1. Tjawiquiuu'ti majuu xuee'ñeeⁿ jlui' Jesús naquii' w'aa, tjaaⁿ, tjacjom ‘ndyoo ndaaluee.
2. Ndo' jeeⁿ jndye nn'aⁿ tjomndye na m'aaⁿ. Jo' chii tjacuo̱o̱ⁿ ts'om w'aandaa na mantyjo̱cheⁿna' nnom ndaaluee. Jo' jo' tjacjom sa̱a̱ cha'tsondye naⁿ'ñeeⁿ ljoo'ndyena, meintyjee'na tyuaatcwii ‘ndyoo ndaaluee.
3. Quia jo' to̱o̱ⁿ'o̱ⁿ na matseineiiⁿ nda̱a̱ naⁿ'ñeeⁿ. Jndye ñ'oom t'mo̱o̱ⁿ nda̱a̱na ñequio ñ'oom tjañoom'. Tsoom:—Tyom'aaⁿ cwii ts'aⁿ na mach'ee ts'iaaⁿ jnda̱a̱. Tjaaⁿ, tjacjoom'm tsjaaⁿ lqueeⁿ trigo.
4. Ndo' yocheⁿ na majoom'm lqueeⁿ'ñeeⁿ nt'om tquiaa ts'om nato. Mañoom' tquie'cañom cantsaa, tcwa'yo' lqueeⁿ'ñeeⁿ.
5. Ndo' nt'om lqueeⁿ tquiaana' yuu na jeeⁿ ljo̱', yuu na tita m'aaⁿ ts'o. Tyuaa' t'oomna' ee tita m'aaⁿ ts'o.
6. Sa̱a̱ quia na jnda̱ teijmeiⁿ' na manty'iaa' ñe'quioom', t'uaana', tjacaaⁿna' ee na tinjoom ty'e nch'ioo'na'.
7. Ndo' nt'om lqueeⁿ tquiaana' yuu na too' nda' l'o̱o̱nioom. Tyuaa'ti tjawindye l'o̱o̱nioom'ñeeⁿ, jla'canto'ndyena' nacjoo' ntjom.
8. Sa̱a̱ nt'om lqueeⁿ tquiaana' yuu na ya ts'o, jeeⁿ ya tue'na'. Cwii taⁿ' tjei'na' ñequiee xuu lqueeⁿ trigo na cwii ts'oom lqueeⁿ tjacju' ts'aⁿ'ñeeⁿ. Ndo' cwii taⁿ' tjei'na' we xuu waljoo' xcwe na cwii ts'oom lqueeⁿ tjacjoom'm. Ndo' cwiicheⁿ cwii taⁿ' tjei'na' cwii xuu waljoo' yom ts'oom na cwii ts'oom lqueeⁿ tjacjoom'm.
9. ‘Ñeeⁿ juu na niom lue' n'om lua'qui na nndii, candii. Luaa ts'iaaⁿ' na quitseineiⁿ Jesús ñ'oom tjañoom'
10. Nn'aⁿ na cwila'jomndye ñ'eⁿ Jesús ty'entyjaa'na jom. Ta'x'eena nnoom:—Ticala'no̱o̱ⁿ'â chiuu na cwe' ñ'oom wjaañoom' matsei'neiⁿ' nda̱a̱ nn'aⁿ.
11. T'o̱o̱ⁿ nda̱a̱na:—Luaa waa na mach'ee Ty'o̱o̱ts'om, mañequiaaⁿ na ‘o caliu'yo' ñ'oom na wanty'iuu' m'aaⁿna' cantyja na matsa̱'ntjoom. Sa̱a̱ nt'omcheⁿ nn'aⁿ tinquiaaⁿ na nla'no̱ⁿ'na.
12. Meiⁿcwi'ñeeⁿcheⁿ ts'aⁿ na maco'ñom ñ'oom na ma'mo̱o̱ⁿya, nñequiaa Ty'o̱o̱ts'om na nntsei'no̱ⁿ'tyeeⁿ. Sa̱a̱ meiⁿquia ts'aⁿ na tîco'ñom ñ'oom na ma'mo̱o̱ⁿya, nnts'aana' na cwe' ts'iaaⁿ'ndyo cantyjati chjoowi' na matsei'no̱o̱ⁿ'o̱ⁿ.
