1. Seineiⁿti Jesús ñ'oom tjañoom', tsoom:—Juu na matsa̱'ntjom Ty'o̱o̱ts'om cañoom'luee, matseijomna' juuna' cha'na cwii patrom na waa ntjoom'. Cwitsjoom tjacal'ue patrom'ñeeⁿ naⁿntjom na nnc'ooquie' ts'iaaⁿ ‘naaⁿ'aⁿ.
2. T'maⁿna ñ'eⁿ naⁿntjom ‘naaⁿ'aⁿ na nnto'ñoomna cwii denario na cwii xuee cha'xjeⁿ cwita'ntjom nn'aⁿ. Jnda̱ chii jñoom joona na waa ntjoom'm.
3. Cha'na ñjeeⁿ na cwitsjoom tjaaⁿ xcwe quii' tsjoom, jo' jo' ljeiiⁿ nt'omcheⁿ nn'aⁿ na cwe' mandi'.
4. Tsoom nda̱a̱na: “Cwa catsa'yo' na waa ntjom ‘naⁿya na nl'a'yo' ts'iaaⁿ. Ja nntioml'uaya ‘o cha'xjeⁿ na matsona'.” Mana ty'e naⁿ'ñeeⁿ.
5. Cha'na quiajmeiⁿ' matjannda' patrom'ñeeⁿ quii' tsjoom. Ljeiiⁿ nt'omcheⁿ naⁿntjom. Ndo' majo'ti s'aaⁿ cha'na ndyee na matmaaⁿ.
6. Manncuee' na ‘om na matmaaⁿ, tjannaaⁿ'aⁿ quii' tsjoom. Mañoomcheⁿ na ljeiiⁿ na cwe' m'aⁿcheⁿ. Tsoom nda̱a̱na: “¿Chiuu na meiiⁿchaa' xuee ñjaaⁿ m'aⁿ'yo' na tjaa ts'iaaⁿ cwil'a'yo'?”
7. Jluena nnoom: “Mayuu', ee tjaa ‘ñeeⁿ cotsa̱'ntjom jâ.” Tsoom nda̱a̱na: “Cwa catsa'yo', nl'a'yo' ts'iaaⁿ ‘naⁿya na waa ntjoomya. Ja nntioml'uaya ‘o cha'xjeⁿ na matsona'.” Ndo' mati ty'e naⁿ'ñeeⁿ.
8. Quia na jnda̱ tmaaⁿncue tso patrom nnom moso tquiee ‘naaⁿ'aⁿ: “Cwaⁿ' naⁿntjomm'aⁿ' ndo' catiom'l'ua' joona. Cato̱'jndyee' ñequio joo nn'aⁿ na ty'equie' na macanda̱. Tcuu cjaana' hasta nncuee'cañoomna' nn'aⁿ na ty'equie'jndyee.”
9. Quia jo' tquiontyjaa' nn'aⁿ na ty'equie' ts'iaaⁿ cha'na ‘om na matmaaⁿ. Ticwii cwii joona to'ñoomna cwii denario cha'xjeⁿ na nncwantjom ts'aⁿ na cwii xuee.
10. Ndo' quia tuee'cañoomna' nn'aⁿ na ty'equie'jndyee ts'iaaⁿ, jla'tiuuna na joona jndyeti nnta'ntjomna. Sa̱a̱ mati ticwiindye joona to'ñoomna cwii denario.
11. Jnda̱ na to'ñoomna s'om'ñeeⁿ to̱'na na tyola'ncjoo'ndyena nacjoo' patrom ‘naaⁿna.
12. Jluena: “Joo naⁿm'aⁿ' na ty'equie'na ts'iaaⁿ na macanda̱, ñecwii hora l'ana ts'iaaⁿ, sa̱a̱ ‘u ñe'cwii xjeⁿ mache' ñ'eⁿndye joona cha'xjeⁿ ñ'eⁿndyô̱ jâ. Ndo' jâ tyolajnda̱a̱yâ meiiⁿchaa' xuee, tyolaquii n'o̱o̱ⁿyâ meiiⁿ jeeⁿ jmeiⁿ' nquiuuyâ.”
13. T'o̱ patrom nnom cwii joo naⁿ'ñeeⁿ, tsoom: “‘U re, tjaa'naⁿ na seitjo̱o̱ndyo̱ njom'. ¿Aa nchii t'maaⁿya ñ'eⁿndyu' na cwii denario nncwantjom' cha'xjeⁿ quita'ntjom nn'aⁿ?
