1. ‘O nn'aⁿya na cwila'yu'yo' ñ'eⁿ Cristo, manquiu'yo' chiuu waa na matsa̱'ntjom ljeii na tquiaa Ty'o̱o̱ts'om nnom Moisés, na juu ljeii'ñeeⁿ taxoqueⁿtina' xjeⁿ ts'aⁿ na jnda̱ tue'.
2. Ee matseijomna' cha'xjeⁿ cwii yuscu na jnda̱ toco, matseityeⁿ ljeii jom ñequio saaⁿ'aⁿ yocheⁿ na wando'. Sa̱a̱ xeⁿ nncue' quia jo' cwindyaañê l'o̱ ljeii ‘naaⁿna.
3. Jo' chii xeⁿ ndicwaⁿ wando' saaⁿ'aⁿ ndo' nnc'o̱o̱ⁿ ‘ndyoo cwiicheⁿ tsaⁿs'a quia jo' matsona' na jom yuscu na cwe' m'aaⁿya ñ'eⁿ tsaⁿs'a'ñeeⁿ. Sa̱a̱ xeⁿ na jnda̱ tue' saaⁿ'aⁿ quia jo' wanaaⁿ na nncoconnaaⁿ'aⁿ ndo' xocatsona' na cwe' m'aaⁿyaaⁿ ñ'eⁿ tsaⁿ'ñeeⁿ.
4. Jo' chii ‘o nn'aⁿya na cwila'yu'yo', mati ‘o cwiluiindyo' l'oo cantyja ‘naaⁿ' ljeii na matsa̱'ntjomna' na tqueⁿ Moisés nc'e ts'oom'naaⁿ ty'ioom nn'aⁿ Cristo, cha na nnda̱a̱ nla'xmaⁿ'yo' cwentaa' cwiicheⁿ, manqueⁿ na wando'xcoom jnda̱ na tueeⁿ'eⁿ. Maluaa' waa cha nnda̱a̱ nleil'uee'ñê ‘o.
5. Ee quia na ñet'o̱o̱ⁿya xjeⁿ ‘naaⁿ' na teincoondyo̱ na nn'aⁿ jnaⁿ jaa, ljeii'ñeeⁿ tyotseilcwii'ñena' nda̱a̱ya na cwil'aaya cha'tso nnom natia na queeⁿ ts'om seii'a, jo' na tjachuuna' jaa na nntsuundyo̱.
6. Sa̱a̱ je' je' jnda̱ tja̱a̱ya cantyja ‘naaⁿ' ljeii na ñetqueⁿna' xjeⁿ jaa, jo' chii je' mam'aⁿcandyaandyo̱ na nndya̱'ntjo̱o̱ⁿya nnom Ty'o̱o̱ts'om nc'e cwitando̱o̱'xco̱o̱ya na m'aaⁿya nacje ‘naaⁿ' Espíritu, tachii cantyja ‘naaⁿ' ñ'oom tquiee na ñesa̱'ntjom. Jnaⁿ ñe'queⁿna' xjeⁿ ‘naaⁿ'na' ja
7. Quia jo' ¿chiuu nl'uuyo̱o̱ya je' cantyja ‘naaⁿ ljeii na tqueⁿ Moisés, aa jnaⁿ matseixmaⁿna'? Meiⁿchjoo nchii jo' ee xeⁿ nchii juuna', xocatsei'no̱ⁿ'a na ticatsa̱'ntjomna' na matseiqueeⁿ ts'o̱o̱ⁿ ‘naaⁿ' cwiicheⁿ ts'aⁿ hasta quia ljeiya na tso ljeii'ñeeⁿ: “Tintseiqueeⁿ ts'om' ‘naaⁿ' x'ia'”.
8. Sa̱a̱ juu ljeii'ñeeⁿ teil'uee'ñe jnaⁿ na s'aana' na tyotseiqueeⁿna' ts'o̱o̱ⁿ jndye nnom natia. Ee yuu na ticuaa ljeii'ñeeⁿ m'aaⁿ ts'ooñe jnaⁿ.
9. Tyowaa xjeⁿ na tîcaljeii chiuu matsa̱'ntjom ljeii na tqueⁿ Moisés, xjeⁿ'ñeeⁿ tîcatsei'ndaa'na' ntyjiiya na ñeseitjo̱o̱ndyo̱ nnomna', sa̱a̱ quia na sei'no̱ⁿ'a chiuu matsa̱'ntjomna', quia jo' ljeiya na wando' jnaⁿ, na wjaañ'oomna' ja na ntsuundyo̱.
10. Ndo' juu ljeii'ñeeⁿ na ts'iaaⁿ'na' na nñequiaana' na nndaya na ticantycwii na wando̱'a, teijndaa'yuu na nntsuundyo̱ cantyja ‘naaⁿ'na'.
