1. Jnda̱ na seineiⁿ Jesús ñ'oommeiⁿ', jlunda̱a̱ñê cañoom'luee. Matsoom:—Tsotya̱ya, jnda̱ tue'ntyjo̱ na nluii cha'tso na teijndaa' cantyja ‘naⁿya. Je' catseit'maaⁿ'ndyu' ja na cwiluiindyo̱ Jnda', cha mati ja nntseit'maaⁿ'ndyo̱ ‘u.
2. Ee ‘u jnda̱ tqueⁿ' na waa na jndo̱ na matseixmaⁿya jo nda̱a̱ cha'tso nn'aⁿ tsjoomnancue na ticwii cwii ts'aⁿ na mañequiaa' l'o̱o̱ya na nñequiaya na tseixmaⁿ na ticantycwii na wando'.
3. Luaa waa na nntseixmaⁿ ts'aⁿ na ticantycwii na wando' añmaaⁿ'aⁿ, na catsei'no̱o̱ⁿ'o̱ⁿ na ñenncu'cheⁿ' cwiluiindyu' Ty'o̱o̱ts'om na mayuu' ndo' mati na ja Jesús cwiluiindyo̱ Cristo na jñom' ja quii'ntaaⁿ nn'aⁿ tsjoomnancue.
4. 'Ja jnda̱ seit'maaⁿ'ndyo̱ ‘u quii'ntaaⁿ nn'aⁿ tsjoomnancue. Ndo' majnda̱ mamañequiaandyo̱ na c'io̱ cwentaa nn'aⁿ, mañejuu ts'iaaⁿ'ñeeⁿ na tquiaa' no̱o̱ⁿ na cats'aa.
5. Ndo' je' je' ‘u Tsotya̱ya, catseit'maaⁿ'ndyu' ja cha'xjeⁿ na cwiluiit'maⁿndyu' yuu na m'aaⁿ', na juu jo' matseixmaⁿya ñ'eⁿndyu' cwii tjo̱o̱cheⁿ na nncuaa tsjoomnancue.
6. 'Nda̱a̱ nn'aⁿ na m'aⁿ tsjoomnancue na tquiaa' joona l'o̱o̱, jnda̱ t'mo̱o̱ⁿya chiuu cwiluiindyu'. Tyom'aⁿna cwenta', ndo' tquiaa' na cwila'xmaⁿna cwentaya. Joona cwila'wena ñ'oom naya ‘naⁿ' ndo' cwila'canda̱na juuna'.
7. Ndo' macwila'no̱ⁿ'na na cha'tso na cwicanda̱a̱ mats'aa, ñenncu' tquiaa' na matseixmaⁿya na ljo'.
8. Ee ñ'oom na tsu' no̱o̱ⁿya, jnda̱ tquia joona' nda̱a̱na. Ndo' joona jnda̱ to'ñoomna ñ'oom'ñeeⁿ. Cwila'no̱ⁿ'na na mayuu'cheⁿ jnaaⁿya na m'aaⁿ', ndo' cwila'yu'na na ‘u jñom' ja quii'ntaaⁿ nn'aⁿ.
9. 'Macaⁿ'a naya njom' cantyja ‘naaⁿna, nchii cantyja ‘naaⁿ nn'aⁿ tsjoomnancue. Ja macaⁿ'a na cateijndei' joo na jnda̱ tquiaa' l'o̱o̱ya, ee cwila'xmaⁿna cwenta'.
10. Cha'tsondye joona na la'xmaⁿna cwentaya, mati la'xmaⁿna cwenta'. Ndo' joona na la'xmaⁿna cwenta', mati la'xmaⁿna cwentaya, ndo' matseit'maaⁿ'ñena' ja cantyja ‘naaⁿna.
11. 'Je' taxoc'o̱o̱ⁿtya̱ tsjoomnancue, sa̱a̱ joo naⁿm'aⁿ' cwiljoo'ndyena juuna', ee ja jo̱nlcwa̱'a na m'aaⁿ'. ‘U Tsotya̱ya na lju' cwiluiindyu', catsa' cwenta naⁿm'aⁿ na jnda̱ tquiaa' l'o̱o̱ ñequio juu najndeii na matsei'xmaⁿ' cha nnts'aana' ñe'cwii nla'xmaⁿna cha'xjeⁿ jaa ñe'cwii cwilaxmaaⁿya.
12. Yocheⁿ na tyom'aaⁿya naquii'ntaaⁿ naⁿm'aⁿ na jnda̱ tquiaa' l'o̱o̱, tyots'aa cwenta joona ñequio najndeii na matsei'xmaⁿ' nncu'. Ndo' meiⁿcwiindyena tîcatsuuñe, macanda̱ tsuuñe juu ts'aⁿ na matseixmaⁿ na catsuuñe, cha na catseicanda̱a̱'ñena' ñ'om' na teiljeii.
