1. Ángel na jnda̱ ‘om tjo̱o̱ⁿ'o̱ⁿ ntu ‘naaⁿ'aⁿ. Quia jo' nty'iaya cwii caxjuu na jnaⁿ tsjo̱'luee, tiooñê tsjoomnancue. Ndo' caxjuu'ñeeⁿ tquiaa Ty'o̱o̱ts'om ts'o̱w'aa nnoom cwentaa' cwii tsue' na tjaa yuu ntycwii na njoom.
2. Seicanaaⁿñê ‘ndyoo tsue'ñeeⁿ. Quia jo' jlui' ndioom jo' jo' cha'cwijom ndioom na cwicalui' ntom' t'maⁿ. Ndo' nc'e na jeeⁿ ‘aa ndioom'ñeeⁿ, seijaaⁿñena' tsjoomnancue hasta tatquioo' na manty'iaa' ñe'quioom'.
3. Naquii' ndioom'ñeeⁿ jnaⁿ'ndye jndye calcaa. Ty'entyjayo' nnom tsjoomnancue. To'ñoomyo' na wjeeyo' cha'na w'ii catsjo̱.
4. Ndo' Ty'o̱o̱ts'om tînquiaaⁿ na wanaaⁿ na nlcwa'yo' jnda̱ na niom nnom tsjoomnancue, meiⁿ tsco jnda̱a̱, meiⁿ tsco n'oom. Macanda̱ wanaaⁿ na nnta'wi'yo' joo nn'aⁿ na tîcañoom sa̱yo ‘naaⁿ'aⁿ cantaana.
5. To'ñoomyo' ñ'oom na cha'waa ‘om chi' wanaaⁿ na nl'ayo' na nlquiina' naⁿ'ñeeⁿ cha'na maquiina' ts'aⁿ quia na tco' catsjo̱. Sa̱a̱ ticwanaaⁿ na nla'cwjeeyo' naⁿ'ñeeⁿ.
6. Ncuee'ñeeⁿ yocheⁿ na wi' cwitjoomna nl'uee'ndye cheⁿnquieena na cwjetona, sa̱a̱ xocaliuna chiuu ya nl'ana. Nnc'omna na queeⁿ n'omna na ñe'cwjena, sa̱a̱ xocaliuna chiuu ya na nncwjena.
7. Calcaa'ñeeⁿ matseijomna' jooyo' cha'cwijom catso na m'aⁿc'eeyo' na nnc'ooyo' ntia'. Nqueⁿyo' ñjom cha'cwijom corona na tuiina' s'om cajaⁿ ndo' nda̱a̱yo' matseijomna' cha'cwijom nnom ts'aⁿ.
8. Ndo' soonqueⁿyo' cha'cwijom soonqueⁿ yolcu, ndo' ndei'n'omyo' cha'cwijom ndei'n'om liom.
9. Tsuaayo' cha'cwijom ñ'eⁿ xjo tuiina'. Jeeⁿ c'uaa lquiiyo' cha'cwijom c'uaa ndyuee tornom quia na jndeii ‘oontyjaandye catso na cwi'ooyo' tia'.
10. Ndo' n'aaⁿ calcaa'ñeeⁿ matseijomna' cha'na n'aaⁿ caljo̱, ee mati jeeⁿ wjee ndaa xioomyo'. Ndo' cha'waa na ‘om chi' wanaaⁿ na nnta'yo' xioomyo' nn'aⁿ.
11. M'aaⁿ cwii ángel na matsa̱'ntjoom calcaa'ñeeⁿ. Jom tseixmaaⁿ na mach'eeⁿ cwenta tsue' na tjaa yuu ntycwii na njoom. Jom jñoom Abadón ñequio ñ'oom hebreo ndo' ñ'oom griego Apolión. Ma'mo̱ⁿ xueⁿ'eⁿ tsaⁿ na matseicwjee nn'aⁿ.
