1. Tsoticheⁿ Jesús no̱o̱ⁿ:—Catseiljei'ti' ñ'oommeiiⁿ, catseicwanom' joona' nam'aaⁿ ángel na mach'ee cwenta tmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ na m'aⁿ tsjoom Sardis. Catsu': “Luaa matsjo̱o̱ nnco̱ na matseixmaⁿya ntquiee' Espíritu cwentaa' Ty'o̱o̱ts'om ndo' ntquiee' cancjuu: Tcuu mantyjiiya chiuu waa ts'iaaⁿ ‘naⁿya na cwil'a'yo' na m'aⁿ'yo' ndo' na waa ñ'oom cantyja ‘naⁿ'yo' na jeeⁿ tando' n'om'yo', sa̱a̱ tiyuu'. ‘O cwilaxmaⁿ'yo' cha'cwijom l'oo.
2. ‘O na m'aⁿ'yo' cha'cwijom na cwinda'yo', calcwiiya n'om'yo'. Juu chjoowi' na ndi cwileiñ'om'yo', calajnda̱'yo' na nncjaanajndeiina'. Ee mawaa xjeⁿ na ñe'cantycwii naya'ñeeⁿ naquii' n'om'yo'. Ee maljeiya na tixcwe cwil'a'yo' jo nnom Tsotya̱ya Ty'o̱o̱ts'om.
3. Quia jo' tyeⁿ cjaañjoom' n'om'yo' ñ'oom naya na jnda̱ to'ñoom'yo'. Calawe'yo' joona' ndo' calcwe' n'om'yo'. Ee xeⁿ ticalajndaa'ndyo' na nnc'om'c'eendyo', mats'ia jo' nncua̱caño̱o̱ⁿya ‘o cha'cwijom macwjee'cañoom tsaⁿcanch'ue quia tic'omc'eeñe ts'aⁿ. Meiⁿ xocala'no̱ⁿ'yo' ljo' xjeⁿ nncua̱caño̱o̱ⁿya ‘o.
4. Sa̱a̱ m'aⁿ cwantindyo' ‘o tsjoom Sardis na tyoolacwajndiindyo' lia'yo' ñequio natia. Jo' chii nñequiaya liaa canchii' na nlcwee'yo' ndo' nnc'om'yo' ñ'eⁿndyo̱ ee la'xmaⁿ'yo' na nnda'yo' joona'.
5. ‘Ñeeⁿ joo na jnda̱a̱ jnaⁿndye ñequio natia, nntseicwa̱ya liaa canchii' naⁿ'ñeeⁿ. Meiⁿ tijoom catseicanduu'a ncueena nacjoo' libro na chuuna' ncuee nn'aⁿ na ticantycwii na cwita'ndo'. Ndo' nncwji'yuu'ndyo̱ na cwiluiindyena cwentaya jo nnom Tsotya̱ya ndo' mati jo nda̱a̱ ángeles cwentaaⁿ'aⁿ.
6. ‘Ñeeⁿ ‘o na ñe'candye'yo', candye'ya'yo' ñ'oom na matseineiⁿ Espíritu Santo nda̱a̱ ntmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ.” Ñ'oom na tja tsjoom Filadelfia
7. Tsoticheⁿ Jesús no̱o̱ⁿ:—Catseiljei'ti' ñ'oommeiiⁿ, catseicwanom' joona' nam'aaⁿ ángel na mach'ee cwenta tmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ na m'aⁿ tsjoom Filadelfia. Catsu': “Ja cwiluiindyo̱ na lju' ts'o̱o̱ⁿ ndo' cwiluiindyo̱ ñ'oom na mayuu'. Cha'xjeⁿ David tyowaa najneiⁿ na tyotsa̱'ntjoom cha'waa ndyuaaⁿ'aⁿ, mati ja matseixmaⁿya juu najndeii na matsa̱'ntjom Ty'o̱o̱ts'om. Ee ja tseixmaⁿya na nñequiaya na wanaaⁿ na nncjaaquiee' ts'aⁿ cañoom'luee oo na ticwanaaⁿ. Nnco̱ matseicanaaⁿndyo̱ ndo' tjaa ‘ñeeⁿ juu nnda̱a̱ nntseicu'tyeⁿ. Oo matseicu'tya̱ⁿya ndo' tjaa ‘ñeeⁿ juu nnda̱a̱ nntseicanaaⁿñe. Luaa waa na matsjo̱o̱ nnco̱:
8. Mantyjiiya chiuu waa ts'iaaⁿ ‘naⁿya na cwil'a'yo'. Canty'ia'yo', jnda̱ seicanaaⁿndyo̱ cwii cha'cwijom ‘ndyoots'a jo nda̱a̱'yo' cha nnda̱a̱ nntjei'yuu'ndyo' cantyja ‘naⁿya, ndo' tjaa ‘ñeeⁿ juu nnda̱a̱ nntseicu'. Ee meiiⁿ tit'maⁿ waa na jnda̱'yo', sa̱a̱ cwilacanda̱'yo' ñ'oomya meiⁿ tyootjei'ndyo' cantyja ‘naⁿya.
