א. ויהי המלך שלמה מלך על כל ישראל:
ב. ואלה השרים אשר לו עזריהו בן צדוק הכהן:
ג. אליחרף ואחיה בני שישא ספרים יהושפט בן אחילוד המזכיר:
ד. ובניהו בן יהוידע על הצבא וצדוק ואביתר כהנים:
ה. ועזריהו בן נתן על הנצבים וזבוד בן נתן כהן רעה המלך:
ו. ואחישר על הבית ואדנירם בן עבדא על המס:
ז. ולשלמה שנים עשר נצבים על כל ישראל וכלכלו את המלך ואת ביתו חדש בשנה יהיה על אחד לכלכל:
ח. ואלה שמותם בן חור בהר אפרים:
ט. בן דקר במקץ ובשעלבים ובית שמש ואילון בית חנן:
י. בן חסד בארבות לו שכה וכל ארץ חפר:
יא. בן אבינדב כל נפת דאר טפת בת שלמה היתה לו לאשה:
יב. בענא בן אחילוד תענך ומגדו וכל בית שאן אשר אצל צרתנה מתחת ליזרעאל מבית שאן עד אבל מחולה עד מעבר ליקמעם:
יג. בן גבר ברמת גלעד לו חות יאיר בן מנשה אשר בגלעד לו חבל ארגב אשר בבשן ששים ערים גדלות חומה ובריח נחשת:
יד. אחינדב בן עדא מחנימה:
טו. אחימעץ בנפתלי גם הוא לקח את בשמת בת שלמה לאשה:
טז. בענא בן חושי באשר ובעלות:
יז. יהושפט בן פרוח ביששכר:
יט. גבר בן ארי בארץ גלעד ארץ סיחון מלך האמרי ועג מלך הבשן ונציב אחד אשר בארץ:
כ. יהודה וישראל רבים כחול אשר על הים לרב אכלים ושתים ושמחים:
כא. ושלמה היה מושל בכל הממלכות מן הנהר ארץ פלשתים ועד גבול מצרים מגשים מנחה ועבדים את שלמה כל ימי חייו:
כב. ויהי לחם שלמה ליום אחד שלשים כר סלת וששים כר קמח:
כג. עשרה בקר בראים ועשרים בקר רעי ומאה צאן לבד מאיל וצבי ויחמור וברברים אבוסים:
כד. כי הוא רדה בכל עבר הנהר מתפסח ועד עזה בכל מלכי עבר הנהר ושלום היה לו מכל עבריו מסביב:
כה. וישב יהודה וישראל לבטח איש תחת גפנו ותחת תאנתו מדן ועד באר שבע כל ימי שלמה:
כו. ויהי לשלמה ארבעים אלף ארות סוסים למרכבו ושנים עשר אלף פרשים:
כז. וכלכלו הנצבים האלה את המלך שלמה ואת כל הקרב אל שלחן המלך שלמה איש חדשו לא יעדרו דבר:
כח. והשערים והתבן לסוסים ולרכש יבאו אל המקום אשר יהיה שם איש כמשפטו:
כט. ויתן אלהים חכמה לשלמה ותבונה הרבה מאד ורחב לב כחול אשר על שפת הים:
ל. ותרב חכמת שלמה מחכמת כל בני קדם ומכל חכמת מצרים:
לא. ויחכם מכל האדם מאיתן האזרחי והימן וכלכל ודרדע בני מחול ויהי שמו בכל הגוים סביב:
לב. וידבר שלשת אלפים משל ויהי שירו חמשה ואלף:
לג. וידבר על העצים מן הארז אשר בלבנון ועד האזוב אשר יצא בקיר וידבר על הבהמה ועל העוף ועל הרמש ועל הדגים:
לד. ויבאו מכל העמים לשמע את חכמת שלמה מאת כל מלכי הארץ אשר שמעו את חכמתו:
| 