12. Jnda̱ teinom na tco'na' nty'iaya cwii nawi' na quia nntjoom nn'aⁿ. Sa̱a̱ canty'ia', ndicwaⁿ waa we nawi' na quia nncue'ntyjo̱.
13. Ángel na jnda̱ yom tjo̱o̱ⁿ'o̱ⁿ ntu ‘naaⁿ'aⁿ, quia jo' quii'ntaaⁿ ñequiee nqui nomts'om na tuiina' ñ'eⁿ s'om cajaⁿ na meiⁿntyjee'na' jo nnom Ty'o̱o̱ts'om, jndiiya na teic'uaa seineiⁿ.
14. Tso nnom ángel na jnda̱ yom na maleiñ'oom ntu:—Cja'tseicanaⁿ' joo ñequiee ángeles na chu'tyeⁿndye na m'aⁿ joo jndaa t'maⁿ Eufrates.
15. Quia jo' tjatseicanaaⁿ'aⁿ ángeles'ñeeⁿ na c'oola'cwjeena nn'aⁿ cha'waa tsjoomnancue. Manndyoo' cha'na xcwe nn'aⁿ tsjoomnancue nla'cwjeena. Ee ángeles'ñeeⁿ majndaa' na m'aⁿc'eendyena na nl'ana ts'iaaⁿ'ñeeⁿ chuwaa, ndo' chi'waa, ndo' xueewaa, ndo' horawaa.
16. Ndo' jndiiya cantyja ‘naaⁿ sondaro ‘naaⁿna, na ntyjondye catso, tue'ntyjo̱ cha'na ntquiuu meiⁿ ndii' na nqui nqui meiⁿndyena.
17. Luaa' waa na tco'na' no̱o̱ⁿ na nty'iaya catso'ñeeⁿ ñequio sondaro na ntyjondye jooyo'. Naⁿ'ñeeⁿ cwee'na ncjo candyaana na mawañoom'na' joona na tilquiee'ndyena. Ndo' ncjo'ñeeⁿ chona' colo wee ñequio colo tsa̱, ñequio colo cajaⁿ. Ndo' matseijomna' nqueⁿ catso'ñeeⁿ cha'na nqueⁿ liom. Ndo' naquii' ndyueeyo' cwicalui' chom ñequio ndioom ñequio sufra̱.
18. Ñequio ndyee nnom nawi'ñeeⁿ na jlui' quii' ndyueeyo', chom ñequio ndioom ñequio sufra̱, jo' na tja̱ manndyoo' xcwe nn'aⁿ na m'aⁿ tsjoomnancue.
19. Catso'ñeeⁿ we ndii' waa na jnda̱yo' na cwita'wi'yo' nn'aⁿ, naquii' ndyueeyo' ndo' n'aaⁿyo'. Ee yuu na tjacantycwii n'aaⁿyo' jo' ntyjoo nqueⁿ canduu. Ndo' canduu'ñeeⁿ nioom tyotquiiyo' nn'aⁿ.
20. Sa̱a̱ nn'aⁿ na ‘ndiina' na tîcwje ñequio nawi'meiⁿ', tîcalcwe' n'omna. Tîca'ndyena natia na cwil'ana, meiⁿ tîc'oomeintyjee'na na cwila't'maaⁿ'ndyena naⁿjndii ñequio ‘naⁿ na cwe' nn'aⁿ nl'a na tuii ñ'eⁿ s'om cajaⁿ, ñ'eⁿ s'om xuee, ñ'eⁿ s'om wee, ñ'eⁿ ljo̱', ndo' ñ'eⁿ n'oom. ‘Naⁿmeiⁿ' tilei'canty'iaana', meiⁿ na nndyena', nmeiⁿ na nnc'ooca'na'.
21. Ndo' tîcalcwe' n'omna na cwila'cwjeena nc'iaana. Meiⁿ tîca'ndyena cantyja na cwila'calua'ndyena, meiⁿ cantyja na cwe' cwim'aⁿyana ñ'eⁿ nc'iaana, meiⁿ cantyja na cwinty'ueena ‘naⁿ.
| 
