1. Jlui' Jesús tsjoom'ñeeⁿ, tjalcweeⁿ'eⁿ ndyuaa tsjom'm. Ndo' nn'aⁿ na cwila'jomndye ñ'eⁿñê ty'ena ñ'eⁿñê.
2. Quia na tuee' xuee na cwita'jndyee nn'aⁿ judíos, tjaquiee' Jesús naquii' wats'om ‘naaⁿna, to̱o̱ⁿ'o̱ⁿ na tyo'mo̱o̱ⁿ nda̱a̱na. Ndo' jndye nn'aⁿ na tyondye ñ'oom na tyoñequiaaⁿ jeeⁿ tjawee' n'omna. Jluena:—¿Yuu chuu tsaⁿm'aaⁿ cha'tso ñ'oommeiⁿ' na jeeⁿ yana'? Ndo' ¿yuu jnaⁿ na jeeⁿ jndo̱' ts'oom? ¿Chiuu waayuu na jeeⁿ jndye nnom ts'iaaⁿ t'maⁿ mach'eeⁿ na tiquinty'iaaya?
3. Ndo' tsaⁿm'aaⁿ', ¿aa nchii cwe' ts'aⁿ na macuuñe n'oom? ¿Aa tiyuu' na jom jnda María? Ndo' ntyjeeⁿ, ¿aa nchii Jacobo ñequio José ndo' Judas ñequio Simón? Ndo' mati yolcu ntyjeeⁿ m'aⁿna quii'ntaaⁿya.Jo' chii t'omna na tineiiⁿna jom.
4. Quia jo' tso Jesús nda̱a̱na:—Majndye nn'aⁿ m'aⁿ na cwila't'maaⁿ'ndye profeta. Sa̱a̱ macanda̱ nn'aⁿ ndyuaaⁿ'aⁿ ñequio nn'aaⁿ'aⁿ ñequio nn'aⁿ waⁿ'aⁿ tixocala't'maaⁿ'ndyena jom.
5. Macwe' jo' tjaa'naⁿ ts'iaaⁿ t'maⁿ na s'aaⁿ quii'ntaaⁿna. Macanda̱ tioom l'o̱o̱ⁿ nacjoo cwantindye nn'aⁿwii na sein'maaⁿ joona.
6. Ndo' s'aana' na jeeⁿ jnda ntyjeeⁿ na tileica'la'yu' naⁿ'ñeeⁿ. Jnda̱ chii tjawinoom njoom nch'u na nndyoo' tsjom'm. Tyo'mo̱ⁿtyeeⁿ nda̱a̱ nn'aⁿ. Majñom Jesús nn'aⁿ canchoo'wendye
7. Quia jo' t'maaⁿ nn'aⁿ canchoo'we na cwila'jomndye ñ'eⁿñê. Tquiaaⁿ najndeii na tseixmaaⁿ na nla'xmaⁿna cha nnda̱a̱ nntjeii'na jndyetia naquii' n'om nn'aⁿ. Ndo' to̱o̱ⁿ'o̱ⁿ na majñoom we wendyena ts'iaaⁿ ‘naaⁿ'aⁿ.
8. Ndo' sa̱'ntjoom na meiⁿcwii ‘naⁿ tic'ooñ'omna nato, meiⁿ chetsja', meiⁿ tyoo', meiⁿ tsjo̱'ñjeeⁿ. Macanda̱ ts'oom l'eii wanaaⁿ na nnc'ooñ'omna,
9. ñequio lcoom na ñjoomna. Ndo' manda̱ liaa na cwee'na na cwi'oona.
10. Mati tsoom nda̱a̱na:—Meiⁿyuucheⁿ waa' ts'aⁿ na nntsquie'yo', caljoo'ndyo' jo' jo' hasta xjeⁿ na nlui'yo' tsjoom'ñeeⁿ.
