ܐ. ולות משׁה אמר מיכאל סרכן חכמתא ביומא שׁביעאה בירחא סק לקדם ייי אנת ואהרן נדב ואביהוא ושׁובעין מסבי ישׁראל ותסגדון מרחיק
ܒ. ויתקרב משׁה בלחודוי קדם ייי והינון לא יתקרבון ועמא לא יסקון עימיה
ܓ. ואתא משׁה ואישׁתעי לעמא ית כל פיתגמיא דייי וית כל דיניא ואתיב כל עמא קלא חד ואמרו כל דמליל ייי נעביד
ܕ. וכתב משׁה ית פיתגמיא דייי ואקדם בצפרא ובנא מדבחא בשׁיפולי טורא ותריסירי קמן לתריסירי שׁיבטיא דישׁראל
ܗ. ושׁדר בוכרי בני ישׁראל ארום עד ההיא שׁעתא הוות פולחנא בבוכריא דעד כדון לא איתעביד משׁכן זימנא ועד כדון לא איתייהבת כהונתא לאהרן ואסיקו עלוון וניכסת קודשׁין קדם ייי תורין
ܘ. ונסיב משׁה פלגות אדם ניכסא ושׁוי במזירקיא ופלגות אדם ניכסא דרק על מדבחא
ܙ. ונסיב סיפרא דקיימא דאורייתא וקרא קדם עמא ואמרו כל פיתגמיא דמליל ייי נעביד ונקביל
ܚ. ונסיב משׁה ית פלגות דמא דבמזירקיא ודרק על מדבחא לכפרא על עמא ואמר הא דין אדם קיימא דיגזר ייי עימכון על כל פיתגמיא האילין
ܛ. וסליק משׁה ואהרן נדב ואביהוא ושׁובעין מסבי ישׁראל
ܝ. וזקפו נדב ואביהוא ית עיניהון וחמון ית איקר אלקא דישׁראל ותחות אפיפורין אפיפודין דריגלוי דמייצע תחות כורסייה הי כעובד אבן ספירינון מידכר שׁיעבודא דשׁעבידו מצראי ית בני ישׁראל בטינא ובליבנין והוואן נשׁיא בטשׁן ית טינא עם גובריהון הות תמן ריבא מפנקתא מעברתא ואפילת ית עוברא ואתבטשׁ עם טינא נחת גבריאל ועבד מיניה לבינתא ואסקיה לשׁמי מרומא ואתקניה גלוגדק תחות אפיפורין דמרי עלמא זיויה הי כעובד אבן טבא והי כתקוף שׁפר שׁמיא כד הינון ברירין מן ענניא
ܝܐ. ולות נדב ואביהוא עולימיא שׁפיריא לא שׁדר מחתיה בההיא שׁעתא ברם איתנטרא להון ליום תמיניי לאשׁלמותא לאסערא עליהון וחמון ית איקר שׁכינתא דייי והוון הדן בקורבניהון דאתקבלו ברעוא הי כאכלין והי כשׁתיין
ܝܒ. ואמר ייי למשׁה סוק קדמי לטוורא והוו תמן ואיתן לך ית לוחי אבנא דבהון רמיז שׁאר פיתגמי אורייתא ושׁית מאה ותליסירי פיקודיא דכתבית לאלופיהון
ܝܓ. וקם משׁה ויהושׁע משׁומשׁניה וסליק משׁה לטורא דאיתגלי עלוי יקר שׁכינתא דייי
ܝܕ. ולחכימיא אמר אמתינו לנא הכא עד-זמן דנתוב לותכון והא אהרן וחור עימכון מן מאן דאית ליה עסק דינא יתקרב לוותכון
ܝܗ. וסליק משׁה לטורא וחפא ענן יקרא ית טורא
ܝܘ. ושׁרא איקר שׁכינתא דייי על טורא דסיני וחפהי ענן יקרא שׁיתא יומין וקרא למשׁה ביומא שׁביעאה מיגו עננא
ܝܙ. וחיזו זיו יקרא דייי הי כאשׁא בערא וזיקוקי אישׁא אכלא אישׁא והוון חמן ותמהין בני ישׁראל
ܝܚ. ואעאל משׁה בגו עננא וסליק לטוורא והוה משׁה בטוורא אליף פיתגמי אורייתא מן פום קודשׁא יהי שׁמיה משׁבח ארבעין יממין וארבעין לילוון
| 