13. Jo' chii ñ'oom tjañoom' matseina̱ⁿya nda̱a̱ nn'aⁿ. Ee meiiⁿ ñequii'cheⁿ cwinty'iaana ts'iaaⁿ na mats'aa sa̱a̱ maxjeⁿ tixoqueⁿna cwenta. Ndo' meiiⁿ cwindyena ñ'oom na mañequia sa̱a̱ m'aⁿna cha'cwijom na tyoondyena, meiⁿ ticala'no̱ⁿ'na ljo' cwindyena.
14. Cantyja ‘naaⁿ naⁿ'ñeeⁿ matseicanda̱a̱'ñena' ñ'oom na seiljeii profeta Isaías, tsoom: Meiiⁿ na jndye na cwindye'yo' sa̱a̱ tixocala'no̱ⁿ'yo', ndo' meiiⁿ na jndye cwinty'ia'nda̱a̱'yo', sa̱a̱ tixoqueⁿ'yo' cwenta.
15. Ee naⁿm'aⁿ' jnda̱ jla'quie' n'omna, cha tico'xcwena' cantyja na cwila'tiuuna. Ndo' tañe'quiandyena na nndyena cha tints'aana' na nla'no̱ⁿ'na. Ndo' cwil'a nquieena cha'cwijom ticajndoo'na cha ticaⁿna' na nlqueⁿna cwenta. Joona cwil'ayana nmeiⁿ' cha ticalcwe' n'omna, tincwji'n'maaⁿndyo̱ joona.
16. Seineiⁿti Jesús nda̱a̱ nn'aⁿ na cwila'jomndye ñ'eⁿñê. Tsoom:—Sa̱a̱ jeeⁿ matio'naaⁿñe Ty'o̱o̱ts'om ‘o na cwinty'ia'nda̱a̱'yo' ts'iaaⁿ na mats'aa ndo' mati ñ'oom na cwindye'yo' cwila'no̱ⁿ'yo' juuna'.
17. Mayuu'cheⁿ nndye'yo' nntsjo̱o̱, jndye profetas na tyoñe'quia ñ'oom' Ty'o̱o̱ts'om tandyo xuee ñequio jndye nn'aⁿ na tyom'aⁿ cantyja na maty'iomyana', jeeⁿ tyocantyjaa' n'omna na nnty'iaanda̱a̱na ljo' na cwinty'ia' ‘o ndo' na nndyena cha'na cwindye' ‘o sa̱a̱ tîcanty'iaana meiⁿ tîcandyena. Luaa ma'mo̱ⁿna' na tjacju' ts'aⁿ lqueeⁿ trigo
18. 'Candye'yo' luaa ma'mo̱ⁿ ñ'oom tjañoom' cantyja na tjacju' ts'aⁿ tsjaaⁿ lqueeⁿ trigo.
19. Nt'om lqueeⁿ na tquiaa ts'om nato na tcwa' cantsaa, jo' jo' nn'aⁿ na cwindye ñ'oom' Ty'o̱o̱ts'om. Ee meiⁿcwi'ñeeⁿcheⁿ ts'aⁿ na mandii ñ'oom cantyja na matsa̱'ntjom Ty'o̱o̱ts'om sa̱a̱ ticatsei'no̱o̱ⁿ'o̱ⁿ, maxjeⁿ macwje'cañoom tsaⁿjndii na nncwji' ñ'oom naya naquii' ts'oom.
20. Ndo' nt'om lqueeⁿ na tquiaa yuu na jeeⁿ ljo̱', mann'aⁿ na cwindye ñ'oom' Ty'o̱o̱ts'om ndo' ñequio na neiiⁿna cwito'ñoomna juuna'.
21. Sa̱a̱ naⁿ'ñeeⁿ cha'cwijom ntjom na tinjoom ty'e nch'ioo'na', na tyuaa' tcaaⁿna'. Ee quia na maco'wi'na' joona oo cwilei'ntyjo̱ nn'aⁿ joona cantyja ‘naaⁿ' ñ'oom naya, mantyja cwi'ndyena.
