1. Jnda̱ jo' tjañ'oom Espíritu Santo Jesús jo ndo' yuu tjaa nn'aⁿ c'om. Jo' jo' tyoqueⁿñe tsaⁿjndii na nnts'aa xjeⁿ jom.
2. Tyom'aaⁿ wen'aaⁿ xuee ndo' wen'aaⁿ tsjom tîcwaaⁿ'aⁿ, jnda̱ chii jndyo na ñejnoom'm.
3. Ndo' tyje'cañoom tsaⁿjndii na mach'ee xjeⁿ nn'aⁿ. Tso nnoom:—Xeⁿ mayuu'cheⁿ cwiluiindyu' Jnda Ty'o̱o̱ts'om, cwa catsa̱'ntjom' ljo̱'meiiⁿ na catseicwaqueⁿna' tyoo' joona' na nlcwa'.
4. T'o̱ Jesús:—Ja xocats'aa na ljo' ee waa ljeii ‘naaⁿ' Ty'o̱o̱ts'om na matsona': “Nchii cwe' cantyja ‘naaⁿ' tyoo' na wando' ts'aⁿ, sa̱a̱ cantyja ‘naaⁿ cha'tso ñ'oom na mañequiaa Ty'o̱o̱ts'om.”
5. Jnda̱ jo' tjañ'oom tsaⁿjndii Jesús Jerusalén tsjoom na lju' cwentaa' Ty'o̱o̱ts'om. Tqueeⁿ juu xqueⁿ tsiu' wats'om t'maⁿ.
6. Tsoom nnom Jesús:—Xeⁿ mayuu'cheⁿ cwiluiindyu' Jnda Ty'o̱o̱ts'om, cwa cju'ndyu' jo nacje. Ee luaa matso ñ'oom ‘naaⁿ'aⁿ: Nquii Ty'o̱o̱ts'om nñequiaaⁿ ‘u luee ángeles cwentaaⁿ'aⁿ na cal'ana cwenta ‘u. Ndo' nntyjee' lueena ‘u cha tincjaacañjom ljo̱' nc'e'.
7. Quia jo' t'o̱ Jesús nnom, tsoom:—Ja tijoom cats'aa cha'na matsu' luaa' ee mati waa cwiicheⁿ ljeii ‘naaⁿ' Ty'o̱o̱ts'om na matsona': “Tintsa' xjeⁿ Ta Ty'o̱o̱ts'om cwenta'.”
8. Jnda̱ chii tjañ'oom tsaⁿjndii Jesús cwii sjo̱ nandye. Jo' jo' t'mo̱o̱ⁿ nnom cha'tsoti n'iaaⁿ t'maⁿ na m'aⁿ nn'aⁿ tsjoomnancue, ñequio na t'maⁿ matseit'maaⁿ'ñena' joo.
9. Ndo' tsoom nnom:—Cha'tso nmeiⁿ' nntio̱o̱ l'o̱' xeⁿ nlco' xtye' na nntseit'maaⁿ'ndyu' ja.
10. Ndo' t'o̱ Jesús nnoom, tso:—Quindyo̱o̱' nacañomya ‘u Satanás, ee ñ'oom' Ty'o̱o̱ts'om na teiljeii matsona': “Catseit'maaⁿ'ndyu' nquii Ta Ty'o̱o̱ts'om cwenta', ndo' macanda̱ nnom nqueⁿ candi'ntjom'.”
11. Quia jo' ‘ndii tsaⁿjndii jom. Ndo' tquie'cañom ángeles, tyondye'ntjomna nnoom. Mato̱' Jesús ts'iaaⁿ ‘naaⁿ'aⁿ ts'o̱ndaa Galilea
12. Quia jndii Jesús na jnda̱ mam'aaⁿ Juan pra̱so, tjalcweeⁿ'eⁿ ts'o̱ndaa Galilea.
13. Tjaaⁿ tsjom'm Nazaret, sa̱a̱ taticaljoo'ñê jo' jo'. Tjaaⁿ na nljoo'ñê tsjoom Capernaum na m'aaⁿna' ‘ndyoo ndaaluee. Jo' jo' ndyuaa cwentaa nn'aⁿ tmaaⁿ' Zabulón ñequio Neftalí.