11. Sa̱a̱ xeⁿ nntsquie'yo' cwii tsjoom na tiñe'cato'ñoom nn'aⁿ ‘o, meiⁿ tiñe'candyena ñ'oom ndyue'yo', quia na nlui'yo' tsjoom'ñeeⁿ, calaquia'yo' ts'ojnda̱a̱ na chuu' nc'ee'yo' cha na nncwji'yuu'ñena' nacjoo naⁿ'ñeeⁿ na tîcato'ñoomna ñ'oom' Ty'o̱o̱ts'om. Mayuu'cheⁿ nndye'yo' nntsjo̱o̱, xuee na nncu'xeⁿ Ty'o̱o̱ts'om nn'aⁿ, t'maⁿti nawi' nntjoom nn'aⁿ tsjoom'ñeeⁿ, nchiiti na nntjoom nn'aⁿ tsjoom Sodoma ñ'eⁿ Gomorra.
12. Ndo' jlui' nn'aⁿ na jñom Jesús. Ty'enquiana ñ'oom na calcwe' n'om nn'aⁿ jnaaⁿna.
13. Mati majndye jndyetia tyotjeii'na naquii' n'om nn'aⁿ. Tyoty'oomndyena seitye nacjoo nn'aⁿ wii na tyola'n'maⁿna naⁿ'ñeeⁿ. Cantyja na tue' Juan, tsaⁿ na tyotseits'oomñe nn'aⁿ
14. Ndo' Herodes, ts'aⁿ na matsa̱'ntjom, jñeeⁿ cantyja ‘naaⁿ' Jesús ee cha'waa ndyuaa'ñeeⁿ jnda̱ t'oom' ñ'oom'ñeeⁿ. Sa̱a̱ luaa seitioom cantyja ‘naaⁿ' Jesús, tsoom:—Tsaⁿm'aaⁿ' ¿aa nchii juu Juan, ts'aⁿ na tyotseits'oomñe nn'aⁿ? ¿Aa nchii jom jnda̱ wando'xcoom na tueeⁿ'eⁿ, jo' chii waa na matseixmaaⁿ na cwicanda̱a̱ mach'eeⁿ ts'iaaⁿ t'maⁿmeiⁿ'?
15. Sa̱a̱ nt'omcheⁿ nn'aⁿ tyolue:—Profeta Elías luaa'.Ndo' nt'omcheⁿ tyolue:—Luaa' profeta cha'na joo profeta na tyom'aⁿ tandyo xuee.
16. Quia na jndii Herodes ñ'oommeiⁿ' na cwilue nt'omcheⁿ, tsonnaaⁿ'aⁿ:—Maxjeⁿ Juan luaa', ts'aⁿ na sa̱'ntjo̱ⁿ na catyjena xtyo'. Jnda̱ wando'xcoom na tueeⁿ'eⁿ.
17. Ee Herodes ñequio tsaⁿ na jndyu Felipe joona cwii nquieendyena. Sa̱a̱ Herodes m'aaⁿ ñ'eⁿ scuu' tyjeeⁿ. Herodías jndyu yuscu'ñeeⁿ. Ndo' tyotso Juan nnoom:—'U ticatsa̱'ntjomna' na mañ'oom' scuu' t'iu'.Jnaaⁿ' ñ'oomwaa' na jeeⁿ ndya' jndoo' yuscu Herodías Juan. Jo' chii seincjoo'ñe yuscu'ñeeⁿ nnom Herodes ndo' jom je' seiyoom'm, sa̱'ntjoom na cala'tyeⁿna Juan, chii catuee'na juu w'aancjo. Herodías queeⁿ ts'oom Juan hasta l'ue ts'oom na calacuee'na juu sa̱a̱ tileicanda̱a̱.
20. Ee Herodes nquiaⁿ'aⁿ juu. Sei'no̱o̱ⁿ'o̱ⁿ na tseixmaⁿ Juan cantyja na maty'iomyana' ndo' na jnda̱ tqueⁿlju' Ty'o̱o̱ts'om naquii' ts'om tsaⁿ'ñeeⁿ. Jo' chii tyowañom'm juu cha ticats'aa yuscu'ñeeⁿ nawi' ñ'eⁿñe. Ñequio na xcwee' ts'oom tyoñeeⁿ ñ'oom na tyoñe'quiaa tsaⁿ'ñeeⁿ sa̱a̱ tijndye sei'no̱o̱ⁿ'o̱ⁿ ñ'oom na tyotseineiⁿ Juan.
