1. Jâ nn'aⁿ na canchoo'we na t'maⁿ Jesús na calajomndyô̱ ñ'eⁿñê tyoma'no̱o̱ⁿyâ ñ'eⁿñê. Yocheⁿ na saawi'no̱o̱ⁿyâ cwii joo, nty'iaayâ cwii tsaⁿs'a xjeⁿ na tuiiñe na nchjaaⁿ'.
2. Ndo' tax'a̱a̱yâ nnoom, l'uuyâ:—'U Maestro, ¿'ñeeⁿ juu seitjo̱o̱ñe nnom Ty'o̱o̱ts'om, jo' na tuiiñe tsaⁿm'aaⁿ' na nchjaaⁿ'aⁿ? ¿Aa nqueⁿ oo aa nn'aⁿ na nda jom?
3. T'o̱ Jesús nda̱a̱yâ, matsoom:—Meiⁿ nchii jnaaⁿ' nquii na tuiiñe na nchjaaⁿ', meiⁿ nchii jnaaⁿ nn'aⁿ na nda juu. Luaa' tjom cha cantyja ‘naaⁿ' ca'mo̱ⁿna' na nquii Ty'o̱o̱ts'om waa najndeii na matseixmaaⁿ.
4. Tseixmaⁿya na cats'aaya ts'iaaⁿ ‘naaⁿ' nqueⁿ na jñoom ja yocheⁿ na ndicwaⁿ wando̱'a. Ee quia nncue'ntyjo̱ xjeⁿ na nncwja̱a̱ya, quia jo' xonda̱a̱ nl'aatya̱a̱ya ts'iaaⁿ ‘naaⁿ'aⁿ.
5. Yocheⁿ na m'aaⁿya quii'ntaaⁿ nn'aⁿ, cwiluiindyo̱ chom na mañequiaa naxuee jo nda̱a̱na.
6. Jnda̱ na tsoom na luaa', tjoom'm ndaajnaⁿ' nomtyuaa. S'aaⁿ tsoo' ñequio juuna', jnda̱ jo' ty'oomñê tsoo'ñeeⁿ lua'nnom tsaⁿnchjaaⁿ'.
7. Ndo' tsoom nnom:—Cja' peila na jndyu Siloé, camaⁿ' n'omnjom'. Ñ'oom Siloé matsona' jñom ts'aⁿ x'iaaⁿ'aⁿ.Ndo' tja tsaⁿ'ñeeⁿ, tmaaⁿ nnoom. Ndo' quia jndyolcweeⁿ'eⁿ xuee manty'iaaⁿ'aⁿ.
8. Ndo' nn'aⁿ na nndyoo' m'aⁿ yuu na mac'eeⁿ ñequio nn'aⁿ na ñenty'iaana jom na ñetcaaⁿ ljo' tjo̱o̱ñê, ta'x'eena nda̱a̱ ntyjeena:—¿Aa nchii luaa' tsaⁿnchjaaⁿ' na tacatyeeⁿ na tcaⁿ ljo' tjo̱o̱ñe?
9. Nt'omndye joona jluena:—Majom luaa'.Sa̱a̱ nt'omcheⁿ jlue:—Nchii jom, cwe' na jeeⁿ tseijomna'.Sa̱a̱ nqueⁿ matsoom:—Maja luaa.
10. Jo' na ta'x'eena nnoom, jluena:—¿Chiuu tuiiyuu na ya teitquio' je'?
11. T'o̱o̱ⁿ nda̱a̱na, tsoom:—Juu ts'aⁿ na jndyu Jesús s'aaⁿ tsoo', ty'oomñê juuna' lua'no̱o̱ⁿ. Jnda̱ jo' matso na cjo̱ya Siloé na cjo̱camaaⁿ no̱o̱ⁿ. Ndo' tjo̱ jo', tmaaⁿ no̱o̱ⁿ, ndo' je' xuee manty'iaya.
12. Quia jo' ta'x'eetina nnoom, jluena:—¿Ndo' juu tsaⁿ'ñeeⁿ, yuu m'aaⁿ?T'o̱o̱ⁿ nda̱a̱na:—Ticaljeiiya. Fariseos ñe'caliuna chiuu tuii na n'maⁿ tsaⁿnchjaaⁿ'
13. Quia jo' ty'eñ'omna juu ts'aⁿ na ñet'oom na nchjaaⁿ' jo nda̱a̱ nn'aⁿ judíos na la'xmaⁿ tmaaⁿ' fariseos.
14. Ee xuee na cwita'jndyee nn'aⁿ quia s'aa Jesús tsoo' na s'aaⁿ na ya manty'iaa' tsaⁿ'ñeeⁿ.
15. Ndo' mati nn'aⁿ fariseos'ñeeⁿ tyota'x'eena nnoom. Tyoluena:—¿Chiuu tuiiyuu na ya manty'ia'?T'o̱o̱ⁿ nda̱a̱ naⁿ'ñeeⁿ, tsoom:—Juu tsaⁿ'ñeeⁿ ty'oomñê tsoo' lua'no̱o̱ⁿ, jnda̱ chii tmaaⁿya lua'no̱o̱ⁿ, ndo' je' ya manty'iaya.