22. Ndo' lqueeⁿ na tquiaa yuu na too' nda' l'o̱o̱nioom, mann'aⁿ na cwindye ñ'oom naya. Sa̱a̱ naⁿ'ñeeⁿ jeeⁿ m'aⁿna ñomtiuu chiuu na cwii ‘oom'aⁿyoona, ndo' chiuu ya nleityandyetina. Jo' chii tileicanaⁿndyena na nl'ana yuu na matsona'. Ee ñ'omtiuu'ñeeⁿ matseicu'na' na nla'canda̱na nnom Ty'o̱o̱ts'om cha'xjeⁿ l'a joo l'o̱o̱nioom na jla'canto'ndyena' nacjoo' ntjom.
23. Sa̱a̱ lqueeⁿ na tquiaa yuu na jeeⁿ ya ts'o mann'aⁿ na cwindye ñ'oom naya. Cwila'no̱ⁿ'na juuna' ndo' cantyja na cwil'ana cwiwitquioo' na cwinaⁿndyena chiuu waa na matsona'. Nt'om naⁿ'ñeeⁿ tjacantyja na ya cwil'ana. Matseijomna' joona cha'na cwii ts'oom lqueeⁿ'ñeeⁿ na tjei'na' ñequiee xuu. Ndo' nt'om naⁿ'ñeeⁿ xcweyandyo cwil'ana yuu na ya. Matseijomna' joona cha'na cwii ts'oom lqueeⁿ'ñeeⁿ na tjei'na' we xuu waljoo' xcwe. Ndo' nt'om naⁿ'ñeeⁿ tiqueⁿndyena na cwil'ana yuu na ya. Jo' chii matseijomna' joona cha'na cwii ts'oom lqueeⁿ'ñeeⁿ na tjei'na' ñe'cwii xuu waljoo' yom ts'oom. Lqueeⁿ jnda̱a̱ ñequio lqueeⁿ trigo
24. Ndo' seineiⁿ Jesús cwiicheⁿ ñ'oom tjañoom'. Tsoom nda̱a̱na:—Juu na matsa̱'ntjom Ty'o̱o̱ts'om, matseijomna' juuna' cha'na cwii ts'aⁿ na tja na waa tyuaa', tjacjoom'm lqueeⁿ tsjaaⁿ na ya.
25. Sa̱a̱ cwii teijaaⁿ yocheⁿ na watsom ñequio nn'aⁿ waⁿ'aⁿ tyje'cañoom cwii ts'aⁿ na jndoo' jom. Tjatseiñ'eeⁿ'ñe tsaⁿ'ñeeⁿ lqueeⁿ jnda̱a̱ quii'ntaaⁿ lqueeⁿ trigo. Jnda̱ chii tja.
26. Tjawindye jnda̱ lqueeⁿ, tja'meiiⁿndyena', quia jo' chii teitquioo' na ñ'eeⁿ' lqueeⁿ jnda̱a̱ naquii' ntjom'ñeeⁿ.
27. Naⁿntjom ‘naaⁿ' tsaⁿ'ñeeⁿ tqueⁿna cwenta na nmeiiⁿ' niom. Ty'entyjaa'na jom, jluena nnoom: “Ta, aa nchii ñequii'cheⁿ lqueeⁿ na ya tja'cju', quia jo' ¿chiuu na cwiwitquioo' lqueeⁿ jnda̱a̱ quii'ntaaⁿ jnda̱ lqueeⁿ ‘naⁿ'?”
28. T'o̱o̱ⁿ nda̱a̱ naⁿ'ñeeⁿ, tsoom: “Ts'aⁿ na jndoo' ja s'aa na luaa'.” Ndo' ta'x'ee naⁿntjom'ñeeⁿ nnoom: “¿Aa l'ue ts'om' na nntsaacatjeii'ndyô̱ joona' naquii' ntjom ‘naⁿ'?”
29. T'o̱o̱ⁿ nda̱a̱ naⁿntjoom'm, tsoom: “Til'a'yo' na ljo' ee xeⁿ nntjeii'ndyo' joona', nnts'aacheⁿna' na mati nnc'oomna' ntjom na ya.
