1. Quia jo' sa̱'ntjom Pilato na catjaa' sondaro Jesús.
2. Ndo' sondaro'ñeeⁿ l'ana tsei nioom, jnda̱ chii tioomna juuna' xqueⁿ Jesús, ndo' jla'cweena jom cwii liaatco colo catsioo'.
3. Ndo' ty'entyjaa' nt'om sondaro'ñeeⁿ jom. Cwe' tyoncona, jluena:—Caluit'maⁿndyu' ‘u Rey na cwiluiindyu' na catsa̱'ntjom' nn'aⁿ judíos.Ndo' tyotmeiiⁿ'na nda' watmeiⁿ nnoom.
4. Jnda̱ jo' jlui'nnda' Pilato jo nda̱a̱na. Matsoom:—Canty'ia'yo', macwjii'a jom jo nda̱a̱'yo' cha queⁿ'yo' cwenta meiⁿcwii jnaⁿ ticatseixmaaⁿ.
5. Xjeⁿ'ñeeⁿ jlui' Jesús jo nda̱a̱na na ñjom tsei nioom xqueeⁿ, ndo' cweⁿ liaatco colo catsioo'. Tso Pilato nda̱a̱na:—Luaañe tsaⁿs'am'aaⁿ.
6. Ndo' ntyee na cwiluiitquiendye ñequio nn'aⁿ na cwil'a cwenta wats'om, quia nty'iaana Jesús, jla'xuaana:—Caty'iom' jom ts'oom'naaⁿ. Caty'iom' jom ts'oom'naaⁿ.T'o̱ Pilato nda̱a̱na, matsoom:—Ncjo'yo' cato'ñoom'yo' jom ndo' caty'iom'yo' jom ts'oom'naaⁿ ee jnda̱ ljeiya na meiⁿcwii jnaⁿ ticatseixmaaⁿ.
7. T'o̱o̱nnda' nn'aⁿ judíos nnoom, jluena:—Mawaa ljeii na cwileiñ'o̱o̱ⁿyâ, ndo' cantyja ‘naaⁿ' juuna' matsa̱'ntjomna' na cueeⁿ'eⁿ ee na tsoom na Jnda Ty'o̱o̱ts'om cwiluiiñê.
8. Jnda̱ na jndii Pilato ñ'oommeiⁿ', seicaty'uetina' jom.
9. Ndo' tjaquiee'nnaaⁿ'aⁿ wats'iaaⁿ ‘naaⁿ'aⁿ. Tax'eeñê ‘ndyoo Jesús:—¿'U yuu jnaⁿ'yu'?Sa̱a̱ Jesús meiⁿcwii ñ'oom tîc'o̱o̱ⁿ.
10. Jo' chii matso Pilato nnoom:—¿Chiuu na tic'o̱' ‘ndyo̱? Ja waa na jndo̱ na nntseicandyaandyo̱ ‘u, oo na nnty'io̱ⁿya ‘u ts'oom'naaⁿ.
11. T'o̱ Jesús, matsoom:—Xeⁿ nchii Ty'o̱o̱ts'om tquiaa na jndu' tjaa meiⁿcwii na nnda̱a̱ nntsa' ñ'eⁿndyo̱. Macwe' jo' juu ts'aⁿ na tio ja l'o̱' mat'maⁿti jnaaⁿ' mawaa.
12. Quia na jndii Pilato ñ'oomwaa', seijneiⁿ na nntseicandyaañê Jesús. Sa̱a̱ nn'aⁿ na cwiluiitquiendye nda̱a̱ nn'aⁿ judíos jla'xuaana:—Xeⁿ nntseicandyaandyu' tsaⁿm'aaⁿ', tiñe'catseix'iaa'ndyu' ñequio César, tsaⁿmaⁿts'iaaⁿ t'maⁿ, ee meiⁿcwi'ñeeⁿcheⁿ ts'aⁿ na ñe'caluiiñe rey cha'na tsaⁿm'aaⁿ', mawjaa nacjoo' César.
