1. Cwiicheⁿ cwii ndii' jnaⁿ Jesús Capernaum, tjaaⁿ, tueⁿ'eⁿ ts'o̱ndaa Judea. Teinoom cwiicheⁿ nantyjaa' jndaa Jordán. Tjomndyennda' cwii tmaaⁿ' nn'aⁿ yuu na m'aaⁿ. Quia jo' t'mo̱o̱ⁿ nda̱a̱na cha'xjeⁿ na quich'eeⁿ.
2. Majuu xjeⁿ'ñeeⁿ tquie'cañom nn'aⁿ fariseos na m'aaⁿ na ñe'cal'ana xjeⁿ jom. Ta'x'eena nnoom:—¿Aa matsa̱'ntjomna' na tsaⁿs'a nntseityueeⁿ'eⁿ ljeii na tocoom ñ'eⁿ scoom'm?
3. Jom t'o̱o̱ⁿ, tsoom nda̱a̱na:—Juu ñ'oom na tqueⁿ Moisés, ¿ljo' matsona' na cal'a'yo'?
4. Quia jo' jluena:—Moisés tquiaaⁿ na wanaaⁿ na nntyuii' ljeii na toco tsaⁿs'a ñequio scoom'm. Ndo' tsaⁿscu nnco'ñoom cwiicheⁿ ljeii na matsona' na macanda̱ cwito̱ⁿ'ndyena ñ'eⁿ saaⁿ'aⁿ.
5. T'o̱ Jesús nda̱a̱na, tsoom:—Cwe' ee na ‘o jeeⁿ quie' n'om'yo', jo' na seiljeii Moisés ñ'oomwaa'.
6. Sa̱a̱ cantyjati xuee na to̱' Ty'o̱o̱ts'om na tqueeⁿ cha'tso, s'aaⁿ tsaⁿs'a ñ'eⁿ tsaⁿscu.
7. Ndo' tsoom: “Macwe' jo' na n'ndii tsaⁿs'a tsotyeeⁿ, tsoñeeⁿ, cha tyeⁿ nnc'oom ñ'eⁿ scoom'm,
8. ndo' wendyena ñe'cwii sei' nla'xmaⁿna.” Jo' chii meiiⁿ na we ts'aⁿ ñejla'xmaⁿna sa̱a̱ je' ñecwii ts'aⁿ cwiluiindyena.
9. Ndo' nc'e na luaa', seijndaa'ñe nquii Ty'o̱o̱ts'om na ñecwii ts'aⁿ cwiluiindyena, jo' chii ticatsona' na cwe' ts'aⁿ nntseityuii' na luaa' cwiluiindyena.
10. Ndo' quia na tquiennda'na na waa w'aa, nquiee nn'aⁿ na cwila'jomndye ñ'eⁿ Jesús jla'lcwii'ndyennda'na juu ñ'oomwaa'.
11. Tsoom nda̱a̱na:—'Ñeeⁿ juu ts'aⁿ na nntseityuii' ljeii na toco ñ'eⁿ scuu' ndo' nncoco ñ'eⁿ cwiicheⁿ yuscu, tsaⁿ'ñeeⁿ waa jnaaⁿ' nnom scuu' nc'e na matsona' cantyja ‘naaⁿ' na cwe' m'aaⁿya ñequio cwiicheⁿ yuscu.
12. Ndo' mati xeⁿ m'aaⁿ cwii yuscu na nntseityuii' ljeii na toco ñ'eⁿ saa' ndo' nncoco ñ'eⁿ cwiicheⁿ tsaⁿs'a, majo'ti matseijndaa'ñena' na waa jnaaⁿ' na m'aaⁿ ñ'eⁿ cwiicheⁿ tsaⁿs'a. Matio'naaⁿñe Jesús yocanch'u
13. Ndo' tyonquiocho nt'om nn'aⁿ yocanch'u na m'aaⁿ Jesús na catioom l'o̱o̱ⁿ nacjoona. Sa̱a̱ nn'aⁿ na cwila'jomndye ñ'eⁿñê jla'tia'na nn'aⁿ na tquiocho yocanch'u'ñeeⁿ.