30. Ca'ndye'yo' na ñejom c'oowijnda̱na' hasta na mmaⁿjndyeena'.” Quia jo' nntsjo̱o̱ nda̱a̱ nn'aⁿ na nntyje: “Catyje'jndyee'yo' jnda̱ lqueeⁿ jnda̱a̱, cal'a'yo' cantsa̱a̱' joona' ee na nlcona'. Nda̱nquia catyje'yo' jnda̱ lqueeⁿ na ya na nnc'oocuena' ts'om tsa̱' ‘naⁿya.” Ñ'oom tjañoom' cantyja ‘naaⁿ' lqueeⁿ mostaza
31. Seineiⁿticheⁿ Jesús cwiicheⁿ ñ'oom tjañoom' na ma'mo̱ⁿna' na maxjeⁿ nleijndyendyeti nn'aⁿ na nntsa̱'ntjom Ty'o̱o̱ts'om naquii' n'om. Tsoom nda̱a̱na:—Juu na matsa̱'ntjom Ty'o̱o̱ts'om matseijomna' cha'na cwii lqueeⁿ' mostaza. Tjatseic'oom ts'aⁿ juuna' naquii' ntjoom'm.
32. Lqueeⁿ' mostaza jeeⁿ cajnda̱a̱na' sa̱a̱ xeⁿ jnda̱ teijndeii ts'oom, nleindyena', nncwinom'na' nt'om n'oom ntjom na tiquiwindye. Juuna' nleit'maⁿtina' hasta nnda̱a̱ nnaⁿ l'o̱ ts'oom'ñeeⁿ cantquiaa cantsaa. Ñ'oom tjañoom' cantyja ‘naaⁿ ndaaljo'
33. Jnda̱ chii cwiicheⁿ ñ'oom tjañoom' seineiⁿ Jesús nda̱a̱ naⁿ'ñeeⁿ, tsoom:—Juu na matsa̱'ntjom Ty'o̱o̱ts'om matseijomna' juuna' cha'na ndaaljo' na seitjoom' yuscu ñ'eⁿ ndyee tsua'xjo jnda̱a̱ tyoo'. Seicandeii'na' cha'waa tsqueeⁿ tyoo'. Ñe'quii'cheⁿ ñ'oom tjañoom' na seineiⁿ Jesús
34. Ñequii'cheⁿ ñ'oom tjañoom' seineiⁿ Jesús na tyo'mo̱o̱ⁿ ñ'oommeiⁿ' nda̱a̱ nn'aⁿ. Meiⁿcwii ñ'oom tîcatseineiiⁿ nda̱a̱na na nchii ñ'oom tjañoom'.
35. Jo' chii seicanda̱a̱'ñena' ñ'oom ‘ndyoo profeta, tsoom: Ja nntseina̱ⁿya ñ'oom tjañoom' nda̱a̱ nn'aⁿ. Nntseicano̱o̱ⁿya ñ'oom na wanty'iuu' m'aaⁿna' nda̱a̱ nn'aⁿ cantyjati na jnaⁿ tsjoomnancue. Luaa ma'mo̱ⁿ ñ'oom cantyja ‘naaⁿ' lqueeⁿ jnda̱a̱ ñequio lqueeⁿ trigo
36. Jnda̱ na jñom Jesús nn'aⁿ na c'oolcwee'na, quia jo' tjaqueⁿ'eⁿ naquii' w'aa. Ndo' jâ nn'aⁿ na cwilajomndyô̱ ñ'eⁿñê santyjaa'â jom. L'uuyâ nnoom:—Catsu' nda̱a̱yâ ljo' ñe'ca'mo̱ⁿ ñ'oom tjañoom' cantyja ‘naaⁿ' lqueeⁿ jnda̱a̱ na t'oomna' naquii' ntjom na ya.
37. T'o̱o̱ⁿ nda̱a̱yâ, tsoom:—Ts'aⁿ na tjacju' lqueeⁿ tsjaaⁿ na ya, jo' jo' nnco̱ na cwiluiindyo̱ ts'aⁿ na jnaⁿ cañoom'luee.
