א. אנכי הגפן האמתית ואבי הוא הכרם:
ב. כל שריג בי אשר איננו עשה פרי יסירנו ואשר יעשה פרי יטהרנו להרבות את פריו:
ג. אתם כעת מטהרים בעבור דברי אשר דברתי אליכם:
ד. עמדו בי ואני בכם כאשר השריג בל יעשה פרי מאליו אם לא יעמד בגפן כן גם אתם אם לא תעמדו בי:
ה. אנכי הוא הגפן ואתם השריגים העמד בי ואני בו הוא יעשה פרי לרב כי בלעדי לא תוכלון עשות מאומה:
ו. איש אשר לא יעמד בי השלך כשריג החוצה וייבש וילקטום וישליכום אל תוך האש והיה לבער:
ז. והיה אם תעמדו בי ודברי יהיו בכם ככל חפצכם תשאלו ויעשה לכם:
ח. בזאת נכבד אבי בעשותכם פרי לרב והייתם לי לתלמידים:
ט. כאשר אהבני אבי אהבתי אתכם גם אני ואתם עמדו באהבתי:
י. אם תשמרו את מצותי תעמדו באהבתי כאשר שמרתי גם אני את מצות אבי ועמדתי באהבתו:
יא. את אלה דברתי אליכם בעבור תהיה שמחתי בכם ותמלא שמחתכם:
יב. הנה זאת מצותי כי תאהבון איש את אחיו כאשר אהבתיכם:
יג. אין לאיש אהבה יתרה מתתו את נפשו בעד ידידיו:
יד. ואתם ידידי אתם אם תעשו את אשר אני מצוה אתכם:
טו. לא אקרא לכם עוד עבדים כי העבד איננו ידע את אשר יעשה אדניו כי אם אמרתי ידידי אתם כי כל אשר שמעתי מאת אבי הודעתי אתכם:
טז. לא אתם בחרתם בי כי אם אנכי בחרתי בכם והפקדתי אתכם ללכת ולעשות פרי ופריכם יקום והיה כל אשר תשאלו מאבי בשמי יתן לכם:
יז. את אלה אני מצוה אתכם למען תאהבון איש את אחיו:
יח. אם העולם שנא אתכם דעו כי אתי שנא ראשונה:
יט. אלו מן העולם הייתם כי אז אהב העולם את אשר לו ויען כי אינכם מן העולם כי אם בחרתי אתכם מתוך העולם לכן העולם ישנא אתכם:
כ. זכרו את דברי אשר דברתי אליכם העבד איננו גדול מאדניו אם רדפו אתי גם אתכם ירדפו אם שמרו את דברי גם את דברכם ישמרו:
כא. אבל כל זאת יעשו לכם בעבור שמי כי לא ידעו את שלחי:
כב. לולא באתי ודברתי אליהם לא היה בהם חטא ועתה לא יוכלון להתנצל על חטאתם:
כג. השנא אתי ישנא גם את אבי:
כד. לולא עשיתי בתוכם את המעשים אשר איש זולתי לא עשה לא היה בהם חטא ועתה ראו וישנאו גם אתי גם את אבי:
כה. אך למלאת דבר הכתוב בתורתם שנאת חנם שנאוני:
כו. ובבוא הפרקליט אשר אשלחנו לכם מאת אבי רוח האמת היוצא מאת אבי הוא יעיד עלי:
כז. וגם אתם תעידו כי מראש הייתם עמדי:
| 