16. Sa̱a̱ nt'om fariseos'ñeeⁿ tyoluena:—Tsaⁿs'am'aaⁿ' nchii m'aaⁿ cantyja ‘naaⁿ' Ty'o̱o̱ts'om, ee ticatseit'maaⁿ'ñê xuee na cwita'jndya̱a̱ya.Ndo' nt'om nc'iaana jlue:—Ts'aⁿ na tseixmaⁿ jnaⁿ tixocanda̱a̱ nnts'aaⁿ cwii ts'iaaⁿ t'maⁿ cha'na luaa'.Ndo' laa'ti' tîcwijom ñ'oom na jla'neiⁿna.
17. Jo' chii ta'x'eennda'na nnom ts'aⁿ na ñet'oom na nchjaaⁿ'. Jluena nnoom:—Ndo' ‘u je', ¿ljo' matsu' cantyja ‘naaⁿ'aⁿ na s'aaⁿ na ya manty'ia'?T'o̱o̱ⁿ, matsoom:—Tsaⁿ'ñeeⁿ cwiluiiñê profeta.
18. Sa̱a̱ nn'aⁿ judíos'ñeeⁿ maxjeⁿ tiñe'cala'yu'na na ñet'oom na nchjaaⁿ'aⁿ ndo' je' jnda̱ ljoya manty'iaaⁿ'aⁿ. Jo' chii tqueeⁿ'ndyena nn'aⁿ na nda jom.
19. Ndo' ta'x'eena nda̱a̱ naⁿ'ñeeⁿ, jluena:—Tsaⁿm'aaⁿ', ¿aa nda'yo' jom? Chiuu cwindu'yo', ¿aa mayuu' na tuiiñê na nchjaaⁿ'aⁿ?
20. Ndo' t'o̱o̱ nn'aⁿ na nda jom. Jluena:—Manquiuuyâ na ndaayâ jom, ndo' manquiuuyâ na tuiiñê na nchjaaⁿ'aⁿ.
21. Sa̱a̱ cantyja chiuu tuiiyuu na ya manty'iaaⁿ'aⁿ je', jo' ticaliuuyâ. Meiⁿ ticaliuuyâ ‘ñeeⁿ s'aa na ya manty'iaaⁿ'aⁿ. Sa̱a̱ jnda̱ tue'ntyjo̱ choom'm. Jo' chii cata'x'ee'yo' ‘ñom chiuu waa. Manquiityeeⁿ nntsoom chiuu tuii.
22. Luaa' ñ'oom t'o̱o̱ joo nn'aⁿ na nda jom, ee nquiaana nn'aⁿ na cwiluiitquiendye nda̱a̱ nn'aaⁿna. Ee jnda̱ jla'jomndyena xeⁿ na nncwji'yuu'ñe meiⁿcwi'ñeeⁿcheⁿ ts'aⁿ na Jesús cwiluiiñê Cristo, tixonquiana na wanaaⁿ na nntseijomñe tsaⁿ'ñeeⁿ xjeⁿ na cwitjomndye nn'aⁿ na nla't'maaⁿ'ndyena Ty'o̱o̱ts'om.
23. Cwe' na luaa' waa, jo' na jlue nn'aⁿ na nda jom: “Jnda̱ tue'ntyjo̱ ñoom'm. Cata'x'ee'yo' ‘ñom.”
24. Quia jo' jnda̱ we ndii' tqueeⁿ' nn'aⁿ judíos juu tsaⁿ na ñet'oom na nchjaaⁿ'. Tyoluena nnoom:—Ñequio na ndo' Ty'o̱o̱ts'om catseineiⁿ' ñ'oom na mayuu'cheⁿ. Jâ cwila'no̱o̱ⁿ'â na juu tsaⁿs'am'aaⁿ' matseixmaaⁿ jnaⁿ.
25. Ndo' t'o̱o̱ⁿ nda̱a̱na, matsoom:—Ticaljeiiya, aa jom ts'aⁿ na matseixmaⁿ jnaⁿ. Ñe'cwii waa na matsei'no̱ⁿ'a, meiiⁿ na ñet'o̱o̱ⁿ na nchjaⁿya, sa̱a̱ je' ya manty'iaya.
26. Quia jo' ta'x'eennda'na nnoom. Jluena:—¿Ljo' s'aaⁿ ‘u? ¿Chiuu s'aayom na ya manty'ia'?
27. T'o̱o̱ⁿ nda̱a̱ naⁿ'ñeeⁿ, matsoom:—Majnda̱ tsjo̱o̱ya nda̱a̱'yo', sa̱a̱ ticalañ'oom'ndyo'. Ndo' je' ¿chiuu na ñe'candye'nnda'yo'? ¿Aa mati ‘o ñe'calajomndyo' ñ'oom na mañequiaaⁿ?