9. Luaa waa na nnts'aaya. M'aⁿ nn'aⁿ tsjom'yo' na cwiluena na joona na mayuu'cheⁿ judíos na wi' ts'om Ty'o̱o̱ts'om. Sa̱a̱ cantyja na cwil'ana mach'eena' na tiyuu' na ljo'. Ñenquii'cheⁿ cantu cwila'neiⁿna, ee la'xmaⁿna tmaaⁿ' cwentaa' Satanás. Jo' chii queⁿ'yo' cwenta, nnts'aaya na nnc'oontyjaa'na ‘o na nnta'na cantyena jo nda̱a̱'yo'. Ndo' na nnc'oola'no̱ⁿ'na na ja m'aaⁿya na candya' ts'o̱o̱ⁿya ‘o.
10. Nc'e na cwiqueⁿ'yo' cwenta ñ'oom na tsjo̱o̱ na tica'ndyenc'uaa'ndyo' meiⁿchiuucheⁿ na cwitjom'yo', jo' chii mati ja nnts'aa cwenta ‘o juu xjeⁿ quia na nlco'wi'na' cha'tsondye nn'aⁿ na m'aⁿ tsjoomnancue.
11. Queⁿ'yo' cwenta, matyuaa' nncua̱caño̱o̱ⁿya ‘o. Cha'tso naya na tseixmaⁿya na jnda̱ to'ñoom'yo', tila'candyaandyo' joona', cha' tints'aana' na ticanda'yo' cwii corona.
12. ‘Ñeeⁿ juu na cwinaⁿñe ñequio natia, ja nnts'aa na nljoo'ñetyeⁿ nacañoom' Ty'o̱o̱ts'om. Nntseijomna' tsaⁿ'ñeeⁿ cha'cwijom cwii ta ts'oomx'ee wats'om cañoom'luee. Ndo' tijoom cwinncwji'na' juu jo' ee nquii Ty'o̱o̱ts'om cwentaya cwiluiiñê wats'om'ñeeⁿ. Ndo' nntseiljeiya xueⁿ'eⁿ nacjoo' tsaⁿ'ñeeⁿ ñequio xuee' tsjoom ‘naaⁿ'aⁿ, majuu tsjoom Jerusalén xco. Tsjoom'ñeeⁿ nndyocuena' na nnaⁿna' cañoom'luee yuu na m'aaⁿ nqueⁿ na cwiluiiñê cwentaya. Ndo' mati nntseiljeiya cwiicheⁿ xueya na xcona' nacjoo' tsaⁿ'ñeeⁿ.
13. ‘Ñeeⁿ ‘o na ñe'candye'yo', candye'ya'yo' ñ'oom na matseineiⁿ Espíritu Santo nda̱a̱ ntmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ.” Ñ'oom na tja tsjoom Laodicea
14. Tsoticheⁿ Jesús no̱o̱ⁿ:—Catseiljei'ti' ñ'oommeiiⁿ, catseicwanom' joona' nam'aaⁿ ángel na mach'ee cwenta tmaaⁿ' nn'aⁿ cwentaa' Ty'o̱o̱ts'om na m'aⁿ tsjoom Laodicea. Catsu': “Luaa matsjo̱o̱ nnco̱ na cwiluiindyo̱ ñ'oom na mayuu' ndo' ñequii'cheⁿ macwji'yuu'ndyo̱ ñ'oom na canda̱a̱'. Ñ'eⁿndyo̱ ja s'aa Ty'o̱o̱ts'om cha'tso na tuii.