14. Quia nty'iaa' Jesús na ljo' cwil'ana, seilioo'ñê ñ'eⁿndyena. Tsoom nda̱a̱na:—Ca'ndye'yo' na quiontyjaa' yocanch'um'aⁿ' ja. Tilacu'yo' joona, ee yuu na matsa̱'ntjom Ty'o̱o̱ts'om macanda̱ nnc'ooquiee'ndye nn'aⁿ na ntyjaandye ja cha'na cwil'a yocanch'u.
15. Ñ'oom na mayuu' matsjo̱o̱ nda̱a̱'yo', meiⁿcwi'ñeeⁿcheⁿ ts'aⁿ na ntyjaañe Ty'o̱o̱ts'om cha'na ntyjaandye yocanch'u ja, ndo' mañequiaañe na matsa̱'ntjom Ty'o̱o̱ts'om juu, tsaⁿ'ñeeⁿ nnda̱a̱ nncjaaquiee'ñê cantyja na maTsa̱'ntjom Ty'o̱o̱ts'om.
16. Quia jo' to'ñoom yocanch'u'ñeeⁿ naquii' l'o̱o̱ⁿ. Tioom l'o̱o̱ⁿ nacjoona na tio'naaⁿñê joona. Matseineiⁿ tsaⁿtya ñ'eⁿ Jesús
17. Tjatjati Jesús nato. Ndo' cwii tsaⁿs'a maleinom na jndyontyjaa' jom. Jndyoco' xtye jo nnoom. Tso:—'U Maestro na ya ts'aⁿndyu', ¿ljo' macaⁿna' na cats'aa cha nntseixmaⁿya na ticantycwii na nncwa'ndo̱'a?
18. Ndo' tso Jesús nnom:—¿Chiuu na matsu' na ya ts'aⁿndyo̱ ja? Macanda̱ nquii Ty'o̱o̱ts'om cwiluiiñê na ljo'.
19. ‘U mantyji' ljeii naqui na matsa̱'ntjoom. Matsona': “Tinc'om'ya' ñ'eⁿ cwiicheⁿ ts'aⁿ. Tintsei'cue' ts'aⁿ. Tinch'uee' ‘naaⁿ' ts'aⁿ. Tintseineiⁿ' ñ'oom na cwe' cantu nacjoo' ts'aⁿ. Tiñenquiu'nn'aⁿ' ts'aⁿ. Catseit'maaⁿ'ndyu' tsotye' ñ'eⁿ tso'ndyo'.”
20. Tsaⁿ'ñeeⁿ tsoom nnom Jesús:—Maestro, cha'tso ñ'oommeiⁿ' matseicanda̱ya xjeⁿ na cachjoondyo̱cha̱ⁿ.
21. Jesús nty'iaaⁿ'aⁿ nnom tsaⁿ'ñeeⁿ. S'aana' na jeeⁿ wi' ts'oom juu. Tsoom nnom:—Cwii waa na matseitjo̱o̱na' ‘u. Cja', cajnda̱a̱' cha'tso ‘naⁿ'. S'om'ñeeⁿ quiaa' nda̱a̱ ndyeñeeⁿ'. Quia jo' nnc'oom' na tyandyu' nandye cañoom'luee. Ndo' caljoya ts'om' nawi' na nntjom' hasta meiiⁿ xeⁿ nntseicuee'na' ‘u. Candyo'tsei'jomndyu' ñ'eⁿndyo̱.
