Leviticus, Chapter 9 ܛ

ܐ. והוה ביומא תמינאה לרבות אהרן ובנוי ויום תמינאה לאשׁלמוותא הוא יומא קדמאה לירחא דניסן אקים משׁה ית משׁכנא ולא פרקיה ולא שׁמישׁ תוב על גבי מדבחא בכן קרא משׁה לאהרן ולבנוי ולסבי סנהדרי ישׁראל    ܒ. ואמר לאהרן סב לך עיגל בר תורי לחטאתא מטול דלא ישׁתעי עלך סטנא לישׁן תליתאי על עיסק עיגלא דעבדת בחורב וברם דכר לעלתא תיסב מן -בגלל די ידכר לך זכותא דיצחק דכפתיה אבוי כדיכרא בטוור פולחנא תריהון יהון שׁלמין וקריב קדם ייי    ܓ. ועם בני ישׁראל תמליל למימר סבו ברם אתון צפיר בר עיזי מטול דסטנא מימתיל ביה מטול דלא ישׁתעי עליכון לישׁן תליתאיי על עיסק צפיר בר עיזי דנכיסו שׁבטוי דיעקב ורמייו יתיה ועיבד יתיה לחטאתא ועיגלא מטול דאשׁתעבדתון לעיגלא ואימר בר שׁתיה מטול דידכר לכון זכותא דיצחק דכפתיה אבוי הי כאימרא תריהון שׁלמין לעלתא    ܕ. ותור ואימר לניכסת קודשׁיא לדבחא קדם ייי מן -בגלל דיתרעי בכון ומנחתא פתיכא במשׁח זיתא ארום יומא דין איקר שׁכינתא דייי מתגלי לכון    ܗ. ואזדרזון אהרן ובנוי וכל בני ישׁראל ונסיבו ית מה דפקיד משׁה והייתיו לקדם משׁכן זימנא וקריבו כל כנישׁתא וקמון בלב שׁלים קדם ייי    ܘ. ואמר משׁה דין פיתגמא דתעבדון אעברו ית יצרא בישׁא מן ליבכון ומן -יד איתגלי לכון איקר שׁכינתא דייי    ܙ. והוה כיוון דחמא אהרן מדבחא בקרנוי מידמי לעיגלא איסתפי למיקרב לגביה בכין אמר ליה משׁה אגיס מנדעך וקריב למדבחא ולא תיסתפי ועיבד ית חטאתך וית עלתך וכפר אמטולתך ואמטול עמא ועיבד ית קרבן עמא וכפר עליהון היכמא דפקיד ייי    ܚ. וקריב אהרן למדבחא בזריזותא ונכיס ית עיגלא דחטאתא דידיה    ܛ. וקריבו בני אהרן ית אדמא לוותיה וטבל אדבעיה באדם תורא ויהב על קרנת מדבחא וית שׁאר אדמא אריק ליסודא דמדבחא וקדשׁיה למכפרא עלוי    ܝ. וית תריב וית כוליין וית חצרא מן כבדא מן חטאתא אסיק למדבחא היכמא דפקיד ייי ית משׁה    ܝܐ. וית בשׁרא וית מושׁכיה אוקיד בנורא מברא למשׁריתא    ܝܒ. ונכס ית עלתא ואקריבו בני אהרן ליה ית אדמא ודרקיה על מדבחא חזור-חזור    ܝܓ. וית עלתא אקריבו יתה לפסגהא וית רישׁא ואסיק על מדבחא    ܝܕ. וחליל ית בני גווא וית ריגלייא ואסיק על עלתא למדבחא    ܝܗ. וקריב ית קרבן עמא ונסב ית צפירא דחטאתא די לעמא ונכסיה וכפר באדמיה דצפירא היכמא דכפר באדם עיגלא דחטאתא דיליה דקריב בשׁירויא    ܝܘ. וקריב ית עלתא ועבדא ועבדה כהילכת עלתא דקריב אמטולתיה    ܝܙ. וקריב ית מנחתא ומלא ידיה מינה ונסיב מיניה צריד אדכרתא ואסיק על מדבחא בר מן עלת צפרא    ܝܚ. ונכיס ית תורא וית דיכרא ניכסת קודשׁיא די לעמא ואקריבו בני אהרן ית אדמא ליה ודרקיה על מדבחא חזור-חזור    ܝܛ. וית תרביא מן תורא ומן דיכרא אליתא ודחפי בני גווא וכולייתא וחצר כבדא    ܟ. ושׁוייו ית תרביא על חדוותא ואסיק תרביא למדבחא    ܟܐ. וית חדוותא וית שׁקא דימינא ארים אהרן ארמא קדם ייי היכמא דפקיד ייי ית משׁה    ܟܒ. ופרס אהרן ית ידוי לקבל עמא ובריכינון ונחת מן מדבחא בחדוא מן דפסק למעבד חטאתא ועלתא ונכסת קודשׁיא    ܟܓ. וכיוון דאיתעבידו קורבניא ולא איתגליית שׁכינתא הוה אהרן מיבהית ואמר למשׁה דילמא לא איתרעי מימרא דייי בעובדי ידיי בכן עלו משׁה ואהרן למשׁכנא זימנא וצלו עמא בית ישׁראל ונפקו ובריכו ית עמא ואמר יקבל מימר דייי ברעוא ית קורבניכון וישׁרי וישׁבוק על חוביכון ומן -יד איתגלי איקר שׁכינתא דייי לכל עמא    ܟܕ. ונפקת אישׁתא מן -קדם ייי ואכלת על גבי מדבחא ית עליא וית תרביא וחמון כל עמא ואודון ואתרכינו בצלו על-אנפיהון