1. Jnda̱ jndii ñ'oommeiⁿ', quia jo' tco'nnda'na' no̱o̱ⁿ na nty'iaya cwii ‘ndyoots'a na wanaaⁿ cañoom'luee. Ndo' jndiinnda'a na seineiⁿ juu na jndiijndya̱a̱ na teic'uaa jndyee' cha'cwijom ntu, tso no̱o̱ⁿ:—Candyo'waa' ñjaaⁿ, ndo' m'mo̱o̱ⁿya njom' chiuu waa na quia wjaaluiiti.
2. Ndo' juu xjeⁿ'ñeeⁿ m'aaⁿya nacje ‘naaⁿ' Espíritu Santo. Quia jo' nty'iaya na meintyjee' cwii tio cañoom'luee, wacatyeeⁿ cwii ts'aⁿ nacjoo' juuna'.
3. Jeeⁿ neiⁿncoo' caxueeñê. Juu jo' matseijomna' cha'cwijom tsjo̱' jaspe ñequio cornalina na jeeⁿ wando' colo ‘naaⁿna'. Tio'ñeeⁿ ndii'na' catsuutsoom'naⁿ' na tseijomna' cha'na tsjo̱' esmeralda na jeeⁿ neiⁿncoo'na'.
4. Ndo' ndiocheⁿ tio'ñeeⁿ meintyjee' nt'omcheⁿ ntquiuu nchoo' ñequiee ntio. Jo' jo' meindyuaandye ntquiuu nchoo' ñequiee nn'aⁿ na cwiluiitquiendye. Cwee'na liaa canchii' ndo' ñjom corona s'om cajaⁿ nqueⁿna.
5. Juu tio'ñeeⁿ na meintyjee' xcwe cwicalui' chom ntsuee ndo' c'uaa cwila'naⁿ'na'. Ndo' jo nnom tio'ñeeⁿ meintyjee' ntquiee' sca catsuu na cwiwixuee chom. Joo chom'ñeeⁿ cwiluiindye ntquiee' Espíritu na cwiluiiñe Ty'o̱o̱ts'om.
6. Ndo' jo nnom tio'ñeeⁿ waa cwii ndaaluee na jeeⁿ caxuee cha'na tsioo.Ndo' ndiocheⁿ tio'ñeeⁿ m'aⁿ ñequiee naⁿ na ta'ndo' na niom n'om nda̱a̱na jo nanqueⁿ'na ndo' jo nda̱a̱na.
7. Juu tsaⁿ na wando' na nty'iajndya̱a̱, matseijomna' jom cha'cwijom liom. Ndo' tsaⁿ na jnda̱ we, matseijomna' jom cha'cwijom quioo'jndyo. Tsaⁿ na jnda̱ ndyee, matseijomna' nnoom cha'na nnom ts'aⁿ. Ndo' tsaⁿ na jnda̱ ñequiee, matseijomna' jom cha'cwijom cachi na mantyja.
8. Ndo' cha'tsondye joo naⁿ'ñeeⁿ na ta'ndo', niom yom yom lquiina. Cha'waandyena ñ'eⁿ lquiina chuu' n'om nda̱a̱na. Naxuee natsjom tic'oomeintyjee'na na cwiluena: Nquii Ta Ty'o̱o̱ts'om matseixmaⁿñ'eeⁿ cha'tso nnom najnda̱. Lju'. Lju'. Lju' cwiluiiñê. Nqueⁿ m'aaⁿ nacjee' na jnaⁿjndyeena'. Maxjeⁿ m'aaⁿ ndo' m'aaⁿ ndo' nncue'ntyjo̱ na nncwjee'cañoom.
9. Joo ñequiee naⁿ'ñeeⁿ na ta'ndo', cwilcwii'na nquii Ty'o̱o̱ts'om na wacatyeeⁿ tio, jom na tjaa yuu cantycwii na wanoom'm. Cwila't'maaⁿ'ndyena jom ndo' cwiñe'quiana na quianl'uaaⁿ'aⁿ.
10. Quia na cwil'ana na ljo', quia jo' cha'tso ntquiuu nchoo' ñequiee naⁿ na cwiluiitquiendye cwita'na cantyena jo nnom nqueⁿ na wacatyeeⁿ tio. Cwila't'maaⁿ'ndyena jom na tjaa yuu cantycwii na wanoom'm. Cwitsa̱'na corona ‘naaⁿna jo nnom tio. Cwiluena:
11. ‘U Ta Ty'o̱o̱ts'oomyâ na t'maⁿ cwiluiindyu', jeeⁿ matsona' na cwit'maaⁿ'ndyu'. ‘U tijoom cantycwii cantyja najndu'. ‘U sa' cha'tso na niom. Tuiina' nc'e na l'ue ts'om' ndo' ndim'aⁿna' nc'e ‘u.
| 