38. Ndo' tyuaa ‘naaⁿ' tsaⁿ'ñeeⁿ, jo' jo' tsjoomnancue. Lqueeⁿ tsjaaⁿ na ya, jo' jo' nn'aⁿ na cwila'jomndye cantyja na matsa̱'ntjom Ty'o̱o̱ts'om. Ndo' lqueeⁿ tsjaaⁿ jnda̱a̱, jo' jo' nn'aⁿ na m'aⁿ cantyja ‘naaⁿ' tsaⁿjndii.
39. Juu ts'aⁿ na wi'ñe na tjatseiñ'eeⁿ'ñe tsjaaⁿ lqueeⁿ jnda̱a̱, jo' jo' nquii tsaⁿjndii. Ndo' xuee na jnda̱ tmaⁿ ntjom na ty'ecatyje naⁿntjom, jo' jo' xuee na cwintycwii tsjoomnancue. Joo naⁿntjom na ty'ecatyje lqueeⁿ, jo' jo' ángeles cwentaa' Ty'o̱o̱ts'om.
40. Ndo' cha'xjeⁿ l'a naⁿntjom cantsa̱a̱' jnda̱ lqueeⁿ jnda̱a̱ na nlcona' quii' chom, maluaa' matseijomna' na nluii xuee quia na cwintycwii tsjoomnancue.
41. Ee ja na cwiluiindyo̱ ts'aⁿ na jnaⁿ cañoom'luee njño̱o̱ⁿya ángeles cwentaya na nntjeii'ndyo̱na nn'aⁿ na wi'ndye ñequio nn'aⁿ na cwila'jndo̱' n'om nc'iaa na cal'a naⁿ'ñeeⁿ natia.
42. Ndo' ángeles nntuee'na naⁿ'ñeeⁿ naquii' chom b'io. Jo' jo' nndyuee naⁿ'ñeeⁿ ndo' nnteinquiena ndei'n'omna na wi' cwitjoomna.
43. Sa̱a̱ nn'aⁿ na cwila'canda̱a̱'ndye cha'xjeⁿ na matsa̱'ntjom Ty'o̱o̱ts'om, nts'aana' na caxueendyena cha'na xuee nnom ñe'quioom'. ‘Ñeeⁿ juu na niom lue' n'om lua'qui na nndii, candii. Ñ'oom tjañoom' cantyja ‘naaⁿ s'om na wanty'iu quii' tyuaa
44. 'Juu na matsa̱'ntjom Ty'o̱o̱ts'om matseijomna' cha'na castom na ñjom s'om cajaⁿ na wanty'iuna' quii' tyuaa. Ljeii cwii ts'aⁿ castom'ñeeⁿ sa̱a̱ tanty'iunnaaⁿ'aⁿ juuna'. Tjaaⁿ na jeeⁿ neiiⁿ'eⁿ, tjacajna̱a̱ⁿ cha'tso ‘naaⁿ'aⁿ na niom. Jnda̱ chii seijnaaⁿ tyuaa'ñeeⁿ yuu na ndii' castom. Ñ'oom tjañoom' cantyja ‘naaⁿ' ta̱' perla
45. 'Juu na matsa̱'ntjom Ty'o̱o̱ts'om mati matseijomna' cha'na cwii ts'aⁿ na matseijnda ndo' majnda̱a̱ ta̱' na ñequii'cheⁿ mal'ueeⁿ ta̱' perlas na yati.
46. Quia na ljeiiⁿ cwii ta̱' perla na jeeⁿcheⁿ ndyaa' ya ndo' jndana', tja tsaⁿ'ñeeⁿ tjacajna̱a̱ⁿ cha'tso ‘naaⁿ'aⁿ, jnda̱ chii seijnaaⁿ ta̱' perla'ñeeⁿ. Ñ'oom tjañoom' cantyja ‘naaⁿ' tsqui'
47. 'Juu na matsa̱'ntjom Ty'o̱o̱ts'om mati matseijomna' cha'na cwii tsqui' t'maⁿ na tuee' nn'aⁿ ts'om ndaaluee. Jndye nnom calcaa matseit'uena'.
48. Quia na jnda̱ too' tsqui' na ñjomndye calcaa, ‘oocantyjaandye nn'aⁿ juuna' tyuaatcwii. Meindyuaandyena, cwitjeii'ndyena calcaa na yati. Cwitioomna jooyo' n'om lquiee sa̱a̱ calcaa na cwantindyo cwityeⁿ'quiee'na jooyo'.