21. Sa̱a̱ tue'ntyjo̱ xjeⁿ na juu Herodías ljeiiⁿ chiuu ya na nnda̱a̱ nnts'aaⁿ. Ee tuee' xueechuu' Herodes, tyola't'maaⁿ'ndyena jom. Tquiaaⁿ nantquie na tcwa' nn'aⁿ na cwiluiitquiendye cantyja ‘naaⁿ'aⁿ, ñequio nn'aⁿ na cwitsa̱'ntjom sondaro, ndo' ñequio nt'omcheⁿ nn'aⁿ na cwiluiitquiendye ts'o̱ndaa Galilea.
22. Quia jo' tjaquiee' yuscundyua jnda Herodías yuu cwicwa' naⁿ'ñeeⁿ, seijnom jo nda̱a̱na. Jeeⁿ tjawee' ts'om Herodes ndo' mati nn'aⁿ na jla'jomndye ñ'eⁿñê. Tsoom nnom yuscundyua'ñeeⁿ:—Caⁿ' cantyjati na l'ue ts'om' no̱o̱ⁿ, ndo' ja nñequia.
23. Seityeⁿtyeeⁿ ñ'oom, tsoom:—Meiⁿnquia na nlcaⁿ' no̱o̱ⁿ, nñequia hasta meiiⁿ xcwe cantyja na matsa̱'ntjo̱ⁿ.
24. Jlui' yuscu'ñeeⁿ quii'ntaaⁿ nn'aⁿ, tax'eeⁿ nnom tsoñeeⁿ:—Naⁿ, ¿ljo' nlcaaⁿ'a?T'o̱ tsaⁿ'ñeeⁿ nnom jnaaⁿ:—Caⁿ' xqueⁿ Juan, tsaⁿ na tyotseits'oomñe nn'aⁿ.
25. Mantyja seityuaaⁿ'aⁿ, tjaquiee'nnaaⁿ'aⁿ na m'aaⁿ rey Herodes, tsoom:—Ja l'ue ts'o̱o̱ⁿ na maje'ndyo quiaa' no̱o̱ⁿ cwii xio na njom xqueⁿ Juan, tsaⁿ na tyotseits'oomñe nn'aⁿ.
26. Na luaa' tso tsaⁿ'ñeeⁿ, jeeⁿ seichjoo'na' ts'om Herodes. Sa̱a̱ nc'e na jnda̱ tqueⁿtyeeⁿ ñ'oom'm ñequio na ndyecheⁿ nn'aⁿ na cwila'jomndye ñ'eⁿñê, jo' chii tîcanda̱a̱' ts'oom na nntseichueeⁿ'eⁿ ñ'oom.
27. Mantyja jñoom cwii sondaro ‘naaⁿ'aⁿ, sa̱'ntjoom na cjaac'oom tsaⁿ'ñeeⁿ xqueⁿ Juan.
28. Quia jo' tja sondaro'ñeeⁿ w'aancjo, tjacatyjeeⁿ xtyo' Juan. Jnda̱ chii jndyoñ'oom juuna' ts'om cwii xio. Tquiaaⁿ nnom yuscu'ñeeⁿ ndo' juu tquiaa nnom tsondyee.
29. Jnda̱ na jndye nn'aⁿ na tyocañ'eeⁿ ñ'eⁿ Juan, quia jo' ty'ec'omna sei'ts'o ‘naaⁿ'aⁿ. Ty'ecat'iuuna jom. Tquiaa Jesús na tcwa' ‘om meiⁿ naⁿnom
30. Nn'aⁿ na jñom Jesús ts'iaaⁿ ‘naaⁿ'aⁿ tjomndyennda'na na m'aaⁿ. Tyoluena nnoom cha'tso ts'iaaⁿ na jnda̱ ñel'ana ndo' cha'tso ñ'oom na jnda̱ ñet'mo̱o̱ⁿna.
31. Quia jo' tsoom nda̱a̱na:—Cjaaya, nntsaaya cwii joo yuu na ñencjo̱o̱ jo jnda̱a̱ na nnta'jndya̱a̱ya.Ee yuu na tyom'aⁿna jndye ts'aⁿ, nn'aⁿ na cwiquie ndo' nn'aⁿ na cwi'oo, meiⁿ tileicju'naaⁿñena' na nlcwa'na.
