1. Ncuee na tyom'aaⁿ Herodes rey, tuiiñe Jesús tsjoom Belén ts'o̱ndaa Judea. Luaa tuii, tquie'cañom nn'aⁿ na jndo̱' n'om Jerusalén, na jnaⁿ jo ndo' na macalui' ñe'quioom'.
2. Tyota'x'eendyena:—¿Yuu m'aaⁿ nqueⁿ na tuiiñê rey cwentaa nn'aⁿ judíos? Ee jâ jnda̱ nty'iaayâ na teitquioo'ñe caxjuu cwentaaⁿ'aⁿ na ndicwaⁿ m'aaⁿyâ ndyuaayâ jo ndo' yuu na macalui' ñe'quioom'. Jo' na tquio̱o̱yâ na nlat'maaⁿ'ndyô̱ jom.
3. Quia na jndii Herodes ñ'oomwaa', jeeⁿ seiñ'eeⁿ'ñena' jom ndo' mati cha'tso nn'aⁿ Jerusalén.
4. Jo' chii seitjoom cha'tso ntyee na cwiluiitquiendye, ñequio nn'aⁿ na m'aⁿ tsjoom'ñeeⁿ na cwit'mo̱o̱ⁿ ljeii na tqueⁿ Moisés. Ndo' tax'eeñê nda̱a̱ naⁿ'ñeeⁿ yuu tsona' na nluiiñe juu na cwiluiiñe Cristo.
5. Naⁿ'ñeeⁿ jluena nnoom:—Ndi', matso ljeii na tsjoom Belén ts'o̱ndaa Judea, jo' jo' nluiiñê. Ee luaa waa na seiljeii profeta:
6. ‘O nn'aⁿ tsjoom Belén, ts'o̱ndaa Judá, meiⁿchjoo ticju'cjena' tsjom'yo' quii'ntaaⁿ njoom nt'maⁿ cha'waa ts'o̱ndaa Judá. Ee quii'ntaaⁿ'yo' nlui' cwii ts'aⁿ na nluiitquieñe na nnteix'ee nn'aaⁿya Israel.
7. Quia jo' cwe' nty'iu tqueeⁿ'ñe Herodes nn'aⁿ na jndo̱' n'om na jnaⁿ jo ndo' na macalui' ñe'quioom'. Tcuu tcuu tax'eeñê nda̱a̱na ‘ñeeⁿ xjeⁿ'ñeeⁿ na tei'tquioo'ñe caxjuu.
8. Jnda̱ jo' jñoom joona na c'oona tsjoom Belén. Tsoom nda̱a̱na:—Catsa'yo', ndo' cata'x'ee'jndaa'ndyo' yuu m'aaⁿ tyochjoo'ñeeⁿ. Ndo' quia na jnda̱ jliu'yo' jom, quiola'candii'yo' ja, cha mati ja nncjo̱, nntseit'maaⁿ'ndyo̱ jom.
9. Naⁿ'ñeeⁿ, quia na jnda̱ jndyena ñ'om'ndyoo rey Herodes'ñeeⁿ mana ty'ena. Ndo' juu caxjuu na tei'tquioo'ñe nda̱a̱na na ndicwaⁿ m'aⁿna ndyuaana jo ndo' na macalui' ñe'quioom', tjajndyeena' jo nda̱a̱na hasta tue'cañoomna' ndyeyu yuu na m'aaⁿ tyochjoo'ñeeⁿ.
10. Jeeⁿ tjawee' n'omna quia nty'iaannda'na caxjuu'ñeeⁿ. T'maⁿ tquiaana' na neiiⁿna.
11. Quia ty'equie'na naquii' w'aa, nty'iaana juu tyochjoo ñequio tsoñeeⁿ María. Ty'ecata'na cantyena na tyola't'maaⁿ'ndyena jom. Tjeii'na ‘naⁿ na jnda na cwilei'chona. L'ana naya jom s'om cajaⁿ ñ'eⁿ suu ndo' ñ'eⁿ nasei cachi na tuiina' ñ'eⁿ ntsuee' ts'oom mirra.
