1. Quia jo' nty'iano̱o̱ⁿ tsjo̱'luee xco ñequio tsjoomnancue xco. Ee jnda̱ ntycwii cantyja ‘naaⁿ' tsjo̱'luee najndyee ñequio tsjoomnancue najndyee. Ndo' tatjaa'naⁿ ndaaluee cwii cuaa.
2. Ndo' nty'iaya tsjoom Jerusalén xco, tsjoom na lju' cwiluiiñe. Jnaⁿna' cañoom'luee na m'aaⁿ Ty'o̱o̱ts'om, tycwi'na' cha'cwijom cwii yuscundyua na manncoco ñ'eⁿ saa'.
3. Quia jo' jndiiya na jndeii teic'uaa matseineiⁿ ángel cañoom'luee na m'aaⁿ Ty'o̱o̱ts'om, matso:—Je' mam'aaⁿ Ty'o̱o̱ts'om ñ'eⁿ nn'aⁿ. Jnda̱ ljoo'ñetyeeⁿ ñ'eⁿndyena ee maqueeⁿ joona na nn'aaⁿ'aⁿ. Nqueⁿ nnc'oomñê ñ'eⁿndyena ndo' nntseixmaaⁿ Ty'o̱o̱ts'om cwentaana.
4. Ticwii cwii ndaanda̱a̱na nncuee'ñê. Taxocwjena jo' jo'. Taxoc'omna na chjoo' n'omna, meiⁿ taxocatyueena, meiⁿ na taxoquiitina' joona. Ee jnda̱ teinom cantyja na ñetjoomna najndyee.
5. Quia jo' nqueⁿ na wacatyeeⁿ tio, tsoom:—Queⁿ' cwenta, mats'aa na caluiixco cha'tso.Mati tsoom no̱o̱ⁿ:—Luaa catseiljei' ee ñ'oommeiiⁿ, ñ'oom na mayuu' joona'. Nnda̱a̱ ntyjaa'tyeⁿ ts'om ts'aⁿ joona'.
6. Ndo' tsoticheⁿ no̱o̱ⁿ:—Jnda̱ jnda̱a̱' cha'tso. Ja m'aaⁿya cwii tjo̱o̱cheⁿ na nluii cha'tso, ndo' maxjeⁿ nnc'o̱o̱ⁿya quia na jnda̱ ntyue cha'tso. Cwiluiindyo̱ x'e cha'tso ndo' mati ntyjii chiuu cwintycwiina'. Juu ts'aⁿ na ñe'c'uu ndaa, ja cwe' yuu nñequia ndaa xo̱' nc'uu, ndaa na mañequiaana' na wando' ts'aⁿ.
7. ‘Ñeeⁿ juu na jnda̱ jnaⁿñe nacjoo' natia, cha'tso nayameiⁿ' nndaa'. Ndo' ja nluiindyo̱ Ty'o̱o̱ts'om cwentaaⁿ'aⁿ ndo' jom nluiiñê jndaaya.
8. Sa̱a̱ nn'aⁿ na cwitjeii'ndye cantyja ‘naⁿya ee na cwicatyuena, ndo' nn'aⁿ na ticala'yu', ñequio nn'aⁿ na jnda̱ jlui' cha'tso nnom natia l'a, nntiomna' joona naquii' ndaalueechom. Ndo' mati nn'aⁿ na cwila'cwjee nc'iaa, nn'aⁿ na cwe' m'aⁿya ñ'eⁿ nc'iaa, nn'aⁿ na calua'ndye, nn'aⁿ na cwila't'maaⁿ'ndye ‘naⁿ na cwe' nn'aⁿ nl'a, ñequio naⁿcantu, maxjeⁿ cha'tsondyena jnda̱ teijndaa' na nntiomna' joona naquii' ndaalueechom na cwico ljo̱' sufra̱. Jo' jo' yuu na jnda̱ we na cwiwje nn'aⁿ. Tsjoom Jerusalén xco
9. Quia jo' tyjee'cañoom cwii na ntquiee'ndye ángeles na ñejleicho ntquiee' waso na too' ntquiee' nnom nawi' na macanda̱. Tqueeⁿ' tsaⁿ'ñeeⁿ ja, tsoom:—Candyo' ndo' m'mo̱o̱ⁿya njom' yuscu na waa ñomcaa', juu nluiiñe scuu' nquii Catsmaⁿ.
