ cwii nnom na nntjoom na nncueeⁿ'eⁿ.
34. T'o̱o̱ nn'aⁿ na jndyendye, jluena:—Majnda̱ macwindya̱a̱ya na matso ñ'oom na sa̱'ntjom Ty'o̱o̱ts'om na teiljeiina' na juu Cristo xocantycwii na m'aaⁿñê. Quia jo' ¿chiuu na matsu' na matsona' na nla'we nn'aⁿ juu na cwiluiiñe ts'aⁿ na jnaⁿ cañoom'luee na nla'cuee'na juu? ¿'Ñeeⁿ juu luaa' na matsu' na cwiluiiñe ts'aⁿ na jnaⁿ cañoom'luee?
35. Quia jo' matso Jesús nda̱a̱na:—Ja na cwiluiindyo̱ naxuee quii'ntaaⁿ nn'aⁿ ndicwaⁿ m'aaⁿtya̱ya quii'ntaaⁿ'yo'. Jo' chii ñequii'cheⁿ c'om'yo' cantyja ‘naⁿya yocheⁿ na cwii m'aaⁿtya̱ya ñ'eⁿndyo', cha tincwinom' natia ‘o. Ee ts'aⁿ na m'aaⁿñe nacje ‘naaⁿ' natia, ticaljeii yuu wjaañ'oomna' juu.
36. Yocheⁿ na m'aaⁿya na mañequia naxuee quii' n'om'yo', calayu'yo' ñequiondyo̱ ja na cwiluiindyo̱ naxueeñe. Ee na nl'a'yo' na ljo' nlaxmaⁿ'yo' cantyja ‘naaⁿ' Ty'o̱o̱ts'om na nqueⁿ cwiluiiñê naxueeñe.Jnda̱ na seineiⁿ Jesús ñ'oommeiⁿ', tjaaⁿ yuu na xocaliu naⁿ'ñeeⁿ jom. Tiñe'calayu' nn'aⁿ jndíos ñ'eⁿ Jesús
37. Meiiⁿ jndye ts'iaaⁿ na tyoch'eeⁿ jo nda̱a̱na na tixocaluii na cwe' ts'aⁿ nnts'aa, sa̱a̱ tiñe'cala'yu'na ñ'eⁿñê.
38. Luaa' tuii cha catseicanda̱a̱'ñena' ñ'oom na tyotseiljeii profeta Isaías, matso: Ta, ¿'ñeeⁿ juu na matseiyu' ñ'oom na cwiñe'quiaayâ?Ndo' tsotyeeⁿ cwiicheⁿ ñ'oom: ¿'Ñeeⁿ juu na jnda̱ t'mo̱ⁿ Ty'o̱o̱ts'om nnom najndeii na matseixmaaⁿ?
39. T'mo̱ⁿ Isaías chiuu waa na tileicanda̱a̱ nla'yu' nn'aⁿ judíos, ee waa cwiicheⁿ ñ'oom na matsoom:
40. Cha'xjeⁿ tileicanty'iaa' ts'aⁿ na nchjaaⁿ', maluaa' s'aa Ty'o̱o̱ts'om quii' n'omna, ndo' tquiaaⁿ na jla'quie' n'omna jo nnoom. Nmeiiⁿ' tuii cha tixocaliuna chiuu l'ue ts'oom ñ'eⁿndyena, meiⁿ na nla'no̱ⁿ'na quii' n'omna. Ee xeⁿ nnc'ooliuna chiuu l'ue ts'oom ndo' nla'no̱ⁿ'na, maxjeⁿ nlcwe' n'omna ndo' nncwji'n'maaⁿñê joona.
41. Seineiⁿ Isaías ñ'oommeiⁿ' quia na tco'na' nnoom na seit'maaⁿ'ñe Ty'o̱o̱ts'om Jesús, ndo' seineiiⁿ cantyja ‘naaⁿ' juu.
42. Sa̱a̱ meiiⁿ na luaa' tso Isaías, majndyendye nn'aⁿ na m'aⁿ n'iaaⁿ jo nda̱a̱ nn'aⁿ judíos, tyola'yu'na ñ'eⁿ Jesús. Sa̱a̱ jnaaⁿ' na nquiaana nn'aⁿ tmaaⁿ' fariseos, jo' chii ticatjei'yuu'ndyena na ljo'. Ee xeⁿ nl'ana na ljo' tixonquia fariseos'ñeeⁿ na wanaaⁿ na nla'jomndyena xjeⁿ na cwi'oona wats'om.
43. Ee joona neiiⁿtina na calue nc'iaana na ya cwil'ana, nchiiti na ntyjaa' n'omna na catso Ty'o̱o̱ts'om na ya ntyjeeⁿ ñ'eⁿndyena. Ñ'oom na mañequiaa Jesús macu'xeⁿna' nn'aⁿ
44. Jndeii seineiⁿ Jesús. Matsoom:—'Ñeeⁿ juu na matseiyu' ñ'eⁿndyo̱, nchii macanda̱ ñequio ja matseiyu' tsaⁿ'ñeeⁿ. Mati matseiyu' ñequio nquii Tsotya̱ na jñom ja quii'ntaaⁿ'yo'.
45. Ndo' ‘ñeeⁿ juu na manty'iaa' ja, mati manty'iaa' tsaⁿ'ñeeⁿ nquii na jñom ja quii'ntaaⁿ'yo'.
46. Ja na cwiluiindyo̱ naxuee, jndyo̱o̱ tsjoomnancue, cha meiⁿcwi'ñeeⁿcheⁿ ts'aⁿ na matseiyu' ñ'eⁿndyo̱ nncwji'na' juu naquii' natia.
47. Sa̱a̱ xeⁿ cwe' na mandii ts'aⁿ ñ'oom na mañequiaya, meiⁿ ticatseinda̱ joona', nchii ja tseixmaⁿya na nncu'xa̱ⁿ tsaⁿ'ñeeⁿ. Ee nchii ty'iom Tsotya̱ ts'iaaⁿ ja na nncu'xa̱ⁿya nn'aⁿ, ty'ioom ts'iaaⁿ ja na cwji'n'maaⁿndyo̱ joona.
48. ‘Ñeeⁿ juu na ticuee' ts'om ja, meiⁿ tico'ñom ñ'oom na mañequiaya, waa cwii na nncu'xeⁿna' tsaⁿ'ñeeⁿ. Ee xuee na macanda̱ majooti ñ'oom na jnda̱ seina̱ⁿya, joona' nntu'xeⁿna' jom.
49. Ticalatiuu'yo' na cwe' na jndeii' ‘ndyo̱ nnco̱ ñ'oommeiⁿ' na matseina̱ⁿ. Nquii Tsotya̱ na jñom ja, nqueⁿ sa̱'ntjoom na nmeiiⁿ' catseina̱ⁿya ndo' na ca'mo̱o̱ⁿya joona' nda̱a̱'yo'.
50. Ndo' ntyjiiya ñ'oom na matsa̱'ntjoom mañequiaana' na nntseixmaⁿ ts'aⁿ na ticantycwii na wando'. Jo' chii matseina̱ⁿya cha'xjeⁿ ñ'oom na jnda̱ tsoom no̱o̱ⁿ.
| 
