1. Sa̱a̱ Jesús tjaaⁿ ta na jndyu Olivos.
2. Ndo' teincoo cwiicheⁿ xuee, lcweeⁿ'eⁿ, tjaquiee'nnaaⁿ'aⁿ wats'om t'maⁿ. Ndo' jndyendye nn'aⁿ tquie'cañomna jom. Quia na jnda̱ tjacjom, tyo'mo̱o̱ⁿ nda̱a̱na.
3. Ndo' juu xjeⁿ'ñeeⁿ joo nn'aⁿ na cwit'mo̱o̱ⁿ ljeii na tqueⁿ Moisés na matsa̱'ntjomna' ñequio nn'aⁿ tmaaⁿ' fariseos tquioñ'omna cwii yuscu na m'aaⁿ. Yuscu'ñeeⁿ jliuna juu xcwe na matseitjo̱o̱ñe na m'aaⁿ ñ'eⁿ cwii tsaⁿs'a. Tquioqueⁿna juu xcwe quii'ntaaⁿna.
4. Ndo' jluena nnom Jesús:—'U na ma'mo̱o̱ⁿ' cantyja ‘naaⁿ' Ty'o̱o̱ts'om, jliuuyâ yuscum'aaⁿ' xcwe na matseitjo̱o̱ñê ñ'eⁿ cwii tsaⁿs'a.
5. Ndo' naquii' ljeii na tqueⁿ Moisés matsa̱'ntjomna' na catua̱a̱'a ljo̱' cjoo yolcu na cwil'a na luaa'. Sa̱a̱ ‘u je', ¿chiuu matsu'?
6. Luaa' jluena nnoom cwe' ee cwil'ueena na cat'uiina' jom. Sa̱a̱ jom je', seintquie'ñê, seiljeiⁿ nomtyuaa ñequio nomts'o̱o̱ⁿ.
7. Ndo' cwe' nc'e na tic'oowintyjee'na na cwita'x'eena ñ'oomwaa' nnoom, teintyjee'yuñê. Matsoom nda̱a̱na:—'Ñeeⁿ cwiindyo' ‘o na tjaa jnaⁿ tseixmaⁿ, juu cju'jndyee tsjo̱' nacjoo' yuscum'aaⁿ'.
8. Jnda̱ jo' seintquie'ñennaaⁿ'aⁿ nomtyuaa, seiljeiityeeⁿ.
9. Sa̱a̱ quia jndye naⁿ'ñeeⁿ ñ'oomwaa', jnaⁿna' na maco'tiana' nquiuna. Quia jo' to̱'na na cwii ndo' cwiindyena jlui'na jo' jo'. Nn'aⁿ na tquiendye jlui'jndyeena, jnda̱ jo' nn'aⁿ na cjeti m'aⁿ. Na macanda̱ ‘ndiina' nquii Jesús ñequio yuscu'ñeeⁿ na meintyjee' jo nnoom.
10. Jnda̱ jo' teintyjee'yuu Jesús, ndo' cwe' nc'e meiⁿcwiindye naⁿ'ñeeⁿ tac'oomndyena, macanda̱ juu yuscu'ñeeⁿ cwii m'aaⁿ, jo' chii tsoom nnom:—'U yuscu, ¿yuu m'aⁿ nn'aⁿ na tquiocalue jnaⁿ'? ¿Aa meiⁿncwii ts'aⁿ ticatseijndaa'ñe jnaⁿ'?
11. T'o̱ nnoom, matso:—Mayuu' Ta, meiⁿcwii ts'aⁿ tjaljo' s'aa.Matso Jesús nnom:—Meiⁿ ja ticats'aaya na cat'uiina' ‘u. Cja'to', tantsa'nnda' jnaⁿ. Jesús cwiluiiñê naxuee quii'ntaaⁿ nn'aⁿ
12. Ndo' seineiⁿnnda' Jesús nda̱a̱ nn'aⁿ. Matsoom:—Ja cwiluiindyo̱ naxueeñe na mañequia naxuee jo nda̱a̱ nn'aⁿ tsjoomnancue. Meiⁿcwi'ñeeⁿcheⁿ ts'aⁿ na matseijomñe ñ'eⁿndyo̱, nntseixmaⁿ naxuee na mañequia na ticantycwii na wando' ts'aⁿ. Tijoom nntseixmaⁿ cantyja ‘naaⁿ' najaaⁿ.
13. Quia jo' nn'aⁿ fariseos jluena nnoom:—'U macwji'yuu'ndyu' che'nncu' cantyja ‘naⁿ'. Ndo' ñ'oom'ñeeⁿ meiⁿ tiyuu' joona'.