15. Ja mantyjiiya chiuu waa na la'xmaⁿ'yo'. Ticatseijomna' ‘o meiⁿ cha'na ndaatioo teiⁿ, oo meiⁿ cha'na ndaatioo jmeiⁿ'. Toom cwe' m'aⁿ'yo' na queeⁿya n'om'yo' cantyja ‘naⁿya quia jo' nntseijomna' ‘o cha'na ndaatioo jmeiⁿ'. Oo toom cwe' canda̱'ñ'eⁿ na l'o̱'yo' ja quia jo' nntseijomna' ‘o cha'na ndaatioo teiⁿ.
16. Sa̱a̱ nc'e na cwe' cwiljoyato n'om'yo' chiuu waa na m'aⁿ'yo', jo' chii matseijomna' ‘o cha'cwijom ndaa na cwe' tue'ncue, meiⁿ tijmeiⁿ' ndo' meiⁿ titeiⁿ. Na luaa' waa na cwila'xmaⁿ'yo', maxjeⁿ nncwjii'a ‘o cantyja ‘naⁿya cha'xjeⁿ na macwji' ts'aⁿ ndaajnaⁿ' quii' ‘ndyoo.
17. Ee cwindu'yo': Jâ tyandyô̱, jnda̱ teit'aa' ‘naaⁿyâ. Meiⁿ cwii tjaa na cwimatseitjo̱o̱na' jâ. Sa̱a̱ ticaliu'yo' na ‘o la'xmaⁿ'yo' nn'aⁿ na nty'iaa'ndye. La'xmaⁿ'yo' nn'aⁿ na wi' cwitjoom, ndo' nn'aⁿ na jñeeⁿ'ndye. La'xmaⁿ'yo' na nchjaaⁿ'yo' ndo' na ñecantsei'ndyo'.
18. Jo' chii matseijndo̱'a n'om'yo' na cal'uee'ndyo' naya na m'aaⁿya na matseijomna' juuna' cha'na s'om cajaⁿ na cajndati, quia jo' nnc'om'yo' na mayuu'cheⁿ na tyandyo' jo nnom Ty'o̱o̱ts'om. Ndo' cal'ueendyo' liaa canchii' na m'aaⁿya na nlcwee'yo', quia jo' nntseicu'na' na jnaaⁿ'yo' na m'aⁿ'yo' na ñecantsei'ndyo'. Ndo' cal'uee'ndyo' ncheⁿ' nasei na nnc'oocue n'omnda̱a̱'yo' quia jo' nleitquioo'yo' na nla'no̱ⁿ'yo' chiuu waa cantyja na m'aⁿ'yo'.
19. Cha'tso nn'aⁿ na candya' ts'o̱o̱ⁿya, quia cwila'tjo̱o̱ndyena macwaⁿya joona, ndo' matseisei'a joona quia na macaⁿna'. Jo' chii ñequii'cheⁿ c'om'yo' na cjoo' n'om'yo' cantyja ‘naⁿya, ndo' calcwe' n'om'yo'.
20. Queⁿ'yo' cwenta, meintyja̱a̱'a ‘ndyoots'a ndo' macjo̱o̱'a juuna'. Xeⁿ m'aaⁿ ‘ñeeⁿ juu na nndii na macwaⁿya, ndo' nntseicanaaⁿñe ‘ndyoots'a, nncjo̱quia̱'a na nntseijomndyo̱ ñ'eⁿñê. Nlcwaa'a ñ'eⁿñê ndo' mati nlcwaaⁿ'aⁿ ñ'eⁿndyo̱.
21. ‘Ñeeⁿ juu na jnda̱ jnaⁿñe ñequio natia, quia mawa'catya̱ⁿ tio ‘naⁿya, nñequiaya na nncwa'catyeeⁿ na cañomya, cha'xjeⁿ ja jnda̱ jnaⁿndyo̱ ñequio natia ndo' jnda̱ jndyocajmaⁿya nacañoom' Tsotya̱ya tio ‘naaⁿ'aⁿ.
22. ‘Ñeeⁿ ‘o na ñe'candye'yo', candye'ya'yo' ñ'oom na matseineiⁿ Espíritu Santo nda̱a̱ ntmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ.”
| 
