1. Quia na jnda̱ t'mo̱ⁿ Jesús ñ'oommeiⁿ' nda̱a̱ jâ nn'aⁿ na canchoo'wendye na cwilajomndyô̱ ñ'eⁿñê, quia jo' jlueeⁿ'eⁿ jo' jo'. Tjaaⁿ na m'mo̱o̱ⁿ ndo' na nñequiaaⁿ ñ'oom naquii' njoom ndyuaa'ñeeⁿ.
2. Juan tsaⁿ na tyotseits'oomñe nn'aⁿ, m'aaⁿ w'aancjo quia na jñeeⁿ ñ'oom cantyja ‘naaⁿ' ts'iaaⁿ na tyoch'ee Cristo. Jñoom we nn'aⁿ na cwila'jomndye ñ'eⁿñê na c'oota'x'ee cwii ñ'oom ‘ndyoo Jesús.
3. Jluena:—¿Aa ‘u cwiluiindyu' Cristo na nncwjee'cañoom tsjoomnancue, oo aa nncwindo̱o̱'â cwiicheⁿ?
4. T'o̱ Jesús nda̱a̱ naⁿ'ñeeⁿ, tsoom:—Catsa'yo' ndo' candu'yo' nnom Juan cantyja ñ'oom naya na cwindye'yo' ndo' na cwinty'ia'nda̱a̱'yo' na jndye nn'aⁿ cwin'maaⁿ.
5. Ndo' candu'yo' nnoom nn'aⁿ na ñet'om na nchjaaⁿ jnda̱ teitquioo. Nn'aⁿ na ñet'om na ntjeiⁿ nc'ee' je' ya cwi'ooca'. Nn'aⁿ na ñecho tycu lepra, je' jnda̱ ljuu'ndye. Nn'aⁿ na ñet'om na cantaa, je' ya cwindye. Ndo' nn'aⁿ na jnda̱ tja̱, je' jnda̱ cwita'ndo'xcona. Ndo' joo nn'aⁿ na nty'iaandye jnda̱ macwindyena ñ'oom naya na macwji'n'maaⁿñe Ty'o̱o̱ts'om joona.
6. Ndo' neiiⁿ' ts'om ts'aⁿ na ñe'cwii matseitiuu cantyja ‘naⁿya ee juu xotseijnaaⁿ'na'.Ñ'oommeiⁿ' seineiⁿ Jesús nda̱a̱ nn'aⁿ na jñom Juan.
7. Quia na jnda̱ ty'elcwee' naⁿ'ñeeⁿ, to̱' Jesús na matseineiiⁿ nda̱a̱ tmaaⁿ' nn'aⁿ na m'aⁿ nacañom'm cantyja ‘naaⁿ' Juan. Tsoom:—¿Chiuu waa na saacanty'ia'yo' na sa'yo' na m'aaⁿ Juan jo ndo' yuu tjaa nn'aⁿ c'om? ¿Aa nty'ia'yo' na jom ts'aⁿ na we waa na matseineiⁿ cha'cwijom cwii tsmaaⁿ na maleiñ'oomñe jndye? Ntyjii nchii jo'.
8. Quia jo' ¿chiuu waa na saacanty'ia'yo' na sa'yo'? ¿Aa nty'ia'yo' cwii ts'aⁿ na cwee liaa na jnda? Ntyjii nchii jo'. Ee ‘o nquiu'yo' na macanda̱ nn'aⁿ na tjacantyja na t'maⁿ n'iaaⁿ, joona cwicwee'na liaa jnda ñequio nn'aⁿ w'aana.
9. Quia jo' ¿chiuu waa na saacanty'ia'yo'? ¿Aa nty'ia'yo' cwii profeta? Ja ntyjii na jo'. Ndo' jom t'maⁿti cwiluiiñê nchiiti nt'omcheⁿ profeta.
10. Ee ljeii ‘naaⁿ' Ty'o̱o̱ts'om matseineiⁿna' cantyja ‘naaⁿ'aⁿ. Luaa matsona': Ja majño̱o̱ⁿñetya̱ya cwii moso ‘naⁿya na wjaajndyee jo njom'. Jom nncwji'yuu'ñê cantyja ‘naⁿ', cha nnc'omc'eendye nn'aⁿ quia na nncue'cañoom'.
11. Ndo' tsoticheⁿ Jesús:—Mayuu'cheⁿ nndye'yo' nntsjo̱o̱, tijoom ñeteitquioo'ñe cwii ts'aⁿ na t'maⁿti cwiluiiñe quii'ntaaⁿ cha'tsondye nn'aⁿ cha'na juu Juan, ts'aⁿ na tyotseits'oomñe nn'aⁿ. Sa̱a̱ meiiⁿ na ljo', meiⁿcwi'ñeeⁿcheⁿ ts'aⁿ na jnda̱ tjaquiee'ñe cantyja na matsa̱'ntjom Ty'o̱o̱ts'om, meiiⁿ tit'maⁿ cwiluiiñe, sa̱a̱ t'maⁿti cwiluiiñe, nchiiti Juan.