14. Co'ñom' s'om ‘naⁿ', cja'to' wa'. Nnco̱ ntyjii xeⁿ ljo'yu nntioml'uaya ‘u ñequio cwiicheⁿ tsaⁿm'aaⁿ' na teinioom' tjaquiee' ts'iaaⁿ.
15. ¿Aa ticatseitiuu' na wanaaⁿ na nnts'aa cha'xjeⁿ na l'ue ts'o̱o̱ⁿ ñequio s'om ‘naⁿya? ¿Aa matsei'candya' ts'om' s'om na ja titseintycwi'a?”
16. Jo' chii luaa ñe'ca'mo̱ⁿ ñ'oom tjañoom'waa'. Nn'aⁿ na ticala'tiuu na t'maⁿ cwiluiindye ljo'yu nntseit'maaⁿ'ñe Ty'o̱o̱ts'om joona cha'xjeⁿ matseit'maaⁿ'ñê nt'omcheⁿ. Ndo' nn'aⁿ na cwila'tiuu nquiee na t'maⁿ cwiluiindye, quia nleitquioo' na ljo'yu la'xmaⁿna jo nnom Ty'o̱o̱ts'om ñequio meiⁿnquia nn'aⁿ. Matseicandiinnda' Jesús na nncueeⁿ'eⁿ
17. Yocheⁿ na njom Jesús nato na wjaⁿ Jerusalén, tjachom jâ na canchoo'wendyô̱ cwii ntyja na ñencjo̱o̱yâ. Tsoom nda̱a̱yâ:
18. —Queⁿ'yo' cwenta, je' tsawaaya Jerusalén. Ndo' ja na cwiluiindyo̱ ts'aⁿ na jnaⁿ cañoom'luee, jo' jo' nñequiaa ts'aⁿ cwenta ja luee ntyee na cwiluiitquiendye ñequio nn'aⁿ na cwit'mo̱o̱ⁿ ljeii na tqueⁿ Moisés. Naⁿ'ñeeⁿ nl'ana na nnt'uiityeⁿna' ja na nnc'io̱.
19. Nñe'quiana cwenta ja luee nn'aⁿ na nchii judíos na nla'jnaaⁿ' naⁿ'ñeeⁿ ja. Nntjaa'na ja ndo' nnty'ioomna ja ts'oom'naaⁿ na nnc'io̱, sa̱a̱ xuee jnda̱ ndyee nncwando̱'xco̱. Tsondyee Jacobo ñ'eⁿ Juan tcaaⁿ cwii naya
20. Scuu' Zebedeo ñequio ntseinaaⁿ Jacobo ñ'eⁿ Juan tquiola'candyoo'ndyena na m'aaⁿ Jesús. Tcoom'm xtyeeⁿ jo nnom na tcaaⁿ cwii naya.
21. Tso Jesús nnoom:—¿Ljo' l'ue ts'om'?T'o̱ yuscu'ñeeⁿ nnom, tsoom:—Quia na nncue'ntyjo̱ na nntsa̱'ntjom', quiaa' ñ'om' na we ntseindaaya nmeiiⁿ nluiit'maⁿndyena ñ'eⁿndyu'. Cwii joona nnc'oom ts'o̱' ntyjaya ndo' cwiicheⁿ nnc'oom ts'o̱' ntyjatymaaⁿ'.
22. Sa̱a̱ t'o̱ Jesús nda̱a̱ we naⁿ'ñeeⁿ, tsoom:—'O ticala'no̱ⁿ'yo' ljo' cwitaⁿ'yo'. Juu nawi' na nncwino̱o̱ⁿ, ¿aa nnda̱a̱ nnaⁿndyo'? Ndo' ¿aa nnda̱a̱ nljoya n'om'yo' na nncwje'yo' cha'xjeⁿ na jnda̱ ljoya ts'o̱o̱ⁿ na nnc'io̱?T'o̱o̱na nnoom, jluena:—Nnda̱a̱.
