1. Jnda̱ na seineiⁿ Jesús ñ'oommeiⁿ' nnom Ty'o̱o̱ts'om, mana jlueeⁿ'eⁿ jo' jo' ñ'eⁿndyô̱ jâ na cwilajomndyô̱ ñ'eⁿñê. Tei'ty'io̱o̱'â tsjo' Cedrón. Squia̱a̱yâ cwii joo yuu waa cwIi ntjom, jo' jo' santyjo̱o̱yâ na tjaqueⁿ'eⁿ.
2. Ndo' Judas, juu x'iaayâ na tquiaa cwenta jom, mati mantyjii jo' jo', ee majndye ndii' ñesaayâ jo' jo' ñ'eⁿ Jesús.
3. Quia jo' Judas'ñeeⁿ, to'ñoom cwii tmaaⁿ' sondaro ñ'eⁿ nt'om nn'aⁿ na cwindye'ntjom nda̱a̱ ntyee na cwiluiitquiendye, ndo' mañ'eeⁿ nt'om nn'aⁿ tmaaⁿ' fariseos. Tjachom naⁿ'ñeeⁿ jo' jo'. Ty'echona lioochom ndo' chom nlca ñ'eⁿ l'o̱ ts'iaaⁿ ntia'.
4. Ndo' Jesús, nc'e na mantyjeeⁿ cha'tso na mawaa xjeⁿ na nntjoom, tjacatjomñê naⁿ'ñeeⁿ. Tax'eeⁿ nda̱a̱na, matsoom:—¿'Ñeeⁿ juu cwil'ue'yo'?
5. T'o̱o̱na, jluena:—Cwil'ua̱a̱yâ Jesús na jnaⁿ Nazaret.Matsoom:—Maja luaa jo'.Ndo' mati Judas na tquiaa cwenta jom, mañ'eⁿ ñequio naⁿ'ñeeⁿ.
6. Ndo' quia tso Jesús: “Maja luaa jo'”, seilcwe'ntya'na' joona hasta xjeⁿ nomtyuaacheⁿ tquiaandyena.
7. Quia jo' tax'eeñennda' Jesús nda̱a̱na:—¿'Ñeeⁿ juu cwil'ue'yo'?Ndo' joona t'o̱o̱nnda'na nnoom:—Jesús tsaⁿ na jnaⁿ Nazaret.
8. T'o̱ Jesús nda̱a̱na:—Jnda̱ tsjo̱o̱ya, maja luaa jo'. Jo' chii xeⁿ ja cwil'ue'yo', ca'ndye'yo' naⁿm'aⁿ na nnc'oona.
9. Luaa' tuii cha catseicanda̱a̱'ñena' ñ'oom na tsoom quia seineiiⁿ nnom Tsotyeeⁿ. Tsoom: “Nn'aⁿ na jnda̱ tquiaa' l'o̱o̱ya, meiⁿcwiindye joona tîtseicatsuuya.”
10. Quia jo' Simón Pedro tjei'ñoomñê xjo na maleiñ'oom. Seiquiee'ñê ts'aⁿ na jndyu Malco. Tyjeeⁿ tsua'qui tsaⁿ'ñeeⁿ ntyjaya. Juu tsaⁿ'ñeeⁿ mosoo' tyee na cwiluiitquieñe.
11. Matso Jesús nnom Pedro:—Cwja'ndyu'nnda' xjo' quii' tjaⁿwaa'na'. ¿Aa matseitiuu' na ticaty'iomyana' na catjo̱ⁿya nawi' t'maⁿ na seijndaa'ñe Tsotya̱ya na nntjo̱ⁿ? Ty'eñ'omna Jesús na m'aaⁿ tyee na cwiluiitquieñe
12. Quia jo' sondaro'ñeeⁿ ñequio capeitaⁿ na cwiluiitquieñe nda̱a̱na ñequio naⁿ'ñeeⁿ na cwindye'ntjom nda̱a̱ ntyee na cwiluiitquiendye nda̱a̱ nn'aⁿ judíos, t'uena Jesús, jla'tyeⁿna jom.
13. Ty'eñ'omjndyeena jom na m'aaⁿ Anás, xeeⁿ' tyee na jndyu Caifás na cwiluiitquieñe chu'ñeeⁿ.
14. Majuu Caifás'ñeeⁿ jnda̱ seijno̱o̱ⁿ'o̱ⁿ n'om nc'iaaⁿ'aⁿ nn'aⁿ judíos'ñeeⁿ na yaticheⁿ na cwii ts'aⁿ cue' cwentaa cha'tsondye joona. Macwji'ñe Pedro cantyja ‘naaⁿ' Jesús
15. Wendyô̱ jâ, nquii Simón Pedro ñ'eⁿ ja Juan saantyjo̱o̱yâ nanqueⁿ' naⁿ'ñeeⁿ. Juu tyee na cwiluiitquieñe mawajnaⁿ'aⁿ ja. Macwe' jo' tjo̱quia̱'a tach'eⁿ waa' tyee'ñeeⁿ xjeⁿ na ty'eñ'omna Jesús jo' jo'.
