1. Cwii xuee na cwita'jndyee nn'aⁿ, tjatseijomñe Jesús waa' ts'aⁿ na cwiluiitquieñe cantyja ‘naaⁿ nn'aⁿ fariseos, na nlcwaaⁿ'aⁿ jo' jo'. Ndo' ñ'eeⁿ nn'aⁿ fariseos na tyoqueⁿ cwenta ljo' nnts'aaⁿ.
2. Jo' jo' tjameintyjee' cwii ts'aⁿ na wii' jo nnoom na ndii' tcoo'.
3. Ndo' tax'eeⁿ nda̱a̱ nn'aⁿ na cwit'mo̱o̱ⁿ ljeii na tqueⁿ Moisés ñequio nn'aⁿ fariseos, tsoom:—¿Aa maty'iomyana' na nntsein'maⁿ ts'aⁿ tsaⁿwii' xuee na cwita'jndyee nn'aⁿ, oo aa ticaty'iomna'?
4. Sa̱a̱ joona yacheⁿ jla'cheⁿna. Quia jo' to'ñoom ts'aⁿwii', sein'maaⁿ juu ndo' tsoom nnom:—Ya xeⁿ na wja'to' wa'.
5. Jnda̱ jo' tsoom nda̱a̱ fariseos'ñeeⁿ:—¿Aa m'aaⁿ cwiindyo' ‘o na xocatseicjeeñe na nncwji' snom oo quio'jndyo tsmeiⁿ' na tju'na' ts'om tsue'tsjoom, meiiⁿ na juu xuee na cwita'jndyee nn'aⁿ?
6. Sa̱a̱ ticat'o̱o̱na ‘ñom. Nn'aⁿ na ‘oo yuu na macoco ts'aⁿ
7. Ndo' naⁿ'ñeeⁿ na tqueeⁿ' ts'aⁿ fariseo na nlcwa' ñ'eⁿñê, tqueⁿ Jesús cwenta ljo' l'ana. Jla'yuu nda̱a̱na ntsula̱ nacañoom'ticheⁿ nacañoom' meiⁿsa. Jo' chii seineiiⁿ ñ'oom tjañoom' nda̱a̱na.
8. Tsoom:—Quia na maqueeⁿ' ts'aⁿ ‘u na catseijomndyu' na macoco jnaaⁿ, tincja'cajmaⁿ' sula̱ nacañoom'ticheⁿ. Ee xeⁿ nntseijomna' tqueeⁿ'ñê cwiicheⁿ ts'aⁿ na t'maⁿti cwiluiiñe, nchiiti ‘u,
9. quia jo' jom na tqueeⁿ'ñê ‘o, nncjaantyjaaⁿ'aⁿ ‘u, nntsoom njom': “‘U quiaa' na tsaⁿm'aaⁿ nncjom yuu na wacatyeⁿ'.” Quia jo' nlui'jnaaⁿ'ndyu' na nncja'cajmaⁿ' sula̱ na macanda̱.
10. Jo' chii, quia na maqueeⁿ'ñe ts'aⁿ ‘u, cja'cajmaⁿ' sula̱ na we'yandyo, cha quia na nncjaantyjaa' ts'aⁿ na tqueeⁿ'ñe ‘u, nntsoom njom': “‘U x'iaya, cwinoom' nacañoomcheⁿ.” Quia jo' nntseit'maaⁿ'ñena' ‘u jo nda̱a̱ cha'tso nn'aⁿ na meindyuaandye nacañoom' meiⁿsa ñ'eⁿndyu'.
11. Ee meiⁿcwi'ñeeⁿcheⁿ ts'aⁿ na matseiwendyeñe cheⁿnquii, maxjeⁿ nntseiquioo Ty'o̱o̱ts'om juu. Ndo' meiⁿcwi'ñeeⁿcheⁿ ts'aⁿ na maju'ñecje, maxjeⁿ nntseiwendye Ty'o̱o̱ts'om tsaⁿ'ñeeⁿ.
12. Mati tso Jesús nnom ts'aⁿ na tqueeⁿ'ñe jom:—Quia na maqueⁿ' nn'aⁿ na cala'jomndye na nlcwa'yo' na quiajmeiⁿ' oo natmaaⁿ, tilqueⁿ' nc'ia', meiⁿ nn'aⁿ' nncu', meiⁿ nn'aⁿ' na jnda̱ teitquio̱o̱', meiⁿ naⁿtya na m'aⁿ nndyoo'. ¿Ee aa nchii nncuee' xuee na majo'ti nl'a joona, cha nnjoom cha'xjeⁿ na sa' ‘u?