32. Jo' chii jlui'na na ñenquieena ñ'eⁿ w'aandaa na ‘oona cwii joo yuu na tjaa'naⁿ nn'aⁿ.
33. Sa̱a̱ jndye nn'aⁿ nty'iaatquia na cwi'oona ndo' ta'jnaaⁿ' naⁿ'ñeeⁿ joona na ‘oowinomna. Ndo' jla'tyuaa'ti naⁿ'ñeeⁿ, jnaⁿna njoomna ty'eca'na, ty'enquiandyena ‘ndyoo ndaaluee. Joona tquiejndyeena yuu na wjaa Jesús ñequio nn'aⁿ na cwila'jomndye ñ'eⁿñê.
34. Quia jlueeⁿ'eⁿ ts'om w'aandaa nty'iaaⁿ'aⁿ na jeeⁿ jndye nn'aⁿ jnda̱ tjomndye jo' jo'. Ty'oom na jeeⁿ wi' ts'oom naⁿ'ñeeⁿ ee cwe' m'aⁿtona cha'cwijom cwii tmaaⁿ' canmaⁿ na tjaa ‘ñeeⁿ juu na ya nnteix'ee. Quia jo' to̱o̱ⁿ'o̱ⁿ na jndye ñ'oom tyo'mo̱o̱ⁿ nda̱a̱na.
35. Quia na jnda̱ tmaaⁿ, nn'aⁿ na cwila'jomndye ñ'eⁿñê ty'entyjaa'na jom, jluena nnoom:—Je' jnda̱ tmaaⁿ ndo' tjaa'naⁿ l'aa meiⁿ rancho ‘naaⁿ nn'aⁿ.
36. Cajñom' naⁿm'aⁿ' na nnc'oona ranchoo nn'aⁿ oo njoom nch'u na nndyoo' nndyoo' cha jo' jo' nnda̱a̱ nla'jndana na nlcwa'na. Ee joona tjaa'naⁿ na c'omna na nlcwa'na.
37. T'o̱ Jesús nda̱a̱na, tsoom:—'O quia'yo' na nlcwa'na.Quia jo' jluena nnoom:—¿Cwaaⁿ nnda̱a̱ nleijndeii meiiⁿ nntsalajndaayâ cha'na we siaⁿnto s'om denario tyoo' na nñe'quiaayâ na nlcwa' naⁿm'aⁿ'?
38. Tax'eeⁿ nda̱a̱na, tsoom:—¿Cwanti tyoo' cwileiñ'om'yo'? Canty'ia'yo' cwanti na mawaa.Jnda̱ na l'ueena, jluena nnoom:—Ñe'om taⁿ' tyoo' ñ'eⁿ we catscaa cwilein'o̱o̱ⁿyâ.
39. Quia jo' sa̱'ntjoom na cal'a nn'aⁿ cwii cwii tmaaⁿ' ndo' cwindyuaandyena nacjoo' jnda̱ nch'u.
40. Nt'om naⁿ'ñeeⁿ ty'emeindyuaandyena cwii siaⁿnto na cwii cwii tmaaⁿ', ndo' nt'om naⁿ'ñeeⁿ l'ana wen'aaⁿ nchoo' nqui na cwii cwii tmaaⁿ' joona.
41. Jnda̱ na to'ñoom ‘om taⁿ' tyoo' ñequio we catscaa, quia jo' jlunda̱a̱ñê cañoom'luee. Tquiaaⁿ na quianl'uaa' Tsotyeeⁿ. Jnda̱ jo' tyjeeⁿ tyoo'ñeeⁿ, tquiaaⁿ joona' nda̱a̱ nn'aⁿ na cwila'jomndye ñ'eⁿñê cha joona nnt'oomna joona' nda̱a̱ nn'aⁿ na meindyuaandye. Majo'ti s'aaⁿ ñ'eⁿ we catscaa.