22. Jnda̱ na jñeeⁿ ñ'oomwaa' quia jo' jeeⁿ sei'ndaa'na' ntyjeeⁿ. Tjaaⁿ na chjoo' ts'oom ee jeeⁿ jndye ‘naaⁿ'aⁿ niom.
23. Quia jo' taqueⁿ Jesús nda̱a̱ nn'aⁿ na m'aⁿ nacañom'm na cwila'jomndye ñ'eⁿñê. Tsoom nda̱a̱na:—Nn'aⁿ na tyandye jeeⁿ ndya' jndei'na' na nñe'quiandyena na nntsa̱'ntjom Ty'o̱o̱ts'om joona.
24. Jnda̱ na jndyena ñ'oomwaa', seitsaⁿ'na' joona. Quia jo' tsonnaaⁿ'aⁿ nda̱a̱na:—'O nn'aⁿya, joo nn'aⁿ na quit'maⁿ n'om ‘naⁿ jeeⁿ jndei'na' na nñe'quiandyena na nntsa̱'ntjom Ty'o̱o̱ts'om joona.
25. Jndei'tina' na nncju'ñecje cwii tsaⁿtya na nntsa̱'ntjom Ty'o̱o̱ts'om jom, nchiiti na nncwicandii'ñe quioo' camello tsue' x'e tsei'nchquia.
26. Jnda̱ na jndyena ñ'oomwaa' yacheⁿ seiñ'eeⁿ'ñ'eⁿna' joona. Ta'x'eendye cheⁿnquieena nda̱a̱ ntyjeena, jluena:—Quia jo' ¿'ñeeⁿ ts'aⁿ nnda̱a̱ nlui'n'maaⁿñe?
27. Nty'iaa' Jesús nda̱a̱na, tsoom:—Tijoom canda̱a̱ nncwji'n'maaⁿñe cheⁿnquii ts'aⁿ. Macanda̱ nquii Ty'o̱o̱ts'om nnda̱a̱ nncwji'n'maaⁿñê ts'aⁿ. Ee tjaa'naⁿ cwii na xocanda̱a̱ nnts'aaⁿ.
28. Ndo' tso Pedro nnom Jesús:—Aa ndi' Ta, jâ jnda̱ ‘ndya̱a̱yâ cha'tso ‘naaⁿyâ na cwitsaantyjo̱o̱yâ naxeⁿ'.
29. Tso Jesús nda̱a̱na:—Candye'yo' nntsjo̱o̱ ñ'oom na mayuu'cheⁿ. Meiⁿcwi'ñeeⁿcheⁿ ts'aⁿ na ma'ndii waa', oo ti'nquio oo ndyencjo, oo tsotye, oo tsondyee, oo scuu' oo ntseinda, oo ndyuaa' nc'e na matseijomñe ñ'oom na mañequia na macwji'n'maaⁿñe Ty'o̱o̱ts'om nn'aⁿ,
30. juu tsaⁿ'ñeeⁿ tiempomeiiⁿñe nnco'ñoom siaⁿnto ndii'cheⁿ l'aⁿ'aⁿ, ti'nquioom, ndyencjoom, loñeeⁿ, ntseinaaⁿ, ndyuaaⁿ'aⁿ ñequio na nnta'wi' nn'aⁿ jom. Sa̱a̱ ncuee na cwii nndyona', ticantycwii na nncwanoom'm.
31. Ee jndye nn'aⁿ m'aⁿ na cwila'tiuu nquiee na t'maⁿ cwiluiindye, sa̱a̱ nncue'ntyjo̱ na nncju'cjena' joona. Ndo' jndye nn'aⁿ m'aⁿ na maju'cjena' sa̱a̱ nda̱nquia nntseiwendyena' joona. Matseicandiinnda' Jesús na nncueeⁿ'eⁿ
32. Jesús ñequio nn'aⁿ na cwila'jomndye ñ'eⁿñê, ñjomndyena nato na cwi'oona Jerusalén. Jom wjaajñeeⁿ jo nda̱a̱na. Jeeⁿ matseiñ'eeⁿ'na' joona ndo' cwicatyuena na cwi'oontyjo̱na naxeeⁿ'eⁿ. Quia jo' tjei'ño̱o̱ⁿ nn'aⁿ na canchoo'wendye, to̱o̱ⁿ'o̱ⁿ na matseineiiⁿ nda̱a̱na chiuu waa na nntjom nqueⁿ.