13. Jo' chii quia na nntsa' nantquie na t'maⁿ na nlcwa' nn'aⁿ, queⁿ' ndyeñeeⁿ' ñ'eⁿ nn'aⁿ na ticanda̱a̱' luee, nc'ee', ndo' nn'aⁿ na tileic'ooca' ñequio nn'aⁿ na nchjaaⁿ.
14. Quia jo' nnc'oom' na neiⁿ' na luaa' nntsa'. Ee joona xocanda̱a̱ nl'ana na nnjoom ljo' na sa', sa̱a̱ ‘u nnco'ñom' na nnjoom quia na nnta'ndo'nnda' nn'aⁿ na ñel'a yuu na maty'iomyana'. Nantquie t'maⁿ natmaaⁿ
15. Cwii ts'aⁿ na ñ'eⁿ meindyuaandyena nacañoom' meiⁿsa, quia na jndii na luaa', tso nnom Jesús:—Nñequiaana' na neiiⁿ' ts'aⁿ na nntseijomñe nantquie t'maⁿ yuu na matsa̱'ntjom Ty'o̱o̱ts'om.
16. T'o̱ Jesús cwii ñ'oom na tjañoom'. Ma'mo̱ⁿna' na nchii cha'tsondye nn'aⁿ nnc'ooquiee'ndye yuu na matsa̱'ntjom Ty'o̱o̱ts'om. Tsoom:—Tyom'aaⁿ cwii ts'aⁿ, jom jnoom'm cwii nantquie t'maⁿ ndo' tqueeⁿ'ñê jndye nn'aⁿ.
17. Quia na tuee'ntyjo̱ xjeⁿ na nlcwa'na natmaaⁿ jñoom mosoom'm na cjaacatso nda̱a̱ nn'aⁿ na maqueeⁿ'ñê: “Aa ndye'yo', cjaaya, ee cha'tso jnda̱ maya waa.”
18. Sa̱a̱ cha'tsondye naⁿ'ñeeⁿ cwii cwii nnom jla'cajñoom'ndyena. Tsaⁿ najndyee tso: “Catsa' cwii naya'ñeeⁿ na catsu' nnom patrom ‘naⁿ' na catseit'maⁿ ts'oom ja, ee jnda̱ seijndaya cwii taⁿ' tyuaa ndo' macaⁿna' na cjo̱cando̱o̱'a juuna'.”
19. Ndo' tso cwiicheⁿ ts'aⁿ nnom moso: “Ja jnda̱ seijndaya ‘om ljo quioo'ndyo na nl'a ts'iaaⁿ ndo' je' jo̱canty'ia aa ndyaa' ya nl'ayo'. Jo' chii catsa' cwii naya'ñeeⁿ na catsu' nnoom na catseit'maⁿ ts'oom ja.”
20. Ndo' cwiicheⁿ tso: “Cwe' xcondyo na tmaⁿ'co̱, jo' na xocanda̱a̱ nncjo̱.”
21. Tjalcwe' moso tjatseicañeeⁿ patrom ‘naaⁿ'aⁿ cha'tso ñ'oommeiⁿ'. Ndo' seilioo'ñe patrom. Tsoom nnom mosoom'm: “Catseityua', cja' jo ts'ua ndo' n'om nantaa naquii' tsjoom ndo' candyo'chu' ndyeñeeⁿ' ñequio nn'aⁿ na ticanda̱a̱' luee, nc'ee', nn'aⁿ na ntjeiⁿ nc'ee' ñequio nn'aⁿ na nchjaaⁿ.”
22. Jnda̱ chii seicandii moso'ñeeⁿ, tsoom: “Ta, jnda̱ tuii cha'xjeⁿ na sa̱'ntjom' sa̱a̱ ndicwaⁿ wanaaⁿti.”
23. Quia jo' tso patrom nnoom: “Cja' jo n'om nato nt'maⁿ ñequio cha'tso nato cajneiⁿ. Catsa' na jndei'na' na nñequio nn'aⁿ cha na nntoo' w'aya.
