1. Jnda̱ tuii nmeiⁿ', Jesús seica'mo̱ⁿñennaaⁿ'aⁿ nda̱a̱ jâ nn'aⁿ na cwilajomndyô̱ ñ'eⁿñê. S'aaⁿ na ljo' yocheⁿ na m'aaⁿyâ xndyaa' ndaaluee Tiberias. Luaa waa na seica'mo̱ⁿñê nda̱a̱yâ.
2. Ñe'naaⁿ' m'aaⁿ Simón Pedro ñequio Tomás tsaⁿ na cwil'uuyâ catyeⁿnquiee, ñequio Natanael na jnaⁿ Caná ts'o̱ndaa Galilea, ñequio wendyô̱ jâ ntseinda Zebedeo ñequio nt'omcheⁿ nc'iaayâ na t'maⁿ Jesús na cala'jomndyô̱ ñ'eⁿñê.
3. Tso Simón Pedro nda̱a̱yâ:Jo̱cwjii'a catscaa.L'uuyâ nnoom:—Cwitsaayâ ñ'eⁿndyu'.Quia jo' saayâ, tuo̱o̱yâ ts'om w'aandaa. Sa̱a̱ juu tsjom'ñeeⁿ meiⁿcwii catscaa tîcatjeii'â.
4. Ndo' jnda̱ wjaawixuee, quia jo' tyjee'cañoom Jesús jâ. Meintyjeeⁿ'eⁿ ‘ndyoo ndaaluee, sa̱a̱ tîcala'no̱o̱ⁿ'â na manqueⁿ jo'.
5. Quia jo' tax'eeñê nda̱a̱yâ:—'O tyja̱no̱ⁿ, ¿aa jnda̱ tjei'yo' calcaa?T'o̱o̱yâ nnoom:—Tjaa'naⁿ.
6. Matsoom nda̱a̱yâ:—Catue'yo' tsqui' ‘naⁿ'yo' ntyjaa' w'aandaa ntyjaya, quia ljo'cheⁿ nliu'yo' calcaa.Ndo' tua̱a̱'â juuna' jo' jo', jnda̱ jo' tileicanda̱a̱ nntjeii'â juuna' cwe' ee jeeⁿcheⁿ ndya' jndye calcaa chuuna'.
7. Quia jo' ja na jeeⁿ wi' ts'om Jesús, tsjo̱o̱ya nnom Pedro:—Juu Ta Jesús luaa'.Quia jñeeⁿ na ljo' tsjo̱o̱, tcweeⁿ liaa maseta, ee jnda̱ tjeiiⁿ'eⁿ juuna' na mach'eeⁿ ts'iaaⁿ. Jnda̱ jo' tju'ñê ts'om ndaaluee, mana tueⁿ'eⁿ tyuaatcwii.
8. Ndo' nt'omndyô̱ jâ tquio̱ntyjo̱o̱yâ cha'na wen'aaⁿ nchoo' nqui nc'aa ñ'eⁿ w'aandaa chjoo, chii squia̱a̱yâ tyuaatcwii. Ndo' saantyjaandyô̱ tsqui' na too' ñjom calcaa.
9. Quia na jnda̱ squia̱a̱yâ tyuaatcwii, nty'iaayâ ñoom na cwico, ndo' ljo catscaa ñ'eⁿ tyoo' cjoo ñoom'ñeeⁿ, cwineiiⁿna'.
10. Matso Jesús nda̱a̱yâ:—Quiocho'yo' nt'om calcaa na jnda̱ tjei'yo' je'.
11. Quia jo' tuo̱ Simón Pedro ts'om w'aandaa chjoo. Jndyoñ'oom tsqui' tyuaatcwii na too'na' ñjom calcaa nt'maⁿ. Tue'ntyjo̱ jooyoo' cwii siaⁿnto waljoo' wen'aaⁿ nchoo' nqui nchoo' ndyeeyo'. Ndo' meiiⁿ na jeeⁿ ndya' jndye calcaa'ñeeⁿ, sa̱a̱ tîcaty'ioo' tsqui'.
12. Matso Jesús nda̱a̱yâ:—Quio'yo' nlcwa'yo'.Sa̱a̱ meiⁿcwiindyô̱ jâ na cwilajomndyô̱ ñ'eⁿñê, tic'oom na t'maⁿ ts'om na nncwax'ee nnoom, ¿'Ñeeⁿ ‘u? Ee manquiuuyaayâ na manquii Ta Jesús jo'.