33. Tsoom:—Queⁿ'yo' cwenta, macwitsaawaaya Jerusalén. Ndo' ja na cwiluiindyo̱ ts'aⁿ na jnaⁿ cañoom'luee nñequiaa ts'aⁿ cwenta ja luee ntyee na cwiluiitquiendye, ñequio nn'aⁿ na cwit'mo̱o̱ⁿ ljeii na tqueⁿ Moisés na nla'jndaa'ndyetyeⁿna na nnc'io̱ ndo' nñe'quiana cwenta ja luee nn'aⁿ na nchii judíos.
34. Ndo' naⁿ'ñeeⁿ nneiⁿ'ncona ndo' njñomna ndaajnaⁿ' ja. Nntjaa'na ja ñ'eⁿ tjaⁿtsei' ndo' nla'cuee'na ja. Sa̱a̱ xuee jnda̱ ndyee nncwa'ndo̱'xco̱. Jacobo ñ'eⁿ Juan cwitaⁿna cwii naya
35. Quia jo' ntseinda Zebedeo, Jacobo ñ'eⁿ Juan tquiontyjaa'na Jesús, jluena:—Aa ndi' Ta, l'ue n'o̱o̱ⁿyâ na nñequiaa' cwii naya na cwitaaⁿyâ njom'.
36. Tsoom nda̱a̱na:—¿Ljo' l'ue n'om'yo' na cats'aa ‘o?
37. T'o̱o̱na nnoom, jluena:—Quia jnda̱ mam'aaⁿ' yuu na matseit'maaⁿ'ñena' ‘u, quiaa' na cwii jâ nncwacatyeeⁿ ntyja' ntyjaya ndo' cwiicheⁿ jâ nncwacatyeeⁿ ntyjatymaaⁿ'.
38. Quia jo' matso Jesús nda̱a̱na:—'O maxjeⁿ ticala'no̱ⁿ'yo' ljo' cwitaⁿ'yo' no̱o̱ⁿ. Na wi't'maⁿ na nncwino̱o̱ⁿ, ¿aa nnda̱a̱ nnaⁿndyo'? ¿Aa nnda̱a̱ nljoya n'om'yo' na nla'cwjee nn'aⁿ ‘o cha'xjeⁿ na jnda̱ ljoya ts'o̱o̱ⁿ na nla'cuee'na ja?
39. Joona t'o̱o̱na, jluena:—Nnda̱a̱.Tsoom nda̱a̱na:—Mayuu' macaⁿna' na mañejuu nawi' na nncwino̱o̱ⁿya, nncwi'nom'yo'. Ndo' macaⁿna' na caljoya n'om'yo' na nla'cwjee nn'aⁿ ‘o cha'na cwiljoya ts'o̱o̱ⁿ na nla'cuee'na ja.
40. Sa̱a̱ nchii nnco̱ tseixmaⁿya na nntseijndaa'ndyo̱ ‘ñeeⁿ juu nncwacatyeeⁿ ntyjaa'a ntyjaya oo ntyjatymaaⁿ'. Nquii Ty'o̱o̱ts'om nñequiaaⁿ naya'ñeeⁿ nda̱a̱ nn'aⁿ na jnda̱ seijndaa'ñê na nnto'ñoom juuna'.