13. Ndo' jnda̱ na jndii Pilato ñ'oommeiⁿ', tjeiiⁿ'eⁿ Jesús jo nda̱a̱na. Tjacjom ntio ‘naaⁿ'aⁿ cwii joo na jndyu Nataa Ljo̱' yuu quicu'xeeⁿ ñ'oom. Ñequio ñ'oom na cwila'neiⁿ nn'aⁿ judíos jndyuna' Gabata.
14. Ndo' juu xuee'ñeeⁿ, xuee na cwilajndaa'ndyo̱ jaa nn'aⁿ judíos na nntquia̱a̱ya catsmaⁿ chjoo. Tuii na luaa' cha'na quiajmeiⁿ'. Quia jo' matso Pilato nda̱a̱ nn'aⁿ judíos'ñeeⁿ:—Canty'ia'yo', luaañe rey na tseixmaⁿ na nntsa̱'ntjom ‘o.
15. Sa̱a̱ naⁿ'ñeeⁿ jla'xuaana:—Catseicue' jom. Catseicue' jom. Caty'iom' jom ts'oom'naaⁿ.Matso Pilato nda̱a̱na:—Nquii rey na nntsa̱'ntjom ‘o, ¿aa maxjeⁿ caty'io̱ⁿya jom ts'oom'naaⁿ?Ntyee na cwiluiitquiendye t'o̱o̱na, jluena:—Jâ tjaa'naⁿ cwiicheⁿ rey na catsa̱'ntjom jâ, macanda̱ nquii César.
16. Quia jo'cheⁿ tquiaa Pilato Jesús nda̱a̱ naⁿ'ñeeⁿ na caty'ioomna jom ts'oom'naaⁿ. Ndo' mana ty'eñ'omna jom. Ty'ioom sondaro Jesús ts'oom'naaⁿ
17. Quia jo' tjachuu Jesús ts'oom'naaⁿ cwentaaⁿ'aⁿ cwii joo na jndyuna' Tsei'xqueⁿ Ts'oo. Ñequio ñ'oom na cwila'neiⁿ nn'aⁿ judíos jndyuna' Gólgota.
18. Ndo' jo' jo' ty'ioomna jom ts'oom'naaⁿ. Ndo' mati ty'ioomna cwiicheⁿ we ts'aⁿ noom'naaⁿ. Cwii cwii ts'aⁿ ñoom ts'oom'naaⁿ na cwii ntyjaaⁿ'aⁿ, ndo' m'aaⁿñê xcwe.
19. Ndo' sa̱'ntjom Pilato na teiljeii cwii ñ'oom na ty'iom sondaro xqueⁿ ts'oom'naaⁿ. Ñ'oom'ñeeⁿ matsona': “Luaa Jesús, ts'aⁿ Nazaret na cwiluiiñe rey na matsa̱'ntjom nn'aⁿ judíos.”
20. Jndye nn'aⁿ judíos jla'naaⁿna ljeiiwaa', ee yuu na ty'ioomna Jesús ts'oom'naaⁿ manndyoo' nnom tsjoom. Juu ñ'oom'ñeeⁿ teiljeiina' ñequio ñ'oom na cwila'neiⁿ nn'aⁿ judíos, nn'aⁿ romanos, ndo' nn'aⁿ griegos.
21. Quia jo' jla'neiⁿ ntyee na cwiluiitquiendye cwentaa nn'aⁿ judíos nnom Pilato. Jluena:—Tintseiljei' na tsaⁿm'aaⁿ' cwiluiiñê rey na nntsa̱'ntjoom jâ. Luaa catseiljei': “Tsaⁿm'aaⁿ' matsoom: Ja cwiluiindyo̱ Rey na catsa̱'ntjo̱ⁿya nn'aⁿ judíos.”