16. Sa̱a̱ Pedro tjawintyjeeⁿ'eⁿ ‘ndyoots'a tatiom. Jo' chii ja na mawajnaaⁿ' tyee na cwiluiitquieñe, jluii'a ch'eⁿ, seina̱ⁿ nnom yuscu na mach'ee cwenta ‘ndyoots'a'ñeeⁿ. Ndo' juu tquiaa ñ'oom' na jndyoquiee' Pedro tach'eⁿ w'aa.
17. Ndo' tax'ee yuscu'ñeeⁿ nnom Pedro:—¿Aa nchii ‘u cwii joona na matseijomñe ñ'oom na mañequiaa tsaⁿm'aaⁿ'?T'o̱ Pedro matsoom:—Nchii jo' ja.
18. Ndo' nn'aⁿ na cwindye'ntjom w'aa'ñeeⁿ, ñequio nt'omcheⁿ nn'aⁿ na cwil'a cwenta wats'om, jnda̱ jla'cw'aana ñoom. Meintyjee'na na cwila'windyena, ee jeeⁿ teiⁿ. Ndo' mati meintyjee' Pedro quii'ntaaⁿna, matseiwiñê ñ'eⁿndyena. Mawax'ee tyee na cwiluiitquieñe ñ'oom nnom Jesús
19. Ndo' nquii tyee na cwiluiitquieñe nda̱a̱ ntyee, tax'eeñe nnom Jesús ‘ñeeⁿ jâ nn'aⁿ na cwilajomndyô̱ ñ'eⁿñê ts'iaaⁿ na mach'eeⁿ, ndo' mati chiuu waa ñ'oom na tyoñequiaaⁿ.
20. T'o̱ Jesús matsoom:—Ñequii'cheⁿ ñequio na jndoo' nn'aⁿ tyotseina̱ⁿya. Ndo' na tyo'mo̱o̱ⁿya nda̱a̱ nn'aⁿ judíos naquii' lan'om ‘naaⁿna ñequio wats'om t'maⁿ yuu na cwitjomndyena. Meiⁿcwii ñ'oom tyootseina̱ⁿ na cwe' ñe'we ndyee ts'aⁿ ndii.
21. Na mawaxe' no̱o̱ⁿ, ¿chiuu na ticwaxe' nda̱a̱ nn'aⁿ na jnda̱ ñejndyena ñ'oom na mañequiaya ljo' ñetsjo̱o̱? Naⁿ'ñeeⁿ nquiujndaa'ndyena ñ'oom na ñet'mo̱o̱ⁿ.
22. Ndo' quia na jnda̱ tso Jesús ñ'oomwaa', cwii naⁿ'ñeeⁿ na cwil'a cwenta wats'om na tyom'aⁿ jo' jo' tquiaa tsaⁿ'ñeeⁿ nda' watmeiⁿ jom. Tso tsaⁿ'ñeeⁿ nnoom:—¿Aa laa'ti' maw'o̱' ‘ndyoo nquii ts'aⁿ na cwiluiitquieñe nda̱a̱ ntyee cwentaaya?
23. T'o̱ Jesús, matsoom:—Xeⁿ tia ñ'oom na matsjo̱o̱, cwji'yuu'ndyu' cantyja ‘naaⁿ' ñ'omtia'ñeeⁿ, sa̱a̱ xeⁿ ñ'oom na maty'iomyana' matseina̱ⁿ, tis'a na macwja' ja.
24. Quia jo' seicwanom Anás Jesús na ndi chu'tyeⁿñê l'o̱ Caifás, tyee na cwiluiitquieñe nda̱a̱ nn'aⁿ judíos. Macwji'ñennda' Pedro cantyja ‘naaⁿ' Jesús
25. Yocheⁿ na meintyjee' Pedro ‘ndyoo chom na matseiwiñê, ta'x'eena nnoom:—Ndo' ‘u je', ¿aa nchii macwii nquiee naⁿ'ñeeⁿ na cwilajomndyo' ñ'eⁿñê?Sa̱a̱ jom tjei'ñê, tsoom:—Nchii jo' ja.
26. Ndo' jo' jo' m'aaⁿ cwii ts'aⁿ na mach'ee ts'iaaⁿ ‘naaⁿ' tyee na cwiluiitquieñe nda̱a̱ ntyee. Juu tsaⁿ'ñeeⁿ mann'aaⁿ'aⁿ ts'aⁿ na tyjee Pedro tsua'qui. Matso tsaⁿ'ñeeⁿ nnom Pedro:—¿Aa nchii nty'iaya ‘u na ñ'eⁿ' ñ'eⁿñê yuu waa ntjom?