14. T'o̱ Jesús nda̱a̱na:—Meiiⁿ na macwji'yuu'ndyo̱ cantyja ‘naⁿya, sa̱a̱ ñ'oom na mayuu' juuna', nc'e ntyjiiya yuu jnaaⁿya, ndo' ntyjiiya yuu jo̱yo̱. Sa̱a̱ ‘o ticaliu'yo' yuu jnaaⁿya, meiⁿ yuu na jo̱.
15. ‘O cwilajndaa'ndyo' jnaaⁿ nn'aⁿ cantyjati na jndo̱' n'om nn'aⁿ sa̱a̱ ja meiⁿcwii ts'aⁿ ticat'uiya juu cantyja jnaaⁿ'.
16. Sa̱a̱ quia nncue'ntyjo̱ xjeⁿ na nncu'xa̱ⁿ, nncu'xa̱ⁿ cha'xjeⁿ na maty'iomyana'. Ee nchii m'aaⁿya na ñenco̱ na nnts'aa ts'iaaⁿ'ñeeⁿ. Nquii Tsotya̱ na jñoom ja, m'aaⁿñê ñ'eⁿndyo̱.
17. Naquii' ñ'oom na sa̱'ntjom Ty'o̱o̱ts'om na teiljeiina' na cwileiñ'om'yo', waa ñ'oom na matsona': “Quia na cwitjoom' ñ'oom na cwitjei'yuu'ndye we nn'aⁿ, maxjeⁿ cwicalui'yuu' ñ'oom'ñeeⁿ.”
18. Jo' chii nc'e na luaa' matsona', ja cwiluiindyo̱ cwii ts'aⁿ na macwji'yuu'ndyo̱ cantyja ‘naⁿya, ndo' Tsotya̱ya cwiluiiñê cwiicheⁿ na jnda̱ we.
19. Quia jo' tax'eena nnoom:—¿Yuu m'aaⁿ Tsotye'?T'o̱ Jesús matsoom:—'O ticala'no̱ⁿ'yo' cantyja ‘naⁿya meiⁿ cantyja ‘naaⁿ' Tsotya̱ya. Ee xeⁿ cwila'no̱ⁿ'yo' cantyja ‘naⁿya mati nla'no̱ⁿ'yo' cantyja ‘naaⁿ' jom.
20. Ñ'oommeiiⁿ seineiⁿ Jesús yocheⁿ na tyo'mo̱o̱ⁿ naquii' wats'om t'maⁿ ‘naaⁿ nn'aⁿ judíos, yuu cwituee' nn'aⁿ s'om cwentaa' Ty'o̱o̱ts'om. Ndo' meiⁿcwii ts'aⁿ tîcat'uii jom, ee tyoowe'ntyjo̱ xjeⁿ na nntjoom nawi' t'maⁿ. “Yuu na jo̱ xonda̱a̱ nntsquie'yo'”
21. Cwiicheⁿ cwii ndii' matso Jesús nda̱a̱na:—Ja majo̱, ndo' ‘o nl'ue'yo' ja, sa̱a̱ ndicwaⁿ cho'nqueⁿ'yo' jnaⁿ ndo' nncwje'yo'. Ndo' yuu na jo̱ ‘o xocanda̱a̱ nntsquie'cañom'yo'.
22. Cwe' nc'e ñ'oomwaa', jlue nn'aⁿ judíos:—¿Aa nnts'aacheⁿna' na nntseicuee'ñe cheⁿnqueⁿ, na matsoom yuu na mawjaⁿ jaa xocanda̱a̱ nntsquie'caño̱o̱ⁿya?
23. Jo' chii t'o̱o̱ⁿ nda̱a̱na, tsoom:—'O ticalaxmaⁿ'yo' cantyja ‘naaⁿ' cañoom'luee sa̱a̱ ja tseixmaⁿya jo'. ‘O laxmaⁿ'yo' cantyja ‘naaⁿ' tsjoomnancuewaañe, sa̱a̱ ja nchii jo' tseixmaⁿya.
24. Cwe' nc'e ñ'oomwaa' jo' na tsjo̱o̱ya nda̱a̱'yo' na ndicwaⁿ cho'nqueⁿ'yo' jnaⁿ'yo' ndo' nncwje'yo'. Ee xeⁿ ticalayu'yo' na ja cwiluiindyo̱ nquii na jñom Ty'o̱o̱ts'om, quia jo' meiⁿchiuucheⁿ ndicwaⁿ cho'nqueⁿ'yo' jnaⁿ'yo' quia na nncwje'yo'.