10. Quia jo' tco'na' no̱o̱ⁿ na nty'iaya cantyja na t'mo̱ⁿ Espíritu Santo. Tjañ'oom ángel'ñeeⁿ ja yuu waa cwii sjo̱ t'maⁿ na ndye. Jo' jo' t'mo̱ⁿ no̱o̱ⁿ tsjoom t'maⁿ Jerusalén, tsjoom na lju' cwiluiiñena'. Jnaⁿna' cañoom'luee na m'aaⁿ Ty'o̱o̱ts'om, jndyocuena'.
11. Ñ'oomna' nacaxuee na tseixmaⁿ nquii Ty'o̱o̱ts'om. Maco'na' lui' cha'cwijom cwii tsjo̱' na jeeⁿ ndya' jnda, cha'na tsjo̱' jaspe, ndo' xueena' cha'cwijom tsioo.
12. Ndiocheⁿ tsjoom'ñeeⁿ meintyjee' tatiom t'maⁿ na jeeⁿ ndye. Niom canchoo'we ndyueel'a tatiom'ñeeⁿ, ndo' meintyjee' cwii cwii ángel na cwii cwii ‘ndyoots'a. Mati ncuee canchoo'we ntmaaⁿ' ntseinda Israel teiljeii cwii cwiina' nacjoo' cwii cwii ‘ndyoots'a.
13. Ndyee ndyueel'a niom jo ndo' na macalui' ñe'quioom', ndyee ndyuel'a niom jo ndo' na m'aⁿ cancjuu ntquiee', ndo' jo ndo' na m'aaⁿ caxjuu tsoom'naaⁿ, ndo' cantyja na majaacue ñe'quioom'.
14. Tuii tsiaⁿtsjo̱' tatiom tsjoom'ñeeⁿ ñ'eⁿ canchoo'we ljo̱' na jeeⁿ nt'maⁿ. Ndo' canchoo'we apóstoles, teiljeii xuee' cwii cwii joona nacjoo' cwii cwii tsjo̱'ñeeⁿ.
15. Nquii ángel na seineiⁿ ñ'eⁿndyo̱ maleiñ'oom cwii ts'oomxjeⁿ na tuiina' ñ'eⁿ s'om cajaⁿ. Ñ'eⁿ juuna' nncwjeeⁿ'eⁿ xjeⁿ tsjoom'ñeeⁿ, ñequio tatiom na meintyjee' ndiocheⁿ ndo' ñequio ndyueel'a tatiom'ñeeⁿ.
16. Juu tsjoom'ñeeⁿ ljo'yu xjeⁿ nquina', ñe'cwii xjeⁿ cantyja na tmeiⁿna' ndo' cantyja na tcona'. Quia jo' tjeiiⁿ'eⁿ xjeⁿ cwii ntyjaa' tsjoom'ñeeⁿ ñequio ts'oomxjeⁿ ‘naaⁿ'aⁿ. Tue'ntyjo̱ cha'na we meiⁿ waljoo' we siaⁿnto kilómetros na tco juuna'. Ñe'cwii xjeⁿ cantyja na tcona' ñequio na tmeiⁿna' ñequio na ndyena'.
17. Mati tjeiiⁿ'eⁿ xjeⁿ tatiom cwanti na ndyena'. Tue'ntyjo̱ cha'na ndyeen'aaⁿ nchoo' qui nchoo' ñequiee metros na ndyena'. Ndo' ts'oomxjeⁿ na teil'uee'ñe ángel matseijomna' cha'xjeⁿ na tco ts'oomxjeⁿ na cwiwil'uee'ndye nn'aⁿ.