49. Malaa'ti' nnts'aana' xuee quia na cwintycwii tsjoomnancue. Nñequiocue ángeles na nntjeii'ndyena nn'aⁿ na wi'ndye quii'ntaaⁿ nn'aⁿ na m'aⁿ cantyja na maty'iomyana'.
50. Ndo' nntioomna nn'aⁿ na wi'ndye naquii' chom b'io. Jo' jo' nndyuee naⁿ'ñeeⁿ ndo' nnteinquiena ndei'n'omna na wi' cwitjoomna. Jeeⁿ jnda la'xmaⁿ ñ'oom xco ñequio ñ'oom tquie
51. Quia jo' tax'ee Jesús nda̱a̱ jâ nn'aⁿ na cwila'jomndyô̱ ñ'eⁿñê, tsoom:—¿Aa cwila'no̱ⁿ'yo' cha'tso ñ'oommeiⁿ'?T'o̱o̱yâ nnoom, l'uuyâ:—Mayuu', Ta, macwila'no̱o̱ⁿ'â.
52. Quia jo' tsoom nda̱a̱yâ:—Je' jnda̱ jla'no̱ⁿ'yo' ljo' ñe'cat'mo̱o̱ⁿ ñ'oom tjañoom'meiⁿ'. Nndye'yo' nntsjo̱o̱, ticwii cwii ts'aⁿ na jnda̱ teijndo̱' ts'om chiuu t'maⁿ ljeii na tqueⁿ Moisés ndo' mati jnda̱ sei'no̱ⁿ' cantyja ‘naaⁿ' juu na matsa̱'ntjom Ty'o̱o̱ts'om, tsaⁿ'ñeeⁿ matseijomna' jom cha'na ts'aⁿ na cwiluiitquieñe cwii w'aa. Ee ts'aⁿ na cwiluiitquieñe matseil'uee'ñê ‘naⁿ na tquie ndo' matseitjoom ‘naⁿ na xco. Quia jo' meiⁿquia xjeⁿ na macaⁿna' cwii nmeiⁿ' mawaac'eena' na nleil'uee'ñê. Tja Jesús tsjoom Nazaret
53. Quia na jnda̱ seineiⁿ Jesús ñ'oommeiⁿ' na tjañoom', jlueeⁿ'eⁿ jo' jo'.
54. Tjalcweeⁿ'eⁿ ndyuaa tsjom'm. Jo' jo' tyotseineiiⁿ nda̱a̱ nn'aⁿ naquii' wats'om. Ndo' cha'tsondye nn'aⁿ jeeⁿ tjawee' n'omna ñ'oom na seineiiⁿ. Tyoluena:—Tsaⁿm'aaⁿ' ¿chiuu s'aayom na jeeⁿ jndo̱' ts'oom? Ndo' ¿yuu jnaⁿ najneiⁿ na mach'eeⁿ ts'iaaⁿ t'maⁿ na tyoonty'iaaya?
55. ¿Aa nchii tsaⁿm'aaⁿ' jnda ts'aⁿ na macuuñe n'oom? Ndo' ¿aa nchii tsoñeeⁿ jndyu María? Ndo' ntyjeeⁿ, ¿aa nchii Jacobo, José, Simón ñequio Judas?
56. Ndo' mati ntyjeeⁿ na yolcu m'aⁿna quii'ntaaⁿya. Quia jo' ¿chiuu waa na jeeⁿ jndo̱' ts'oom ndo' cwe' ts'aⁿ tsjoom ñjaaⁿ jom?
57. Cwe' jo' ticalañ'oom'ndyena Jesús. Jo' chii tsoom nda̱a̱na:—Meiⁿquiayuucheⁿ na wjaa cwii profeta, nla't'maaⁿ'ndye nn'aⁿ jom. Sa̱a̱ joo nn'aⁿ ndyuaaⁿ'aⁿ ñequio nn'aⁿ waⁿ'aⁿ, xocala't'maaⁿ'ndyena jom.
58. Ndo' tijndye ts'iaaⁿ t'maⁿ s'aaⁿ jo' jo', nc'e na ticala'yu' naⁿ'ñeeⁿ ñ'eⁿñê.
| 