25. Quia jo' tax'eennda'na nnoom, jluena:—'U je', ¿'ñeeⁿ cwiluiindyu'?Matso Jesús nda̱a̱na:—Majo' cha'xjeⁿ na jnda̱ ñetsjo̱o̱ nda̱a̱'yo' xjeⁿ na to̱'a na mañequiaya ñ'oom naya.
26. Nqueⁿ na jñoom ja cwiluiiñê na mayom'm. Jndye ñ'oom tsoom no̱o̱ⁿ na catsjo̱o̱ya nda̱a̱'yo'. Ndo' ñequii'cheⁿ matseiteinco̱o̱'a joo ñ'oom'ñeeⁿ nda̱a̱ nn'aⁿ. Sa̱a̱ jndye niom na ntyjeeⁿ ñ'eⁿndyo' na macaⁿna' na cu'xa̱ⁿya.
27. Sa̱a̱ naⁿ'ñeeⁿ tîcala'no̱ⁿ'na na ma'mo̱o̱ⁿ nda̱a̱na na Ty'o̱o̱ts'om cwiluiiñe Tsotyeeⁿ.
28. Quia jo' matsoom nda̱a̱na:—Ja cwiluiindyo̱ nquii ts'aⁿ na jnaⁿ cañoom'luee. Quia na jnda̱ jla'we'yo' ja na nlacue'yo', quia ljo'cheⁿ nla'no̱ⁿ'yo' na jo' cwiluiindyo̱, ndo' nncjaantyjo̱o̱' n'om'yo' na tjaa'naⁿ cwii na mats'aa cantyja na matseixmaⁿ nnco̱. Cantyjati na t'mo̱ⁿ Tsotya̱ no̱o̱ⁿ, ntyjati jo'ndyo na mats'aa.
29. Ndo' Tsotya̱ na jñoom ja m'aaⁿñê ñ'eⁿndyo̱. Tica'ñeeⁿ ja na ñenco̱, ee ñequii'cheⁿ mats'aa yuu na cjawee' ntyjeeⁿ ñ'eⁿndyo̱.
30. Jnda̱ na seineiiⁿ ñ'oommeiⁿ', jndye nn'aⁿ jla'yu' ñ'eⁿñê. Ñ'oom na mayuu' nntseicandyaañena' ‘o
31. Ndo' matso Jesús nda̱a̱ nn'aⁿ judíos na jnda̱ macwila'yu' ñ'eⁿñê:—Xeⁿ cwiljoo'ndyo'tyeⁿ'yo' ñequio ñ'oom naya quia jo' mayuu'cheⁿ na cwiluiindyo' nn'aⁿ na cwilajomndyo' ñ'oom na mañequiaya.
32. Ndo' nla'no̱ⁿ'yo' cwaaⁿ ñ'oom tseixmaⁿna' ñ'oom na mayuu', ndo' juu ñ'oom na mayuu'ñeeⁿ nntseicandyaañena' ‘o.
33. Joo naⁿ'ñeeⁿ t'o̱o̱na nnoom, jluena:—Jâ cwiluiindyô̱ tsjaaⁿ Abraham na jndyowicantyjoo'. Meiⁿjom ndii' tyoom'aaⁿyâ moso nda̱a̱ nt'omcheⁿ nn'aⁿ. ¿Chiuu na matsu' na nnc'o̱o̱ⁿcandyaa'ndyô̱ na m'aaⁿyâ nacje ‘naaⁿ' cwiicheⁿ?
34. T'o̱ Jesús nda̱a̱ naⁿ'ñeeⁿ, matsoom:—Ñ'oom na mayuu'cheⁿ matsjo̱o̱ya nda̱a̱'yo'. Meiⁿcwi'ñeeⁿcheⁿ ts'aⁿ na matseitjo̱o̱ñe nnom Ty'o̱o̱ts'om m'aaⁿ xjeⁿ ‘naaⁿ' jnaⁿ.
35. Ndo' ts'aⁿ na cwe' moso m'aaⁿ nnda̱a̱ nnts'aana' na tixocaljoo'ñetyeⁿ na m'aaⁿ patrom ‘naaⁿ', sa̱a̱ nquii jnda patrom ñenquiicheⁿ m'aaⁿ.
36. Ja na cwiluiindyo̱ Jnda Ty'o̱o̱ts'om, ja nntseicandyaandyo̱ ‘o. Macwe' nc'e jo' nnc'om'yo' na canda̱a̱'ya na jnda̱ jndyaandyo'.