22. T'o̱ Pilato nda̱a̱na, matsoom:—Cantyja na jnda̱ seiljeiya, mantyjati jo'ndyo.
23. Jnda̱ na ty'ioom sondaro Jesús ts'oom'naaⁿ, quia jo' ñequieendye joona to'ñoomna cwii cwii liaⁿ'aⁿ. Mati to'ñoomna liaatco ‘naaⁿ'aⁿ na tuiina' na tjaa yuu ñjoom'na'.
24. Jluena nda̱a̱ nc'iaana:—Ticajndii'ndyo̱ juuna', x'iaa nncjaaya na nnty'iaaya ‘ñeeⁿ cwii jaa nncwantjom juuna'.Luaa' l'ana cha catseicanda̱a̱'ñena' ñ'oom' Ty'o̱o̱ts'om na teiyo teiljeii nacjoo' libro Salmos. Matsona': “Tquiana cwii cwii liaya nda̱a̱ nc'iaana, ndo' ty'ena x'iaa na ta'ntjomna liaya.” Nc'e na luaa' matso ljeii'ñee, jo' chii l'a sondaro na ljo'.
25. Ndo' macañoom' ts'oom'naaⁿ na ñoom Jesús meintyjee' tsoñeeⁿ. Mati jo' jo' m'aaⁿ María tyjee tsoñeeⁿ, scuu' Cleofas, ñequio María Magdalena.
26. Jnda̱ na nty'iaa' Jesús na jo' jo' meintyjee' tsoñeeⁿ na cañom ja na jeeⁿ candya' ts'oom, tsoom nnom:—'U naⁿ, tsaⁿm'aaⁿ' nntseixmaaⁿ ti'jnda'.
27. Jnda̱ jo' matso Jesús no̱o̱ⁿ:—Luaañe tso'ndyo'.Ndo' majuu xjeⁿ'ñeeⁿ to'ño̱ⁿya tsoñeeⁿ. Teix'a̱ya juu cha'cwijom cwii ts'aⁿ w'aya. Na tue' Jesús
28. Jnda̱ tuii na luaa', ntyjii Jesús na jnda̱ jnda̱a̱' cha'tso cantyja ‘naaⁿ'aⁿ. Jo' chii cha na nntseicanda̱a̱'ñena' cha'tso ñ'oom' Ty'o̱o̱ts'om na teiljeii, matsoom:—Ñe'c'ua ndaa.
29. Ndo' jo' jo' waa cwii xuaa na cwicañjom winom na ta̱. Quia jo' nchjeendye sondaro'ñeeⁿ cwii ‘naⁿ na ya maw'ana' winom'ñeeⁿ. Chii tioona juuna' nnom cwii ts'oom hisopo, jnda̱ chii ty'ioomna juuna' ‘ndyoo Jesús.
30. Ndo' jnda̱ na tjawe'na' ‘ñom, matsoom:—Jnda̱ seicanda̱a̱'ñena' cha'tso cantyja ‘naⁿya. Jnda̱ chii seintyjanquiooñê xqueeⁿ.Tioom cantyja na wanoom'm l'o̱ Ty'o̱o̱ts'om. Seicjooñe cwii sondaro tsei'ntsquiee' Jesús
31. Xuee na cwila'tyeⁿ nn'aⁿ judíos xuee pascua quia ty'ioomna Jesús ts'oom'naaⁿ. Nn'aⁿ na m'aⁿ n'iaaⁿ quii'ntaaⁿ nn'aⁿ judíos, tical'ue n'omna na nñom ndyee naⁿ'ñeeⁿ noom'naaⁿ xuee na cwita'jndyeena. Ee juu xuee'ñeeⁿ jeeⁿ t'maⁿ xuee tseixmaⁿna' quia cwila'cuee'na catsmaⁿ chjoo. Jo' chii ty'ecataⁿna nnom Pilato na catsa̱'ntjoom na catom ndei'nc'ee' naⁿ'ñeeⁿ cha catseityuaa'na' na nncwjena, ndo' cha tyuaa' nntaa'ndyena naⁿ'ñeeⁿ noom'naaⁿ.
