1. Nn'aⁿ fariseos ñequio nn'aⁿ saduceos tquie'cañomna na m'aaⁿ Jesús. Ñe'cal'ana xjeⁿ jom, jo' na taⁿna nnoom na cats'aaⁿ cwii ‘naaⁿ na nnty'iaana na m'mo̱o̱ⁿna' na Ty'o̱o̱ts'om jñom jom.
2. Sa̱a̱ t'o̱ Jesús nda̱a̱ naⁿ'ñeeⁿ, tsoom:—Quia na jnda̱ tmaaⁿ cwinty'ia'yo' na jeeⁿ tmaaⁿ nchquiu, cwindu'yo': “Matseinmaaⁿñeyana'.”
3. Ndo' quia na cwitsjoom cwinty'ia'yo' na jeeⁿ neiⁿncoo' nchquiu ‘ndaa, cwindu'yo': “Je' maxjeⁿ nncua'.” ‘O nn'aⁿ na tiñecwii m'aaⁿ' n'om'yo', jeeⁿ ya cwila'noⁿ'yo' ‘naaⁿ na cwit'mo̱o̱ⁿ nchquiu na m'aⁿ tsjo̱'luee sa̱a̱ tileicala'no̱ⁿ'yo' ljo' cwii ndyoch'eetina' cantyja na cwit'mo̱o̱ⁿ ts'iaaⁿ t'maⁿ na cwinty'ia'yo' na mats'aa.
4. Nn'aⁿ na m'aⁿ je' jeeⁿ tia nn'aⁿndye, jnda̱ ‘ndyena Ty'o̱o̱ts'om sa̱a̱ meiiⁿ na ljo', cwitaⁿna cwii ‘naaⁿ t'maⁿ na ñe'canty'iaana. Sa̱a̱ xonquiaya na nnty'iaana cwii ‘naaⁿ na t'maⁿ. Macanda̱ cala'no̱ⁿ'na ljo' ñe'ca'mo̱ⁿna' juu na tjom Jonás.Mana tjaaⁿ, ‘ñeeⁿ joona. Ndaaljo' ‘naaⁿ nn'aⁿ fariseos
5. Quia jo' saanndaa'â cwiicheⁿ xndyaa' ndaaluee. Ndo' quia na squia̱a̱yâ jo' jo' ñ'eⁿ Jesús jliuuyâ na tjaa'naⁿ nantquie cañ'eⁿ, jnda̱ tsuu' n'o̱o̱ⁿyâ juuna'.
6. Tso Jesús nda̱a̱yâ:—C'omc'eendyo' na cal'a'yo' cwenta cantyja ‘naaⁿ' ndaaljo' ‘naaⁿ nn'aⁿ fariseos ñequio nn'aⁿ saduceos.
7. Ndo' jâ na cwila'jomndyô̱ ñ'eⁿñê to̱o̱'â na cwilana̱a̱ⁿ cheⁿncjo̱o̱yâ. L'uuyâ:—Macwjeeⁿ'eⁿ ñ'oomwaa' nda̱a̱ya nc'e na tjaa'naⁿ tyoo' cwilei'ñ'o̱o̱ⁿya.
8. Ndo' sei'no̱ⁿ' Jesús na m'aaⁿ' n'o̱o̱ⁿyâ cantyja ‘naaⁿ' tyoo' ñ'eⁿ ndaaljo'. Tsoom nda̱a̱yâ:—'O nn'aⁿ na tit'maⁿ cwila'yu'ya n'om'yo', ¿chiuu na jeeⁿ jndye m'aaⁿ' n'om'yo' na tjaa'naⁿ tyoo' cwilei'ñ'om'yo'?
9. ¿Aa maxjeⁿ ticala'no̱ⁿ'yo' ñ'oom na tsjo̱o̱ luaa'? ¿Aa ticjaañjoom' n'om'yo' ‘om taⁿ' tyoo'ñeeⁿ na tyja̱ya na tcwa' ‘om meiⁿ nn'aⁿ, ndo' na jndye tsquiee tyoo' jla'we'yo' na seicwaljoo'na'?