12. Ndo' seineiⁿti Jesús, tsoom:—Quia na to̱' Juan na tyotseits'oomñe nn'aⁿ teitquioo' na cwila'jnda̱ nn'aⁿ na nnc'ooquiee'ndyena cantyja na matsa̱'ntjom Ty'o̱o̱ts'om hasta xjeⁿ je'. Ndo' naⁿ'ñeeⁿ cwiqueⁿ n'omna na nnaⁿjnda̱na cha nnda̱a̱ nla'xmaⁿna cantyja ‘naaⁿ' juuna'.
13. Cha'tso ñ'oom' Ty'o̱o̱ts'om na tyotjeii'yuu'ndye profetas ñequio ljeii na tqueⁿ Moisés tjoom' t'mo̱o̱ⁿna' cantyja na matsa̱'ntjom Ty'o̱o̱ts'om. Ndo' quia na tyjee' Juan, jom t'mo̱o̱ⁿ na jnda̱ tue'ntyjo̱ na mamatsa̱'ntjom Ty'o̱o̱ts'om.
14. Toom cwe' nlayu'yo' na Juan matseinoomñê cwentaa' profeta Elías tsaⁿ na waa ñ'oom na nndyonnda'.
15. ‘Ñeeⁿ juu na niom lue' n'om lua'qui na nndii, candii.
16. '¿Ljo' ñ'oom na nntseijo̱o̱ⁿ'a cantyja ‘naaⁿ nn'aⁿ na m'aⁿ tiempomeiiⁿ? Joona matseijomna' cha'na yocanch'u na cwinquioo' naquii' tsjoom.
17. Cwila'xuaana nda̱a̱ nc'iaana, cwiluena: “Ñetjo̱o̱'â tsmaaⁿ juu som na cwitjo̱' na toco ts'aⁿ sa̱a̱ ‘o tîcala'jnom'yo'. Jnda̱ chii ñetjo̱o̱'â som ts'oo, sa̱a̱ ‘o tîcatyuee'yo'.”
18. Maluaa' matseijomna' na cwil'a nn'aⁿ na m'aⁿ tiempomeiiⁿ. Ee tyje'cañoom Juan quii'ntaaⁿ'yo', t'oom cha'cwijom ts'aⁿ na chjoo' ts'om. Tîcwaaⁿ'aⁿ nantquie na ya, meiⁿ tîc'om winom. Sa̱a̱ ‘o cwindu'yo' tsaⁿjndii matseixmaaⁿ.
19. Jnda̱ jo' tyja̱caño̱o̱ⁿ nnco̱ na cwiluiindyo̱ ts'aⁿ na jnaⁿ cañoom'luee. Ja matseijomndyo̱ ñ'eⁿ nn'aⁿ, macwa'a ñ'eⁿndyena. Sa̱a̱ ‘o cwindu'yo' cantyja ‘naⁿya: “Luaa' ts'aⁿ jeeⁿ cwa', jeeⁿ ‘uu. Juu jeeⁿ ya matseix'iaa'ñe ñ'eⁿ nn'aⁿ na cwila'tjo̱o̱ndye nnom Ty'o̱o̱ts'om ñequio nn'aⁿ na cwito'ñoom ts'iaaⁿnda̱a̱ nn'aⁿ cwentaa' gobiernom.” Sa̱a̱ tints'aa, ee cwiwitquioo' na jndo̱' ts'om Ty'o̱o̱ts'om ee cha'tso na matseijndaa'ñê ma'mo̱ⁿna' na ljo'. Njoom na m'aⁿ nn'aⁿ na tiñe'cala'canda̱
20. Jnda̱ chii to̱' Jesús na matseitiaaⁿ'aⁿ nn'aⁿ njoom yuu na jndyeti ts'iaaⁿ s'aaⁿ na ma'mo̱ⁿna' na tseixmaaⁿ najndeii Ty'o̱o̱ts'om ee na tîcalcwe' n'om naⁿ'ñeeⁿ. Matsoom:
21. —Jee jndo'cheⁿ'yo' ‘o nn'aⁿ tsjoom Corazín. Jee jndo'cheⁿ'yo' ‘o nn'aⁿ tsjoom Betsaida. Ee quii'ntaaⁿ'yo' jndye ts'iaaⁿ t'maⁿ s'aa sa̱a̱ tîcalcwe' n'om'yo'. Xeⁿ s'aa ts'iaaⁿmeiⁿ' quii'ntaaⁿ nn'aⁿ tsjoom Tiro ñ'eⁿ Sidón, tyuaa'ti jnda̱ tcwee'na liaa tsja' ndo' jnda̱ tioona tsjaa' nqueⁿna na cwit'mo̱o̱ⁿna na cwilcwe' n'omna.