18. Tatiom'ñeeⁿ tuiina' ñ'eⁿ ljo̱' jaspe, ndo' juu tsjoom tuiina' ñ'eⁿ s'omcajaⁿ ya. Maco'na' lui' cha'na mach'ee cwii tsioo na caxuee.
19. Teichjoom tsiaⁿtsjo̱' tatiom tsjoom'ñeeⁿ ñequio cha'tso nnom ljo̱' na jnda. Tsjo̱' t'maⁿ najndyee, tsjo̱' cachuii' na jndyu jaspe, tsjo̱' na jnda̱ we, na jndyu zafiro. Tsjo̱' na jnda̱ ndyee, cachuii' na jndyu ágata. Tsjo̱' na jnda̱ ñequiee, mati cachuii' na jndyu esmeralda.
20. Tsjo̱' t'maⁿ na jnda̱ ‘om, colo wee na caljeii na jndyu ónice. Tsjo̱' na jnda̱ yom, tsjo̱' wee na jndyu cornalina. Tsjo̱' na jnda̱ ntquiee', cajaⁿna' na jndyu crisólito. Tsjo̱' na jnda̱ ñeeⁿ, cachuii'na' cha'na ndaaluee na jndyu berilo. Tsjo̱' na jnda̱ ñjeeⁿ, colo tsco'ndaa na jndyu topacio. Tsjo̱' na jnda̱ nqui, colo wii na jndyu crisoprasa. Tsjo̱' na jnda̱ canchoo'cwii, colo tsa̱ na jndyu jacinto. Ndo' tsjo̱' na jnda̱ canchoo'we, colo catsioo' na jndyu amatista.
21. Canchoo'we ndyueel'a na niom tatiom, tuiina' ñ'eⁿ ta̱' perlas. Cwii cwii ‘ndyoots'a tuiina' ñ'eⁿ cwii ta̱' perla t'maⁿ. Ndo' nataa t'maⁿ tsjoom'ñeeⁿ tuiina' ñ'eⁿ s'omcajaⁿ ya. Maco'na' lui' cha'na mach'ee cwii tsioo na caxuee.
22. Ndo' tjaa'naⁿ wats'om nty'iaya tsjoom'ñeeⁿ, ee nquii Ta Ty'o̱o̱ts'om na tseixmaⁿñ'eeⁿ cha'tso nnom najnda̱, ñequio nquii Catsmaⁿ, joona cwiluiindyena wats'om cwentaa' tsjoom'ñeeⁿ.
23. Ndo' jo' jo' ticaⁿna' ñe'quioom', meiⁿ chi' na nla'xuee. Ee cantyja na caxueeñe Ty'o̱o̱ts'om ñequio juu Catsmaⁿ, jo' naxuee jo' jo'.
24. Nn'aⁿ njoomnancue na jnda̱ jlui'n'maaⁿndye nnc'omna cantyja naxuee tsjoom'ñeeⁿ. Ndo' nn'aⁿ na cwiluiit'maⁿndyeti tsjoomnancue, juu na matseit'maaⁿ'ñena' joona, nnc'oon'omna juuna' tsjoom'ñeeⁿ ndo' nla't'maaⁿ'ndyena nn'aⁿ na m'aⁿ jo' jo'.
25. Tsjoom'ñeeⁿ tjaa'naⁿ natsjom. Jo' chii ticata̱' ndyueel'a tatiom ndiocheⁿ ee ñeⁿnquii'cheⁿ naxuee.
26. Nn'aⁿ njoomnancue nnc'oochona cha'tsoti na ya na la'xmaⁿna ndo' nla't'maaⁿ'ndyena nn'aⁿ na m'aⁿ jo' jo'.
27. Tsjoom'ñeeⁿ tijoom nncjaaquiee' meiⁿnquia na tilju', meiⁿ nn'aⁿ na cwajndii cwil'a, meiⁿ nn'aⁿ na cwila'neiⁿ cantu. Macanda̱ nnc'ooquie' nn'aⁿ na teiljeii ncuee nacjoo' libro cwentaa' juu Catsmaⁿ. Naⁿ'ñeeⁿ ticantycwii na cwita'ndo'na.
| 