13. Quia jo' seicandyoo'ñe Jesús nacañoomyâ. To'ñoom tyoo' ñ'eⁿ catscaa. Tquiaaⁿ joona' nda̱a̱yâ.
14. Cantyjati na tquiaa Ty'o̱o̱ts'om na tando'xcoom na tueeⁿ'eⁿ, luaa' jnda̱ ndyee ndii' na seica'mo̱ⁿñê nda̱a̱ jâ na cwilajomndyô̱ ñ'eⁿñê ts'iaaⁿ na mach'eeⁿ. Ñ'oom na sa̱'ntjom Jesús Simón Pedro
15. Ndo' quia na jnda̱ tcwaa'â tax'ee Jesús ‘ndyoo Simón Pedro. Tsoom:—'U Simón jnda Jonás, ¿aa ja jndati ntyji' nchiiti ts'iaaⁿmeiⁿ' na mache'?T'o̱o̱ⁿ, matsoom:—Mayuu' Ta, ntyji' na ‘u wi' ts'o̱o̱ⁿya.Matso Jesús nnoom ñ'oom na wjaañoom':—Quiaa' na nlcwa' canmaⁿ nch'u cwentaya.
16. Jnda̱ we ndii' tax'eennaaⁿ'aⁿ nnom Pedro:—'U Simón, jnda Jonás, ¿aa mayuu' na jndati ntyji' ja?T'o̱ Pedro:—Mayuu' Ta, ntyji' na wi' ts'o̱o̱ⁿya ‘u.Tsonnda' Jesús ñ'oom na wjaañoom':—Cateixe' canmaⁿ cwentaya.
17. Na jnda̱ ndyee ndii' tax'eeñê nnom Pedro. Tsoom:—'U Simón, jnda Jonás, ¿aa wi' ts'om' ja?Seichjoo'na' ts'om Pedro na jnda̱ ndyee ndii' mawax'eeñe Jesús: “¿Aa wi' ts'om' ja?” Quia jo' t'o̱o̱ⁿ, tsoom:—Ta, cha'tso matsei'no̱ⁿ'. Ndo' manty'ia'nchaa'ndyu' na wi' ts'o̱o̱ⁿya ‘u.Matso Jesús nnoom:—Cateixe' canmaⁿ cwentaya.
18. Ñ'oom na mayuu'cheⁿ matseicandiiya ‘u. Quia ñet'oom' na xcwe ts'aⁿndyu', seijndaa'ndyu' na nntsa' meiⁿljo'cheⁿ na l'ue ts'om', ndo' tjaa ‘ñeeⁿ juu na nntseitsaaⁿ'ñe ‘u yuu na ñe'cja'. Sa̱a̱ quia na jnda̱ teinc'uaa'ndyu' nntseiliuu' l'o̱' ndo' nntseityeⁿ cwiicheⁿ ts'aⁿ ‘u na nncjaañ'oom ‘u yuu na tiñe'cja'.
19. Luaa' ñ'oom na tso Jesús na ma'mo̱o̱ⁿ ljo' cwii nnom na nnts'aana' na nncue' Pedro, na cantyja ‘naaⁿ' jo' nntseit'maaⁿ'ñena' Ty'o̱o̱ts'om. Quia na jnda̱ seineiiⁿ ñ'oommeiⁿ', matsoom:—'U candyo'ntyjo̱' naxa̱ⁿ'a. Ñ'oom na seineiⁿ Jesús cantyja ‘naaⁿ' Juan
20. Teiqueⁿ Pedro ndo' nty'iaaⁿ'aⁿ na jo̱ntyjo̱ ja na candya' ts'om Jesús ja, ndo' maja na seintyjo̱ndyo̱ jo ndo' jñaaⁿ quia na tcwaa'â teijaaⁿ'ñeeⁿ ñ'eⁿñê juu xjeⁿ na tax'a̱ya ‘ñom: “Ta, ¿'ñeeⁿ juu ts'aⁿ na nñequiaa cwenta ‘u?”
21. Ndo' quia nty'iaa' Pedro na jo̱ntyjo̱, tax'eeñê ‘ndyoo Jesús. Tsoom:—Ta, ndo' tsaⁿm'aaⁿ' je', ¿ljo' cwii nnom na nntjoom?
22. T'o̱ Jesús nnoom:—Xeⁿ l'ue ts'o̱o̱ⁿ na ñec'oom hasta quia nndyo̱o̱nnda'a, ¿ljo' mach'eena' ‘u? ‘U candyo'ntyjo̱' naxa̱ⁿ'a.
23. Quia jo' t'om ñ'oom quii'ntaaⁿ nn'aⁿ na cwila'yu' na tso Jesús na xoc'io̱ya. Sa̱a̱ nchii matsoom na xoc'io̱. Tomti tsoom: “Xeⁿ l'ue ts'o̱o̱ⁿ na ñec'oom hasta quia nndyo̱o̱nnda'a, ¿ljo' mach'eena' ‘u, Pedro?”
24. Maja luaa jo'. Maja matseiljeiya ñ'oommeiⁿ'. Ndo' joo ñ'oom na macwji'yuu'ndyo̱, ñ'oom na mayuu' jo', nchii cwe' na maquiu'nn'aⁿya.
25. Ndo' jndye nt'omcheⁿ ts'iaaⁿ maniom na s'aa Jesús. M'aaⁿ' ts'o̱o̱ⁿ xeⁿ nleiljeii cwii ndo' cwii joona', mach'eena' ntyjii na xocwijndeii tsjoomnancue libros na nluii na nleiljeii joo jo'. Mantyjati luaa'ndyo.
| 