27. Sa̱a̱ Pedro tjei'ñennaaⁿ'aⁿ. Ndo' mañoom' seixuaa caxtijndyo. Nn'aⁿ judíos tioona cwenta Jesús l'o̱ Pilato
28. Quia jo' ty'eñ'om nn'aⁿ judíos Jesús, jnaⁿna waa' Caifás, tquiena w'aa yuu na mac'eⁿ gobiernom. Ndo' ndicwaⁿ cwitsjoom xjeⁿ'ñeeⁿ. Sa̱a̱ tic'ooquie' nn'aⁿ judíos naquii' wats'iaaⁿ ‘naaⁿ' gobiernom cha tints'aana' na tilju' laxmaⁿna, ee xeⁿ na ljo' tixonquiaana' na wanaaⁿ na nla'jomndyena xuee na cwitquiina catsmaⁿ chjoo.
29. Jo' chii jlui' Pilato quii' w'aa'ñeeⁿ tjatseineiiⁿ nda̱a̱ nn'aⁿ. Tsoom:—¿Ljo' ñ'oom cwiqueⁿ'yo' nacjoo' tsaⁿs'am'aaⁿ?
30. Joona t'o̱o̱na nnoom:—Xeⁿ nchii ts'aⁿ na tia ts'aⁿñe jom, xonquio̱o̱ñ'o̱o̱ⁿyâ jom na m'aaⁿ'.
31. Ndo' tso Pilato nda̱a̱ judíos'ñeeⁿ:—Ncjo'yo' catsaañ'om'yo' jom. Catu'xeⁿ'yo' jom cantyja ‘naaⁿ' ljeii ‘naⁿ'yo' na waa.T'o̱o̱ naⁿ'ñeeⁿ nnoom:—Tjaa'naⁿ najnda̱a̱ya na nlacua̱a̱'â ts'aⁿ.
32. Luaa' tuii cha catseicanda̱a̱'ñena' ñ'oom na seineiⁿ Jesús na t'mo̱o̱ⁿ cwaaⁿ cwii nnom na nntseicuee'na' jom.
33. Ndo' tjaquiee'nnda' Pilato quii' wats'iaaⁿ ‘naaⁿ'aⁿ. Tax'eeñê nnom Jesús:—¿Aa ‘u cwiluiindyu' Rey cwentaa nn'aⁿ judíos?
34. T'o̱ Jesús, matsoom nnom:—¿Aa luaa' matsu' ee na matsei'no̱ⁿ' cheⁿnncu'? Oo, ¿aa m'aⁿ nt'omcheⁿ nn'aⁿ na cwilue na ljo' cantyja ‘naⁿya njom'?
35. T'o̱ Pilato, matsoom:—Ja nchii ts'aⁿ judío ja. Manquiee nn'aⁿ ndyua' ñequio nn'aⁿ na cwiluiitquiendye nda̱a̱ ntyee ‘naⁿ'yo', joona tquiana cwenta ‘u l'o̱o̱ya. ¿Ljo' sa'?
36. T'o̱ Jesús nnoom:—Juu na cwiluiindyo̱ na catsa̱'ntjo̱ⁿya, nchii cantyja ‘naaⁿ' tsjoomnancuewaañe na matseixmaⁿna'. Ee xeⁿ cwiluiiñena' na ljo', quia jo' nn'aⁿ na cwila'jomndye ñ'eⁿndyo̱ nl'ana tia' cha na tiñequiaa ts'aⁿ cwenta ja luee nn'aⁿya nn'aⁿ judíos, sa̱a̱ nchii cantyja ‘naaⁿ' tsjoomnancue tseixmaⁿya na catsa̱'ntjo̱ⁿ.
37. Ndo' tax'ee Pilato nnoom:—Quia jo', ¿Aa cwiluiindyu' rey?T'o̱ Jesús, matsoom nnom:—Maxjeⁿ jo' cwiluiindyo̱. Macwe' jo' na tuiindyo̱ na jndyo̱o̱ tsjoomnancue, cha cwji'yuu'ndyo̱ ñ'oom na mayuu'. Ticwii cwii ts'aⁿ na matseijomñe ñ'oom na mayuu'ñeeⁿ, tsaⁿ'ñeeⁿ mandii ñ'oom na mañequiaya.
38. Tax'eeñe Pilato nnom Jesús:—¿Ljo' jo' na cwiluiiñena' na mayuu'? Teijndaa'tyeⁿ na cue' Jesús Ndo' jnda̱ na tso Pilato na luaa', jlui'nnaaⁿ'aⁿ jo nda̱a̱ nn'aⁿ judíos. Tsoom nda̱a̱na:—Tjaa jnaⁿ tseixmaⁿ tsaⁿm'aaⁿ'.
39. Sa̱a̱ mawaa costumbre quii'ntaaⁿ'yo' na catseicandyaandyo̱ cwii pra̱so na nntio̱o̱ juu luee'yo' xuee na cwitquie'yo' catsmaⁿ chjoo. Quia jo' ¿aa l'ue n'om'yo' na nntseicandyaandyo̱ juu rey na matseixmaⁿ na catsa̱'ntjom ‘o?
40. Ndo' jla'xuaana, jluena:—Nchii tsaⁿm'aaⁿ'. Catseicandyaandyu' Barrabás.Luaa' ñ'oom taⁿ naⁿ'ñeeⁿ. Ndo' juu Barrabás'ñeeⁿ, tsaⁿcanch'ue jo'.
| 