28. Ndo' jla'jnaaⁿ' naⁿ'ñeeⁿ ts'aⁿ na ñet'oom na nchjaaⁿ'. Jluena:—'U cwiluiindyu' ts'aⁿ na matseijomñe ñ'oom'm, sa̱a̱ jâ cwilajomndyô̱ ñ'oom na tyoñequiaa Moisés.
29. Jâ manquiuuyayâ na seineiⁿ Ty'o̱o̱ts'om nnom Moisés, sa̱a̱ tsaⁿm'aaⁿ' meiⁿ cwe' ticaliuuyâ yuu jnaⁿyom.
30. T'o̱ tsaⁿ'ñeeⁿ nda̱a̱na, matsoom:—Jeeⁿcheⁿ ndya' cjaawee' ts'o̱o̱ⁿ na luaa', na ‘o ticaliu'yo' yuu jnaⁿyom, ndo' jnda̱ tquiaaⁿ na ya manty'iaya.
31. Cha'tsondyo̱ manquiuuya na Ty'o̱o̱ts'om xocañeeⁿ ñ'oom ndyuee nn'aⁿ na laxmaⁿ jnaⁿ. Sa̱a̱ meiⁿcwi'ñeeⁿcheⁿ ts'aⁿ na matseit'maaⁿ'ñe jom ndo' na mach'ee yuu na l'ue ts'oom, tsaⁿ'ñeeⁿ nñeeⁿ ñ'oom ‘ndyoo.
32. Cantyjati xuee na jnaⁿ tsjoomnancue, meiⁿjom ndii' tyoondye nn'aⁿ na ñet'oom cwii ts'aⁿ na s'aa na ya manty'iaa' cwii ts'aⁿ na tuiiñe na nchjaaⁿ'.
33. Xeⁿ nchii Ty'o̱o̱ts'om m'aaⁿ ñ'eⁿ tsaⁿm'aaⁿ', tjaa na nnda̱a̱ nnts'aaⁿ.
34. T'o̱o̱na nnoom, jluena:—'U cha'tso na cha'tso cantyja na tuiindyu' matsei'xmaⁿ' jnaⁿ. Ndo' ¿aa matseijndu' na m'mo̱ⁿ' nda̱a̱ jâ?Quia jo' tjeii'na jom wats'om chjoo ‘naaⁿna yuu cwitjomndyena. La'xmaⁿna cha'na nn'aⁿ nchjaaⁿ jo nnom Ty'o̱o̱ts'om
35. Jndii Jesús na tjeii'na tsaⁿ'ñeeⁿ quii'ntaaⁿna. Quia ljeiiⁿ juu, matsoom nnom:—¿Aa matseiyu' ñequio Jnda Ty'o̱o̱ts'om?
36. T'o̱ tsaⁿ'ñeeⁿ, matsoom:—Jeeⁿ ‘u Ta, ¿cwaaⁿ ts'aⁿ jom cha ya nntseiyu'a ñ'eⁿñê?
37. Matso Jesús nnoom:—Majnda̱ nty'ia' jom. Mannco̱ na matseina̱ⁿya njom' cwiluiindyo̱ nqueⁿ.
38. Quia jo'cheⁿ matsoom:—'U Ta, matseiyu'a ñ'eⁿndyu'.Ndo' seit'maaⁿ'ñê Jesús.
39. Ndo' Jesús matsotyeeⁿcheⁿ:—Ja jndyo̱o̱ tsjoomnancuewaañe na nnto̱ⁿ'a nn'aⁿ. Nquiee nn'aⁿ na ndoo' nquiuna na cwila'no̱ⁿ'na chiuu waa cantyja ‘naaⁿ' Ty'o̱o̱ts'om nnts'aa na nnc'omna cha'cwijom ts'aⁿ na nchjaaⁿ'. Ndo' joo nn'aⁿ na ndoo' nquiuna na m'aⁿna na nchjaaⁿna cantyja ‘naaⁿ' Ty'o̱o̱ts'om, joona nñequiaya na canda̱a̱'ya nla'no̱ⁿ'na cantyja ‘naaⁿ'aⁿ.
40. Nndyoo' meintyjee' cwantindye nn'aⁿ tmaaⁿ' fariseos, ndo' jndyena na luaa' tso Jesús. Quia jo' ta'x'eena nnoom, jluena:—¿Aa mati jâ mach'eena' na nchjaaⁿyâ?
41. T'o̱ Jesús nda̱a̱na, matsoom:—Xeⁿ na je' laxmaⁿ'yo' cha'na nn'aⁿ na ticala'no̱ⁿ' cantyja ‘naaⁿ' Ty'o̱o̱ts'om quia jo' tjaa'naⁿ jnaⁿ na cwilaxmaⁿ'yo'. Sa̱a̱ nc'e na cwindu'yo' na ‘o laxmaⁿ'yo' nn'aⁿ na canda̱a̱'ya cwila'no̱ⁿ' cantyja ‘naaⁿ' Ty'o̱o̱ts'om, jo' chii cwilaxmaⁿ'yo' na cho'nqueⁿ'yo' jnaⁿ'yo'.
| 