12. Jnda̱ chii cwiicheⁿ nato ty'elcwee'na ndyuaa tsjoomna ee s'aa Ty'o̱o̱ts'om na tsoona ndaa, jo' na seijndo̱'na' n'omna na tic'oolcwee'na na m'aaⁿ Herodes'ñeeⁿ. Cwilei'nomna, cwi'oona ndyuaa Egipto
13. Jnda̱ na jlui' naⁿ'ñeeⁿ, teitquioo'ñe cwii ángel cwentaa' Ta Ty'o̱o̱ts'om nnom José xjeⁿ na tsoom'm ndaa. Tso ángel'ñeeⁿ nnoom:—Quicantyja', cja'ñ'oom' tyochjoo ñequio tsoñeeⁿ. Calei'nom'yo', catsa'yo' ndyuaa Egipto, ndo' jo' jo' c'om'yo' hasta xjeⁿ na nntseicandiiya. Ee nl'ue Herodes tyochjoo na nntseicueⁿ'eⁿ juu.
14. Quia jo' teicantyjaaⁿ, ndo' cwe' natsjom tjañ'oom tyochjoo ñequio tsondyee. Ty'ena Egipto.
15. Jo' jo' t'omna hasta na tue' Herodes. Na tuii na luaa' seicanda̱a̱'ñena' ñ'oom' Ty'o̱o̱ts'om na tyoñequiaa profeta. Matsona': “Tjeii'a Jndaaya na m'aaⁿ ndyuaa Egipto.” Herodes sa̱'ntjoom na cwje tyocanch'u
16. Juu Herodes, jnda̱ na ljeiiⁿ na joo nn'aⁿ na jndo̱' n'om ticala'ñ'oom'ndyena jom, seiw'iiyayaaⁿ. Jñoom sondaro tsjoom Belén ndo' cha'waa ndiocheⁿ yuu na m'aⁿ nn'aⁿ. Sa̱'ntjoom na cala'cwjee naⁿ'ñeeⁿ cha'tso tyonch'u na we ndyuu ndo' na cjeti m'aⁿ. Ee laa'ti' tjeiiⁿ'eⁿ cwenta cwanti xuee na teitquioo'ñe jndyee caxjuu'ñeeⁿ cantyja ‘naaⁿ' ñ'oom ndyuee nn'aⁿ na jndo̱' n'om.
17. Ndo' na luaa' s'aaⁿ, seicanda̱a̱'ñena' ñ'oom' Ty'o̱o̱ts'om na seiljeii profeta Jeremías. Ee seineiiⁿ ñ'oom tjañoom' chiuu seichjoo'na' n'om yolcu judías tsjoom Belén na jla'cwjee sondaro ndana.
18. Tsoom: Teic'uaa naquii' tsjoom Ramá na cwityuee londyee yocanch'u. Jndeii cwila'xuaana, cwityueena cantyja ‘naaⁿ ndana meiⁿ taleiquiaana' na nnjoomna, ee tja̱ ndana.
19. Jnda̱ na tue' Herodes, quia jo' teitquioo'ñennda' ángel cwentaa' Ty'o̱o̱ts'om nnom José xjeⁿ na tsoom'm ndaa. Ndicwaⁿ m'aⁿna ndyuaa Egipto.
20. Tso nnoom:—Quicantyja', cja'ñ'oom' tyochjoo ñequio tsoñeeⁿ. Tsalcwe'yo' ndyuaa nn'aⁿ Israel. Ee jnda̱ tja̱ nn'aⁿ na ñel'uee'ndye na ñe'cala'cuee' jom.
21. Quia jo' teicantyjaaⁿ, tjañ'oom tyochjoo ñ'eⁿ tsondyee. Ty'elcwee'na ndyuaana ndyuaa Israel.
22. Joo ncuee'ñeeⁿ m'aaⁿ Arquelao ts'iaaⁿ ts'o̱ndaa Judea yuu na tyotsa̱'ntjom tsotyeeⁿ Herodes. Sa̱a̱ quia na jndii José na ljo', t'oom na nquiaⁿ'aⁿ na nncjaⁿ Judea. Mati s'aannda' Ty'o̱o̱ts'om na tsoom'm ndaa na tancjaⁿ jo' jo'. Jo' chii tjaaⁿ cwiicheⁿ ntyja, ts'o̱ndaa Galilea.
23. Tjaaⁿ cwii tsjoom na jndyu Nazaret. Jo' jo' ljoo'ñê. Na tuii na luaa' seicanda̱a̱'ñena' ñ'oom' Ty'o̱o̱ts'om na tyoñe'quia profetas na nntseicajndyuna' Jesús ts'aⁿ Nazaret.
| 
