1. Quia jo' teitquioo' cwii ‘naaⁿ t'maⁿ tsjo̱'luee na ma'mo̱ⁿna' chiuu cwinluii. Nty'iaya cwii yuscu cweⁿ ñe'quioom' cha'cwijom liaⁿ'aⁿ. Meintyjeeⁿ'eⁿ nacjoo' chi' ndo' ñjom cwii corona xqueeⁿ na chuu' canchoo'we cancjuu.
2. Ndo' jndeiiñê. Tyotseixuaⁿ na maquiina' jom, ee manntseincueⁿ.
3. Jnda̱ chii teitquioo'ti cwiicheⁿ ‘naaⁿ tsjo̱'luee. Nty'iaya cwii catsoomjndii na t'maaⁿñe ndo' weeñe cha'na chom. Juuyo' niom ntquiee' xqueⁿyo', ndo' nqui ndei'jndyee'yo'. Ndo' cha'tso na ntquiee' xqueⁿyo', jo' ñjom cwii cwii corona.
4. Quia tmeiiⁿ'ñeyo' ts'aaⁿyo' manndyoo' cha'na xcwe cancjuu na ntyja tsjo̱'luee tei'caljoona', tquiaandye cancjuu'ñeeⁿ nomtyuaa. Ndo' juu catsoomjndii'ñeeⁿ tjameintyjee'yo' jo nnom yuscu'ñeeⁿ na mawaa xjeⁿ na nntseincuii cha mantyjacheⁿ nlquiiyo' jnda xeⁿ jnda̱ tuiiñe.
5. Quia jo' seincuii yuscu'ñeeⁿ yu'ndaa na tsaⁿs'a. Jnda̱ tqueⁿ Ty'o̱o̱ts'om yu'ndaa'ñeeⁿ na nluiit'maⁿñe, ndo' jndeii ñ'oom na nntsa̱'ntjom cha'tso nn'aⁿ njoomnancue. Ndo' tjei'na' juu quii'l'o̱ yuscu'ñeeⁿ. Tjañ'oom Ty'o̱o̱ts'om juu yuu waa tio ‘naaⁿ'aⁿ.
6. Ndo' juu yuscu'ñeeⁿ tjaleinoom cwii joo yuu na nncwañoom'na' juu yuu na jnda̱ seijndaa'ñe Ty'o̱o̱ts'om na nljoo'ñê. Jo' jo' m'aⁿ nn'aⁿ na nnteix'eena jom cwii meiⁿ waljoo' we siaⁿnto waljoo' ndyeen'aaⁿ xuee.
7. Quia jo' jnaⁿ tia' cañoom'luee. Juu Miguel ñequio ángeles ‘naaⁿ'aⁿ tyol'ana tia' nacjoo' catsoomjndii. Ndo' catsoomjndii'ñeeⁿ ñequio naⁿjndii ‘naaⁿ'aⁿ tyola'jnda̱na, tyol'ana tia' ñ'eⁿ joo ángeles'ñeeⁿ.
8. Sa̱a̱ tîcanajnda̱na ndo' tacwanaaⁿ na nljoo'ndyena cañoom'luee.
9. Jo' chii tjeii'na jom. Jla'cwatyu'na jom cañoom'luee, tiooñê tsjoomnancuecheⁿ. Mati jla'quiaana ángeles tia ñ'eⁿñê. Ee cantyjati na jnaⁿjndyeena' matseicajndyuna' jom catsuu tquiee, tsaⁿjndii ndo' Satanás. Majom na manquiu'nn'aaⁿ cha'tso nn'aⁿ tsjoomnancue.
10. Quia jo' jndiiya na teic'uaa cwii jndyee jndeii cañoom'luee. Matsona':—Je' je' yuu', juu na macwji'n'maaⁿñe Ty'o̱o̱ts'om nn'aⁿ, jnda̱ mamatseicanda̱a̱'ñena', ndo' ma'mo̱o̱ⁿ juu najndeii na matseixmaaⁿ. Jnda̱ tue'ntyjo̱ na macanda̱ jom matsa̱'ntjoom ndo' mati cwiluiitquieñe Jnaaⁿ Cristo. Ee juu naxuee ndo' natsjom mañequiaa jnaaⁿ nn'aaⁿya jo nnom Ty'o̱o̱'ts'oomya, jnda̱ jla'cwatyu'na juu. Manquiiti na tyoñequiaa jnaaⁿ nn'aaⁿya.
11. Sa̱a̱ joona jnda̱ jnaⁿndyena ñ'eⁿ tsaⁿjndii'ñeeⁿ nc'e nioom' Catsmaⁿ ndo' nc'e ñ'oom na tjei'yuu'ndyena cantyja ‘naaⁿ'aⁿ nda̱a̱ nn'aⁿ. Ee joona tyom'aⁿna na ticajnda nquiuna meiiⁿ cwjena cantyja na cwitjei'yuu'ndyena.
12. Nc'e na luaa' waa, c'om'yo' na neiⁿ'yo' cha'tsondyo' na m'aⁿ'yo' cañoom'luee. Sa̱a̱ jeeⁿ nty'iaa'ndyo' ‘o nn'aⁿ na m'aⁿ'yo' tsjoomnancue ñequio ‘o na m'aⁿ'yo' ndaaluee, ee juu tsaⁿjndii jnda̱ tiooñê na m'aⁿ'yo' na jeeⁿcheⁿ ndya' w'eeⁿ. Ee ntyjeeⁿ na jnda̱ teitsio̱o̱' m'aaⁿna' cantyja ‘naaⁿ'aⁿ.
13. Ndo' quia na ljeii catsoomjndii'ñeeⁿ na jnda̱ tuee'na jom nnom tsjoomnancue quia jo' tyontyjo̱o̱ⁿ yuscu na seincuii tyochjoo na tsaⁿs'a.
14. Sa̱a̱ tquiaa Ty'o̱o̱ts'om we ntsquii cachi t'maaⁿ nnom yuscu'ñeeⁿ cha nnda̱a̱ nncuaaⁿ na nleinoom catsuujndii'ñeeⁿ. Jo' chii tjaaⁿ yuu na nncwañoom'na' jom yuu na taxonda̱a̱ nnts'aa catsuu tquiee'ñeeⁿ nata̱' jom. Jo' jo' nntei'x'ee Ty'o̱o̱ts'om jom ndyee chu waljoo' xcwe.
15. Ndo' juu catsuu tquiee'ñeeⁿ ñequio ‘ñom tyojoom'm ndaa jo naxeⁿ' yuscu'ñeeⁿ. S'aana' cha'jom cwii jndaa, cha nncjaawjaañe yuscu'ñeeⁿ.
16. Sa̱a̱ teijndeii tyuaa yuscu'ñeeⁿ ee seintquiooñena' ‘ndyoona' ndo' t'uuna' jndaa'ñeeⁿ na tju' catsoomjndii ñequio ‘ñom.
17. Jo' chii jeeⁿ t'maⁿ seiw'ii catsoomjndii yuscu'ñeeⁿ. Tjaaⁿ, tjacats'aaⁿ tia' nacjoo cha'tso nn'aⁿ tsjaaⁿ yuscu'ñeeⁿ na cwila'canda̱ ñ'oom na matsa̱'ntjom Ty'o̱o̱ts'om ndo' na tica'ndye na cwitjei'yuu'ndye cantyja ‘naaⁿ' Jesucristo.
| 