41. Ndo' joo nquindye naⁿ'ñeeⁿ na cwila'jomndye ñ'eⁿ Jesús to̱'na tyola'wjeena we nc'iaana Jacobo ñ'eⁿ Juan.
42. Jo' chii Jesús tcwaaⁿ joona, tsoom nda̱a̱na:—'O manquiu'yo' nn'aⁿ na cwiluiitquiendye cwii cwii tsjoomnancue cwila's'andyena nda̱a̱ nn'aⁿ na cwitsa̱'ntjomna. Ndo' nn'aⁿ na cwiluiit'maⁿndye cwiqueⁿna xjeⁿ nn'aⁿ na m'aⁿ nacje ‘naaⁿna.
43. Sa̱a̱ nchii laa'ti' nl'a'yo' quii'ntaaⁿ'yo'. Ee meiⁿcwi'ñeeⁿcheⁿ ‘o na ntyjaa' ts'om na nnc'oom na t'maⁿñe quii'ntaaⁿ'yo', tsaⁿ'ñeeⁿ matsona' na jom candi'ntjoom nda̱a̱'yo'.
44. Ndo' ‘ñeeⁿ juu quii'ntaaⁿ'yo' na maqueⁿ ts'om na juu nlco'nnomna' jo nda̱a̱'yo', matsona' na cateijndeii ‘o.
45. Ee ja na cwiluiindyo̱ ts'aⁿ na jnaⁿ cañoom'luee jndyo̱o̱ na nndi'ntjo̱ⁿya nda̱a̱ nn'aⁿ, nchii na nndye'ntjom nn'aⁿ no̱o̱ⁿ. Ndo' jndyo̱o̱ na nñequiaandyo̱ na c'io̱ na nntio̱o̱ⁿya jnaaⁿ nn'aⁿ na jndyendye cha nndyaandyena jnaaⁿna na waa. Matsein'maⁿ Jesús tsaⁿnchjaaⁿ' na jndyu Bartimeo
46. Ndo' tquiena tsjoom Jericó. Jnda̱ jo' majaacalui' Jesús ñequio nn'aⁿ na cwila'jomndye ñ'eⁿñê ndo' ñequio cwii tmaaⁿ' nn'aⁿ na jndyendye. Juu xjeⁿ'ñeeⁿ wacatyeeⁿ tsaⁿnchjaaⁿ' Bartimeo ‘ndyoo nato. Jom jnda Timeo. Macaaⁿ ljo' na nleil'uee'ñê.
47. Quia na jñeeⁿ na mawinom Jesús ts'aⁿ Nazaret, to̱o̱ⁿ'o̱ⁿ na matseixuaⁿ, tsoom:—'U Jesús, na cwiluiindyu' tsjaaⁿ David na jndyowicantyjoo', c'oom' na wi' ts'om' ja.
48. Jndye nn'aⁿ jla'tia'na jom na catseicheeⁿ, sa̱a̱ jom yacheⁿ tyotseixuaatyeeⁿ, tsoom:—'U, na cwiluiindyu' tsjaaⁿ David na jndyowicantyjoo', c'oom' na wi' ts'om' ñ'eⁿndyo̱.
49. Jesús tjameintyjeeⁿ'eⁿ, tsoom:—Cwaⁿ'yo' jom.Quia jo' tcwaⁿna tsaⁿnchjaaⁿ', jluena nnoom:—C'om't'maaⁿ'ndyu' ts'om'. Quicantyja' ee macwaaⁿ ‘u.
50. Ndo' jom cwe' tju'toom liaa na wanjoom'ñê, teicantyjaaⁿ, tjaaⁿ na m'aaⁿ Jesús.
51. Tax'ee Jesús nnoom:—¿Aa waa na nntsa' ja?T'o̱ tsaⁿnchjaaⁿ', tsoom:—Jeeⁿ ‘u Ta, l'ue ts'o̱o̱ⁿ na nleitquioya.
52. Tso Jesús nnoom:—Cja'to'. Jnda̱ n'maⁿ' nc'e na matsei'yu' ñ'eⁿndyo̱.Mañoom' teitquioom'm. Tjantyjo̱o̱ⁿ naxeⁿ' Jesús na ty'ety'etina nato.
| 