14. Ndo' joo ndyuaa'ñeeⁿ tyom'aaⁿ cha nntseicanda̱a̱'ñena' ñ'oom na seiljeii profeta Isaías, matsona':
15. Nntseixueeñena' jo nda̱a̱ nn'aⁿ na m'aⁿ ndyuaa cwentaa' Zabulón ndo' jo nda̱a̱ nn'aⁿ na m'aⁿ ndyuaa cwentaa' Neftalí. Nntseixueeñena' jo nda̱a̱ nn'aⁿ na m'aⁿ ndyuaa ‘ndyoo ndaaluee, ñequio ndyuaa xndyaa' jndaa Jordán, ñequio ts'o̱ndaa Galilea yuu na m'aⁿ nn'aⁿ na nchii nn'aⁿ judíos.
16. Naⁿ'ñeeⁿ m'aⁿna nacje ‘naaⁿ' najaaⁿñe, sa̱a̱ je' je' jnda̱ teitquioo' cwii na jeeⁿ caxueeñe jo nda̱a̱na. Ndo' mati m'aⁿna na manchjena' joona na wi' cwitjoomna, sa̱a̱ je' jnda̱ seicaxueeñena' jo nda̱a̱na.
17. Xjeⁿ'ñeeⁿ jnaⁿna' na to̱' Jesús na tyoñequiaaⁿ ñ'oom. Tsoom:—Calcwe' n'om'yo', ee juu na matsa̱'ntjom Ty'o̱o̱ts'om mandyocwje'cañoomna' ‘o. Ma'maⁿ Jesús ñequiee nn'aⁿ na cwitjeii' calcaa
18. Xjeⁿ na mawinom Jesús ‘ndyoo ndaaluee Galilea, ljeiiⁿ we nn'aⁿ na ñenquii ts'aⁿ ntseinda, Simón, tsaⁿ na jndyu Pedro ñequio Andrés tyjee tsaⁿ'ñeeⁿ. Cwituee'na tsqui' ‘naaⁿna ts'om ndaaluee ee nn'aⁿ cwitjeii' calcaa joona.
19. Tso Jesús nda̱a̱na:—Quiolajomndyo' ñ'eⁿndyo̱ ndo' ja nnts'aa na nla'tjom'yo' nn'aⁿ tachii cwe' calcaa.
20. Joona mañoom' ‘ndyena nlqui' ‘naaⁿna, ty'ela'jomndyena ñ'eⁿñê.
21. Ndo' na tja tjatyeeⁿ ljeiiⁿ cwiicheⁿ we ts'aⁿ, ntseinda Zebedeo naⁿ'ñeeⁿ, Jacobo ñ'eⁿ tyjeeⁿ Juan. Ñjomndyena ts'om w'aandaa. Cwila'yo̱na nlqui' ‘naaⁿna ñequio tsotyena Zebedeo. Quia jo' t'maⁿ Jesús joona.
22. Ndo' mañoom' ‘ndyena w'aandaa ñ'eⁿ tsotyena, ty'elajomndyena ñ'eⁿñê. Jesús ma'mo̱o̱ⁿ nda̱a̱ jndye nn'aⁿ
23. Tyomanom Jesús cha'waa ts'o̱ndaa Galilea. Tyo'mo̱o̱ⁿ nda̱a̱ nn'aⁿ naquii' lan'om ‘naaⁿna. Tyoñequiaaⁿ ñ'oom naya cantyja na matsa̱'ntjom Ty'o̱o̱ts'om. Ndo' tyotsein'maaⁿ nn'aⁿ cha'tso nnom ntycu na wiina.
24. Ndo' t'om ñ'oom cantyja ‘naaⁿ'aⁿ cha'waa ndyuaa Siria. Naⁿ'ñeeⁿ tquiochona cha'tso nn'aⁿwii na m'aaⁿ na cwitjoom jndye nnom ntycu ñequio na maquiina' joo. Mati ñ'eeⁿ nn'aⁿ na cwilei'cho jndyetia joo, ñ'eeⁿ nn'aⁿ na maleiñ'oom tycuwee', ndo' ñ'eeⁿ nn'aⁿ na cwitjoom tycutqueeⁿ. Sein'maaⁿ joona.
25. Jo' chii t'maⁿ ntmaaⁿ' nn'aⁿ ty'entyjo̱ naxeeⁿ'eⁿ. Jnaⁿ naⁿ'ñeeⁿ ts'o̱ndaa Galilea, ñ'eⁿ nn'aⁿ ndyuaa njoom Decápolis, ñ'eⁿ tsjoom Jerusalén, ñ'eⁿ ts'o̱ndaa Judea, ndo' xndyaa' jndaa Jordán.
| 
