1. Tue'ntyjo̱ xuee na teitquioo'ñe Juan, to̱o̱ⁿ'o̱ⁿ na tyotseits'oomñê nn'aⁿ. Tyoñequiaaⁿ ñ'oom nda̱a̱na ts'o̱ndaa Judea jo ndo' yuu tjaa nn'aⁿ c'om.
2. Tyotsoom:—Calcwe' n'om'yo' ee juu na matsa̱'ntjom Ty'o̱o̱ts'om mandyocwje'cañoomna' ‘o.
3. Cantyja ‘naaⁿ' Juan'ñeeⁿ na tyotseineiⁿ profeta Isaías, tsoom: M'aaⁿ cwii ts'aⁿ jo ndo' yuu tjaa nn'aⁿ c'oom na jndeii matseineiⁿ nda̱a̱na. Matso tsaⁿ'ñeeⁿ: “Calajndaa'ndyo' naquii' n'om'yo' cha'cwijom cwii nato na juu jo' nndyocwje'cañoom nquii na cwiluiiñe na nntsa̱'ntjom ‘o. Cata'ndyo'xcwe'yo' cha'cwijom na cwilayo̱'yo' nato na nñoom.”
4. Juan'ñeeⁿ tyocweⁿ liaa na tuii ñequio soo' camello. Tyochu'tyeⁿ tsiaⁿ'aⁿ ñequio cwii tjaⁿ. Ndo' nantquie na tyocwaaⁿ'aⁿ calcaa ntyue' ñequio tsiom' jnda̱a̱.
5. Ndo' jndye nn'aⁿ tsjoom Jerusalén ñequio nn'aⁿ na m'aⁿ cha'waa ts'o̱ndaa Judea ndo' mati nn'aⁿ na m'aⁿ cantsu ‘ndyoo jndaa Jordán, tyo'oona na m'aaⁿ.
6. Seits'oomñê joona ts'om jndaa Jordán jnda̱ na lcwe' n'omna jnaaⁿna.
7. Sa̱a̱ quia na nty'iaaⁿ'aⁿ na jndye nn'aⁿ fariseos ñequio saduceos tquiona na m'aaⁿ na ñe'cwits'oomndyena, quia jo' tsoom nda̱a̱na:—'O cwiluiindyo' cha'na canduu na cwilei'nom'yo' na nquiaayo' na nnt'uiiwi'na' jooyo'. Ee ‘o cwinquio'yo' na m'aaⁿya na nquia'yo' na nntseiw'ii Ty'o̱o̱ts'om ‘o. ¿'Ñeeⁿ t'mo̱ⁿ nda̱a̱'yo' na waa na nnda̱a̱ nlui'n'maaⁿndyo' nawi' na quia nndyo?
8. Ca'ndye'yo' na tis'a ndo' cal'a'yo' yuu na ya, quia jo' m'mo̱ⁿna' na mayuu'cheⁿ cwilcwe' n'om'yo'.
9. Meiⁿ ticalas'andyo' cheⁿncjo'yo' naquii' n'om'yo' na nndu'yo': “Jaa tjaa na teincuu' nacjooya ee Abraham cwiluiiñê weloo welooya.” Candye'yo' nntsjo̱o̱, meiiⁿ cwe' ljo̱'meiiⁿ nnda̱a̱ nntseicwaqueⁿ Ty'o̱o̱ts'om na nluiindyena' tsjaaⁿ Abraham na jndyowicantyjoo', quia jo' n'ndiina' ‘o.
10. ‘O matseijomna' cha'cwijom n'oom na tis'a ta̱ cwil'a. Ndo' manquiu'yo' n'oom na tical'a ta̱ naya, maxjeⁿ nnt'uana'. Ndo' xeⁿ jnda̱ t'ua n'oom'ñeeⁿ nntioom nn'aⁿ joona' quii' chom. Maluaa' matseijomna' nnts'aa Ty'o̱o̱ts'om ñ'eⁿndyo' ‘o xeⁿ tical'a'yo' yuu na ya.
11. Ja mayuu' matseits'o̱o̱ⁿndyo̱ ‘o ñequio ndaatioo ee na cwilcwe' n'om'yo'. Sa̱a̱ mandyontyjo̱ nqueⁿ na nntseits'oomñê ‘o ñequio Espíritu Santo naquii' n'om'yo' ndo' ñequio chom. Nqueⁿ t'maⁿti tseixmaaⁿ, nchiiti ja. Meiⁿ ticatseixmaⁿya na cwe' ja nnt'uiya lcoom'm na nñequiaya joona' na nñjoom.
12. Jnda̱ jaawindyoo' na nntu'xeⁿndyo' ee laxmaⁿ'yo' cha'cwijom lqueeⁿ na ndicwaⁿ cwajndii. Luaa ts'iaaⁿ cantyja ‘naaⁿ' lqueeⁿ. Matseicueeñe ts'aⁿ lqueeⁿ hasta na nlju'ñ'eⁿ. Jnda̱ chii nntseiweeⁿ lqueeⁿ na ya naquii' w'aa. Sa̱a̱ nchuaa'na' njñoom chom. Maluaa' matseijomna' na nnts'aa Ty'o̱o̱ts'om. Nn'aⁿ na ya cwil'a maco'ñoom joona sa̱a̱ nn'aⁿ na tis'a cwil'a, nntseicoom joona ñequio chom na tijoom canduu'. Teits'oomñe Jesús
13. Quia jo' jnaⁿ Jesús ts'o̱ndaa Galilea, tjaaⁿ jndaa Jordán na nntseits'oomñe Juan jom.
14. Sa̱a̱ tiñe'nquiaañe Juan na caluii na ljo'. Tsoom:—Cwa jnda̱ tyje'cañoom' ja na catseits'oomndyo̱ ‘u meiiⁿ na matsona' na ‘u catseits'oomndyu' ja.
15. T'o̱ Jesús, matsoom nnom:—Je' quiaandyu'to' na caluii na ljo'. Ee macaⁿna' na laa'ti' calacanda̱a̱'ndyo̱ cha'tso cantyja na maty'iomyana'.Ndo' tancuee' Juan.
16. Jnda̱ na teits'oomñe Jesús, jlueeⁿ'eⁿ quii' ndaa. Ndo' seicanaaⁿñena' tsjo̱'luee. Nty'iaaⁿ'aⁿ Espíritu na cwiluiiñe Ty'o̱o̱ts'om ndyocue cha'cwijom catu'. Jndyocaljo nacjoom'm.
17. Ndo' nandye cañoom'luee teic'uaa na seineiⁿ Ty'o̱o̱ts'om. Tsoom:—Luaañe Jndaaya na jeeⁿ candya' ts'o̱o̱ⁿ. Cantyja ‘naaⁿ' jom mañequiaana' na neiⁿya.
| 