11. Ee juu jnaⁿ teil'uee'ñena' ljeii'ñeeⁿ na tquiu'nn'aⁿna' ja ndo' tqueⁿna' na nntsuundyo̱.
12. Jo' chii nquii ljeii'ñeeⁿ lju' cwiluiiñena' cantyja ‘naaⁿ'na', ndo' ñ'oom na matsa̱'ntjom cwiluiiñena' na lju', mati xcwe ndo' jeeⁿ yana'.
13. Quia jo' ¿aa ñe'catsona' na ljeii na cwiluiiñe na yana' tjañ'oomna' ja na nntsuundyo̱? Meiⁿchjoo nchii ljo'. Juu jnaⁿ na waana' quii' ts'o̱o̱ⁿ, seijndaa'ñena' na nntsuundyo̱ ndo' t'mo̱ⁿ jndaa'ñena' na jnaⁿ jo', juu jo' teil'uee'ñena' cwii na jeeⁿ ya ndo' laa'ti waa na juu ñ'oom na matsa̱'ntjomna' t'mo̱ⁿna' na jeeⁿ tia tseixmaⁿ jnaⁿ.
14. Manquiuuya na tquiaa Espíritu ljeii na matsa̱'ntjomna'. Sa̱a̱ nc'e na ts'aⁿ ja matseijomna' cantyja ‘naⁿya na cwiluiindyo̱ ts'aⁿ na seijnda jnaⁿ, na tyeⁿ mandi'ntjo̱ⁿya nnomna'.
15. Tileicatsei'no̱ⁿ'a chiuu na matjo̱ⁿya na tileicats'aaya ljo' na ñe'cats'aa, yacheⁿ mats'aayo̱ya majo'to ljo' na jeeⁿ jndo̱ya.
16. Sa̱a̱ quia na mats'aa yuu na tiñe'cats'aa, matsei'no̱ⁿ'a na jeeⁿ ya juu ljeii na matsa̱'ntjomna'.
17. Ndo' na ljo', ma'mo̱ⁿna' na nchii nnco̱ mats'aa. Juu jnaⁿ na m'aaⁿ naquii' ts'o̱o̱ⁿ mach'eena' na ljo'.
18. Ndo' ntyjiiya nc'e na ts'aⁿ ja, tjaa'naⁿ cwii na matseixmaⁿya na nts'aa yuu na ya. L'ue ts'o̱o̱ⁿ na nnts'aa yuu na ya sa̱a̱ leicanda̱a̱ nnts'aa.
19. Juu na ya na ñe'cats'aa, ticats'aa jo', ñequii'cheⁿ natia na tiñe'cats'aa, juu jo' mats'aa.
20. Quia jo' xeⁿ juu na tiñe'cats'aa mats'aa, nchii mannco̱tya̱ mats'aa jo'. Juu jnaⁿ na m'aaⁿ quii' ts'o̱o̱ⁿ, juuna' mach'eena' na ljo'.
21. Jo' chii luaa waa na maljeiya cantyja ‘naⁿya. Quia na matseijndo̱ na nnts'aa yuu na ya na l'ue ts'o̱o̱ⁿ, yacheⁿ maljeiya na m'aaⁿ natia naquii' ts'o̱o̱ⁿ.
22. Ee nnco̱ jeeⁿ neiⁿncoo' ntyjii ljeii ‘naaⁿ' Ty'o̱o̱ts'om na tquiaaⁿ nnom Moisés,
23. sa̱a̱ maqua̱ⁿ cwenta naquii' seii'a m'aaⁿ cwii na matseiweñe nacjoo' juu na m'aaⁿ' ts'o̱o̱ⁿ na ma'mo̱ⁿna' na cats'aa, majuu jnaⁿ na matsa̱'ntjomna' seii'a, na maleiñ'oomna' ja pra̱so.
24. Jeeⁿ ndya' nty'iaa'ndyo̱. ¿'Ñeeⁿ nnda̱a̱ nntseicandyaañe ja ñequio seii'a na wjaañ'oomna' ja na nntsuundyo̱?
25. Jeeⁿ ndya' quianl'uaa' Ty'o̱o̱ts'om na macanda̱ jom nnda̱a̱ nncwji'n'maaⁿñê ja nc'e Taya Jesucristo. Je' je' matsei'no̱ⁿ'a na tseixmaⁿya na cju'ndyo̱ cja̱ jo nnom ljeii ‘naaⁿ' Ty'o̱o̱ts'om na matsa̱'ntjomna'. Sa̱a̱ cantyja ‘naaⁿ' na ts'aⁿ jnaⁿ ja ndicwaⁿ m'aaⁿya nacje ‘naaⁿ' jnaⁿ.
| 