13. 'Sa̱a̱ je' na nncjo̱lcwa̱'a na m'aaⁿ'. Ndo' matseina̱ⁿya ñ'oommeiiⁿ yocheⁿ na ndi m'aaⁿya tsjoomnancuewaañe, cha juu na m'aaⁿya na neiⁿya, canda̱a̱' nla'xmaⁿna juuna'.
14. Jnda̱ tquiaya ñ'oom naya ‘naⁿ' nda̱a̱na, sa̱a̱ nn'aⁿ tsjoomnancue ticuee' n'om joona ee ticala'xmaⁿna cantyja ‘naaⁿ' tsjoomnancue, cha'xjeⁿ ja meiⁿ ticatseixmaⁿya cantyja ‘naaⁿ'na'.
15. Nchii macaⁿ'a na cwji' joona tsjoomnancue, sa̱a̱ na cwañom' joona ljo' na ñe'cats'aa tsaⁿjndii ñ'eⁿndyena.
16. Joona ticalaxmaⁿna cantyja ‘naaⁿ' tsjoomnancue cha'xjeⁿ ja meiⁿ ticatseixmaⁿya cantyja ‘naaⁿ'na'.
17. Queⁿ' joona na cwiluiindyena na lju' n'omna nc'e ñ'oom na mayuu'. Juuna' cwiluiiñena' na mayuu'.
18. Cha'xjeⁿ na jñom' ja na jndyo̱o̱ tsjoomnancue, mati majño̱o̱ⁿya joona na c'oocatjei'yuu'ndyena nda̱a̱ nn'aⁿ tsjoomnancue.
19. Ee nc'e joona maqua̱ⁿ cheⁿnnco̱ na lju' ts'o̱o̱ⁿ jo njom' cha mati nlqueⁿlju'na' n'omna nc'e ñ'oom na mayuu'.
20. 'Ndo' nchii macanda̱ macaⁿ'a cantyja ‘naaⁿ joo naⁿm'aⁿ'. Mati macaⁿ'a na cateijndei' joo nn'aⁿ na quia nla'yu' ñ'eⁿndyo̱ nc'e ñ'oom na quia nntjei'yuu'ndyena
21. cha ñe'cwii nla'xmaⁿna, cha'xjeⁿ ‘u Tsotya̱ya ñe'cwii cwiluiindyu' ñ'eⁿndyo̱, ndo' ja ñe'cwii cwiluiindyo̱ ñ'eⁿndyu'. Ee na ljo' mati joona nnda̱a̱ nla'xmaⁿna na ñe'cwii cwiluiindyena ñequiondyo̱ jaa. Quia jo' nla'yu' nn'aⁿ tsjoomnancue na ‘u jñom' ja.
22. Juu na tquiaa' na matseit'maaⁿ'ñena' ja, mati tquiaya jo' na cala'xmaⁿna, cha na ñe'cwii cala'xmaⁿna cha'xjeⁿ jaa ñe'cwii cwila'xmaaⁿya.
23. Ja m'aaⁿya ñ'eⁿndye joona, ndo' ‘u m'aaⁿ' ñ'eⁿndyo̱ ja cha nnts'aana' na ñe'cwii cwila'xmaⁿna. Ndo' na ljo' nla'no̱ⁿ' nn'aⁿ na ‘u jñom' ja, ndo' na candya' ts'om' joona cha'xjeⁿ na candya' ts'om' ja.
24. ''U Tsotya̱ya m'aaⁿ' na candya' ts'om' ja cwii tjo̱o̱cheⁿ na tqueⁿ' tsjoomnancue. L'ue ts'o̱o̱ⁿ na naⁿm'aⁿ' na jnda̱ tquiaa' l'o̱o̱ya, c'omna yuu na m'aaⁿya ñ'eⁿndyu'. Ee quia ljo'cheⁿ nnda̱a̱ juu na matseit'maaⁿ'ñena' ja na tquiaa' na matseixmaⁿya.
25. Tsotya̱ya ‘u na cwiluiindyu' na maty'iomyana', nn'aⁿ na la'xmaⁿna cantyja ‘naaⁿ' tsjoomnancue ticala'no̱ⁿ'na cantyja ‘naⁿ', sa̱a̱ ja mawajnaⁿ'a ‘u ndo' naⁿm'aⁿ' cwila'no̱ⁿ'na na ‘u jñom' ja.
26. Jnda̱ t'mo̱o̱ⁿya cantyja ‘naⁿ' nda̱a̱na, ndo' m'mo̱o̱ⁿtya̱ya jo' nda̱a̱na. Luaa' nnts'aa cha juu na m'aaⁿ' na candya' ts'om' ja, mati nlaxmaⁿna juuna'. Ndo' mati nnc'o̱o̱ⁿya ñ'eⁿndye joona.
| 