10. Ndo' ¿aa meiⁿ ticjaañjoom' n'om'yo' cwiicheⁿ ntquiee' taⁿ' tyoo' na tyja̱ya na tcwa' ñequiee meiⁿ nn'aⁿ, ndo' mati lojoo tsquiee ntaⁿ' tyoo' jla'we'yo' na seicwaljoo'na'? Nnda̱a̱ nnts'aa na nleijndaa' nantquie na nlcwa'yo'.
11. Jo' chii ¿chiuu na tiqueⁿ'yo' cwenta na nchii matseina̱ⁿya cantyja ‘naaⁿ' tyoo'? Ja tsjo̱o̱ na cal'a'yo' cwenta cantyja ‘naaⁿ' ndaaljo' ‘naaⁿ nn'aⁿ fariseos ñequio nn'aⁿ saduceos.
12. Quia ljo'cheⁿ jla'no̱o̱ⁿ'â na nchii cantyja ‘naaⁿ' ndaaljo' na cwiluii tyoo' na cal'aayâ cwenta, sa̱a̱ tañe'quiandyô̱ cantyja ‘naaⁿ' ñ'oom na cwit'mo̱o̱ⁿ nn'aⁿ fariseos ñequio nn'aⁿ saduceos. Macwji'yuu'ñe Pedro na Jesús cwiluiiñê Cristo
13. Quia jo' tja Jesús ndaatyuaa tsjoom Cesarea Filipo. Jnda̱ squia̱a̱yâ jo' jo' tax'eeⁿ nda̱a̱ jâ nn'aⁿ na cwila'jomndyô̱ ñ'eⁿñê, tsoom:—Ja na cwiluiindyo̱ ts'aⁿ na jnaⁿ cañoom'luee ¿'ñeeⁿ cwilue nn'aⁿ na cwiluiindyo̱?
14. T'o̱o̱yâ nnoom l'uuyâ:—M'aⁿ nn'aⁿ na cwilue na ‘u Juan, ts'aⁿ na tyotseits'oomñe nn'aⁿ. Ndo' nt'om cwilue Elías ‘u, nt'om cwilue na Jeremías oo cwiicheⁿ profeta.
15. Tso Jesús nda̱a̱yâ:—Ndo' ‘o je', ¿'ñeeⁿ cwindu'yo' na cwiluiindyo̱?
16. T'o̱ Simón Pedro nnoom, tso:—'U cwiluiindyu' nquii Cristo, Jnda Ty'o̱o̱ts'om na wando'.
17. Tso Jesús nnom:—'U Simón, jnda Jonás, t'maⁿ waa na matio'naaⁿñe Ty'o̱o̱ts'om ‘u na luaa' matsei'no̱ⁿ'. Ee nchii cwe' ts'aⁿ na t'mo̱ⁿ ñ'oommeiⁿ' njom'. Nquii Tsotya̱ya na m'aaⁿ cañoom'luee tquiaaⁿ na matsei'no̱ⁿ' cantyja ‘naⁿya.
18. Mati matsjo̱o̱ njom' na ‘u jndyu' Pedro, ñ'oom na ma'mo̱ⁿna' tsjo̱'. Nacjoo' juu tsjo̱'waañe nlqua̱a̱ⁿya tmaaⁿ' nn'aⁿ na macwjii'ndyo̱ cwentaya. Ndo' meiⁿ naⁿjndii na m'aⁿ quii' b'io na jeeⁿ jnda̱ cwila'xmaⁿna, xocanaⁿjnda̱na nacjoo' tmaaⁿ' nn'aⁿ na cwjii'ndyo̱ cwentaya.
19. Ja nñequiaya na t'maⁿ nntseixmaⁿ' quii'ntaaⁿ nn'aⁿ na m'aⁿ cantyja ‘naaⁿ' nqueⁿ na matsa̱'ntjoom cañoom'luee. Ñ'oom na nntsu' na ticaty'iomna' na cal'a nn'aⁿ na m'aⁿ tsjoomnancuewaa, ñ'oom'ñeeⁿ nntseix'iaa'ñena' ñequio ñ'oom na ntyjii Ty'o̱o̱ts'om. Ndo' ñ'oom na nntsu' na wanaaⁿ na cal'a nn'aⁿ mati nntseix'iaa'ñena' ñequio juu ñ'oom na ntyjii Ty'o̱o̱ts'om.