37. Mantyjiiya na ‘o cwiluiindyo' tsjaaⁿ Abraham na jndyowicantyjoo', sa̱a̱ cwiqueⁿndyo' na nlacue'yo' ja jnaaⁿ' na tileicjo̱ ñ'oom ‘naⁿya naquii' n'om'yo'.
38. Ljo' na jnda̱ ñenty'iaya na ñet'o̱o̱ⁿya ñequio Tsotya̱, jo' matseina̱ⁿya nda̱a̱'yo'. Sa̱a̱ ‘o je', cantyja na jnda̱ ñejndye'yo' ñ'oom ‘ndyoo tsotye'yo', jo' cwil'a'yo'.
39. T'o̱o̱ naⁿ'ñeeⁿ nnoom, jluena:—Abraham cwiluiiñê tsotya̱a̱ya.Matso Jesús nda̱a̱na:—Xeⁿ ‘o na mayuu'cheⁿ cwiluiindyo' ntseinda Abraham na jndyowicantyjoo', quia jo' nl'a'yo' cha'xjeⁿ s'aaⁿ.
40. Sa̱a̱ je' cwijoo' n'om'yo' na ñe'calacue'yo' ja na cwiluiindyo̱ ts'aⁿ na matseina̱ⁿya ñ'oom na mayuu' nda̱a̱'yo'. Ndo' joo ñ'oom'ñeeⁿ ñequii'cheⁿ ñ'oom na jndiiya ‘ndyoo Ty'o̱o̱ts'om. Nquii Abraham tîcats'aaⁿ cha'na ñe'cal'a' o' ñ'eⁿndyo̱.
41. ‘O cwil'a'yo' cha'xjeⁿ na mach'ee nquii tsotye'yo'.Jluena nnoom:—Jâ nchii na tuiindyô̱ na tijndaa' tsotya̱a̱yâ. Jâ la'xmaaⁿyâ na ñecwii tsotya̱a̱yâ, nquii Ty'o̱o̱ts'om.
42. T'o̱ Jesús nda̱a̱na, matsoom:—Xeⁿ na mayuu'cheⁿ Ty'o̱o̱ts'om cwiluiiñê tsotye'yo', quia jo' mati nnc'om'yo' na jnda nquiu'yo' ja ee jnaaⁿya na m'aaⁿ ndo' jndyo̱o̱ya na m'aⁿ'yo'. Nchii jndyo̱o̱ cantyja ‘naⁿ nnco̱, nqueⁿ jñoom ja.
43. ¿Chiuu na tileicala'no̱ⁿ'yo' ñ'oom na matseina̱ⁿ? Maxjeⁿ cwitjom'yo' na nmeiiⁿ' nc'e na tiñe'calañ'oom'ndyo' ja.
44. ‘O laxmaⁿ'yo' cantyja ‘naaⁿ' tsotye'yo', juu tsaⁿjndii. Yuu na l'ue ts'om jom, jo' ñe'calacanda̱a̱'ndyo'. Jom cwiluiiñê na matseicwjeⁿ nn'aⁿ cantyjati xjeⁿ na tuii tsjoomnancue. Jom tjaa'naⁿ ñ'oom na mayuu' catseixmaaⁿ, ee tjaa'naⁿ ñ'oom na mayuu' naquii' ts'oom. Quia matseineiiⁿ cantu, matseineiiⁿ cantyjati na matseixmaaⁿ, cwe' nc'e tsaⁿcantu jom, ndo' cwiluiiñê tsotye cha'tso ñ'oom na cantu.
45. Sa̱a̱ ja meiiⁿ na matseina̱ⁿya ñ'oom na mayuu' maxjeⁿ tiñe'calayu'yo' ñ'eⁿndyo̱.
46. Tjaa ‘ñeeⁿ cwiindyo' ‘o nnda̱a̱ nncju' jnaⁿ nacjoya. Ñ'oom na matsjo̱o̱ nda̱a̱'yo' cwiluiiñena' ñ'oom na mayuu', quia jo' ¿chiuu na tiñe'calayu'yo' ñ'eⁿndyo̱?