22. Nndye'yo' nntsjo̱o̱, xuee na nncu'xeⁿ Ty'o̱o̱ts'om nn'aⁿ t'maⁿti nlco'wi'na' ‘o nchiiti nn'aⁿ tsjoom Tiro ñ'eⁿ Sidón.
23. Ndo' ‘o nn'aⁿ tsjoom Capernaum, ¿aa cwila'tiuu'yo' na cañoom'lueecheⁿ nntseiwendyena' ‘o cwe' ee na jndye ts'iaaⁿ s'aaya quii'ntaaⁿ'yo'? Maxjeⁿ nntiom Ty'o̱o̱ts'om ‘o yuu na meindoo' l'oo. Mana ntsuuñ'eⁿ tsjom'yo' Capernaum. Xeⁿ nn'aⁿ na ñet'om tsjoom Sodoma nty'iaana ts'iaaⁿ t'maⁿ cha'na s'aaya quii'ntaaⁿ'yo', ndicwaⁿ waa tsjoomna xjeⁿ je'cheⁿ.
24. Nndye'yo' nntsjo̱o̱ xuee na nncu'xeⁿ Ty'o̱o̱ts'om nn'aⁿ t'maⁿti nlco'wi'na' ‘o nchiiti nn'aⁿ na ñet'om ndyuaa tsjoom Sodoma. Quio'yo' na m'aaⁿya ndo' nliu'yo' na nnta'jndyee'yo'
25. Ndo' majuu xjeⁿ'ñeeⁿ to̱' Jesús na matseineiiⁿ nnom Ty'o̱o̱ts'om, tsoom:—Matseit'maaⁿ'ndyo̱ ‘u Tsotya̱ya na cwiluiindyu' na matsa̱'ntjom' cañoom'luee ñequio nnom tsjoomnancue. Ee ‘u jnda̱ tanty'iuu'ndyu' ñ'oommeiⁿ' nda̱a̱ nn'aⁿ na jndo̱' n'om ñequio nn'aⁿ na jeeⁿ t'maⁿ cwila'no̱ⁿ', sa̱a̱ jnda̱ seicano̱o̱ⁿ' joona' nda̱a̱ nn'aⁿ na cje cwil'a.
26. Mayuu' Ta, ee luaa' waa na tjawee' ts'om'.
27. Tsonnda' Jesús nda̱a̱ nn'aⁿ na cwila'jomndye ñ'eⁿñê:—Cha'tso na cwila'xmaⁿ najnda̱, Tsotya̱ya Ty'o̱o̱ts'om jnda̱ tquiaaⁿ joona' l'o̱o̱ya. Tjaa ‘ñeeⁿ tsei'no̱ⁿ' chiuu tseixmaⁿya na cwiluiindyo̱ Jnaaⁿ, macanda̱ nqueⁿ ntyjeeⁿ. Meiⁿ tjaa ‘ñeeⁿ tsei'no̱ⁿ' chiuu tseixmaⁿ Tsotya̱ya, macanda̱ ja na cwiluiindyo̱ Jnaaⁿ mantyjiiya. Mati meiⁿcwi'ñeeⁿcheⁿ ts'aⁿ na l'ue ts'o̱o̱ⁿ na nntsei'no̱ⁿ' chiuu tseixmaⁿ Tsotya̱ya mañequia na nntsei'no̱ⁿ'.
28. Quio'yo' na m'aaⁿya cha'tsondyo' na jnda̱ teijndya'yo' cantyja ‘naaⁿ jnaⁿ'yo' na joona' matseijaa'ñena' nacjo'yo' cha'cwijom xuu na tileicanaⁿ'yo' ndo' ja nñequiaya na nnta'jndyee'yo'.
29. Calajomndyo' ñ'eⁿndyo̱ cha'na cwila'jomndye quioo'ndyo na ljoyu cwil'a ts'iaaⁿ. Ndo' quiaandyo' na nnta'jnaⁿ'yo' cantyja ‘naⁿya. Ee ja tinc'uaa' ts'o̱o̱ⁿya ndo' m'aaⁿya na wi' ts'o̱o̱ⁿya ‘o. Ndo' nliu'yo' na nnta'jndyee añmaaⁿ'yo'.
30. Ee na nlax'iaa'ndyo' ñ'eⁿndyo̱ xocanchjena' ‘o cha'na manchje ts'oom na ljo cantya' quioo'ndyo. Ndo' ñ'oom na maqua̱ⁿya nda̱a̱'yo' cwe' na ya ya xjeⁿ jnda̱'yo'.
| 