20. Quia jo' Jesús tqueⁿtyeeⁿ ñ'oom nda̱a̱yâ na meiⁿcwii nnom ts'aⁿ ticat'mo̱o̱ⁿyâ na jom cwiluiiñê Cristo. Matseicandii Jesús cantyja na nncueeⁿ'eⁿ
21. Xjeⁿ'ñeeⁿ to̱' Jesús na ma'mo̱o̱ⁿ nda̱a̱ jâ nn'aⁿ na cwila'jomndyô̱ ñ'eⁿñê na jndei'na' na nncjaⁿ Jerusalén. Jo' jo' t'maⁿ nawi' nntjoom nl'a nn'aⁿ na cwiluiitquiendye, ñequio ntyee na cwiluiitquiendye, ñequio nn'aⁿ na cwit'mo̱o̱ⁿ ljeii na tqueⁿ Moisés. Naⁿ'ñeeⁿ nla'cuee'na jom, sa̱a̱ xuee jnda̱ ndyee nncwando'xcoom.
22. Quia jo' tjañ'oom Pedro Jesús cwii ntyja, to̱o̱ⁿ'o̱ⁿ na matsoom nnom na ticatsa̱'ntjomna' na nntjom na luaa'. Tsoom:—Tijoom quiaa Ty'o̱o̱ts'om na nntjom' na luaa'. Tixoquiaaⁿ na nluii naljo'.
23. Teiqueⁿ Jesús tsoom nnom Pedro:—Quindyo̱o̱' nacañomya ‘u Satanás. Ñe'catseitsaⁿ' ja. ‘U ñe'catsei'nnda' ts'o̱o̱ⁿya ee ñ'oom na matsei'tiuu' jnaⁿna' cwe' cantyja na cwila'tiuu nn'aⁿ, nchii cha'xjeⁿ na l'ue ts'om Ty'o̱o̱ts'om.
24. Jnda̱ chii tso Jesús nda̱a̱yâ:—Meiⁿcwi'ñeeⁿcheⁿ ts'aⁿ na l'ue ts'om na nncw'aa'ñe ja, cwji'ñê ljo' na matseitiuu nqueⁿ. Caljoya ts'oom nawi' na matjoom meiiⁿ cueeⁿ'eⁿ. Ndo' candyontyjo̱o̱ⁿ cantyja na mats'aa.
25. Ee meiⁿcwi'ñeeⁿcheⁿ ts'aⁿ na mañequiaañe na catjom ljo' na nntjom, nc'e na m'aaⁿ cantyja ‘naⁿya, tsaⁿ'ñeeⁿ nlui'n'maaⁿñê. Ndo' meiⁿcwi'ñeeⁿcheⁿ ts'aⁿ na mal'uee'ñe cheⁿnquii chiuu nlui'n'maaⁿñe, majo'to jo' nntsuuñe.
26. Meiiⁿ cha'waa tsjoomnancue cuaana' cwentaa' ts'aⁿ sa̱a̱ yuu waa na mateijndeiina' tsaⁿ'ñeeⁿ ee xoc'o̱na' ñ'eⁿñê na ticatsuu añmaaⁿ'aⁿ. Ndo' ¿aa nnda̱a̱ nntioml'ua ts'aⁿ na nlui'n'maaⁿñe añmaaⁿ'aⁿ? ¿Cwaaⁿ nnda̱a̱?
27. Ja na cwiluiindyo̱ ts'aⁿ na jnaⁿ cañoom'luee nncwja̱caño̱o̱ⁿnnda'a tsjoomnancue ñequio ángeles cwentaa' Tsotya̱ya. Quia ljo' nntseit'maaⁿ'ñena' ja cha'xjeⁿ na matseit'maaⁿ'ñena' nquii Tsotya̱ya. Ndo' nnts'aa na nnco'ñom ticwii cwii ts'aⁿ cantyjati na ñes'aa, aa na ya, aa na tis'a.
28. Ñ'oom na mayuu' matsjo̱o̱ nda̱a̱'yo', mam'aⁿ nn'aⁿ ljooñe na tixocwjena hasta na jnda̱ nty'iaanda̱a̱na ja na cwiluiindyo̱ ts'aⁿ na jnaⁿ cañoom'luee na macwja̱caño̱o̱ⁿ na nntsa̱'ntjo̱ⁿya.
| 