32. Jo' chii sondaro'ñeeⁿ ty'ecatomna ndei'nc'ee ts'aⁿ najndyee, ndo' majo'ti l'ana cwiicheⁿ tsaⁿ'ñeeⁿ na ty'ioomna jom ts'oom'naaⁿ cwiicheⁿ ntyjaa' Jesús.
33. Sa̱a̱ quia na ty'entyjaa'na Jesús, jliuna na jnda̱ tueeⁿ'eⁿ. Tatîcatomna ndei'nc'eeⁿ.
34. Sa̱a̱ meiiⁿ na ljo' cwii sondaro'ñeeⁿ tjaa'ñe lantsa tsei'ntsqueeⁿ'eⁿ. Mañoom' jlui' niom' ñequio ndaa.
35. Ja nty'ia na ljo' tuii, ndo' macwji'yuu'ndyo̱. Cala'no̱ⁿ'yo' na mayu'a ñ'oom matseina̱ⁿ cha mati nnda̱a̱ nla'yu'yo'.
36. Ee nmeiiⁿ' tuii cha na catseicanda̱a̱'ñena' ñ'oom' Ty'o̱o̱ts'om na teiyo teiljeiina' nacjoo' libro Salmos. Matsona': “Meiⁿcwii tseiiⁿ'eⁿ tîcatom.”
37. Ndo' mati waa cwiicheⁿ ñ'oom' Ty'o̱o̱ts'om na teiljeiina' na matsona': “Nnty'iaana nquii ts'aⁿ na jla'cjoondyena tsei'ntsquiee'.” Tjacanty'iuu'ñe Jesús
38. Jnda̱ teinom nmeiⁿ', José ts'aⁿ na jnaⁿ Arimatea, tjacaaⁿ nnom Pilato na nñequiaa tsaⁿ'ñeeⁿ sei'ts'o ‘naaⁿ' Jesús. José'ñeeⁿ matseijomñê ñ'oom na mañequiaa Jesús sa̱a̱ cwe' nty'iu ee nquiaⁿ'aⁿ nn'aⁿ judíos. Pilato tquiaaⁿ ñ'oom'm. Jo' chii José tjaaⁿ, tjac'oom sei'ts'o ‘naaⁿ' Jesús.
39. Ñ'eⁿ Nicodemo, tsaⁿ na tja na m'aaⁿ Jesús cwii teijaaⁿ. Jom tjañ'oom cha'na ntquiuu nchoo' nqui kilos ncheⁿ' na tjoom'na' mirra ñequio áloes na nnty'oomndyena juuna' sei'ts'o ‘naaⁿ' Jesús.
40. Quia jo' to'ñoomna ts'oo Jesús, ty'oomndyena ncheⁿ' cachi'ñeeⁿ liaa na jndyuna' lino. Jnda̱ chii jla'tyjoondyena liaa'ñeeⁿ jom. Ee luaa' waa costumbre ‘naaⁿ nn'aⁿ judíos na cwity'iuuna l'oo.
41. Yuu na ty'ioom nn'aⁿ Jesús ts'oom'naaⁿ waa cwii ntjom. Naquii' ntjom'ñeeⁿ waa cwii tsei'tsuaa xco, na meiⁿjom ndii' tyoojaanty'iuu'ñe ts'oo.
42. Ndo' nc'e na mawaa xjeⁿ na nnc'ooquie' nn'aⁿ judíos xuee sauro', jo' chii jo' jo' ty'ecatjaa'ndyena ts'oo Jesús. Ee tsei'tsuaa'ñeeⁿ nndyoo' waana' yuu na ty'ioom nn'aⁿ Jesús ts'oom'naaⁿ.
| 