23. Jom tsoom nda̱a̱na:—Mayuu' juu nawi' na nncwino̱o̱ⁿya, nncwinom'yo'. Ndo' cha'xjeⁿ na cwiljoya ts'o̱o̱ⁿ na nnc'io̱ mati macaⁿna' na caljoya n'om'yo' na nla'cwjee nn'aⁿ ‘o. Sa̱a̱ titseixmaⁿya na nntseijndaa'ndyo̱ ‘ñeeⁿ juu nncwacatyeeⁿ ntyjaa'a ntyjaya oo ntyjatymaaⁿ'. Nquii Tsotya̱ya nñequiaaⁿ naya'ñeeⁿ nda̱a̱ joo nn'aⁿ na jnda̱ seijndaa'ñê na nnto'ñoom juuna'.
24. Ndo' cwiicheⁿ quindyô̱ jâ na cwila'jomndyô̱ ñ'eⁿ Jesús, quia na jndya̱a̱yâ ñ'oom na tcaⁿ yuscu'ñeeⁿ, jeeⁿ tyola'wja̱a̱yâ nacjoo we nn'aaⁿyâ naⁿ'ñeeⁿ.
25. Ndo' naljo', tqueeⁿ' Jesús cha'tsondyô̱ na m'aaⁿ. Tsoom nda̱a̱yâ:—'O manquiu'yo' na nquiee nn'aⁿ na cwiluiitquiendye cwii cwii ndyuaa cwila's'andyena nda̱a̱ nn'aⁿ na cwitsa̱'ntjomna. Ndo' nn'aⁿ na cwiluiit'maⁿndye cwiqueⁿna xjeⁿ nn'aⁿ na m'aⁿ nacje ‘naaⁿna.
26. Sa̱a̱ quii'ntaaⁿ ‘o ticatsona' na luaa' nl'a'yo'. Ee meiⁿcwi'ñeeⁿcheⁿ ‘o na ntyjaa' ts'om na nnc'oom na t'maⁿñe naquii' ntaaⁿ'yo', tsaⁿ'ñeeⁿ matsona' na catseixmaaⁿ ts'aⁿ na mandi'ntjom nda̱a̱ nc'iaa'.
27. Ndo' ‘ñeeⁿ cwiindyo' ‘o na maqueⁿ ts'om na nlco'nnomna' juu jo nda̱a̱'yo', tsaⁿ'ñeeⁿ matsona' na c'oom cha'cwijom moso ‘naⁿ'yo'.
28. Maluaa' na jndyo̱o̱ ja na cwiluiindyo̱ ts'aⁿ na jnaⁿ cañoom'luee. Jndyo̱o̱ na nndi'ntjo̱ⁿya nda̱a̱ nn'aⁿ nchii na nndye'ntjom nn'aⁿ no̱o̱ⁿ. Ndo' jndyo̱o̱ na nñequiaandyo̱ na c'io̱ na nntio̱o̱ⁿya jnaaⁿ nn'aⁿ na jndyendye, cha nndyaandyena na nnt'uii jnaaⁿna joona. Sein'maⁿ Jesús we tsaⁿnchjaaⁿ'
29. Quia na saacaluii'â naquii' tsjoom Jericó, tquiontyjo̱ cwii tmaaⁿ' nn'aⁿ naxeⁿ' Jesús.
30. Jo' jo' ‘ndyoo nato meindyuaandye we naⁿnchjaaⁿ. Quia na jndyena ñ'oom na juu Jesús mawinoom jo' jo', jla'xuaana, jluena:—'U Ta, na cwiluiindyu' jndacantyjo David, c'oom' na wi' ts'om' ñ'eⁿndyô̱ jâ.
31. Sa̱a̱ nn'aⁿ na m'aⁿ jo' jo' jla'tia'na naⁿnchjaaⁿ'ñeeⁿ. Ñe'cala'cheⁿna naⁿ'ñeeⁿ, sa̱a̱ yacheⁿ jndeii tyola'xuaa, jlue:—'U Ta, na cwiluiindyu' jndacantyjo David, c'oom' na wi' ts'om' ñ'eⁿndyô̱ jâ.
32. Tjameintyjee' Jesús, t'maaⁿ naⁿ'ñeeⁿ. Tsoom nda̱a̱na:—¿Ljo' l'ue n'om'yo' na nnts'aaya ‘o?
33. T'o̱o̱ naⁿnchjaaⁿ'ñeeⁿ nnoom, jluena:—Jeeⁿ ‘u ta, toom cwe' nnda̱a̱ nnty'iaayâ.
34. Quia jo' Jesús ty'oom na wi' ts'oom joona. Tyeⁿnquioom'm lua'nda̱a̱na. Mañoom' teitquioona. Ty'entyjo̱na naxeeⁿ'eⁿ.
| 