42. Tcwa' cha'tsondye nn'aⁿ hasta tjacjoona.
43. Ndo' nn'aⁿ na cwila'jomndye ñ'eⁿñê jla'tjomna ntaⁿ' ntyoo' ñ'eⁿ calcaa na ‘ndiina'. Too' canchoo'we tsquiee.
44. Ndo' jndye nn'aⁿ na tcwa' ntyoo' na tyot'oom naⁿ'ñeeⁿ. Tue'ntyjo̱ cha'na ‘om meiⁿ na cwe' naⁿnom. Tjacaa Jesús nnom ndaaluee
45. Quia jo' mantyja jñom Jesús nn'aⁿ na cwila'jomndye ñ'eⁿñê na cuo̱na ts'om w'aandaa, c'ooñetina, nncwit'ioo'na xndyaa' ndaaluee na nlquiena tsjoom Betsaida. Jom nljoo'ñetyeeⁿ yocheⁿ na majñoom nn'aⁿ na jndyendye.
46. Ndo' jnda̱ na jñoom naⁿ'ñeeⁿ, tjawaaⁿ cwii joo quii' jnda̱a̱ yuu na ñenqueⁿ na nntseineiiⁿ nnom Tsotyeeⁿ.
47. Quia na jnda̱ teinco̱o̱ⁿ', juu w'aandaa'ñeeⁿ mam'aaⁿna' xcwe ts'om ndaaluee, ndo' Jesús ñenqueⁿ cwii m'aaⁿ tyuaatcwii.
48. Nty'iaaⁿ'aⁿ na jeeⁿ wi' cwitjoom naⁿ'ñeeⁿ na ñjomndye w'aandaa, ee matseilcwe'tya' jndye juuna'. Jeeⁿ cwila'jnda̱na na cwicantyjaandyena n'oom pala' cwentaa' w'aandaa'ñeeⁿ. Cha'na ñequiee na cwitsjoom jnaaⁿ tjacaⁿ nnom ndaaluee. Tuee'cañoom na m'aⁿna, ndoo' cwe' nncwinoom'm joona.
49. Quia nty'iaana na mawjaacaⁿ nnom ndaaluee, jla'tiuuna jndii cwinty'iaana. Jndeii tyola'xuaana.
50. Jeeⁿ ndya' tyuena ee cha'tsondyena nty'iaana jom. Mantyja t'maaⁿ joona, tsoom nda̱a̱na:—C'om'yo' na t'maⁿ n'om'yo'. Mannco̱ luaa. Tilacatyuendyo'.
51. Quia jo' tuo̱o̱ⁿ ts'om w'aandaa yuu na ñjomndyena, mana teicheⁿ jndye. Jo' chii jeeⁿ seiñ'eeⁿ'ñena' joona cantyja ‘naaⁿ'aⁿ.
52. Ee tila'no̱ⁿ'na cantyja ‘naaⁿ' ts'iaaⁿ t'maⁿ na s'aa Jesús ñequio ntyoo' na tcwa' nn'aⁿ. Ndo' ndicwaⁿ tileiqueⁿna cwenta ‘ñeeⁿ cwiluiiñê. Sein'maⁿ Jesús nn'aⁿwii ndyuaa Genesaret
53. Quia na jnda̱ tei'xndyaandyena ndaaluee, tquiena ndyuaa Genesaret. Jo' jo' teicjoomna w'aandaa ‘ndyoo ndaaluee.
54. Quia jlui'na w'aandaa mañoom' ta'jnaaⁿ' nn'aⁿ ndyuaa'ñeeⁿ Jesús.
55. Jla'tyuaa'na, ty'ena cha'waa ndyuaa'ñeeⁿ, tyo'oochona nn'aⁿwii cwe' ñ'eⁿ nduu meiⁿyuucheⁿ joo na ndyena na mawee' Jesús.
56. Ndo' meiⁿyuucheⁿ na tueⁿ'eⁿ, meiiⁿ njoom nch'u, meiiⁿ njoom t'maⁿ, meiiⁿ jo ndo' jnda̱a̱, tyotsa̱'na nn'aⁿwii ts'om nato. Ndo' joo nn'aⁿwii'ñeeⁿ tyola'ty'oondyena nnoom na nñequiaaⁿ meiiⁿ cwe' ‘ndyoo liaⁿ'aⁿ na nñe'quio'na. Ndo' cha'tso nn'aⁿ na tye'nquio' ‘ndyoo liaⁿ'aⁿ n'maaⁿ.
| 