24. Je' nndye'yo' nntsjo̱o̱ na meiⁿcwiindye nn'aⁿ na tqua̱a̱ⁿ'ndyo̱jndya̱a̱ xocaljeii chiuu waa nantquie t'maⁿ na mando̱o̱'a.” Jeeⁿ jndyaa' na wjaantyjo̱ ts'aⁿ naxeⁿ' Cristo
25. T'maⁿ tmaaⁿ' nn'aⁿ ty'e ñ'eⁿ Jesús. Quia jo' taqueeⁿ, tsoom nda̱a̱na:
26. —Meiⁿcwi'ñeeⁿcheⁿ ts'aⁿ na nndyo ñ'eⁿndyo̱ xeⁿ tic'oom na jndati ntyjeeⁿ ñ'eⁿndyo̱, nchiiti tsotyeeⁿ, tsoñeeⁿ, scoom'm, ntseinaaⁿ, ti'nquioom ñequio ndyencjoom, hasta cantyja na wando' nqueⁿ, tsaⁿ'ñeeⁿ xocanda̱a̱ nntseijomñê ñ'eⁿndyo̱.
27. Ndo' meiⁿcwi'ñeeⁿcheⁿ ts'aⁿ na nndyontyjo̱ cantyja na mats'aa, xeⁿ tic'oom na cwiljoya ts'oom nawi' na matjoom cantyja ‘naⁿya meiiⁿ cueeⁿ'eⁿ, tsaⁿ'ñeeⁿ xocanda̱a̱ nntseijomñê ñ'eⁿndyo̱.
28. Xeⁿ cwiindyo' ‘o ñe'cats'aa w'aandye, ¿aa nchii nncjaacjoojndyee, nntseitiuuya chiuuxjeⁿ nlcaⁿna' cha ntyjii aa nleijndeii cwanti na maleiñ'oom hasta na nnda̱a̱' w'aa'ñeeⁿ?
29. Xeⁿ ticats'aaⁿ na ljo', jnda̱ s'aaⁿ tsiaⁿtsjo̱' ndo' nljeiiⁿ na taticatquii nnts'aaⁿ, quia jo' cha'tso nn'aⁿ na nnty'iaa na ljo', nnto̱'na na nla'jnaaⁿ'na jom.
30. Nluena: “Tsaⁿm'aaⁿ' to̱o̱ⁿ'o̱ⁿ cwii ts'iaaⁿ sa̱a̱ cwe' ts'iaaⁿ taⁿ'. Tîtseicanda̱a̱'ñê.”
31. Mati cwii rey na tseixmaⁿ qui meiⁿ sondaro, ¿aa nts'aacheⁿna' na nncjaacatjomñê cwiicheⁿ rey na nndyocats'aa tia' nacjoom'm na matseixmaⁿ ntquiuu meiⁿ sondaro? ¿Aa chii nncjaacjoojñeeⁿ na nntseitiuuyaaⁿ, aa nnda̱a̱ nnts'aaⁿ?
32. Ndo' xeⁿ nnty'iaaⁿ'aⁿ na tixocanda̱a̱ nnts'aaⁿ, quia jo' nntseicwanoom ñ'oom ñequio ts'aⁿ ‘naaⁿ'aⁿ na nntseity'ooñê na cwitsaaⁿ' tia', cwii na ndicwaⁿ tquia ndyo tsaⁿ'ñeeⁿ.
33. Jo' chii meiⁿcwi'ñeeⁿcheⁿ ‘o na tica'ndii cha'tso na matseixmaⁿ nquii, xocanda̱a̱ nntseijomñê ñ'eⁿndyo̱. Til'ue tsjaaⁿ' xeⁿ na jnda̱ jlui' na chjeⁿ'na'
34. 'Jeeⁿ l'ue tsjaaⁿ', sa̱a̱ xeⁿ nlui' na chjeⁿ'na', ¿ljo' ñ'eⁿ cwii nleichjeⁿ'nnda'na'?
35. Taxocwil'uena', meiⁿ quio tyuaa, meiⁿ ñ'eⁿ to'. Cwe' quiityeⁿ'quiee' nn'aⁿ joona'. Maluaa' matseijomna' ‘o, m'aⁿ'yo' cha'cwijom tsjaaⁿ' na til'ue xeⁿ tyootei'jndei'yo' nt'omcheⁿ nn'aⁿ. ‘Ñeeⁿ juu na niom lue' n'om lua'qui na nndii, candiiya.
| 