47. Meiⁿcwi'ñeeⁿcheⁿ ts'aⁿ na m'aaⁿñe cantyja ‘naaⁿ' Ty'o̱o̱ts'om mandii ñ'oom ‘ñom. Sa̱a̱ cwe' nc'e na ticaluiindyo' cantyja ‘naaⁿ'aⁿ, jo' chii tiñe'candye'yo'. Mam'aaⁿ Jesús cwii tjo̱o̱cheⁿ na nnc'oom Abraham
48. Quia jo' t'o̱o̱ nn'aⁿ judíos nnoom. Jluena:—Jeeⁿ xcwe cwil'uuyâ na ‘u cwiluiindyu' ts'aⁿ Samaria. Mati m'aaⁿ tsaⁿjndii quii' ts'om' jo' na matseintjeiⁿna' ‘u.
49. Jesús t'o̱o̱ⁿ nda̱a̱na. Matsoom:—Ja tic'oom tsaⁿjndii quii' ts'o̱o̱ⁿ. Ja Tsotya̱ya matseit'maaⁿ'ndyo̱, sa̱a̱ ‘o cwilajnaⁿ'yo' ja.
50. Sa̱a̱ nchii mal'uee'ndyo̱ na calat'maaⁿ'ndyo' ja. M'aaⁿ cwiicheⁿ na mach'ee na nluiit'maaⁿ'ndyo̱, ndo' manquii nncu'xeⁿ aa cwiluii na ljo'.
51. Ñ'oom na mayuu'cheⁿ na matsjo̱o̱ nda̱a̱'yo'. Meiⁿcwi'ñeeⁿcheⁿ ts'aⁿ na matseiñ'oom'ñe ñ'oom ‘naⁿya, tijoom nntsuuñe.
52. T'o̱o̱ nn'aⁿ judíos, jluena:—Je' manquiujndaa'ndyo̱ na matsei'xmaⁿ' tsaⁿjndii quii' ts'om'. Tue' Abraham, ndo' mati profetas. Sa̱a̱ ‘u matsu': “Xeeⁿ m'aaⁿ ‘ñeeⁿ juu na matseiñ'oom'ñe ñ'oom ‘naⁿ', tijoom cue'.”
53. Chaa l'uu na cwiluiit'maⁿndyu'ti', nchiiti weloo welooya Abraham tsaⁿ na teiyo tue' ndo' mati jnda̱ tja̱ profetas. ¿'Ñeeⁿ juu mache' cheⁿnncu' na cwiluiindyu'?
54. T'o̱ Jesús, matsoom:—Xeⁿ ñequii'cheⁿ na matseit'maaⁿ'ndyo̱ cheⁿnnco̱, maxjeⁿ cwe' ts'iaaⁿ'ndyo. Juu Tsotya̱ya cwiluiiñê na matseit'maaⁿ'ñê ja, nqueⁿ na cwiluiiñê Ty'o̱o̱ts'om na cwila't'maaⁿ'ndyo'.
55. Meiⁿ ticata'jnaaⁿ'yo' jom. Ja mayuu' mawajnaⁿ'a jom, ndo' xeⁿ nntsjo̱o̱ na ticwajnaⁿ'a jom, quia jo' nnts'aa cheⁿnnco̱ na cantundyo̱ cha'xjeⁿ ‘o. Sa̱a̱ mayuu'cheⁿ mawajnaⁿ'a jom, ndo' matseicanda̱a̱'ndyo̱ ñ'oom'm.
56. Tioo na neiiⁿ' ts'om weloo'yo' Abraham tsaⁿ na ñet'oom teiyo na sei'no̱o̱ⁿ'o̱ⁿ na nncuee' xjeⁿ na nluiindyo̱ na ts'aⁿ ja. Nty'iaaⁿ'aⁿ jo', ndo' tquiaana' na jeeⁿ neiiⁿ'eⁿ cantyja ‘naaⁿ' na ljo'.
57. Ndo' jlue nn'aⁿ judíos nnoom:—Nchaa l'uu mayuu' na jnda̱ nty'ia' Abraham ee ‘u meiⁿ cwe' wen'aaⁿ nchoo' nqui chu' tyoowee'.
58. T'o̱ Jesús nda̱a̱ naⁿ'ñeeⁿ, matsoom:—Ñ'oom na mayuu'cheⁿ matsjo̱o̱ nda̱a̱'yo', cwii tjo̱o̱cheⁿ na nluiiñe Abraham, sa̱a̱ ja maxjeⁿ mam'aaⁿya.
59. Quia jo' jla'xcwiina ljo̱' na njñomna jom. Meiⁿ tiqueⁿna cwenta teiño̱o̱ⁿ xcwe quii'ntaaⁿna. Mana jlueeⁿ'eⁿ wats'om t'maⁿ ‘naaⁿna.
| 
