ܐ. ואמר ייי לאברם איזל לך מארעך אתפרשׁ מן ילדותך פוק מבית אבוך זיל לארעא דאחזינך
ܒ. ואעבדינך לעם רב ואיבריכינך וארבי שׁמך ותהי מברך
ܓ. ואבריך ית כהניא דפרסין ידיהון בצלו ומברכין ית בנך ובלעם דמלטט יתהום אילוט ויקטלוניה לפיתגם דחרב ויתברכון בך כל זרעית ארעא
ܕ. ואזל אברם היכמה דמליל ליה ייי ואזל עימיה לוט ואברם בר שׁובעין וחמשׁ שׁנין במיפיקיה מחרן
ܗ. ודבר אברם ית שׁרי אינתתיה וית לוט בר אחוי וית כל קיניינהום דיקנו וית נפשׁתא דיגיירו בחרן ונפקו למיזל לארעא דכנען ואתו לארעא דכנען
ܘ. ועבר אברם בארעא עד אתר שׁכם עד מישׁר דהוה מיירי וכנענאי בכין הוו בארעא דעד כדון לא מטא זימנא דבני ישׁראל למירתא למירתה
ܙ. ואיתגלי ייי לאברם ואמר לבנך אתין ית ארעא הדא ובנא תמן מדבחא קדם ייי דאיתגלי ליה
ܚ. ואיסתלק מתמן לטורא דממדנח לביתאל ופרסיה משׁכניה ביתאל מן מערבא ועי ממדינחא ובנא תמן מדבחא קדם ייי וצלי בשׁמא דייי
ܛ. ונטל אברם אזיל ונטיל לדרומא
ܝ. והוה כפנא בארעא ונחת אברם למצרים לאיתותבא תמן ארום תקיף כפנא בארעא
ܝܐ. והוה כמא דקריב למיעל לתחום מצרים ומטו לנהרא וגליאו בשׁריהון למיעבר ואמר אברם לשׁרי אינתתיה הא עד כדון לא איסתכלית בבישׁריך וכדון ידעית ארום אינתתא שׁפירת חזו אנת
ܝܒ. ויהי ארום יסתכלון ביך מצראי ויחמון ית שׁופריך ויימרון אינתתיה דא ויקטלון יתי ויתיך יקיימון
ܝܓ. אימרי בבעו דאחתי אנת בגין דייטב לי בגיניך ותתקיים נפשׁי אמטולתיך
ܝܕ. והוה כדי על אברם למצרים וחמון מצראי ית אינתתא ארום שׁפירא היא לחדא
ܝܗ. וחמון יתה רברבי פרעה ושׁבחו יתה לפרעה ואידברת אינתתא לבית מלכותא דפרעה
ܝܘ. ולאברם אוטב פרעה בגינה והוו ליה מדיליה עאן ותורין וחמרין ועבדין ואמהן ואתנין וגמלין
ܝܙ. וגרי מימר דייי בפרעה מכתשׁין רברבין וית אינשׁ ביתיה על עיסק שׁרי איתת אברם
ܝܚ. וקרא פרעה לאברם ואמר מה דא עבדת לי למא לא חוית לי ארום אינתתך היא
ܝܛ. למא אמרת אחתי היא ודברית יתה לי לאינתו ומן יד איתגריאת בי מכתשׁא ולא קריבית לותה וכדון הא אינתתך דבר ואיזל
ܟ. ופקיד עילוי פרעה גוברין ואלויאו יתיה וית אינתתיה וית כל דיליה
| 
